1 Pedro 3:1-22
3 3:1-2 Rü pemax, Pa Ngexü̃güx, rü name nixĩ i petega pexĩnüe. Rü ngẽxguma chi nangẽxmagu i petegü i tama yaxõgüxü̃ rü tá nüxü̃ nadaugü i perü maxü̃ i mexü̃ i Tupanape̱xewa rü duü̃xü̃güpe̱xewa rü tá ngẽmaca̱x nayaxõgü woo nataxuxguma i ucu̱xẽxü̃ namaxã pixuxgu.
2 Nüü̃ nadau 3:1
3 Rü ngẽxguma pegü pemexẽẽgu, rü tama name i nagu perüxĩnüe nax peyaewa pegü pemexẽẽxüchixü̃, rü ẽ̱xna úirunaxca̱x i ngã̱xãẽruü̃maxã penga̱xãẽgüxü̃, rüe̱xna tatanüxü̃chixü̃ i naxchirugu nax picu̱xgüxü̃.
4 Natürü name nixĩ i perü maxü̃wa pegü pimexẽxẽgü rü guxü̃ma i duü̃xü̃gümaxã pimecümagü rü taguma texémaxã penuãẽgü, erü ngẽma nixĩ i perü mexü̃ i taguma iyarüxoxü̃ i aixcüma mexü̃ i Tupanape̱xewa.
5 Rü yema nũxcümaü̃güxü̃ ga ngexü̃gü ga Tupanape̱xewa ixüünexü̃ rü Tupanaaxü̃́ iyaxõgü rü ngĩtega ixĩnüe, rü yema nixĩ ga ngĩxrü ngã̱xãẽruü̃gü.
6 Rü yemaacü ta iyixĩ ga Chára ga ngĩte ga Abraáü̃ga nax naxĩnüxü̃, rü ngĩrü corimaxã naxuaxü̃. Rü pema rü ta ngĩxrüxü̃ pixĩgü ega mexü̃ pexügügu rü ñu̱xũchi taxuca̱xtama tü̱xcüü̃ pemuü̃e.
7 Rü ngẽxgumarüxü̃ ta i pemax, Pa Yatügüx, rü name nixĩ i mea pexma̱xü̃ pengechaü̃gü rü yáxna ngĩmaxã pexĩnüe, erü ngĩma rü irüturamae. Rü name nixĩ i ngĩmaxã petaãẽgü erü Tupana pexna naxãxü̃rüxü̃ ngĩxna nanaxã i maxü̃ i taguma gúxü̃. Rü name nixĩ i ngẽmaãcü mea ngĩxü̃ pengechaxü̃gü nax taxuxü̃ma yatoxyepe̱xexü̃ca̱x i perü yumüxẽgü.
Yíxema mexü̃ ügüxe rü ngẽmaca̱x ngúxü̃ ingegüxechiga
8 Rü chanaxwa̱xe i guxãma i pemax rü wüxigu perüxĩnüe, rü pegüxü̃́ pengechaü̃tümüxü̃gü rü pegü pengechaü̃gü, ñoma pegüenexẽxü̃chixü̃ pengechaü̃xü̃rüxü̃. Rü chanaxwa̱xe i aixcüma pemecümagü rü pegü íperüxíxragü.
9 Rü ngẽxguma texé chixexü̃ pexca̱x üxgu, rü tama name i pema rü ta chixexü̃ tümaca̱x pexü. Rü ngẽxguma texé pemaxã guxchigagu, rü tama name i pema rü ta tümamaxã peguxchiga. Natürü name nax mexü̃ tümamaxã pexueguxü̃, erü Tupana pexü̃ nade nax mexü̃ pemaxã naxueguxü̃ca̱x.
10 Erü Tupanaarü ore rü ñanagürü:“Ngẽxguma texé tümaxarü maxü̃xü̃ ngechaü̃gu rü taãẽãcüma tamachaü̃gu, rü name nixĩ i nüxna tadau ya tümaarü conü nax tama chixexü̃ i oremaxã yadexaxü̃ca̱x rü nüxna tadau i tümaã̱x nax tama doraxü̃ yaxuxü̃ca̱x.
11 Rü name nixĩ i nüxna tayaxü̃ i guxü̃ma i chixexü̃gü, rü mexü̃ taxü.Rü ngẽxgumarüxü̃ ta name nixĩ i naxca̱x tadau nax guxü̃guma duü̃xü̃gümaxã tamecümagüxü̃.
12 Erü nüma ya tórü Cori rü tüxna nadau ya yíxema aixcüma naga ĩnüexe, rü nüxü̃ naxĩnü i tümaarü yumüxẽ.Natürü tümamaxã nanu ya yíxema chixexü̃ ügüxe”,
ñanagürü i Tupanaarü ore.
