1 Pedro 4:1-19
4 4:1-2 Cristu rü naxü̃newa ngúxü̃ ningẽ, rü ngẽxgumarüxü̃ ta name nixĩ nax ípememarexü̃ nax ngúxü̃ pingegüxü̃. Rü yíxema ngúxü̃ ingexe rü marü nüxü̃ tarüxo i tümaarü pecadu nax ngẽmawena Tupana naxwa̱xexü̃ãcüma tamaxü̃xü̃ca̱x, rü tama tümaxü̃ne naxwa̱xexü̃ãcüma nax tamaxü̃xü̃ca̱x.
2 Nüü̃ nadau 4:1
3 Ü̃pa ga pemax, rü mucüma ga taunecü nagu pemaxẽ i ngẽma chixexü̃ i ñu̱xma ngẽma duü̃xü̃gü i tama Tupanaxü̃ cua̱xgüxü̃ nagu maxẽxü̃. Rü yexguma ga pema rü pecadugu pemaxẽ, rü penaxü ga pexenearü ngúchaü̃, rü õnagü ga taxü̃ pexügü, rü petagü ga nawa pexãũgatanüxü̃ pexügü, rü pengãxẽ, rü tupananetachicüna̱xãgüxü̃ picua̱xüü̃gü.
4 Rü ñu̱xma nax tama namaxã pexãmücügüxü̃ i ngẽma duü̃xü̃gü i ngẽxguma norü chixexü̃ naxügügu, rü nagu narüxĩnüe nax ta̱xacüca̱x tama natanügu pexãgüxü̃. Rü ngẽmaca̱x chixri pechiga nidexagü.
5 Natürü nümagü rü tá Tupanape̱xewa nangugü nax namaxã nüxü̃ yaxugüxü̃ca̱x nax ñuxãcü namaxẽxü̃. Rü nüma ya Tupana rü ínamemare nax nüxna yacachigüxü̃ca̱x i guxü̃ma i duü̃xü̃gü i maxẽxü̃ rü duü̃xü̃gü i yuexü̃.
6 Rü yexguma ñoma ga naanewa namaxẽgu ga yema duü̃xü̃gü ga marü yuexü̃, rü Tupanaarü orearü uruü̃gü namaxã nüxü̃ nixu ga Tupanaarü ore nax namaxẽxü̃ca̱x i naãxẽgü. Rü yema nixĩ i nanaxwa̱xe ya Tupana woo ñoma ga naanewa rü ãẽ̱xgacügü rü ngúxü̃ nüxü̃ ningexẽẽgü ga yema duü̃xü̃gü.
7 Rü marü ningaica nax nagúxü̃ i ñoma i naane rü guxü̃ma i ta̱xacü i nawa ngẽxmaxü̃. Rü ngẽmaca̱x name nixĩ nax pexuãẽgüxü̃, rü mea peãxẽxü̃ pecuáxü̃, rü guxü̃guma peyumüxẽgüxü̃.
8 Rü guxü̃arü yexera i ngẽma pexü̃́ chanaxwa̱xexü̃ nixĩ nax aixcüma pegü pengechaü̃güxü̃ i wüxichigü. Erü ngẽxguma aixcüma pegü pengechaü̃gügu rü ngẽmaãcü inayarüxo i muxü̃ma i pecadugü.
9 ¡Rü wüxichigü i pemax, rü name i mea pegü peyauxgü i pechiü̃wa! Rü tama name i tümamaxã penuãẽãcüma tüxü̃ peyauxgü.
10 Rü wüxichigü i pemax, rü Tupana pexna nanaxã i perü cua̱x. Rü ngẽma cua̱x ya Tupana pexna ãxü̃maxã rü name nixĩ i wüxichigü pegü perüngü̃xẽẽgü.
