1 Crónicas 9:1-44
9 Rü yemaacü ga guxü̃ma ga Iraétanüxü̃ rü nagu nawǘégagü ga yema popera ga Iraétanüxü̃arü ãẽ̱xgacügü nagu wǘégagüxü̃. Natürü yema duü̃xü̃gü ga Yudáanecüã̱xgü rü Babiróniaanewa nanagagü nagagu ga norü chixexü̃ ga naxügüxü̃.
Duü̃xü̃gü ga Babiróniawa íchoxü̃xü̃
2 Rü yema duü̃xü̃gü ga nüxíra woeguxü̃ nax wena norü naanegüwa rü ĩanegüwa nangugüxü̃ca̱x, rü yemagü nixĩ ga ñuxre ga Iraétanüxü̃ rü chacherdótegü, rü Lebítanüxü̃, rü yema Tupanapata ga taxü̃nearü puracüwa puracüexü̃.
3 Rü nümaxü̃ ga Yudátanüxü̃, rü Bẽyamíü̃tanüxü̃, rü Efraíü̃tanüxü̃ rü Manachétanüxü̃ rü Yerucharéü̃gu naxãchiü̃gü.
4 Rü yema Yudátanüxü̃tanüwa nayexma ga Utái ga Amiúx nane. Rü Amiúx rü Omrí nane nixĩ, rü Omrí rü Imrí nane nixĩ, rü Imrí rü Baní nane nixĩ, rü Baní, rü Fáre ga Yudá nanetanüxü̃ nixĩ.
5 Rü yema Chilótanüxü̃ ga norü ĩaneca̱x woeguxü̃tanüwa nayexma ga Achaía. Rü nüma ga Achaía rü naenexẽtanüwa rü yacü nixĩ.
6 Rü Chératanüxü̃ ga norü ĩaneca̱x woeguxü̃tanüwa nayexma ga Yeué wüxigu namaxã ga 690 ga natanüxü̃.
7 Rü Bẽyamíü̃tanüxü̃ ga norü ĩaneca̱x woeguxü̃tanüwa nayexma ga Charú ga Mechuráü̃ nane. Rü Mechuráü̃ rü Odabía nane nixĩ, rü Odabía rü Chenúa nane nixĩ.
8 Rü yema woeguxü̃tanüwa nayexma ta ga Ineía ga Yeruáü̃ nane, rü Erá ga Uchí nane. Rü Uchí rü Miquirí nane nixĩ. Rü nayexma ta ga Mechuráü̃ ga Chepatía nane. Rü Chepatía rü Reué nane nixĩ, rü Reué rü Inía nane nixĩ.
9 Rü guxü̃ma ga natanüxü̃arü mu ga norü o̱xigüwa ne nadaxü̃ rü 956 nixĩgü. Rü guxü̃ma ga yema yatügü ga Bẽyamíü̃tanüxü̃ ga woeguxü̃ rü wüxichigü rü napatacüã̱xgümaxã icua̱xgüxü̃ nixĩ.
10 9:10-11 Rü yema chacherdótegü ga norü ĩaneca̱x woeguxü̃ nixĩ ga Yedaía, rü Yoiaríx rü Yaquíü̃, rü Acharía ga Irichía nane. Rü Irichía rü Mechuráü̃ nane nixĩ, rü Mechuráü̃ rü Chadóx nane nixĩ, rü Chadóx rü Meraióx nane nixĩ, rü Meraióx rü Aitúx nane nixĩ. Rü Aitúx nixĩ ga guxü̃ma ga duü̃xü̃gü ga Tupanapatawa puracüexü̃maxã icuácü.
11 Nüü̃ nadau 9:10
12 Rü yema chacherdótegü ga woeguxü̃tanüwa nayexma ta ga Adaía ga Yeruáü̃ nane. Rü Yeruáü̃ rü Pachú nane nixĩ, rü Pachú rü Maquía nane nixĩ. Rü Machaí rü Adié nane nixĩ, rü Adié rü Yachéra nane nixĩ, rü Yachéra rü Mechuráü̃ nane nixĩ, rü Mechuráü̃ rü Mechiremíx nane nixĩ, rü Mechiremíx rü Imé nane nixĩ.
13 Rü guxü̃ma ga yema chacherdótegü rü natanüxü̃ ga Babiróniaanewa íchoxü̃xü̃ nax norü ĩaneca̱x woeguxü̃ rü 1,760 nixĩ ga norü mu. Rü nümagü rü napatacüã̱xmaxã inacua̱xgü. Rü guxü̃ma rü meama nüxü̃ nacua̱xgü nax ñuxãcü Tupanapataarü puracü naxügüxü̃.
