1 Juan 4:1-21
4 Pa Chauenexẽgü ya Pexü̃ Changechaü̃güxe, ¡Taxṹ i nüxü̃́ peyaxõgüxü̃ i guxü̃ma i ngẽma nügü ixugügüxü̃ nax Tupanaarü orearü uruü̃gü yixĩgüxü̃! Rü name nixĩ i penangugü i norü ore nax nüxü̃ pecuáxü̃ca̱x rü aixcüma Tupanaãxẽ yixĩxü̃ i nawa idexaxü̃, rüe̱xna tama. Erü guxü̃wama i ñoma i naanewa rü nangẽxma i muxü̃ma idorata̱a̱xgüxü̃ i nügü ixugüxü̃ nax Tupanaarü orearü uruü̃gü yixĩgüxü̃.
2 Rü name nixĩ i penangugü i norü ore nax nüxü̃ pecuáxü̃ nax texé tixĩxü̃ ya yíxema aixcüma Tupanaãxẽ tümawa ngẽxmaxe. Rü guxü̃ma i orearü uruü̃gü i nüxü̃ ixugüxü̃ nax duü̃xü̃rüxü̃ ñoma ga naanewa nanguxü̃ ya Ngechuchu ya Cristu, rü ngẽma nixĩ i aixcüma Tupanaãxẽ nawa idexaxü̃.
3 Natürü guxü̃ma i ngẽma orearü uruü̃gü i tama nüxü̃ ixugüxü̃ nax duü̃xü̃rüxü̃ ñoma ga naanewa nanguxü̃ ga Ngechuchu ya Cristu, rü ngẽma rü tama nüxü̃́ nangẽxma i Tupanaãxẽ ya Üünecü, rü Cristuarü uanüãxẽ nixĩ i nawa ngẽxmaxü̃. Marü nüxü̃ pexĩnüe nax ínanguxchaü̃xü̃ i Cristuarü uanü, natürü ñu̱xma rü marü ñoma i naanewa nangẽxma.
4 Pa Chauxacügüx, pema rü Tupanaxacügü pixĩgü. Rü marü nüxü̃ perüyexera i ngẽma dorata̱a̱xgüxü̃. Erü ngẽma Tupanaãxẽ ya Üünecü i peãẽwa ngẽxmaxü̃ rü marü nüxü̃ narüyexera i ngẽma Cristuarü uanü i ñoma i naanewa ngẽxmaxü̃.
5 Rü nümgü i Cristuarü uanüarü duü̃xü̃gü rü ñoma i naanearü duü̃xü̃gü nixĩgü. Rü ngẽmaca̱x ñoma i naanewa ngẽxmaxü̃chiga nidexagü. Rü ñoma i naanecüã̱x i duü̃xü̃gü rü nüxü̃́ inarüxĩnüe.
6 Natürü i yixema rü Tupanaxacügü tixĩgü. Rü yíxema Tupanaxü̃ cuáxe rü tüxü̃́ itarüxĩnü. Natürü yíxema tama Tupanaxü̃ cuáxe rü tama tüxü̃́ itarüxĩnü. Rü ngẽmawa nüxü̃ tacua̱x nax texé tixĩgüxü̃ ya aixcüma Tupanaãxẽarü duü̃xü̃gü ixĩgüxe rü texé tixĩgüxü̃ ya uanüarü duü̃xü̃gü ixĩgüxe.
Tupana tüxü̃ nangechaü̃
7 Pa Chauenexẽgü ya Pexü̃ Changechaü̃güxe, name nixĩ nax yigü ingechaü̃güxü̃, erü Tupanawa ne naxũ i ngẽma nax yigü ingechaü̃güxü̃. Rü guxãma ya yíxema tümaenexẽxü̃ ngechaü̃xe rü Tupanaxacü tixĩ rü Tupanaxü̃ tacua̱x.
8 Yíxema tama tümaenexẽxü̃ ngechaü̃xe rü tama Tupanaxü̃ tacua̱x, erü nüma nixĩ i guxãxü̃ nangechaü̃xü̃.
9 Tupana rü ñoma ga naanewa nanamu ga Nane ya nügümaxã wüxicacü nax yimágagu tüxü̃́ nangẽxmaxü̃ca̱x i maxü̃ i taguma gúxü̃. Rü yemawa Tupana tüxü̃ nüxü̃ nadauxẽxẽ nax tüxü̃ nangechaü̃xü̃.
