1 Juan 5:1-21
5 Guxü̃ma ya yíxema yaxṍxe nax Cristu yixĩxü̃ ya Ngechuchu, rü Tupana nane tixĩ. Rü guxãma ya yíxema Tanatü ya Tupanaxü̃ ngechaü̃güxe, rü nüxü̃ tangechaü̃ ta i naxacügü.
2 Rü ngẽxguma Tupanaxü̃ ingechaü̃gügu rü naxü̱xgu i ngẽma nüma tüxü̃ namuxü̃, rü nüxü̃ tacua̱x nax nüxü̃ ingechaü̃güxü̃ ta i ngẽma naxacügü ixĩgüxü̃.
3 Rü ngẽxguma aixcüma Tupanaxü̃ ingechaü̃gügu rü naga taxĩnüe i ngẽma tüxü̃ namuxü̃. Rü ngẽma tüxü̃ namuxü̃ rü tama naguxcha nax naga ixĩnüexü̃.
4 Erü guxãma ya yíxema aixcüma Tupanaxacü ixĩxẽ, rü tama ñoma i naanearü ngúchaü̃ i chixexü̃gu tarüxĩnü. Rü tórü õgagu nüxü̃ tarüyexera i ngẽma ngúchaü̃gü i ñoma i naanewa ngẽxmagüxü̃.
5 Rü yíxema yaxṍxe nax Tupana Nane yixĩxü̃ ya Ngechuchu, rü yíxema tixĩ ya nüxü̃ rüporamaexẽ i ñoma i naanearü ngúchaü̃ i chixexü̃gü.
Ore i Tupana Nanechiga
6 Rü nüxü̃ tacua̱x nax aixcüma Tupana Nane yixĩxü̃ ya Ngechuchu. Yerü yexguma ñoma ga naanewa nayexmagu rü dexáwa ínabaiegu, rü nümatama ga Tupana nüxü̃ nixu nax Nane yixĩxü̃. Rü yexguma curuchagu nayu̱xgu rü nagü inabaãgu ga Ngechuchu, rü Tupana rü wenaxarü inanawe̱x nax aixcüma Nane nax yixĩxü̃. Rü yexgumarüxü̃ ta ga Naãxẽ ya Üünexü̃ i taguma idoraxü̃, rü tüxü̃ nüxü̃ nacua̱xẽxẽ nax aixcüma Tupana Nane nax yixĩxü̃.
7 Rü ngẽmaãcü tüxü̃́ nangẽxma i tomaepü̱x i cua̱xruü̃gü i tüxü̃ nüxü̃ cua̱xẽẽxü̃ nax aixcüma Tupana Nane yixĩxü̃ ya Ngechuchu.
8 Rü norü wüxi nixĩ i Naãxẽ ya Üünexü̃, rü norü taxre nixĩ ga yema Tupanaga ga yexguma Ngechuchu dexáwa íbaiegu, rü norü tomaepü̱x nixĩ nax naxẽanexü̃ ga yexguma curuchagu nagü inabaãgu ga Ngechuchu. Rü guxü̃ma i ngẽma tomaepü̱x i cua̱xruü̃gü, rü nüxü̃ nixu nax aixcüma Tupana Nane yixĩxü̃ ya Ngechuchu.
9 Rü tayaxõgü i duü̃xü̃güarü ore, natürü Tupanaarü ore nixĩ i yexeraãcü aixcüma ixĩxü̃. Erü Tupana nixĩ ya tamaxã nüxü̃ ixucü nax Ngechuchu rü Nane yixĩxü̃.
10 Rü yíxema nüxü̃́ yaxṍxe ya Tupana Nane rü nüxü̃ tacua̱x nax aixcüma yixĩxü̃ i ngẽma ore ya Tupana nüxü̃ ixuxü̃ i Nanechiga. Natürü yíxema tama Tupanaaxü̃́ yaxṍxe rü dorata̱a̱x nüxü̃ tawogü ya Tupana erü tama tayaxõ i ngẽma ore ya Tupana nüxü̃ ixuxü̃ i Nanechiga.
