1 Crónicas 28:1-21
28 Rü nüma ga Dabí rü Yerucharéü̃gu nanangutaque̱xexẽxẽ ga guxü̃ma ga Iraéanearü ãẽ̱xgacügü. Rü yematanüwa nayexma ga norü ãẽ̱xgacügü ga yema 12 ga Iraétücumügümaxã icua̱xgüxü̃, rü ãẽ̱xgacügü ga Dabíarü churaragümaxã icua̱xgüxü̃, rü yema churaragüarü comaü̃dáü̃tegü rü capitáü̃gü, rü yema ãẽ̱xgacügü ga Dabíarü rü nanegüarü naanegümaxã rü naxü̃nagümaxã icua̱xgüxü̃, rü guxü̃ma ga yema togü ga ãẽ̱xgacügü ga itaxégatanücüüxü̃ ga Iraéanewa, rü guxü̃ma ga yema churaragü ga tama muü̃wa̱xegüxü̃.
2 Rü yexguma marü yexma nangutaque̱xegu, rü nüma ga Dabí rü inachi rü ñanagürü: —Pa Chomücügü rü Pa Chorü Duü̃xü̃güx ¡rü choxü̃́ iperüxĩnüe! Rü choma rü choxü̃́ nangúchaü̃ nax chanaxüxü̃ ya Tupanapata nax ngẽxma naxü̃́xü̃ca̱x i ngẽma baú i Tupanaarü mugü nagu nucuxü̃ nax ngéma nangẽxmaxü̃ca̱x ya Tupana. Rü yemaca̱x ga choma rü chananutaque̱xe ga yemaxü̃gü nax naxüxü̃ca̱x ya Tupanapata.
3 Natürü nüma ya Tupana rü ñanagürü choxü̃: “Rü taxũtáma cuma nixĩ i cunaxüxü̃ ya yima chopata ya taxü̃ne. Erü cuma rü daigu cumáeta rü poraãcüma nagü icunaba”, ñanagürü choxü̃.
4 Natürü nüma ya Cori ya Iraétanüxü̃arü Tupana rü chautanüxü̃tanüwa choxü̃ nayaxu nax guxü̃guma Iraéanearü ãẽ̱xgacüxü̃ choxü̃ yaxĩxẽẽxü̃ca̱x. Rü yemaca̱x nüxü̃ naxuneta ga Yudátanüxü̃ nax yematücumüwa ãẽ̱xgacügü íchoxü̃tanücüüxü̃. Rü yema Yudátücumüwa nixĩ ga nüxü̃ naxunetaxü̃ ga chautanüxü̃tücumü, rü yema chauenexẽgütanüwa rü choxü̃ naxuneta nax guxü̃ma i Iraéanecüã̱xmaxã ichacuáxü̃ca̱x.
5 Rü ñu̱xma rü namu i chaunegü ya Tupana choxna mugüxü̃, rü ngẽma chaunegütanüwa rü Tupana nüxü̃ naxuneta ya chaune ya Charomóü̃ nax nüma chauchicüxü ãẽ̱xgacü yixĩxü̃ca̱x i Iraéanewa.
6 Rü nüma ya Cori ya Tupana rü choxü̃ ñanagürü: “Yimá cune ya Charomóü̃ tá nixĩ ya yimá naxücü ya yima chopata ya taxü̃ne rü norü ĩã̱xgü. Erü choma rü chanayaxu nax chaune yixĩxü̃ca̱x, rü choma rü tá nanatü chixĩ.
7 Rü choma rü tá guxü̃gutáma nüxü̃ charüngü̃xẽẽxü̃ nax ãẽ̱xgacüecha yixĩxü̃ca̱x i ngẽxguma tá ñu̱xmarüxü̃ naga naxĩnüechagu i ngẽma chorü mugü rü chorü ucu̱xẽgü”, ñanagürü choxü̃ ya Tupana —ñanagürü ga Dabí.
8 Rü yexguma ga nüma ga Dabí rü nane ga Charumóü̃ca̱x nadauegu rü ñanagürü nüxü̃: —Rü nua nape̱xewa i ñaa ãẽ̱xgacügü i Iraéanecüã̱xgü i Cori ya Tupanaarü duü̃xü̃gü ixĩgüxü̃, rü nape̱xewa ya tórü Tupana, rü cuxü̃ chaxucu̱xẽ nax mea nagu cumaxü̃xü̃ca̱x i guxü̃ma i norü mugü ya Cori ya Tupana nax ngẽmaãcü cuxme̱xwa nangẽxmaechaxü̃ca̱x i ñaa mexü̃ i naane, rü cunegüme̱xẽwa cunaxüexẽẽxü̃ca̱x nax nümagü guxü̃gutáma namaxã inacua̱xgüxü̃ca̱x.
9 Pa Chaunex, Pa Charomóü̃x ¡ẽcü naga naxĩnü ya chorü Tupana rü guxü̃ma i curü ngúchaü̃maxã rü curü ĩnü i mexü̃maxã naxü i ngẽma cuxü̃ namuxü̃! Erü nüma ya Cori ya Tupana rü nanangugü i ngẽma taãẽwa ngẽxmaxü̃ rü nüxü̃ nacua̱x i guxü̃ma i ngẽma nagu rüxĩnüxü̃. Rü ngẽxguma tá cuma naxca̱x cuda̱u̱xgu, rü nüma rü tá cuxü̃tawa nangẽxma. Natürü ngẽxguma nüxna quixũgachigu, rü nüma rü tá cuxü̃ ínata̱xüchi.
