1 Juan 3:1-24
3 ¡Dücax, Pa Chauenexẽgüx, ñuxãcü poraãcü tüxü̃ nangechaü̃ ya Tanatü ya Tupana! Rü ngẽmaca̱x nixĩ i naxacügümaxã tüxü̃ naxuxü̃ i nümax. Rü aixcüma naxacügü tixĩgü. Rü ngẽmaca̱x ñoma i naanecüã̱x i duü̃xü̃gü rü tama tüxü̃ nacua̱xgüchaü̃ erü Tupanaxü̃ rü ta tama nacua̱xgüchaü̃.
2 Pa Chauenexẽgü ya Pexü̃ Changechaü̃güxe, ñu̱xma rü marü Tupanaxacügü tixĩgü. Rü woo tama tüxü̃ nüxü̃ nacua̱xẽxẽ nax ñuxãcü tá ixĩgüxü̃ i yixcüra, natürü nüxü̃ tacua̱x nax Ngechuchurüxü̃ tá ixĩgüxü̃ i ngẽxguma nüma nango̱xgu, erü tá nüxü̃ tadau nax nañuxraü̃xü̃ i nüma.
3 Rü guxãma ya yíxema yaxõgüxe nax Ngechuchurüxü̃ tá tixĩxü̃, rü tügüna tadau nax Ngechuchu ya Cristurüxü̃ tamexü̃.
4 Natürü guxãma ya yíxema pecadu ügüxe, rü chixexü̃ nixĩ i taxüxü̃. Erü ngẽxguma tama Tupanaga taxĩnügu, rü pecadu taxü.
5 Pema rü marü nüxü̃ pecua̱x rü Ngechuchu ya Cristu rü ñoma ga naanewa naxũ nax iyanaxoxẽẽãxü̃ca̱x i pecadugü. Natürü i nüma rü taguma pecadu naxü.
6 Rü ngẽmaca̱x guxãma ya yíxema aixcüma nüxü̃́ yaxõgüxe, rü tama pecadu taxügüecha. Natürü guxãma ya yíxema pecadu ügüechaxe, rü taguma Cristuxü̃ tadau, rü taguma nüxü̃ tacua̱x.
7 Pa Chauxacügüx, ¡taxṹ i naga pexĩnüexü̃ i ngẽma duü̃xü̃gü i pexü̃ womüxẽẽgüchaü̃xü̃! Yíxema mexü̃ ǘxe rü aixcüma mecü tixĩ, ngẽxgumarüxü̃ ya Cristu nax aixcüma mecü yixĩxü̃rüxü̃.
8 Natürü yíxema pecadu üechaxe rü ngẽmawa tüxü̃ tacua̱x nax Chatanáarü duü̃xü̃ tixĩxü̃, erü nüma i Chataná rü noxriarü ügügumama pecadu naxüecha. Rü yemaca̱x ga Tupana Nane rü ñoma ga naanewa naxũ nax iyanaxoxẽẽãxü̃ca̱x ga yema Chataná üxü̃.
9 Rü yíxema Tupanaxacü ixĩxẽ rü tama pecadu taxüecha, erü Tupanacüma tümawa nangẽxma. Rü taxuacüma pecadu taxüecha erü Tupanaxacü tixĩ.
10 Rü marü nüxü̃ tacua̱x nax texé tixĩgüxü̃ ya Tupanaxacügü rü texé tixĩgüxü̃ ya Chatanáxacügü. Erü yíxema tama mexü̃ ǘxe rü tama tümaenexẽxü̃ ngechaü̃xe, rü tama Tupanaxacü tixĩ.
Name nixĩ nax yigü ingechaü̃güxü̃
11 Rü yema nüxíra marü nüxü̃ pexĩnüexü̃ ga ore rü ñaa nixĩ. Rü name nixĩ nax guxãma yigü ingechaxü̃güxü̃.
12 Rü tama tanaxwa̱xe nax Caíü̃rüxü̃ ixĩgüxü̃. Nüma rü Chatanáarü duü̃xü̃ nixĩ rü naenexẽxü̃ nima̱x. ¿Rü ta̱xacüca̱x nixĩ ga yamáaxü̃? Nayama̱x yerü yema nüma naxüxü̃ rü tama name, rü yema naenexẽ üxü̃ rü name.