10 Rü ngẽma ngechaü̃ i aixcüma ixĩxü̃ rü tama Tupanaxü̃ tangechaü̃wa nango̱x. Natürü Tupana rü ñoma ga naanewa nanamu ga Nane nax taxca̱x nayuxü̃ca̱x rü naxütanüãxü̃ca̱x ga tórü pecadugü. Rü yemawa inanawe̱x i ngẽma ngechaü̃ i aixcüma ixĩxü̃.
11 Pa Chauenexẽgü ya Pexü̃ Changechaü̃güxe, yexguma yemaacü tüxü̃ nangechaü̃gu ga Tupana, rü ngẽmaca̱x name nixĩ i yixema rü ta yigü tangechaü̃gü.
12 Taguma texé Tupanaxü̃ tadau. Natürü ngẽxguma aixcüma yigü ingechaü̃gügu, rü Tupana rü tawa namaxü̃ rü norü ngechaü̃ rü tórü maxü̃wa nango̱x.
13 Rü nüma rü marü tüxna nanamu ga Naãxẽ ya Üünexü̃. Rü ngẽmawa nüxü̃ tacua̱x nax aixcüma norü duü̃xü̃gü ixĩgüxü̃ rü nüma rü tawa nax namaxü̃xü̃.
14 Rü tomatama nüxü̃ tadaugü rü nüxü̃ tixuchigagü nax Tanatü ya Tupana núma namuxü̃ ga Nane nax guxü̃ma i duü̃xü̃güxü̃ namaxẽxẽẽxü̃ca̱x.
15 Rü yíxema yaxṍxe rü nüxü̃ ixuchigaxe nax Tupana Nane yixĩxü̃ ya Ngechuchu, rü aixcüma Tupanaarü duü̃xü̃ tixĩ, rü Tupana rü tümawa namaxü̃.
16 Rü ngẽmaãcü nüxü̃ tacua̱x rü tayaxõgü nax Tupana rü poraãcü tüxü̃ nangechaü̃xü̃. Rü nüma nixĩ i guxãxü̃ nangechaü̃xü̃. Rü yíxema tümaenexẽxü̃ ngechaü̃xe, rü Tupanaarü duü̃xü̃ tixĩ, rü nüma ya Tupana rü tümawa namaxü̃.
17 Rü ngẽxguma aixcüma taenexẽxü̃ ingechaü̃gügu, rü tórü maxü̃wa nango̱x i ngẽma ngechaü̃, rü taxũtáma nüxü̃ tamuü̃e i ngẽma ngunexü̃ i nagu Tupana tüxü̃ yacagüxü̃gu naxca̱x i tórü maxü̃. Erü yixema rü ñoma i naanewa rü Ngechuchurüxü̃ tixĩgü.
18 Rü ngẽxguma aixcüma yigü ingechaü̃gügu, rü taxuca̱xma tü̱xcüü̃ tamuü̃e. Rü ngẽma ngechaü̃ i aixcüma ixĩxü̃ rü inayanaxoxẽxẽ i ngẽma muü̃. Rü yíxema muü̃xe rü nagu tarüxĩnü nax ngürüãchi tá tapoxcuxü̃. Rü ngẽxguma chi texé poxcuca̱x muü̃gu rü tümagagu nixĩ erü tama aixcüma tümaenexẽxü̃ tangechaxü̃.
19 Rü yixema rü Tupanaxü̃ tangechaü̃gü, yerü nüma rü nüxíra tüxü̃ nangechaü̃.
20 Ngẽxguma chi texé ñagügu: “Choma rü Tupanaxü̃ changechaü̃”, ñagügu, natürü tümaenexẽchi taxaixgu, rü tidora. Erü ngẽxguma tama nüxü̃ tangechaü̃gu i tümaenexẽ i nüxü̃ tadauxü̃, rü taxuacüma nüxü̃ tangechaü̃ ya Tupana ya tama nüxü̃ tadaucü.
21 Rü Ngechuchu ya Cristu tamaxã nüxü̃ nixu i ñaa mu, rü ñanagürü:“Yíxema Tupanaxü̃ ngechaü̃xe, rü tanaxwa̱xe nax tümaenexẽxü̃ rü ta tangechaü̃xü̃”,
ñanagürü.