13 ¿Rü texé tá chixexü̃ pexca̱x üxü̃ ega pema rü aixcüma guxü̃guma mexü̃ pexügügu?
14 Natürü ngẽxguma chi mexü̃ nax pexügüxü̃ca̱x ngúxü̃ pingegügu, ¡rü petaãẽgü i pema! ¡Rü taxuca̱xma texéxü̃ pemuü̃e, rü bai ta̱xacüca̱x peba̱i̱xãchiãxẽgü!
15 Rü name nixĩ i perü Corixü̃ peyaxĩxẽxẽ ya Cristu rü aixcüma naga pexĩnüe. Rü name nixĩ i guxü̃guma ípememare nax mea penangãxü̃xü̃ca̱x i guxü̃ma i ngẽma duü̃xü̃gü i pexna ca̱xaxü̃ nax ta̱xacüca̱x Cristuaxü̃́ peyaxõgüxü̃.
16 Natürü name nixĩ i tama pegü picua̱xüü̃güãcüma penangãxü̃ rü tama pegügu perüxĩnüeãcüma nax ngẽma duü̃xü̃güarü yexera pixĩgüxü̃. Rü name nixĩ i mea pemaxẽ nax taxuca̱xma pexoegaãẽgüxü̃ca̱x. Rü ngẽxguma ngẽmaãcü pemaxẽgu rü tá naxãnẽxẽ i ngẽma duü̃xü̃gü i chixri pechiga idexagüxü̃ naxca̱x nax Cristuca̱x pemaxẽxü̃.
17 Yixema rü ngúxü̃ tingegü ega chixexü̃ ixügügu. Rü narümemae nixĩ nax mexü̃ ixügüxü̃ca̱x ngúxü̃ nax ingegüxü̃, ega ngẽmaãcü Tupana naxwa̱xegu.
18 Yerü nümatama ga Cristu rü ngúxü̃ ninge, rü wüxicanatama guxãarü pecaduca̱x nayu. Rü nüma rü taxuxü̃ma ga chixexü̃ naxü, natürü chixexü̃ ga duü̃xü̃güca̱x ngúxü̃ ningẽ nax Tupanaxü̃tawa pexü̃ nagagüxü̃ca̱x. Rü woo nayu ga naxü̃ne, natürü ga naãxẽ rü namaxü̃.
19 Rü yexguma nayu̱xgu, rü naãxẽ rü natanüwa naxũ ga yema naãxẽgü ga poxcuexü̃, rü namaxã nüxü̃ nayarüxu ga Tupanaarü ore.
20 Rü yema naãxẽgü ga yexma poxcuexü̃, rü yema nixĩ ga naãxẽgü ga yema duü̃xü̃gü ga Noé maxü̃gu tama ixĩnüechaü̃xü̃ woo Tupana yáxna namaxã naxĩnü ga yexguma Noé naxüyane ga gumá wapuru. Rü 8 ga duü̃xü̃güxicatama nixĩ ga gumá wapurugu ichoü̃xü̃, rü yema nixĩ ga gumá mucü ga taxüchicüarü dexáétüwa maxẽxü̃.
21 Rü ngẽma dexá rü wüxi i cua̱xruxü̃ nixĩ. Erü ngẽxguma ngẽma dexáwa íibaiegu, rü duü̃xü̃güxü̃ nüxü̃ tacua̱xẽxẽ nax Tupanaga taxĩnüexü̃ nax tüxü̃́ nangẽxmaxü̃ i maxü̃ i taguma gúxü̃. Rü tama taxü̃nearü düxétüwa nax imexü̃ca̱x nixĩ i íibaiexü̃, natürü ítabaie erü marü Tupanana naxca̱x taca nax tüxü̃́ iyanaxoxẽẽãxü̃ca̱x i tórü pecadugü rü Ngechuchu ya Cristu wena maxü̃xü̃gagu nape̱xewa imexü̃ca̱x rü mexü̃gu rüxĩnüexü̃ca̱x.
22 Rü nüma ga Ngechuchu ya Cristu, rü daxũguxü̃ i naanewa naxũ, rü ñu̱xma rü Tupanaarü tügünecüwawa nangẽxma. Rü ñu̱xma rü naxme̱xwa nangẽxmagü i guxü̃ma i Tupanaarü orearü ngeruü̃gü i daxũcüã̱x, rü guxü̃ma i ngẽma naãxẽgü i ãẽ̱xgacügü ixĩgüxü̃, rü guxü̃ma i ngẽma naãxẽgü i poraexü̃.
