1 Reyes 10:1-29
10 Rü ngĩma ga Chabáanearü ãẽ̱xgacü rü yexguma nüxü̃ naxĩnügu ga nachiga ga Charomóü̃ rü ñuxãcü Tupana mexü̃maxã rü cua̱xmaxã poraãcü nüxü̃ nax nangü̃xẽẽxü̃, rü yemaca̱x yéma ixũ nax guxchagüxü̃ ga oremaxã nüxna yacaxü̃ca̱x nax yemaacü nüxü̃ yaxüxü̃ca̱x.
2 Rü ngĩma rü meama nga̱xãẽxãcü Yerucharéü̃wa ingu namaxã ga muxü̃ma ga caméyugü ga pumaragümaxã rü úirumaxã rü nutagü ga meruü̃gümaxã ixãxwetaxü̃. Rü yexguma Charomóü̃xü̃tawa nanguxgu rü guxü̃ma ga yema nagu naxĩnüxü̃ãcüma nüxna ica.
3 Rü nüma ga Charomóü̃ rü meama ngĩxü̃ nangaxü̃ ga guxü̃ma ga yema nüxna nax naca̱xaxü̃, rü nataxuma ga wüxi ga ngearü ngãxü̃ã́xü̃.
4 10:4-5 Rü yexguma ngĩma ga yema Chabáanearü ãẽ̱xgacü nüxü̃ ĩnügu ga Charomóü̃arü cua̱x rü nüxü̃ nada̱u̱xgu ga guma ãẽ̱xgacüpata ga naxüxü̃ne rü yema mexẽchixü̃ ga õnagü ga norü mechagu inumaxü̃ rü norü ngü̃xẽẽruü̃güarü ucapugü rü norü puracütanüxü̃chiru rü yema norü bínuarü baeruü̃gü rü yema muxũchixü̃ ga naxü̃nagü ga Tupanapata ya taxü̃newa Tupanaca̱x nada̱i̱xü̃ rü ãmarechicawa íguxü̃, rü ngĩma rü poraãcü namaxã ibaixãchi.
5 Nüü̃ nadau 10:4
6 Rü ãẽ̱xgacü ga Charomóü̃xü̃ ngĩgürügü: —Yema chauchixü̃anewa nüxü̃ chaxĩnüxü̃ ga cuchiga rü curü cuáxchiga, rü aixcüma nixĩ.
7 Rü ñu̱xmawaxix nixĩ i chayaxõxü̃ erü nua chaxũ, rü chauxetümaxã nüxü̃ chadau. Natürü yema nüxü̃ chaxĩnüxü̃ ga cuchiga, rü curü cuáxchiga, rü tama ngãxü̃wa nangu ga yema cuchiga ga chomaxã nüxü̃ yaxugüxü̃. Erü ngẽma curü cua̱x, rü curü ngẽmaxü̃gü, rü yema nüxü̃ chaxĩnüxü̃arü yexeraxüchi nixĩ.
8 Rü ñuxãcü itaãẽgü i ngẽma cuxma̱xgü rü ngẽma curü ngü̃xẽẽruü̃gü i guxü̃guma cuxü̃tawa ngẽxmagüxü̃ rü nüxü̃ ĩnüexü̃ nax ñuxãcü cua̱x cuxü̃́ ngẽxmaxü̃ i ngẽxguma quidexagu!
9 Rü namecümaxüchi ya Cori ya curü Tupana ya cumaxã taãẽcü rü cuxü̃ imucuchicü nax Iraéanecüã̱xgüarü ãẽ̱xgacü quixĩxü̃ca̱x. Rü yemaacü cuxü̃ ningucuchixẽxẽ nax aixcüma meama ngẽma Iraéanecüã̱xgümaxã icucuáxü̃ca̱x, erü guxü̃guma poraãcü pexü̃ nangechaü̃ —ngĩgürügü.
10 Rü yemawena ga ngĩma ga yema ãẽ̱xgacü rü nüxna inana ga 3,960 quíru naguxü̃ ga úiru, rü muxũchixü̃ma ga pumara rü nutaacügü ga ngã̱xãẽruü̃gü. Rü ü̃paacü rü taguma Iraéanewa nangu ga yexgumaepü̱x ga pumaragü ga yema Chabáanearü ãẽ̱xgacü Charomóü̃na ãxü̃e̱xpü̱x.
11 Rü guma Iráü̃arü wapurugü ga Ofíwa ixĩne rü tama úiruxica yéma ne nana, natürü yéma ne nana ta ga muxü̃ma ga naixpütagü ga cháü̃daru rü nutaacügü ga ngã̱xãẽruü̃gü.
