1 Timoteo 1:1-20
1 1:1-2 Pa Timutéux, cuxü̃ charümoxẽ. Rü choma i Pauru nixĩ i cuxca̱x chanaxümatüxü̃ i ñaa popera. Rü choxü̃ nixĩ i namuxü̃ ya Tupana ya tüxü̃ maxẽxẽẽcü rü tórü Cori ya Ngechuchu ya Cristu ya ínanguxẽẽgücü nax wena núma naxũxü̃. Pa Timutéux, cuma rü chaune quixĩ i Tupanaarü orewa.* Rü chanaxwa̱xe nax Tanatü ya Tupana rü tórü Cori ya Ngechuchu ya Cristu cuxna naxãxü̃ i norü ngü̃xẽxẽ rü norü ngechaü̃ rü norü taãxẽ.
2 Nüü̃ nadau 1:1
Timutéuxü̃ naxuxcu̱xẽ ga Pauru nachiga ga yema ngu̱xẽẽtaegü ga tama aixcüma ixĩxü̃
3 Yexguma cuxna ichaxũãchigu nax Machedóniaanewa chaxũxü̃ca̱x rü cumaxã nüxü̃ chixu nax Epéchiuarü ĩanegu curüxã́ũxü̃ nax nüxna cunachu̱xuxü̃ca̱x i ngẽma duü̃xü̃gü i doramaãmare ngéma ngu̱xẽẽtaegüxü̃.
4 Rü chanaxwa̱xe i ngẽma duü̃xü̃gümaxã nüxü̃ quixu nax nüxü̃ naxoexü̃ca̱x nax namaxã nangúexẽẽãxü̃ i ngẽma nacümagü ga nũxcümaü̃güxü̃ ga duü̃xü̃gü nagu ĩxü̃. Rü ngẽma ngu̱xẽẽtaegagu düxwa nügümaxã nanue i duü̃xü̃gü erü doramare nixĩ, rü tama aixcüma nüxü̃ narüngü̃xẽxẽ i duü̃xü̃gü nax mea Tupanaaxü̃́ yaxõgüãxü̃ca̱x.
5 Rü ngẽma ucu̱xẽ i cumaxã nüxü̃ chixuxü̃ rü nachiga nixĩ i ngẽma ngechaü̃ i wüxi ya maxü̃ne ya ngearü chixexü̃ã́xü̃wa ne ũxü̃, rü wüxi i ĩnü i mexü̃wa ne ũxü̃, rü wüxi i õ i aixcüma ixĩxü̃wa ne ũxü̃. Rü name nax ngẽma ngechaü̃maxã yigü ingechaxü̃güxü̃.
6 Natürü ñuxre i yaxõgüxü̃ rü marü nüxna nixĩgachi i Tupanaarü ore nax nawe naxĩxü̃ca̱x i ngẽma ngu̱xẽẽtae i taxuwama mexü̃ i nuwa nagagümarexü̃.
7 Erü nümagü tüxü̃ nangúexẽẽchaü̃ i ngẽma mugü ga Moiché ümatüxü̃, natürü tama nüxü̃ nacua̱xgü i ta̱xacüchiga nax yixĩxü̃ i ngẽma nüxü̃ yaxugüexü̃ rü nangúexẽẽxü̃ woo nüma nagu naxĩnüegu rü meama nüxü̃ nacua̱xgü.
8 Rü nüxü̃ tacua̱x rü ngẽma mugü ga Moiché ümatüxü̃ rü tüxü̃́ name ega Tupana naxwa̱xexü̃ãcüma naga ixĩnüegu.
9 1:9-10 Nüxü̃ tacua̱xgü rü guxü̃ma i ngẽma mugü rü tama duü̃xü̃gü i mexü̃ ügüxü̃ca̱x nixĩ. Rü ngẽma mugü rü naxca̱x nixĩ i ngẽma duü̃xü̃gü i tama irüxĩnüechaü̃xü̃, rü ngẽma tama norü ãẽ̱xgacüga ĩnüexü̃, rü ngẽma chixexü̃gu maxẽxü̃, rü ngẽma pecaduã̱xgüxü̃, rü ngẽma tama Tupanaga ĩnüexü̃, rü ngẽma nanatüxü̃ rüẽ̱xna naéxü̃ ima̱xgüxü̃, rü guxü̃ma i ngẽma máetagüxü̃, rü ngẽma naxü̃nearü ngúchaü̃we rüxĩxü̃, rü ngẽma yatügü i naxrüxü̃ yatüxü̃maxã maxẽxü̃ rü ngẽma ngexü̃gü i naxrüxü̃ ngẽxü̃maxã maxẽxü̃, rü ngẽma mugüruü̃gümaxã taxegüxü̃, rü ngẽma idorata̱xaxgüxü̃, rü ngẽma ãẽ̱xgacügüpe̱xewa idoragüxü̃, rü guxü̃ma i ngẽma chixexü̃ ügüxü̃ na̱xcha̱xwa i ngẽma ngu̱xẽẽtae i mexü̃.
