1 Pedro 2:1-25
2 Rü ngẽmaca̱x name nixĩ i nüxü̃ perüxoe i guxü̃ma i chixexü̃gü, rü ngẽma nax pidorata̱a̱xgüxü̃, rü ngẽma nax togüpe̱xewa mea pemaxẽnetaxü̃, rü ngẽma nax pixãũxãchiwa̱xegüxü̃, rü ngẽma nax pixoregüta̱a̱xgüxü̃.
2 2:2-3 Rü ñoma wüxi i õxchana i ngexwaca buxü̃ i naégünenixü̃ nüxü̃́ ngúchaü̃xü̃rüxü̃ penaxwa̱xe i poraãcü pexü̃́ nangúchaü̃ i Tupanaarü ore nax ngẽmawa peporaexü̃ca̱x rü mea peyaexü̃ca̱x i perü õwa nax ngẽmaãcü guxü̃wama namexü̃ca̱x i perü maxü̃ i taguma gúxü̃.
3 Nüü̃ nadau 2:2
Cristu nixĩ ya nuta ya maxü̃cü
4 Rü ñu̱xma rü name nixĩ i nüxna pengaicamagü ya Cristu ya nuta ya maxü̃cü. Rü duü̃xü̃gü nüxü̃ oecü, natürü Tupanaca̱x rü namexẽchi rü natatanü. Rü yimá nixĩ ya Tupana nayaxucü nax namaxã inaxügüãxü̃ca̱x ya napata.
5 Rü ngẽxgumarüxü̃ ta i pemax, rü Tupana pexü̃ nade nax napataarü nutagü ya maxẽcü pixĩgüxü̃. Rü pema nixĩ i Tupanaarü ngü̃xẽẽruü̃gü i üünexü̃ ya Ngechuchu ya Cristuégagu Tupanana ãmare pexãgüxü̃. Rü ngẽma ãmare i nüxna pexãgüxü̃ i namaxã nataãẽxü̃ rü ngẽma nixĩ i perü maxü̃.
6 Rü Tupana rü norü ore i ümatüxü̃wa rü ñanagürü:“Choma rü Chióü̃gu chanaxǘ ya wüxi ya nuta, rü yimá nixĩ ya nuta ya mexẽchicü ya chomatama chanayaxucü nax chopata namaxã ichaxügüxü̃ca̱x.Rü yíxema nüxü̃́ yaxṍxe, rü taxũtáma tüxü̃ chawomüxẽxẽ rü aixcüma tá tanayaxu i maxü̃ i taguma gúxü̃ i tümamaxã ichaxunetaxü̃”,
ñanagürü.
7 Rü pema nax nüxü̃́ peyaxõgüxü̃, rü pexca̱x rü namexẽchi ya yimá nuta. Natürü ngẽma tama yaxõgüxü̃ca̱x, rü taxuwama name. Rü ngẽmaca̱x Tupanaarü ore i ümatüxü̃wa rü ñanagürü:“Yimá nuta ya ĩpataarü üruü̃gü nüxü̃ oecü, rü yimáétüwa nixĩ inaxügüxü̃ ya chopata”,
ñanagürü.
8 Rü Tupanaarü ore rü ñanagürü ta:“Ngẽma tama yaxõgüxü̃ rü yimá nutagu tá nayarüpucutügü”,
ñanagürü. Rü ngẽmaãcü i ngẽma tama yaxõgüxü̃ rü tá napoxcue, erü tama nanayauxgü i ngẽma ore ya Ngechuchu ya Cristuchiga ixĩxü̃.
9 Natürü pema nixĩ i duü̃xü̃gü i tórü ãẽ̱xgacü ya Tupana pexü̃ dexü̃ nax norü puracü pexügüxü̃ca̱x. Rü pema nixĩ i duü̃xü̃gü i nape̱xewa ixüünexü̃, erü nümatama ya Tupana rü norü duü̃xü̃güxü̃ pexü̃ nixĩgüxẽxẽ nax nüxü̃ pixuxü̃ca̱x i ngẽma mexü̃gü i norü poramaxã naxüxü̃. Rü nümatama ya Tupana nixĩ ga ẽanexü̃wa pexü̃ ínanguxü̃xẽẽxü̃ nax norü ngóonexü̃ i mexẽchixü̃gu pechocuxü̃ca̱x.
10 Rü ü̃pa ga pema rü tama Tupanaarü duü̃xü̃gü pixĩgü, natürü i ñu̱xma rü aixcüma norü duü̃xü̃gü pixĩgü. Rü ü̃pa rü tama Tupanaaxü̃́ pengechaü̃tümüxü̃gü, natürü i ñu̱xma rü aixcüma Tupanaaxü̃́ pengechaü̃tümüxü̃gü.
Ñu̱xma nax peyaxõgüxü̃ rü name nixĩ i Tupanaga pexĩnüe
11 Pa Chauenexẽgü ya Pexü̃ Changechaü̃güxe, ñu̱xma nax paxaãchimare ñoma i naanewa pengẽxmagüxü̃, rü ngẽmaca̱x pexü̃ chaca̱xaxü̃ nax nüxü̃ perüxoexü̃ca̱x i guxü̃ma i ngẽma ngúchaü̃gü i chixexü̃ i ñoma i naanecüã̱x nagu ĩxü̃. Erü ngẽma ngúchaü̃gü rü chixexü̃gu nanagu̱xẽẽchaü̃ i peãxẽ.
12 Rü name nixĩ i mea pemaxẽ nape̱xewa i ngẽma duü̃xü̃gü i tama Tupanaxü̃ cua̱xgüxü̃. Rü woo ñu̱xma chixri pechiga yadexagügu, natürü tá nüxü̃ nadaugü i ngẽma mexü̃ i pexügüxü̃, rü tá Tupanaxü̃ nicua̱xüü̃gü i ngẽma ngunexü̃ i nagu Tupana guxãxü̃ma icagüxü̃gu.