10 Rü ngẽmaca̱x rü name i poraãcü cuxuãxẽ erü nüma ya Cori rü cuxü̃ naxuneta nax cuma cunaxüxü̃ca̱x ya yima napata ya üünene. ¡Rü ẽcü pora naxü, rü naxü i ngẽma nüma cuxü̃ namuxü̃! —ñanagürü ga Dabí.
11 Rü yexguma nüma ga Dabí rü nane ga Charomóü̃na nanaxã ga napane ga guma Tupanapata ga taxü̃ne nax ñuxãcü tá naxüaxü̃. Rü yéma rü nango̱x nax ñuxãcü tá naxüaxü̃ ga norü ücuchica, rü napatagü, rü norü ngẽmaxü̃güarü nuchicaxü̃gü, rü norü ã̱ũ̱xchicaxü̃gü i daxũwa ngẽxmagüxü̃, rü norü ucapugü i aixepewa ügüxü̃, rü ngẽma naxmachixü̃ i Üünexüchixü̃.
12 Rü yexgumarüxü̃ ta nüxna nanaxãpane nax ñuxãcü tá naxüaxü̃ ga naã̱xtügü ga guma Tupanapata ga taxü̃ne, rü yema pegüchicagü ga nacüwawa yexmagüxü̃, rü yema ucapugü ga Tupanapata ga taxü̃nearü yemaxü̃gü ga tatanüxü̃ nagu nuxü̃, rü yema ucapugü ga duü̃xü̃gü norü ãmaregü Tupanaca̱x nagu yanuxü̃.
13 Rü yexgumarüxü̃ ta Charomóü̃maxã nüxü̃ nixu nax ñuxãcü tá naxügüãxü̃ ga Chacherdótegü rü Lebítanüxü̃ ga yexguma norü puracü naxügügu nax Tupanaxü̃ yacua̱xüü̃güxü̃. Rü namaxã nüxü̃ nixu nachiga ga guxü̃ma ga Tupanapata ga taxü̃nearü nawechigü ga namaxã tá Tupanapata ga taxü̃nearü puracü naxügüxü̃.
14 Rü yexgumarüxü̃ ta Charomóü̃na nanaxã ga yema úirugü rü diẽrumügü ga nagu mexü̃ nax yemawa naxügüã̱xü̃ca̱x ga guxü̃ma ga Tupanapata ga taxü̃nearü yemaxü̃gü ga úirunaxca̱x rü diẽrumünaxca̱x nax yemamaxã Tupanaxü̃ yacua̱xüü̃güxü̃ca̱x.
15 Rü nüxna nanaxã ga yema úiru ga nagu mexü̃ naxca̱x ga wüxichigü ga yema omügü ga úirunaxca̱x. Rü nüxna nanaxã ga yema diẽrumü ga nagu mexü̃ naxca̱x ga wüxichigü ga yema omügü ga diẽrumünaxca̱x.
16 Rü nüxna nanaxã ga yema úiru ga nagu mexü̃ naxca̱x ga wüxichigü ga yema mechagü ga paũ i üünexü̃ nagu nuxü̃. Rü nüxna nanaxã ga yema diẽrumü ga nagu mexü̃ naxca̱x ga wüxichigü ga yema mechagü ga diẽrumünaxca̱x.
17 Rü nüxna nanaxã ga yema úiru ga nagu mexü̃ naxca̱x ga yema choxchataü̃gü rü tacháũgü rü axepáü̃gü rü copugü ga úirunaxca̱x. Rü nüxna nanaxã ga yema diẽrumü ga nagu mexü̃ naxca̱x ga yema copugü ga diẽrumünaxca̱x.
18 Rü nüxna nanaxã ga yema úiruica ixĩxü̃ ga nagu mexü̃ naxca̱x ga yema pumarate̱xearü guruxü̃. Rü nüxna nanaxã ga yema úiru ga nagu mexü̃ naxca̱x ga yema Tupanaarü mugüchixü̃ataxü̃ ga nawa nayexmagüxü̃ ga yema taxre ga dauxü̃cüã̱xchicüna̱xãgü ga ixãxpe̱xatüxü̃.
19 Rü Dabí rü Charomóü̃xü̃ ñanagürü: —Rü guxü̃ma ga yema cumaxã nüxü̃ chixuxü̃ rü Tupana choxü̃ nüxü̃ nacua̱xẽxẽ, rü poperagu naxümatü nax yemaacü nüxü̃ chacuáxü̃ca̱x i ñuxãcü tá nax yixĩxü̃ ya napata rü norü ngẽmaxü̃gü —ñanagürü.
20 Rü nüma ga Dabí rü Charomóü̃xü̃ ñanagürü: —¡Ẽcü pora naxü rü cugü naporaxẽẽama rü naxü i ngẽma puracü! ¡Rü taxṹ i curümaãchixü̃! ¡Rü taxṹ i cumuü̃xü̃! Erü nüma ya Cori ya chorü Tupana rü nacuxü̃tagu. Rü nüma rü taxũtáma cuxna nixũgachi rü taxũtáma cuxü̃ ínata̱x ñu̱xmatáta nagu i ngẽma puracü nax cunaxüxü̃ ya yima Tupanapata ya taxü̃ne.
21 Rü ñaagü nixĩ i ngẽma chacherdótegü rü Lebítanüxü̃. Rü nüma rü ínamemaregü nax naxügüãxü̃ca̱x i Tupanapata ya taxü̃nearü puracü. Rü ngẽxgumarüxü̃ ta ínamemaregü i ngẽma puracütanüxü̃ i nüxü̃ icua̱xüchixü̃ nax ñuxãcü ta̱xacü naxügüxü̃. Rü ãẽ̱xgacügü rü guxü̃ma i duü̃xü̃gü rü ínamemaregü nax cuxü̃ nangü̃xẽẽgüxü̃ —ñanagürü.