11 Rü yíxema nüxü̃ cuáxe nax mea tidexaxü̃, rü name nixĩ nax Tupanaarü orexü̃ tixuxü̃. Rü ngẽxguma texé tüxü̃́ nangẽxmagu i cua̱x nax togüxü̃ tarüngü̃xẽẽxü̃, rü name nixĩ i ngẽma pora ya Tupana tüxna ãxü̃maxã nüxü̃ tarüngü̃xẽxẽ. Rü guxü̃ma i ngẽma pexüxü̃ rü name nixĩ i meama penaxü nax ngẽmaãcü Ngechuchu ya Cristugagu Tupanaxü̃ picua̱xüü̃güxü̃ca̱x. Erü nüma ya Tupana rü guxü̃guma naxüüne rü naporaxüchi. Rü ngẽmaãcü yixĩ.
Ngẽxguma Cristuaxü̃́ yaxõ̱xgu rü ngúxü̃ tinge
12 Pa Chauenexẽgü ya Pexü̃ Changechaü̃güxe, ñu̱xma nax taxü̃ i guxchaxü̃gü pexca̱x ínguxü̃, ¡rü taxṹ i peba̱i̱xãchiãxẽgüxü̃, ñoma ta̱xacü i taguma nüxü̃ pedauxü̃ pexca̱x ínguxü̃rüxü̃!
13 Natürü narümemae nixĩ nax petaãẽgüxü̃, yerü yema Cristu ngúxü̃ nax ingexü̃rüxü̃ nixĩ i ngúxü̃ nax pingegüxü̃ i ñu̱xmax nax ngẽmaãcü petaãẽgüxü̃ca̱x i ngẽxguma wena núma naxũxgu i nümax.
14 Rü ngẽxguma Cristuaxü̃́ nax peyaxõgüxü̃gagu texé pemaxã guxchigagu, rü name nixĩ i petaãẽgü. Erü ngẽmaãcü nüxü̃ pecua̱x nax Tupanaãxẽ ya Üünecü rü pewa nax nangẽxmaxü̃.
15 Rü ngẽxguma chi wüxíe i petanüwa ngúxü̃ ingexgu, rü tama tanaxwa̱xe nax wüxi i chixexü̃gagu nax yixĩxü̃, ngẽxgumarüxü̃ i máeta rüe̱xna ngĩ́ta̱a̱x rüe̱xna texémaxã tanuxü̃.
16 Natürü ngẽxguma texé Cristuaxü̃́ tayaxõxü̃gagu ngúxü̃ tingexgu, rü taxuca̱xma taxãnee. Rü name i ngẽmaca̱x Tupanaxü̃ ticua̱xüxü̃.
17 Rü ñu̱xma rü marü nawa nangu nax Tupana tüxna ca̱xaxü̃ i yixema nax naxacügü ixĩgüxü̃. Rü ngẽxguma tawa inaxügüãgu, rü ¿ñuxãcü tá nüxü̃ naxüpetü i ngẽma duü̃xü̃gü i tama naga ĩnüexü̃ i Tupanaarü ore i mexü̃?
18 Erü Tupanaarü ore i ümatüxü̃wa rü ñanagürü:“Ngẽma duü̃xü̃gü i mexü̃ ügüxü̃ rü guxchaãcüma nanayauxgü i maxü̃ i taguma gúxü̃.Rü ñu̱xma nax ngẽmaãcü yixĩxü̃, ¿rü ñuxãcü tá nüxü̃ nangupetüxü̃ i ngẽma chixexü̃ ügüxü̃ rü pecaduã̱xgüxü̃?”
ñanagürü.
19 Rü ngẽmaca̱x ya yíxema Tupana naxwa̱xexü̃ãcüma ngúxü̃ ingegüxe, rü name nixĩ nax mexü̃ taxügüechaxü̃ rü Tupana ya tüxü̃ ücüme̱xẽgu nax tanaxüxü̃ i tümaarü maxü̃ nax nüxna tüxü̃́ nadauxü̃ca̱x. Erü nüma ya Tupana rü mecü nixĩ rü nayanguxẽxẽ i ngẽma tümamaxã inaxunetaxü̃.