13 Rü name nixĩ nax tórü Cori ya Ngechuchugagu naga pexĩnüexü̃ i guxü̃ma i perü ãẽ̱xgacügü. Rü name nixĩ i naga pexĩnüe ya yimá ãẽ̱xgacü ya Rómawa ngẽxmacü, erü nüma nixĩ i guxü̃ i togü i ãẽ̱xgacügüétüwa nangẽxmaxü̃.
14 Rü ngẽxgumarüxü̃ ta name nixĩ i naga pexĩnüe i ngẽma togü i ãẽ̱xgacügü i petanüwa namugüxü̃ ya yimá ãẽ̱xgacü ya Rómawa ngẽxmacü nax napoxcueãxü̃ca̱x i ngẽma chixexü̃ ügüxü̃ rü namaxã nataãẽgüxü̃ca̱x i ngẽma mexü̃ ügüxü̃.
15 Erü Tupana nanaxwa̱xe nax mexü̃ pexügüxü̃ nax ngẽmaãcü ipeyanangea̱xgüxẽẽxü̃ca̱x i ngẽma duü̃xü̃gü i tama naãxẽxü̃ cuáxü̃ rü ngẽma naechitamare maxẽxü̃.
16 Rü ñu̱xma nax Cristu pexü̃ ínguxü̃xẽẽxü̃, rü name nixĩ i duü̃xü̃gü i aixcüma ínguxü̃xü̃rüü̃ãcü mea pemaxẽ. Natürü ñu̱xma nax ípenguxü̃xü̃ rü tama name nax ngẽmamaxã pegü ípepoxü̃xü̃ nax ta̱xacürü chixexü̃ pexügüxü̃ca̱x. Erü ñu̱xma nax Tupanaarü duü̃xü̃gü pixĩgüxü̃, rü name nixĩ i norü ngúchaü̃ pexügü.
17 Rü name nixĩ i mea penayauxgü i guxü̃ma i duü̃xü̃gü. ¡Rü nüxü̃ pengechaxü̃ i taenexẽgü i yaxõgüxü̃! ¡Rü nüxü̃ pemuü̃e ya Tupana! ¡Rü naga pexĩnüe ya yimá ãẽ̱xgacü ya Rómawa ngẽxmacü!
Tanaxwa̱xe i Cristurüxü̃ yáxna namaxã taxĩnüe i ngẽxguma ngúxü̃ ingegügu
18 Pa Duü̃xü̃gü i Coriã̱xgüxü̃x, ¡rü nüxü̃ pengechaxü̃gü rü naga pexĩnüe i perü corigü! Rü tama name i perü corigü i pemaxã mecümaxü̃xü̃xicatama pengechaü̃gü, natürü name i nüxü̃ pengechaü̃gü ta i ngẽma perü corigü i chixecümaxü̃.
19 Erü Tupana rü tümamaxã nataãxẽ ega yáxna namaxã taxĩnüegu i ngẽma tümaarü cori i ngẽxguma natüca̱xma guxchaxü̃gü tümaca̱x ínanguxẽẽgügu rü ngúxü̃ tüxü̃ yangexẽẽgügu nagagu nax Tupanaaxü̃́ tayaxõgüxü̃.
20 Natürü ¿ta̱xacüwa pexü̃́ namexü̃ ega yáxna namaxã pexĩnüegu i ngẽxguma wüxi i perü chixexü̃ca̱x pepoxcuegu? Natürü ngẽxguma ta̱xacürü mexü̃ i pexüxü̃gagu ngúxü̃ pingegügu rü yáxna namaxã pexĩnüegu, rü ngẽmawaxi nixĩ i Tupanape̱xewa mexü̃.
21 Rü ngẽma nax mexü̃ pexüxü̃gagu ngúxü̃ pingegüxü̃ca̱x nixĩ ya Tupana pexü̃ dexü̃. Yerü ga Cristu rü ta pexca̱x ngúxü̃ ninge. Rü yemaacü pexü̃ nüxü̃ nadauxẽxẽ nax naxrüxü̃ yáxna namaxã pexĩnüexü̃ i ngẽma ngúxü̃.
22 Nüma ga Cristu rü taguma pecadu naxü, rü taguma texéxü̃ nawomüxẽxẽ.
23 Rü yexguma duü̃xü̃gü chixexü̃ namaxã ixugüegu, rü nüma rü taxuxü̃ma ga chixexü̃maxã nanangãxü̃. Rü yexguma ngúxü̃ nüxü̃ yangexẽẽgügu, rü nüma rü tama ta̱xacürü chixexü̃maxã nanaxãũxü̃ne. Natürü nüma ga Cristu rü nügü inaxã nüxna ya Tupana ya mea nangugücü i guxü̃ma i duü̃xü̃güarü maxü̃.
24 Rü nümatama ga Cristu rü nügüxü̃negu nayange ga tórü pecadugü ga yexguma curuchagu nayu̱xgu. Rü yemaacü nanaxü nax nüxü̃ rüxoexü̃ca̱x i tórü chixexü̃ rü naxca̱xicatama imaxẽxü̃ca̱x. Nüma rü pexca̱x nanapi̱x nax yemaacü pexü̃ nameexẽẽxü̃ca̱x.
25 Rü pema ga ü̃pa rü ñoma carnérugü i irütauxexü̃rüxü̃ pixĩgü. Natürü i ñu̱xma rü marü Cristuca̱x pewoegu. Rü nüma nixĩ i perü dauruxü̃ yixĩxü̃, rü nüma nixĩ i pexna nadauxü̃.
