1 Pedro 5:1-14
5 Rü ñu̱xmax, Pa Yaxõgüxü̃arü Ãẽ̱xgacügüx, rü pemaxã nüxü̃ chixu i wüxi i ucu̱xẽ i mexü̃, erü choma rü ta pexrüxü̃ yaxõgüxü̃arü ãẽ̱xgacü chixĩ. Rü chomaxü̃chima nixĩ ga nüxü̃ chadauxü̃ ga ngúxü̃ nax yangexü̃ ga Cristu. Rü choma rü tá ta pexrüxü̃ choxü̃́ nangẽxma i chauchica i mexü̃ i ngẽxguma wena núma naxũxgu.
2 Rü chanaxwa̱xe i mea nüxna pedau i Tupanaarü duü̃xü̃gü i pexme̱xwa ngẽxmagüxü̃. Rü name nixĩ i perü ngúchaü̃maxã Tupana naxwa̱xexü̃ãcüma penaxü i ngẽma puracü, rü tama texé pexü̃ muxguxica penaxü rüe̱xna diẽruca̱x penaxü.
3 Rü tama name i chixri namaxã ipecua̱x rü penangaãcüma penamu i ngẽma duü̃xü̃gü i pexme̱xwa ngẽxmagüxü̃. Natürü chanaxwa̱xe i mexü̃ i nacüma nüxü̃ pewe̱x.
4 Rü ngẽxguma wena núma naxũxgu ya tórü Dauruü̃xü̃chi ya Cristu, rü pema rü tá penayauxgü i perü ãmare i nga̱xcueruxü̃ i mexẽchixü̃ i taguma ngauxü̃.
5 Rü ngẽxgumarüxü̃ ta i pemax, Pa Ngextü̱xücügüx, rü name nixĩ i naga pexĩnüe i ngẽma perü ãẽ̱xgacügü i Tupanaarü puracümaxã icua̱xgüxü̃. Rü guxãma i pema i yaxõgüxü̃, rü name nixĩ i wüxichigü mea pegüga pexĩnüe rü tama pegügu perüxĩnüe nax pemücügüarü yexera pixĩgüxü̃. Erü Tupanaarü ore i ümatüxü̃wa rü ñanagürü:“Tupana rü tama norü me nixĩ i ngẽma duü̃xü̃gü i nügü icua̱xüxü̃güxü̃.Natürü nüxü̃ narüngü̃xẽxẽ rü namaxã namecüma i ngẽma duü̃xü̃gü i tama nügü icua̱xüxü̃güxü̃”,
ñanagürü i ngẽma ore.
6 Rü name i naga pexĩnüe ya Tupana rü naxme̱x ya poranetüxü̃wa pegü pengẽxmagüxẽxẽ nax nüma pexü̃ yacua̱xüxü̃xü̃ca̱x i ngẽxguma nawa nanguxgu i ngẽma ngunexü̃.
7 Rü name nixĩ i Tupanamaxã nüxü̃ pixu i guxü̃ma i perü oegaãẽgü, erü nüma ya Tupana rü guxü̃guma pegu narüxĩnü rü mea pexna nadau.
8 Rü name nixĩ i guxü̃guma pegüna pedaugü rü ípexuãẽgü, erü perü uanü i Chataná rü ñoma wüxi ya leóü̃ ya idüraxüchicürüxü̃ nanañaane rü tümaca̱x nadau nax texéxü̃ tá chixexü̃gu nanguxẽẽxü̃.
9 ¡Rü peporaeama rü peyaxõgüama i ngẽxguma ta̱xacürü chixexü̃gu pexü̃ nayixẽẽchaü̃gu! Erü nüxü̃ pecua̱x rü guxü̃ma i taenexẽgü i guxü̃wama ngẽxmagüxü̃ rü pexrüxü̃ ngẽmatama ngúxü̃ ningegü.
10 Natürü ngẽxguma paxaãchi ñoma i naanewa ngúxü̃ pingegüguwena, rü Tupana rü tá pexü̃ nimexẽxẽ nax aixcüma nape̱xewa pimexü̃ca̱x. Rü woo guxchaxü̃gü pexca̱x ínguxgu, rü tá pexü̃ narüngü̃xẽxẽ nax peyaxõgüamaxü̃ca̱x, rü tá pexü̃ naporaexẽxẽ nax ngẽmaãcü taxuca̱xma pemuü̃exü̃ca̱x. Rü nümatama ya Tupana nixĩ i norü ngechaü̃gagu pexü̃ nadexü̃ nax guxü̃guma naxü̃tawa pexü̃́ nangẽxmaxü̃ca̱x i pechica, erü Ngechuchu ya Cristuaxü̃́ peyaxõgü.
11 Rü ngẽmaca̱x name i guxü̃guma nüxü̃ ticua̱xüü̃gü ya Tupana ya Guxü̃étüwa Ngẽxmacü. Rü ngẽmaãcü yixĩ.
Pedru rü wüxi i moxẽmaxã nanagu̱xẽxẽ i norü popera
12 Taenexẽ ya Chilbánu ya mea yaxõcüarü ngü̃xẽẽmaxã pexca̱x chanaxümatü i ñaa nuxmarexü̃ i popera nax pexü̃ chixucu̱xẽgüxü̃ca̱x rü pemaxã nüxü̃ chixuxü̃ca̱x nax ngẽma Tupanaarü ngü̃ẽxẽ i pexna naxãxü̃ rü wüxi i cua̱xruxü̃ nixĩ nax poraãcü pexü̃ nangechaü̃xü̃. Rü name nixĩ i taguma nüxü̃ perüngü̃maexü̃ nax pexü̃ nangechaü̃xü̃.
13 Rü pexü̃ narümoxẽgü i guxü̃ma i taenexẽgü i yaxõgüxü̃ i pexrüxü̃ Tupana dexü̃ i Babiróniawa* ngẽxmagüxü̃. Rü ngẽxgumarüxü̃ ta pexü̃ narümoxẽ i chorü ngü̃xẽẽruxü̃ i Márcu ya chaunerüxü̃ ixĩcü.
14 Rü chanaxwa̱xe i wüxichigü i pema, rü pegü pengechaü̃güãcüma pegü perümoxẽgü. Rü ngẽxgumarüxü̃ ta chanaxwa̱xe nax aixcüma petaãẽgüxü̃ i guxãma i pema nax Ngechuchu ya Cristuarü duü̃xü̃gü pixĩgüxü̃. Rü ngẽmaãcü yixĩ.
Notas
^ 5:13 Rómawa.
