1 Juan 2:1-29
2 Pa Chauxacügüx, pexca̱x chanaxümatü i ñaa ore nax tama pecadu pexügüxü̃ca̱x. Natürü ngẽxguma chi wüxíe pecadu uxgu, rü Tupanape̱xewa tüxü̃́ nangẽxma ya tümaarü chogüruxü̃. Rü yimá nixĩ ya Ngechuchu ya Cristu ya aixcüma mecü ixĩcü.
2 Rü nüma ga Ngechuchu ya Cristu nixĩ ga nügü inaxãxü̃ rü nayuxü̃ nax naxütanüãxü̃ca̱x ga tórü pecadugü. Rü tama tórü pecadugüxicatama naxütanü, natürü guxü̃ma i duü̃xü̃güarü pecadugü rü ta naxütanü.
3 Rü ngẽxguma chi naga ixĩnüegu i norü mugü, rü nüxü̃ tacua̱x nax aixcüma Tupanaxü̃ icuáxü̃.
4 Natürü ngẽxguma chi wüxíe ñagügu: “Choma rü Tupanaxü̃ chacua̱x”, ñagügu, natürü tama naga taxĩnügu i ngẽma norü mugü, rü wüxi i dorata̱xáxü̃ tixĩ rü tama nawa nangexma i ngẽma ore i aixcüma ixĩxü̃.
5 Natürü yíxema naga ĩnüxe i norü mugü, rü aixcüma Tupanaxü̃ tangechaü̃. Rü ngẽmawa nango̱x nax aixcüma Tupanaarü duü̃xü̃ tixĩxü̃.
6 Rü yíxema ñagüxe: “Tupanaarü duü̃xü̃ chixĩ”, ñagüxe, rü name nixĩ nax mea tamaxü̃xü̃ yema Ngechuchu ya Cristu mea maxü̃xü̃rüxü̃.
Tupanaarü mu i ngexwaca̱xü̃xü̃
7 Pa Chauenexẽgüx, ñaa Tupanaarü mu i pexca̱x chaxümatüxü̃ rü tama wüxi i ngexwaca̱xü̃xü̃ i mu nixĩ. Rü ngẽmatama mu ga noxritama peyaxõgügu peyauxgüxü̃ nixĩ i pexca̱x chaxümatüxü̃. Rü ngẽmatama mu nixĩ i ngẽma ore ga marü nüxü̃ pexĩnüexü̃.
8 Natürü ñaa Tupanaarü mu i pexca̱x chaxümatüxü̃ rü nangexwacaxü̃. Rü ñaa mu i aixcüma ixĩxü̃ rü Cristuwa nangẽxma rü ngẽxgumarüxü̃ ta pewa nangẽxma. Rü yema ẽanexü̃ ga noxri nawa peyexmagüxü̃ rü narüxochigü rü ñu̱xma rü ngẽma ngóonexü̃ i aixcüma ixĩxü̃wa pengẽxmagü.
9 Rü ngẽxguma chi wüxíe ñagügu: “Choma rü ngóonexü̃wa changexma”, ñagügu, natürü tümaenexẽchi taxaixgu, rü ẽanexü̃watama tangexma.
10 Yíxema tümaenexẽxü̃ ngechaü̃xe rü ngóonexü̃wa tangexma, rü nataxuma i ta̱xacü i chixexü̃gu tüxü̃ ngu̱xẽẽxü̃.
11 Natürü yíxema tümaenexẽchi aixe, rü ẽanexü̃watama tangexma, rü ẽanexü̃gu tixũ. Rü tama nüxü̃ tacua̱x nax ngextá taxũxü̃, erü ngẽma ẽanexü̃ rü tüxü̃ nixoxetüxẽxẽ.
12 Pa Chauxacügüx, pexca̱x chanaxümatü erü Tupana rü Cristugagu marü pexü̃́ nüxü̃ narüngü̃ma i perü pecadugü.
13 Pa Papágüx, pexca̱x chanaxümatü i ñaa ore erü marü nüxü̃ pecua̱x ga gumá noxriarü ügügumama yexmacü. Pa Ngextü̱xücügüx, pexca̱x chanaxümatü erü marü nüxü̃ perüyexera i Chataná i chixexü̃arü üruxü̃.
14 Pa Chauxacügüx, pexca̱x chanaxümatü erü marü nüxü̃ pecua̱xgü ya Tanatü ya Tupana. Pa Papágüx, pexca̱x chanaxümatü erü marü nüxü̃ pecua̱xgü ya gumá noxriarü ügügumama yexmacü. Pa Ngextü̱xücügüx, pexca̱x chanaxümatü erü peporae, rü peãẽwa nangẽxmaecha i Tupanaarü ore, rü marü nüxü̃ perüyexera i ngẽma chixexü̃arü üruxü̃ i Chataná.
15 ¡Taxṹ i pexü̃́ nangúchaü̃xü̃ i ñoma i naane rü norü ngẽmaxü̃gü! Ngẽxguma chi texéaxü̃́ nangúchaü̃gu i ñoma i naane rü tama Tanatü ya Tupanaxü̃ tangechaü̃.
16 Erü guxü̃ma i ngúchaü̃gü i ñoma i naanewa ngẽxmagüxü̃ rü ñoma i naanearütama nixĩ rü tama Tupanaarü nixĩ. Rü ngẽma nixĩ i taxü̃nearü ngúchaü̃gü, rü taxetüarü ngúchaü̃gü, rü diẽrumaxã yigü icua̱xüü̃güxü̃.
