1 Crónicas 29:1-30
29 Rü yemawena ga ãẽ̱xgacü ga Dabí rü ñanagürü nüxü̃ ga yema duü̃xü̃gü ga yexma ngutaque̱xexü̃: —Rü daa chaune ya Charomóü̃ nixĩ ya Tupana nüxü̃ unetacü. Rü nüma rü nangextü̱xüxüchi, natürü i ngẽma puracü i tá naxüxü̃ rü nataxüchi, erü tama ãẽ̱xgacüpatamare naxü, natürü Cori ya Tupanapata ya taxü̃ne nixĩ ya naxüxü̃ne.
2 Rü yemaca̱x pora naxca̱x chaxü nax chananutaque̱xexü̃ i ngẽmaxü̃gü nax naxüaxü̃ca̱x ya yima Tupanapata ya taxü̃ne. Rü ngẽma chanutaque̱xexü̃ nixĩ i úirugü, rü diẽrumü, rü bróũche, rü fieru, rü mürapewagü. Rü ngẽxgumarüxü̃ ta chananutaque̱xe ya mucüma ya nutaxacügü ya imexẽchicü ya cornalina rü naguxü̃raxü̃cü rü naigü ya nutaxacügü ya imexẽchicü rü tatanücü ya meruü̃gü. Rü ngẽxgumarüxü̃ ta chananutaque̱xe ya mucüma ya nuta ya mármo ya ĩxtapü̱xruxü̃.
3 Rü naétüwa i ngẽma ngẽmaxü̃gü i marü chanutaque̱xexü̃ naxca̱x ya yima Tupanapata ya taxü̃ne rü nüxna chanaxã i ngẽma choxrüxüchi ixĩxü̃ i úirugü rü diẽrumü, erü poraãcü chanaxwa̱xe nax naxüxü̃ ya napata ya taxü̃ne ya chorü Tupana.
4 Rü ngẽmaca̱x 100,000 quíru nagúxü̃ i Ofícüã̱x i úiru, rü 230,000 quíru naguxü̃ i diẽrumü i marü memarexü̃ nixĩ i nüxna chaxãxü̃ nax ngẽmamaxã natügüãxü̃ca̱x i naxtapü̱xgü ya yima Tupanapata ya taxü̃ne.
5 Rü ngẽmaãcü marü nangẽxma i úiru rü diẽrumü nax ngẽmawa ngẽma puracütanüxü̃ naxügüxü̃ca̱x i naguxü̃raü̃xü̃ i meruü̃gü i Tupanapata ya taxü̃neca̱x ixĩxü̃. Rü ñu̱xmax ¿Rü texé tanaxwa̱xe nax tümaarü ngúchaü̃maxã itanaxüxü̃ i tümaarü ãmare naxca̱x ya Cori ya Tupana? —ñanagürü ga Dabí.
6 Rü yexguma ga yema wüxichigü ga papa, rü wüxichigü ga yema Iraétücumügüarü ãẽ̱xgacügü, rü yema ãẽ̱xgacügü ga churaragümaxã icua̱xgüxü̃, rü yema yatügü ga ãẽ̱xgacü ga Dabíarü puracümaxã icua̱xgüxü̃ rü norü ngúchaü̃maxã ãmare inaxãgü.
7 Rü yema norü ãmaregü ga Tupanapata ga taxü̃neca̱x inaxãgüxü̃ rü 165,000 quíru nagúxü̃ ga úiru nixĩ. Rü naétü ngĩxü̃ inaxãgü ga 10,000 tachinü ngĩgu̱xcü ga diẽru ga úirungixca̱x, rü 330,000 quíru nagúxü̃ ga diẽrumü, rü wixgutaa̱x 600,000 quíru nagúxü̃ ga bróũche, rü 3’300,000 quíru nagúxü̃ ga fieru.
8 Rü yema nüxü̃́ yexmaxü̃ ga nutaxacügü ga ngã̱xãẽruü̃gü rü guma rü ta inanana nüxna ga Yeié ga Guerchóü̃taxa ga Tupanapata ga taxü̃nearü diẽrumaxã icuácü.
9 Rü nüma ga duü̃xü̃gü rü nataãẽgü yerü norü ngúchaü̃maxã Cori ya Tupanana nanaxãmaregü ga norü yemaxü̃gü. Rü yexgumarüxü̃ ta rü nüma ga ãẽ̱xgacü ga Dabí rü poraãcü nataãẽxü̃chi.