11 Rü yema Tupana nüxü̃ ixuxü̃ ga ore nixĩ nax nüma rü tüxna naxããxü̃ i maxü̃ i taguma gúxü̃. Rü ngẽma maxü̃ i tüxna naxãxü̃ rü Nanegagu tüxü̃́ nangẽxma.
12 Yíxema nüxü̃́ yaxṍxe ya Tupana Nane rü tüxü̃́ nangẽxma i ngẽma maxü̃ i taguma gúxü̃. Natürü yíxema tama nüxü̃́ yaxṍxe ya yimá Tupana Nane rü tama tüxü̃́ nangẽxma i ngẽma maxü̃.
Cuáü̃ rü ñuxre ga ucu̱xẽgu nayacua̱xẽxẽ ga norü popera
13 Pa Chauenexẽgüx ya Tupana Naneaxü̃́ Yaxõgüxex, pexca̱x chanaxümatü i ñaa ore nax nüxü̃ pecuáxü̃ca̱x nax pexü̃́ nangẽxmaxü̃ i maxü̃ i taguma gúxü̃.
14 Rü ngẽmaca̱x tama taxãnee nax nüxna ingaicamagüxü̃ ya Tupana. Rü nüxü̃ tacua̱x rü nüma tüxü̃ naxĩnü i ngẽxguma norü ngúchaü̃ yixĩxgu i ngẽma naxca̱x nüxna ica̱xaxü̃.
15 Rü ngẽxguma nüxü̃ icua̱xgu nax nüma tüxü̃́ nüxü̃ naxĩnüxü̃ i tórü yumüxẽ i ngẽxguma ta̱xacüca̱x nüxna ícaxgu, rü ngẽxgumarüxü̃ ta nüxü̃ tacua̱x nax nüma rü tá tüxna naxããxü̃ i ngẽma naxca̱x nüxna ica̱xaxü̃.
16 Rü ngẽxguma chi texé nüxü̃ da̱u̱xgu i tümaenexẽ nax pecadu naxüxü̃, rü name nixĩ nax naxca̱x yumüxẽxü̃ ega tama pecadu i iyanatauxẽẽxü̃ yixĩxgu. Rü Tupana tá nanamaxẽxẽ i ngẽma tümaenexẽ ega tama pecadu i iyanatauxẽẽxü̃ yixĩxgu. Nangexma i pecadu i tüxü̃ iyarütauxẽẽxü̃. Rü ngẽxguma ngẽma pecaduwe naxũãmagu i wüxi i peenexẽ, rü tama pexü̃ chamu nax naxca̱x peyumüxẽgüxü̃.
17 Guxü̃ma i chixexü̃ i ixüxü̃, rü pecadu nixĩ. Natürü nangẽxma i pecadu i tama tüxü̃ iyarütauxẽẽxü̃.
18 Rü nüxü̃ tacua̱x, rü yíxema Tupanaxacü ixĩxẽ, rü tama pecadu taxüecha, erü nüma ya Tupana Nane rü tüxna nadau. Rü Chataná rü taxuacüma tümamaxã inacua̱x.
19 Nüxü̃ tacua̱xgü nax Tupanaxacügü ixĩgüxü̃, natürü guxü̃ma i ñoma i naanecüã̱x rü Chatanáme̱xẽwa nangẽxmagü.
20 Rü nüxü̃ tacua̱x ta nax ñoma ga naanewa nanguxü̃ ga Tupana Nane. Rü nüma nixĩ i tüxna naxããxü̃ ga cua̱x nax nüxü̃ icua̱xgüxü̃ca̱x ya yimá aixcüma Tupana ixĩcü. Rü yixema rü norü duü̃xü̃gü tixĩgü ya yimá aixcüma Tupana ixĩcü, erü Nane ya Ngechuchu ya Cristuarü duü̃xü̃gü tixĩgü. Rü nüma ya Tupana Nane nixĩ i aixcüma Tupana ixĩcü, rü nüma nixĩ i tüxna naxããxü̃ i maxü̃ i taguma gúxü̃.
21 Pa Chauxacügüx, ¡Pegüna pedaugü nax tama nüxü̃́ peyaxõgüxü̃ca̱x i ngẽma tupananetachicüna̱xãgü!