14 Rü yema Lebítanüxü̃ ga norü ĩaneca̱x woeguxü̃tanüwa nayexma ga Chemaía ga Achúx nane. Rü Achúx rü Aricáü̃ nane nixĩ, rü Aricáü̃ rü Achabía nane nixĩ, rü Achabía rü Merarítanüxü̃ nixĩ.
15 Rü yema woeguxü̃tanüwa nayexma ta ga Baxbacá, rü Yére, rü Gará, rü Metanía ga Micaía nane. Rü Micaía rü Chicrí nane nixĩ, rü Chicrí rü Achá nane nixĩ.
16 Rü yema woeguxü̃tanüwa nayexma ta ga Adía ga Chemaía nane. Rü Chemaía rü Gará nane nixĩ, rü Gará rü Yedutúü̃ nane nixĩ. Rü nayexma ta ga Berequía ga Achá nane. Rü Achá rü Ercaná nane nixĩ. Rü nüma ga Ercaná rü Netopátanüxü̃arü ĩanexacügügu naxãpata.
17 Rü yema Tupanapataarü ĩã̱xarü dauruü̃gü ga norü ĩaneca̱x woeguxü̃ nixĩ ga Charúü̃, rü Acúx, rü Tamóü̃, rü Aimáü̃. Rü Charúü̃ nixĩ ga naenexẽgümaxã icuáxü̃ ga Tupanapataarü ĩã̱xgüarü dauwa.
18 Rü ngẽma Lebítanüxü̃ rü ñu̱xma rü ta nüxna nadaugü i ngẽma Tupanapataarü ĩã̱x i éstewaama üxü̃ i nawa yaxücuxü̃ ya ãẽ̱xgacü. Rü yemagü nixĩ ga Lebítanüxü̃ ga Tupanapataarü ĩã̱xgüarü dauruü̃gü.
19 Rü Charúü̃ rü Coré nane nixĩ, rü Coré rü Ebiachá nane nixĩ, rü Ebiachá rü Coré nane nixĩ. Rü Coré nataagü nixĩ ga nüxna daugüxü̃ ga yema ĩã̱x ga Tupanapataca̱x nawa ixücuxü̃, yema norü o̱xigü nüxna daugüxü̃rüxü̃.
20 Rü nũxcüma nüxíra namaxã icuácü ga yema puracü nixĩ ga Fineéx ga Ereachá nane. Rü nüma ga Cori ya Tupana rü guxü̃guma namaxã nayexma.
21 Rü Chacaría ga Mecheremía nane nixĩ ga yema Tupanapataarü ĩã̱xarü dauruxü̃.
22 Rü guxü̃wama ga yema duü̃xü̃gü ga ĩã̱xarü dauruü̃ca̱x nadexü̃ rü 212 nixĩ ga norü mu. Rü yemagü nixĩ ga nawa ngo̱xégaxü̃ ga yema popera ga natanüxü̃ nagu iwǘgüxü̃ ga wüxichigü ga norü ĩanewa. Rü Dabí rü Chamué ga Tupanaarü orearü uruxü̃ nixĩ ga noxri nüxü̃ unetagüxü̃ ga yema Lebítanüxü̃ naxca̱x ga yema puracü.
23 Rü yexguma nawa nanguxgu nax naxügüãxü̃ ga yema puracü rü yema ĩã̱xarü dauruü̃gü rü nawena nanegü nixĩ ga nüxí nüxna daugüxü̃ ga yema Tupanapataarü ĩã̱xgü.
24 Rü Tupanapataarü éstewaama, rü oéstewaama, rü nórtewaama rü súrwaama nayexma ga norü dauruü̃gü.
25 Rü yexguma nawa nanguxgu nax napuracüexü̃ rü nüma ga yema Lebítanüxü̃ ga norü ĩanegügu ãpatagüxü̃ rü yéma Tupanapatawa naxĩ nax 7 i ngunexü̃ nüxí nadauxü̃taegüxü̃ca̱x ga ĩã̱xgüwa.
26 Natürü yema ãgümücü ga Lebítanüxü̃ ga dauxü̃taeruü̃gü ga natanüxü̃maxã icua̱xgüxü̃ rü taguma naxüchicüügü. Rü nümagü nixĩ ga nüxna nadaugüxü̃ ga Tupanapataarü ucapugü rü yema meruxü̃gü ga nawa yexmagüxü̃.