10 Rü yexguma ga nüma ga Dabí rü Cori ya Tupanaxü̃ nicua̱xüxü̃ nape̱xewa ga guxü̃ma ga yema duü̃xü̃gü ga yexma ngutaque̱xexü̃ rü ñanagürü: —Pa Cori ya Torü O̱xi ga Iraéarü Tupanax, rü guxü̃gutáma cuxü̃ ticua̱xüü̃gü.
11 Rü cumax, Pa Corix, rü guxü̃étüwa cungexma, rü cuxicatama cupora rü cuxüüne, rü namaxã icucua̱x i guxü̃ma, rü guxü̃ma i ãẽ̱xgacügüétüwa cungexma. Erü guxü̃ma i daxũguxü̃ i naanewa rü ñoma i naanewa ngẽxmagüxü̃ rü cuxrü nixĩgü. Rü cuxrügü ta nixĩ i guxü̃ma i naanegü, erü guxü̃étüwa cungexma.
12 Rü cuwa nixĩ i ne naxĩxü̃ i guxü̃ma i mexü̃gü rü cua̱xüü̃gü. Rü cuma nixĩ i namaxã icucuáxü̃ i guxü̃ma. Rü cuma nixĩ i toxna cunaxãxü̃ i pora. Rü cuxme̱xwa nangẽxma nax toxü̃ cutaxẽẽxü̃ rü toxü̃ cuporaexẽẽxü̃ ya guxãma.
13 Rü ngẽmaca̱x, Pa Torü Tupanax, i ñu̱xmax rü moxẽ cuxna taxãxü̃ rü cuxü̃ ticua̱xüü̃güxü̃ erü cuxüüne.
14 ¿Rü ta̱xacü ẽ̱xna chixĩ i chomax, rü ta̱xacügü nixĩ i ngẽma chorü duü̃xü̃gü nax toxü̃́ natauxchaxü̃ nax cuxna tanaxãxü̃ i ñaa muxü̃ma i ngẽmaxü̃gü? Rü dücax i guxü̃ma i ngẽma rü cuxü̃tawa ne naxũ, rü cuxü̃tawa nixĩ i tanayaxuxü̃ i ngẽma cuxna taxãxü̃.
15 Rü cupe̱xewa i ñoma i naanewa rü toma rü ñoma duü̃xü̃gü i ĩanetanüxü̃rüü̃mare tixĩgü nax paxaãchi i ñoma i naanewa tangexmagüxü̃ yema nũxcüma ga torü o̱xigürüxü̃. Rü ngẽma torü maxü̃ i ñoma i naanewa rü ñoma wüxi i naxchipetarüxü̃ paxa inarütauxmare.
16 Pa Corix, Pa Torü Tupanax, cuxrügü nixĩ i guxü̃ma i ñaa ngẽmaxü̃gü i tanutaque̱xexü̃ rü cuxme̱xwa nixĩ i ne naxĩxü̃ nax naxügüã̱xü̃ca̱x ya yima cupata ya taxü̃ne ya cuxca̱x taxüxü̃ne, Pa Tupana ya Üünecüx.
17 Pa Chorü Tupanax, choma nüxü̃ chacua̱x nax guxü̃guma mea cunangugüxü̃ i torü ĩnü rü namaxã cutaãẽxü̃ nax tixaixcümagüxü̃. Rü ngẽmaca̱x aixcüma mexü̃gu charüxĩnüãcüma chorü ngúchaü̃maxã cuxna chanana i guxü̃ma i ñaa ãmaregü. Rü ñu̱xma rü chataãxẽ erü nüxü̃ chadau i ñaa curü duü̃xü̃gü i nuxã ngutaque̱xexü̃ rü guxü̃ma i norü ngúchaü̃maxã cuxna nanana i ngẽma norü ãmaregü.
18 Pa Corix i Torü O̱xigü i Abraáü̃arü rü Ichaáarü rü Iraéarü Tupanax ¡ẽcü nüxü̃ rüngü̃xẽxẽ i ñaa curü duü̃xü̃gü nax guxü̃guma nüxü̃́ nangúchaü̃xü̃ca̱x nax cuga naxĩnüexü̃, rü tagutáma nüxü̃ naxoexü̃ca̱x nax cuxü̃ nangechaü̃güxü̃!
19 Rü ngẽxgumarüxü̃ ta ya yimá chaune ya Charomóü̃ ¡rü nüxna naxã i wüxi i naãxẽ i cugu rüxĩnüxü̃ nax ngẽmaãcü mea nagu namaxü̃xü̃ca̱x i ngẽma curü mugü rü curü ucu̱xẽgü rü cucümagü, rü ngẽmaãcü naxüaxü̃ca̱x ya yima cupata ya taxü̃ne ya naxca̱x chananutaque̱xene i ngẽmaxü̃gü! —ñanagürü ga Dabí.
