1 Timoteo 3:1-16
3 Rü pemaxã nüxü̃ chixuxchaü̃ i wüxi i ore i aixcüma ixĩxü̃. Rü ngẽxguma chi texé naxwa̱xegu nax yaxõgüxü̃arü ãẽ̱xgacü tixĩxü̃, rü mexü̃ i puracü nixĩ i naxca̱x tadauxü̃.
2 Rü yíxema yaxõgüxü̃arü ãẽ̱xgacü rü tanaxwa̱xe nax aixcüma mecü tixĩxü̃ nax taxúema tümachiga chixri idexaxü̃ca̱x. Rü tanaxwa̱xe i wüxixicatama tixĩ ya tümama̱x, rü aixcüma mea tamaxü̃, rü mexü̃gu tarüxĩnü, rü duü̃xü̃gü rü tüxü̃ nangechaü̃gü rü tümaga naxĩnüe. Rü tanaxwa̱xe i ítamemare nax duü̃xü̃güxü̃ tayaxuxü̃ i tümapatawa, rü ngẽxgumarüxü̃ ta ítamemare nax duü̃xü̃güxü̃ tangúexẽẽxü̃.
3 Rü tama name i wüxi i ngãxwa̱xexü̃ rü nuwa̱xexü̃ tixĩ. Rü tama name i tümaarü diẽruguama rüxĩnüxe tixĩ. Natürü name nixĩ i guxü̃ i duü̃xü̃gümaxã yáxna taxĩnü rü namaxã tamecüma.
4 Rü tanaxwa̱xe i meama tümachiü̃maxã itacua̱x, rü tümaxacügü rü mea tümaga naxĩnüe, rü tüxü̃ nangechaü̃gü.
5 Erü ngẽxguma chi tama tümachiü̃maxã mea itacua̱xgu rü ¿ñuxãcü tá ngẽma Tupanaaxü̃́ yaxõgüxü̃maxã mea itacuáxü̃?
6 Rü yíxema ngẽma yaxõgüxü̃maxã icuáxe rü tama name nax wüxi ya ngexwaca yaxṍxe tixĩxü̃, erü ngürüãchi tá tügü ticua̱xüxü̃ rü ngẽmagagu nagu tangu i ngẽma poxcu i Chatanáca̱x namexẽẽxü̃ ya Tupana.
7 Rü tanaxwa̱xe i woo i ngẽma tama yaxõgüxü̃ rü tüxü̃ nangechaü̃gü nax taxúema chixri tümachiga idexagüxü̃ca̱x rü tama Chataná chixexü̃gu tüxü̃ nangu̱xẽẽxü̃ca̱x.
Diácunugüchiga
8 Rü ngẽxgumarüxü̃ ta i ngẽma diácunugü i Tupanapatawa ngü̃xẽẽtaegüxü̃, rü name nax duü̃xü̃gü nüxü̃ ngechaü̃güxü̃ yaxĩgüxü̃. Rü name i aixcüma nayanguxẽẽgü i ngẽma nüxü̃ yaxugüexü̃. Rü tama name i ngãxẽwa̱xexü̃ nixĩgü rüe̱xna duü̃xü̃güxü̃ nawomüxẽẽgüãcüma ngĩxü̃ nayauxgüxü̃ca̱x i diẽru.
9 Rü ngẽma diácunugü rü tanaxwa̱xe nax aixcüma mea yaxõgüãxü̃ i ngẽma ore i aixcüma ixĩxü̃. Rü nanaxwa̱xe i nügüãẽwatama nüxü̃ nacua̱xgü nax norü maxü̃ rü aixcüma yamexü̃ i Tupanape̱xewa.
10 Rü tanaxwa̱xe i ngẽma diácunuarü puracüwa nüxü̃ taxüxíra. Rü ngẽxguma mea yanguxẽẽgüãgu i ngẽma puracü, rü marü name i diácunugü yaxĩgüxü̃.
11 Rü naxma̱xgü i ngẽma yatügü i diácunugü, rü name nax duü̃xü̃gü nüxü̃ ngechaü̃güxü̃ yaxĩgüxü̃. Rü tama name i oregüta̱xaxgüxü̃ nixĩgü, natürü tanaxwa̱xe i mea namaxẽ rü aixcüma nayanguxẽẽgü i guxü̃ma i ngẽma nüxü̃ yaxugüxü̃.
12 Rü ngẽma diácunugü rü tanaxwa̱xe i wüxixicatama tixĩ ya naxma̱x. Rü tanaxwa̱xe i meama napatacüã̱xgümaxã inacua̱x, rü naxacügü rü mea naga naxĩnüe.
13 Rü ngẽma yatügü i diácunugü, rü ngẽxguma meama naxügüãgu i norü puracü i Tupanapatawa rü guxü̃ma i duü̃xü̃gü tá nüxü̃ nangechaü̃gü. Rü ñu̱xũchi i nümagütama i ngẽma diácunugü, rü tá poraãcü nataãẽgü, erü Ngechuchu ya Cristuaxü̃́ nayaxõgü.
Aixcüma nixĩ i ngẽma ore i Tupana tüxü̃ nüxü̃ cua̱xẽxẽxü̃ i Cristuchiga
14 3:14-15 Rü chanaxwa̱xe i paxa ngéma cuxü̃tawa chaxũ nax cuxü̃ íchayadauxü̃ca̱x. Natürü ngẽxguma chi tama paxa ngéma chaxũxgu, rü ngẽmaca̱x cuxca̱x chanaxümatü i ñaa popera nax nüxü̃ cucuáxü̃ca̱x i ñuxãcü tá cugümaxã icucuáxü̃ nape̱xewa i ngẽma duü̃xü̃gü i Tupanaaxü̃́ yaxõgüxü̃. Erü nümagü nixĩ ya Tupana ya Maxü̃cüarü duü̃xü̃gü yaxĩgüxü̃, rü nümagü nixĩ i ínapoxü̃güãxü̃ i norü ore i aixcüma ixĩxü̃.
15 Nüü̃ nadau 3:14
16 Rü nüxü̃ tacua̱x nax aixcüma yixĩxü̃ i ngẽma ore ga noxri ẽxü̃guxü̃ i ñu̱xma Tupana tüxü̃ nüxü̃ cua̱xẽẽxü̃ i Cristuchiga. Rü nüma ga Cristu rü duü̃xü̃xü̃ nügü nixĩxẽxẽ rü yemaacü nügü nango̱xẽxẽ ga yexguma ñoma ga naanewa nayexmagu. Rü Naãxẽ ya Üünexü̃ tüxü̃ nüxü̃ nacua̱xẽxẽ nax Cristu rü aixcüma Tupana yixĩxü̃. Rü Tupanaarü orearü ngeruü̃gü i daxũcüã̱x nüxü̃ nadaugü. Rü ngẽma tama Yudíugü ixĩgüxü̃maxã nüxü̃ nixuchigagü. Rü guxü̃wama i ñoma i naanewa rü nüxü̃́ nayaxõgü. Rü Nanatü rü wenaxarü daxũguxü̃ i naanewa nanaga.