10 Nüü̃ nadau 1:9
11 Rü Tupanaarü ore i mexü̃ nixĩ i tüxü̃ ngu̱xẽẽxü̃ nachiga i ngẽma ngu̱xẽẽtae ya Tupana ya mecümaxüchicü naxca̱x choxü̃ muxü̃.
Pauru rü Tupanana moxẽ naxã yerü nüxü̃́ nüxü̃ narüngüma ga norü chixexü̃gü
12 Rü moxẽ nüxna chaxã ya Ngechuchu ya Cristu ya tórü Cori ya choxü̃ naporaxẽẽcü. Yerü choxü̃ nangugü nax norü duü̃xü̃ i mexü̃ chixĩxü̃. Rü yemaca̱x choxü̃ nayaxu nax nüxü̃́ chapuracüxü̃ca̱x.
13 Rü woo ga ü̃pa ga choma rü chixri nachiga chidexa ga Cristu, rü nawe chingẽchigü ga yema nüxü̃́ yaxõgüxü̃ rü chixexü̃ Cristumaxã chixugü, natürü ga Tupana rü nüxü̃́ changechaü̃tümüxü̃, yerü tauta Cristuaxü̃́ chayaxõ rü tama nüxü̃ chacua̱x nax tama namexü̃ ga yema chaxüxü̃.
14 Rü yemaacü ga tórü Cori ya Ngechuchu rü poraãcü choxü̃ nangechaxü̃ rü choxü̃ narüngü̃xẽxẽ nax nüxü̃́ chayaxõxü̃ca̱x rü nagagu guxü̃ma i duü̃xü̃güxü̃ changechaü̃xü̃ca̱x.
15 Rü ñaa ore i pemaxã nüxü̃ chixuxü̃ rü aixcümaxü̃chi nixĩ, rü name nax guxãma yaxõgüxü̃. Rü aixcüma Ngechuchu ya Cristu rü ñoma ga naanewa nangu nax namaxẽxẽẽãxü̃ca̱x i pecaduã̱xgüxü̃. Rü ngẽmatanüwa rü choma nixĩ ga guxü̃arü yexera nax chixexü̃ chaxüxü̃.
16 Natürü Tupanaaxü̃́ changechaü̃tümüxü̃ nax ngẽmaãcü chowa duü̃xü̃güxü̃ nawéaxü̃ca̱x ga ñuxãcü nüma ga Ngechuchu ya Cristu yáxna chomaxã nax naxĩnüxü̃. Rü ngẽmaãcü wüxi i cua̱xruxü̃ chixĩ naxca̱x i guxü̃ma i duü̃xü̃gü nax nümagü rü ta nayaxõgüãxü̃ca̱x rü nayauxgüãxü̃ca̱x i maxü̃ i taguma gúxü̃.
17 Rü ñu̱xma tanaxwa̱xe i guxü̃gutáma nüxü̃ ticua̱xüü̃gü rü tanataxẽẽgü ya yimá nüxicatama Tupana ixĩcü. Rü woo tama nüxü̃ tadaugü i ñu̱xma, natürü nüma rü guxü̃guma Tupana nixĩ. Rü ngẽmaãcü yixĩ.
18 1:18-19 Pa Chaune, Pa Timutéux, ñaa nixĩ i chorü ore i cumaxã nüxü̃ chixuxü̃. Rü ü̃pa ga yexguma Tupana yadexaxẽẽgu ga ñuxre ga taenexẽgü, rü nüxü̃ nixugügü nax cuma rü tá mexü̃ i Tupanaarü orearü uruxü̃ quixĩxü̃. Rü ñu̱xma chanaxwa̱xe i yemagü nüxü̃ ixuxü̃rüxü̃ mexü̃ i curü õmaxã rü mexü̃ i curü ĩnümaxã cuyanguxẽxẽ i ngẽma puracü i mexü̃ ya Tupana nawa cuxü̃ muxü̃. Ñuxre i yaxõgüxü̃ rü nüxü̃ narüxoe ga yema mexü̃ ga noxri nagu naxĩnüexü̃ rü ngẽmagagu i ñu̱xma düxwa nüxü̃ narüxoe nax Cristuaxü̃́ yaxõgüãxü̃.
19 Nüü̃ nadau 1:18
20 Rü yema nixĩ ga nüxü̃ üpetüxü̃ ga Imenéu rü Areyándru. Rü düxwa choma Chatanána chanawogü ga yema taxre nax Chataná ngúxü̃ nüxü̃ ingexẽẽgüxü̃ca̱x nax ngẽmawa nüxü̃ nacua̱xgüxü̃ca̱x nax tama namexü̃ nax chixri Tupanachiga yadexagüxü̃.
Notas
^ 1:1 Yerü chauxü̃tawa nixĩ ga cunayaxuxü̃ ga Tupanaarü ore ga noxrix.
