1 Tesalonicenses 1:1-10
1 Pa Toenexẽgü i Techarónicawa Ngẽxmagüxü̃ i Tanatü ya Tupana rü Tórü Cori ya Ngechuchu ya Cristuarü Duü̃xü̃gü Ixĩgüxü̃x, choma i Pauru rü namaxã i taenexẽgü i Chilbánu rü Timutéu nixĩ i pexca̱x tanaxümatüxü̃ i ñaa popera. Rü tanaxwa̱xe i Tanatü ya Tupana rü tórü Cori ya Ngechuchu ya Cristu pexü̃ narüngü̃xẽxẽ rü pexü̃ nataãẽxẽxẽ.
Techarónicawa yexmagüxü̃ ga yaxõgüxü̃ rü wüxi ga cua̱xruxü̃ ga mexü̃ nixĩgü
2 Rü torü yumüxẽwa rü guxü̃guma pexna tacua̱xãchigü, rü pexca̱x Tupanana moxẽ taxã.
3 Rü guxü̃guma i ngẽxguma Tanatü ya Tupanamaxã tidexagügu, rü nüxna tacua̱xãchie nax aixcüma mea peyaxõgüãcüma penaxüxü̃ i Tupanaarü puracü, rü nüxü̃ pengechaü̃güãcüma togüxü̃ perüngü̃xẽẽxü̃. Rü mea ípenangu̱xẽẽxü̃ ya tórü Cori ya Ngechuchu ya Cristu rü ngẽmaca̱x yáxna namaxã pexĩnüe i ngẽma ngúxü̃ i ñu̱xma pingegüxü̃.
4 Pa Chauenexẽgüx ya Tupana Pexü̃ Ngechaü̃güxex, nüxü̃ tacua̱x nax nümatama pexü̃ nadexü̃ nax norü duü̃xü̃gü pixĩgüxü̃ca̱x.
5 Rü yexguma pemaxã nüxü̃ tixuxgu ga Tupanaarü ore i tüxü̃ maxẽxẽẽxü̃, rü tama toechama tidexagümare, yerü Tupanaãxẽ ya Üünecü toxü̃ narüngü̃xẽxẽ nax Tupanaarü poramaxã pemaxã nüxü̃ tixuxü̃. Rü mea nüxü̃ tacuáãcüma pemaxã nüxü̃ tixu ga yema ore yerü toõxẽwatama nüxü̃ tacua̱x nax aixcüma yixĩxü̃. Rü pematama meama nüxü̃ pecua̱x nax aixcüma mea pepe̱xewa tamaxẽxü̃ nax yemaacü pexü̃ tarüngü̃xẽẽgüxü̃ca̱x.
6 Rü pema rü meama nagu pexĩ ga yema pexü̃ tangúexẽẽxü̃ rü yema tüxü̃ nangúexẽẽxü̃ ga tórü Cori ya Ngechuchu. Rü ngẽma taãxẽ i Tupanaãxẽ ya Üünecü pexna ãxü̃maxã penayauxgü ga yema ore ga woo yemaca̱x poraãcü ngúxü̃ nax pingegüxü̃.
7 Rü yemaacü ga pema rü wüxi ga cua̱xruxü̃ ga mexü̃ pixĩgü naxca̱x ga guxü̃ma ga yema yaxõgüxü̃ ga Machedóniaanewa rü Acáyaanewa yexmagüxü̃.
8 Rü pewa yema nax peyaxõgüxü̃gagu rü tórü Cori ya Ngechuchuarü ore rü guxü̃wama ninguchigü. Rü ngẽmaca̱x i ñu̱xma rü Machedóniaanewa rü Acáyaanewa rü guxü̃wama nüxü̃ nacua̱xgü nax aixcüma mea Tupanaaxü̃́ peyaxõgüxü̃. Rü ngẽmaca̱x marü taxuca̱xma tü̱xcüü̃ i toma rü namaxã nüxü̃ tixu i ngẽma ore i pechiga.
9 Yerü nümagütama ga yema duü̃xü̃gü rü marü nüxü̃ nixugügü nax mea toxü̃ peyauxgüxü̃ ga yexguma petanüwa taxĩxgu. Rü nüxü̃ nixugügü nax nüxü̃ perüxoexü̃ ga perü tupananetachicüna̱xãgü nax Tupanaxü̃chi ya maxü̃cü rü ixaixcümacüwe perüxĩxü̃ca̱x nax nüxü̃́ pepuracüexü̃ca̱x.
10 Rü nüxü̃ nixugügü ta nax aixcüma ípenangu̱xẽẽxü̃ nax wenaxarü tá daxũwa ne naxũxü̃ ya Ngechuchu ya Tupana Nane ga yuwa ínadaxẽẽãcü. Rü yimá Ngechuchu nixĩ ya tüxü̃ ínguxü̃xẽẽcü nüxna i ngẽma poxcu i ãũcümaxü̃ i tá ínguxü̃.