27 Rü nümagü rü yema Tupanapata ga taxü̃necüwawa yexmagüxü̃ ga nachicagügu napegü. Rü guxü̃ma ga chütaxü̃ rü Tupanapatagu ínayachoeguaxü̃, yerü norü puracü nixĩ nax nüxna nadaugüxü̃ rü guxü̃ma ga pa̱xmama rü nayawãxnagüxü̃ ga norü ĩã̱xgü.
28 Rü nümaxü̃ ga yema dauxü̃taeruü̃gü rü naxme̱xwa nayexma nax nüxna nadaugüxü̃ ga yema Tupanapataarü nawechigü ga ínanuxü̃ ga yexguma Tupanaxü̃ yacua̱xüü̃gügu rü nawena nachicagu namaxã nanguxü̃gü. Rü ñu̱xũchi nayaxugügü rü poperagu nayawǘgü.
29 Rü togü ga dauxü̃taeruü̃gü rü namaxã inacua̱xgü ga yema to ga nawechigü, rü yema yemaxü̃gü ga ixüünexü̃, rü trigute̱xe, rü bínu, rü chíxü̃ ga baeruruxü̃, rü pumarate̱xe ga guruxü̃, rü to ga pumaragü.
30 Rü nümaxü̃ ga chacherdótegü nixĩ ga nüxü̃ cuáxü̃ nax naxüéxü̃ãxü̃ ga yema pumaragü ga paacaxü̃.
31 Rü wüxi ga Lebítanüxü̃ ga Matatía nixĩ ga nüxü̃ cuáxü̃ nax naxüaxü̃ ga Tupanaarü ãmare ga paũ. Rü nüma rü Corétanüxü̃ ga Charúü̃ nane ga yacü nixĩ.
32 Rü ñuxre ga Queáxtanüxü̃arü puracü nixĩ nax naxügüãxü̃ ga paũ ga üünexü̃ ga meama iñumüxü̃ ga wüxichigü ga ngü̃chigaarü ngunexü̃gu.
33 Rü nayexma ta ga wiyaetanüxü̃ ga Lebítanüxü̃arü ãẽ̱xgacügü ga ngunecü rü chütacü wiyaewa puracüexü̃. Rü yemaca̱x tama to ga puracüwa napuracüe. Rü nümagü rü Tupanapata ga taxü̃nearü ucapugügu napegü.
34 Rü yemagü nixĩ ga norü o̱xigürüxü̃ Lebítanüxü̃maxã icua̱xgüxü̃. Rü Yerucharéü̃gu naxãpatagü.
Chaúarü o̱xigüchiga
35 Rü ĩane ga Gabaóü̃gu nixĩ ga naxãpataxü̃ ga Yeié ga Gabaóü̃ nanatü. Rü naxãxma̱x rü ngĩéga nixĩ ga Maacá.
36 9:36-37 Rü nane ga yacü nixĩ ga Axdóü̃. Rü naigü ga nanegü nixĩ ga Chú, rü Chíx, rü Baá, rü Néx, rü Nadáx, rü Guedóx, rü Aió, rü Chacaría rü Micróx.
37 Nüü̃ nadau 9:36
38 Rü Micróx rü Chimáü̃ nanatü nixĩ. Rü nümagü rü yema togü ga natanüxü̃rüxü̃ Yerucharéü̃gu naxãpatagü.
39 Rü Néx nane nixĩ ga Chíx, rü Chíx nane nixĩ ga Chaú, rü Chaú nanegü nixĩgü ga Yonatáü̃, rü Maquichúa, rü Abinadá rü E-baá.
40 Rü Yonatáü̃ nane nixĩ ga Meríx-baá, rü Meríx-baá nixĩ ga Micaía nanatü.
41 Rü Micaía nanegü nixĩ ga Pitóü̃, rü Mélex, rü Taréa rü Acáx.
42 Rü Acháx nixĩ ga Yará nanatü. Rü Yará nixĩ ga nanatü ga Aréme, rü Amábe rü Zimrí. Rü Zimrí nixĩ ga nanatü ga Mochá.
43 Rü Mochá nixĩ ga nanatü ga Biná, rü Biná nixĩ ga nanatü ga Refaía, rü Refaía nixĩ ga nanatü ga Erachá, rü Erachá nixĩ ga nanatü ga Achéx.
44 Rü 6 nixĩ ga Achéx nanegü, rü naégagü nixĩ ga Aricáü̃, rü Bocurú, rü Ismaé, rü Chearía, rü Adía, rü Anáü̃. Rü yemagü nixĩ ga Achéx nanegü.