20 Rü yemawena rü nüma ga Dabí rü ñanagürü nüxü̃ ga guxü̃ma ga yema duü̃xü̃gü ga yexma ngutaque̱xegüxü̃: —Ñu̱xma rü chanaxwa̱xe i nüxü̃ picua̱xüü̃gü ya Cori ya tórü Tupana —ñanagürü. Rü yexguma ga yema duü̃xü̃gü rü norü o̱xigüarü Cori ya Tupanaxü̃ nicua̱xüü̃gü. Rü Tupanape̱xegu rü ãẽ̱xgacü ga Dabípe̱xegu nacaxã́pü̱xügü.
21 Rü moxü̃ãcü rü yéma nanagagü ga 1,000 ga wocaxacügü ga yexwacax yaexü̃, rü 1,000 ga carnérugü. Rü Tupanaca̱x nanadai ga yema naxü̃nagü rü ãmare ga bínu naétü naba, rü yemaacü guxü̃ma ga Iraétanüxü̃égagu Tupanaca̱x ínanagu.
22 Rü yema ngunexü̃gu rü meama nachibüe rü naxaxegü rü poraãcü nataãẽgü nape̱xewa ga Cori ya Tupana. Rü ñu̱xũchi wenaxarü nüxü̃ naxunetagü ga Charomóü̃ ga Dabí nane nax ãẽ̱xgacü yixĩxü̃ca̱x. Rü Tupanape̱xewa chíxü̃maxã nanabaerugü nax nüma Iraéanecüã̱xgümaxã inacuáxü̃ca̱x. Rü yexgumarüxü̃ ta nüxü̃ naxunetagü ga Chadóx nax chacherdótegüarü ãẽ̱xgacü yixĩxü̃ca̱x.
23 Rü yemaacü nixĩ ga yangucuchixü̃ ga Charomóü̃ nax nüxí nanatü ga Dabíchicüxü ãẽ̱xgacü yixĩxü̃ca̱x. Rü guxü̃ma ga Iraéanecüã̱xgü rü naga naxĩnüe rü yemaacü mea inixũ ga guxü̃ma.
24 Rü guxü̃ma ga Iraétücumügüarü ãẽ̱xgacügü rü churaragüerugü rü Charomóü̃enexẽgü rü nüxü̃ nixugüe nax naga tá naxĩnüexü̃.
25 Rü nüma ga Cori rü poraãcü Charomóü̃xü̃ natachigaxẽxẽ ga guxü̃ma ga Iraéanewa. Rü yexeraãcü namuarü yemaxü̃ã̱x rü nanatüarü yexera nüxü̃ nicua̱xü̃gü.
Nayu ga Dabí
26 29:26-27 Rü Dabí ga Ichaxí nane rü 40 ga taunecü nixĩ ga ãẽ̱xgacü yixĩxü̃ ga Iraéanewa. Rü 7 ga taunecü nixĩ ga ãẽ̱xgacü yixĩxü̃ ga Ebróü̃wa rü 33 ga taunecü nixĩ ga Yerucharéü̃wa.
27 Nüü̃ nadau 29:26
28 Rü yexguma nayu̱xgu ga Dabí rü marü nayaxüchi rü namuarü yemaxü̃ã̱x. Rü duü̃xü̃gü rü poraãcüxüchima namaxã nataãẽgü. Rü nane ga Charomóü̃ nixĩ ga nachicüxü ãẽ̱xgacüxü̃ ingucuchicü.
29 Rü guxü̃ma ga yema Dabí üxü̃ ga yexguma ãẽ̱xgacü yixĩxgu rü yema popera ga Tupanaarü orearü uruxü̃ ga Chamué ümatüxü̃gu naxümatü. Rü yexgumarüxü̃ ta ga yema Dabí üxü̃ rü naxümatü nagu ga yema popera ga Tupanaarü orearü uruxü̃ ga Natáü̃ ümatüxü̃, rü nagu ga yema popera ga Tupanaarü orearü uruxü̃ ga Gáx ümatüxü̃ ga Dabíchiga.
30 Rü yema poperagüwa nango̱x ga nachiga ga guxü̃ma ga Dabí üxü̃ ga yexguma ãẽ̱xgacü yixĩxgu rü ñuxãcü nax naporaxü̃. Rü yemagu naxümatü ga yema Dabíxü̃ ngupetüxü̃, rü yema Iraétanüxü̃xü̃ ngupetüxü̃ rü yema togü ga nachixü̃anegüxü̃ ngupetüxü̃.