13 Pa Chauenexẽgüx, ¡taxṹ i peba̱i̱xãchiãẽgüxü̃ ega pexchi naxaiegu i ñoma i naanecüã̱x i duü̃xü̃gü!
14 Yixema rü marü nüxna ítanguxü̃ i ngẽma yu, rü ñu̱xma rü marü maxü̃wa tangexmagü. Nüxü̃ tacua̱x i ngẽma erü nüxü̃ tangechaü̃gü i taenexẽgü. Yíxema tama tümaenexẽxü̃ ngechaü̃xe rü yuxme̱xwa tangexma.
15 Rü yíxema tümaenexẽchi aixe rü wüxi i máẽtaxü̃ tixĩ. Rü pema nüxü̃ pecua̱x rü wüxi i máẽtaxü̃ rü nüxü̃́ nataxuma i norü maxü̃ i taguma gúxü̃.
16 Rü Ngechuchu ya Cristu rü tórü pecaduca̱x nayu, rü yemawa tüxü̃ nüxü̃ nadauxẽxẽ i ngẽma ngechaü̃ i aixcüma ixĩxü̃. Rü ngẽxgumarüxü̃ ta i yixema, rü tanaxwa̱xe nax íimemarexü̃ nax taenexẽ i yaxõgüxü̃ca̱x inaxãxü̃ i tórü maxü̃.
17 Rü ngẽxguma chi texéaxü̃́ nangẽxmagu i taxü̃ i tümaarü diẽru, rü chi nüxü̃ tada̱u̱xgu i tümamücü nax nüxü̃́ nataxuxü̃ rü tama nüxü̃ tarüngü̃xẽẽgu, rü taxuacüma ñatagürü: “Choma rü Tupanaxü̃ changechaü̃”, ñatagürü.
18 Pa Chauxacügüx, tama name i taa̱xmaxã rü tórü oremaxãxicatama nüxü̃ tangechaü̃ i taenexẽ. Natürü tanaxwa̱xe i tórü maxü̃maxã rü tórü ü i mexü̃maxã nüxü̃ tangechaü̃.
Tama taxãnee nax Tupanana ingaicamagüxü̃
19 3:19-20 Rü ngẽxguma aixcüma yigü ingechaü̃gügu, rü ngẽmawa nüxü̃ tacua̱x nax tawa nangẽxmaxü̃ i ngẽma ore i aixcüma ixĩxü̃, rü nüxü̃ tacua̱x nax Tupanape̱xewa naxacügü ixĩgüxü̃. Rü woo taãẽwa nagu rüxĩnügu nax tama Tupanaxacü ixĩgüxü̃, natürü nüxü̃ tacua̱x nax taãẽarü yexera yixĩxü̃ ya Tupana rü nüma rü guxü̃xü̃ma nacua̱x.
20 Nüü̃ nadau 3:19
21 Pa Chauenexẽgü ya Pexü̃ Changechaü̃güxe, ngẽxguma taãẽwa nüxü̃ icua̱xgu nax Tupanaxacüxüchi ixĩgüxü̃, rü tama taxãnee nax nüxna ingaicamagüxü̃ ya Tanatü ya Tupana.
22 Rü nüma tá tüxna nanaxã i guxü̃ma i ngẽma naxca̱x íicaxü̃, erü naga taxĩnüe i ngẽma tüxü̃ namuxü̃ rü tanaxü i ngẽma nüma namaxã nataãẽxü̃.
23 Rü nüma tüxü̃ namu nax Nane ya Ngechuchu ya Cristuaxü̃́ yaxõgüxü̃ rü yigü ingechaü̃güxü̃, yema nüma tüxü̃ namuxü̃rüxü̃.
24 Rü yíxema naga ĩnüxe i ngẽma Tupana tüxü̃ muxü̃, rü aixcüma Tupanaarü duü̃xü̃ tixĩ rü nüma ya Tupana rü tümawa namaxü̃. Rü nüxü̃ tacua̱x nax Tupanaarü duü̃xü̃gü ixĩgüxü̃ rü tawa nax namaxü̃xü̃, erü tawa namaxü̃ i Naãxẽ ya Üünexü̃ ga Tupana tüxna namuxü̃.