17 Natürü ñoma i naane rü guxü̃ma i ngẽma ngúchaü̃gü i chixexü̃gü i nawa ngẽxmagüxü̃ rü tá narüxo. Natürü yíxema Tupanaga ĩnüxe rü guxü̃gutáma tamaxü̃.
Ore i aixcüma ixĩxü̃chiga rü ore i dora ixĩxü̃chiga
18 Pa Chauxacügüx, paxa tá nawa nangu nax iyanaxoxü̃ i ñoma i naane. Pema rü marü nüxü̃ pexĩnüchiga rü tá ínangu i Cristuarü uanü, natürü marü ínangugü i muxü̃ma. Rü ngẽmawa nüxü̃ tacua̱x nax marü nagúxchaü̃xü̃ i ñoma i naane.
19 Rü ngẽma Cristuarü uanügü rü tatanüwatama nangẽxmagüchire̱x, natürü tama aixcüma tatanüxü̃ nixĩgü, erü ngẽxguma chi tatanüxü̃ yixĩgügu rü tatanügu chitama narücho. Natürü marü tatanüwa ínachoxü̃ nax meama nangóxü̃ca̱x nax tama aixcüma tatanüxü̃ yixĩgüxü̃.
20 Natürü guxãma i pema rü Cristu ya Üünecü marü pexna nanamu i Naãxẽ ya Üünexü̃, rü ngẽmaca̱x meama nüxü̃ pecua̱x i Tupanaarü ore i aixcüma ixĩxü̃.
21 Rü tama nax tama nüxü̃ pecuáxü̃ i ngẽma ore nixĩ i pexca̱x chanaxümatüxü̃. Rü pema rü marü meama nüxü̃ pecua̱x i ngẽma ore i aixcüma ixĩxü̃, rü ngẽmaca̱x nixĩ i pexca̱x chanaxümatüxü̃. Rü pema nüxü̃ pecua̱x rü ngẽma ore i aixcüma ixĩxü̃wa rü taxucürüwama dora nawa ne naxũ.
22 ¿Texé tixĩ ya idorata̱xáxe? Yíxema ñagüxe: “Ngechuchu rü tama aixcüma Cristu ya Tupana Nane nixĩ”, ñagüxe. Rü yíxema tixĩ ya Cristuarü uanü, erü tama nüxü̃ tacuáxchaü̃ ya Tanatü ya Tupana rü Nane ya Ngechuchu.
23 Guxãma ya yíxema tama nüxü̃ cuáxchaü̃xe ya Tupana Nane ya Ngechuchu, rü ngẽxgumarüxü̃ ta tama nüxü̃ tacuáxchaü̃ ya Tanatü ya Tupana. Natürü yíxema Ngechuchuaxü̃́ yaxṍxe, rü Tanatü ya Tupanaaxü̃́ rü ta tayaxõ.
24 Rü ngẽmaca̱x name nixĩ i peyaxõgüama i ngẽma ore ga noxri nüxü̃ pexĩnüexü̃. Rü ngẽxguma peyaxõgüamagu i ngẽma ore ga noxri nüxü̃ pexĩnüexü̃, rü aixcüma Tanatü ya Tupanaarü rü Nane ya Ngechuchuarü duü̃xü̃gü pixĩgü.
25 Rü nümatama ya Ngechuchu ya Cristu nixĩ i tamaxã inaxunetaxü̃ nax tüxna naxããxü̃ca̱x i maxü̃ i taguma gúxü̃.
26 Nangexma i duü̃xü̃gü i pexü̃ womüxẽẽgüchaü̃xü̃ nax Tupanana pixĩgachixü̃ca̱x. Rü ngẽmaca̱x nixĩ i pexca̱x chanaxümatüxü̃ i ñaa ore.
27 Natürü Cristu rü marü pexna nanamu i Naãxẽ ya Üünexü̃, rü nüma rü pewa namaxü̃. Rü ngẽmaca̱x tama penaxwa̱xe i to i perü ngúexẽẽruxü̃, erü nümatama i Naãxẽ ya Üünexü̃ rü pexü̃ nangúexẽxẽ i guxü̃ma. Rü norü ngu̱xẽẽtae rü aixcüma nixĩ rü tama dora nixĩ. Rü ngẽmaca̱x name nixĩ nax guxü̃guma Cristuaxü̃́ peyaxõgüxü̃, ngẽma Naãxẽ ya Üünexü̃ pexü̃ ngúexẽẽxü̃rüxü̃.
28 Rü ñu̱xmax, Pa Chauxacügüx, rü name nixĩ nax meama Cristuaxü̃́ peyaxõgüxü̃ nax tama nüxü̃ imuü̃exü̃ca̱x, rü tama ixãneexü̃ca̱x nape̱xewa i ngẽxguma wena nua naxũxgu.
29 Pema nüxü̃ pecua̱x nax Cristu rü aixcüma mecü yixĩxü̃. Rü ngẽxgumarüxü̃ ta name nixĩ nax nüxü̃ pecuáxü̃ nax guxü̃ma i duü̃xü̃gü i aixcüma mexü̃ ügüxü̃ rü Tupanaxacügü nax yixĩgüxü̃.
