1 Juan 1:1-10
1 Pexca̱x tanaxümatü nachiga ya yimá woetama marü nüxíra yexmacü ga yexguma tauta naane ü̱xgu. Rü toma ga norü ngúexü̃gü nax tixĩgüxü̃, rü nüxü̃ taxĩnüe rü toxetümaxã nüxü̃ tadaugü. Rü aixcüma nüxü̃ tadaugü rü toxme̱xmaxã nüxü̃ tingõgügü. Rü nüma rü Ore i Maxẽxẽxẽruxü̃ nixĩ.
2 Rü yimá maxẽxẽxẽruxü̃ rü toxü̃ nügü nawe̱x. Rü nüxü̃ tadaugü rü ngẽmaca̱x pemaxã nüxü̃ tixuchiga ya yimá tüxna naxãcü i maxü̃ i taguma gúxü̃. Rü noxri rü Nanatüxü̃tawa nayexma, natürü ñoma ga naanewa nangu rü toxca̱x nango̱x.
3 Rü yema toma nüxü̃ tadaugüxü̃ rü nüxü̃ taxĩnüexü̃ rü ngẽma nixĩ i pemaxã nüxü̃ tixuxü̃ nax totanüxü̃ pixĩgüxü̃ca̱x, ngẽxgumarüxü̃ i tomax nax Tanatü ya Tupana rü Nane ya Ngechuchu ya Cristutanüxü̃ tixĩgüxü̃rüxü̃.
4 Rü ngẽmaca̱x pexca̱x tanaxümatü i ñaa ore nax wüxigu aixcüma itaãẽgüxü̃ca̱x.
Tupana rü ngóonexü̃ nixĩ
5 Rü ñaa nixĩ ga ore ga tomaxã nüxü̃ yaxuxü̃ ga Ngechuchu ya Cristu. Rü pemaxã nüxü̃ tixu nax ngóonexü̃ yixĩxü̃ ya Tupana, rü nawa rü nataxuma i ẽanexü̃, rü bai i íxraxü̃.
6 Rü ngẽxguma chi: “Tanatü ya Tupanatanüxü̃ tixĩgü”, ñagügu, natürü ẽanexü̃wa imaxẽgu, rü tidoraemare rü tama tixaixcümagü.
7 Natürü ngẽxguma chi Tupanarüxü̃ ngóonexü̃wa imaxẽgu, rü yigütanüxü̃ tixĩgü, rü Tupana Nane ya Ngechuchu rü nagümaxã tüxü̃́ inayanaxoxẽxẽ i guxü̃ma i pecadugü.
8 Ngẽxguma chi nüxü̃ ixuxgu rü: “Changearü pecaduã̱x”, ñagügu, rü yigütama tawomüxẽxẽ, rü tidoraemare.
9 Natürü ngẽxguma chi Tupanamaxã nüxü̃ ixuxgu i tórü pecadugü, rü nüma ya Tupana ya ixaixcümacü rü tá tüxü̃́ nüxü̃ inarüngüma i tórü pecadugü rü tá inayanaxoxẽxẽ i guxü̃ma i tórü chixexü̃gü.
10 Natürü ngẽxguma chi ñagügu: “Tangearü pecaduã̱xgü”, ñagügu, rü dorata̱a̱x nüxü̃ tawogü ya Tupana rü tama aixcüma tawa nangẽxma i norü ore.