12 Rü nüma ga ãẽ̱xgacü rü yema naixpütawa nanade ga mürapewagü naxca̱x ga Tupanapata ga taxü̃nearü baráü̃da rü napataarü baráü̃da. Rü yexgumarüxü̃ ta yema naiwa nanaxü ga árpagü rü árpaxacügü naxca̱x ga norü paxetaruü̃gü. Rü ü̃paacü rü ñu̱xma rü ta rü taguma yéma nangugü rü bai ñuxgu nüxü̃ tadau ga yexgumaepü̱x ga nai ga cháü̃darupüta.
13 Nüma ga ãẽ̱xgacü ga Charomóü̃ rü yema Chabáanearü ãẽ̱xgacüna nanaxã ga guxü̃ma ga yema ngĩma naxca̱x ínaca̱xaxü̃. Rü naétü ngĩxna nanaxã ga yema ãmaregü ga nümatama norü ngúchaü̃maxã ngĩxna naxãxü̃. Yemawena ga ngĩma rü ngĩrü ĩaneca̱x itaegu namaxã ga guxü̃ma ga ngĩrü ngü̃xẽẽruü̃gü.
Charomóü̃ rü natachiga
14 Rü yema úiru ga Charomóü̃ wüxichigü ga taunecügu yaxuxü̃ rü 22,000 quíruwa nangu.
15 Rü yemaétü ngĩxü̃ nayaxu ga yema diẽru ga nüma ga ãẽ̱xgacü ngĩxü̃ unetacü nax naxütanügüãxü̃ca̱x ga taxepataxü̃arü yoragü rü yema togü ga taxetanüxü̃. Rü yexgumarüxü̃ ta ga guxü̃ma ga Arábiaanearü ãẽ̱xgacügü rü yema ãẽ̱xgacügü ga Iraéanearü üyechigümaxã icua̱xgüxü̃ rü ngĩxü̃ naxütanügü ga yema diẽru ga ãẽ̱xgacü ngĩxü̃ unetacü.
16 Rü nüma ga ãẽ̱xgacü ga Charomóü̃ rü norü puracütanüxü̃xü̃ namu nax yema úiru ga ipomüxü̃wa naxügüã̱xü̃ca̱x ga 200 ga poxü̃ruxü̃ ga ítáxü̃. Rü 6 quíru ga úiru nagu naxücu ga wüxichigü.
17 Rü ñu̱xũchi nüma ga Charomóü̃ rü nüxü̃ nanaxüxẽxẽ ta ga 300 ga poxü̃ruxü̃ ga ixíxraxü̃ ga úiru ga ipomüxü̃wa íxüxüxü̃. Rü wüxitachinüwachigü rü wüxi ga quíruarü ngãxü̃ nagu name. Rü ñu̱xũchi guma napata ga Líbanuarü Naixnecügu ãéganegu nananucu.
18 Rü ñu̱xũchi norü puracütanüxü̃xü̃ namu nax naxügüã̱xü̃ca̱x ga wüxi ga taxü̃ ga toruxü̃ ga marfínaxca̱x. Rü úiru ga nüxica ixĩxü̃maxã nanatüxünegü.
19 Rü nayexma ga 6 ga chinagücutüruxü̃ nax nawa nanguxü̃ca̱x ga yema toruxü̃. Rü yema norü ngũxca̱xweruxü̃ rü inabo. Rü guxü̃cüwawa rü naxünagüchacüxüã̱x. Rü wüxichigü ga yema nacüwawa nayexma ga wüxi ga leóü̃chicüna̱xã ga yexma chixü̃.
20 Rü ñu̱xũchi nayexma ta ga 12 ga leóü̃chicüna̱xãgü ga wüxichigü ga yema 6 ga chinagücutüruü̃cüwagu chixü̃. Rü nataxuma ga to ga ãẽ̱xgacü ga nüxü̃́ yexmaxü̃ ga wüxi ga toruxü̃ ga yemarüxü̃ mexẽchixü̃.
21 Rü guxü̃ma ga ãẽ̱xgacü ga Charomóü̃arü axepáxü̃gü rü úirunaxca̱x nixĩgü. Rü guxü̃ma ga yema poratugü ga napata ga Líbanuarü Naixnecügu ãéganewa yexmagüxü̃ rü úirunaxca̱x nixĩgü. Rü nataxuma ga diẽrumünaxca̱x ixĩxü̃, yerü yexguma Charomóü̃ ãẽ̱xgacü ixĩxgu rü diẽrumü rü naxítanüxü̃chi.
22 Rü gumá norü wapurugü ga ãẽ̱xgacü ga Charomóü̃ rü Iráü̃arü wapurumaxã tomaepü̱x ga taunecüguwena wüxicanatama Tárchixwa naxĩĩxü̃. Rü yéma ne nananaxü̃ü̃xü̃ ga úiru rü diẽrumü rü marfí rü naeü̃gü ga õmegü rü pirugü.
23 Rü nüma ga ãẽ̱xgacü ga Charomóü̃ rü norü cua̱xwa rü norü yemaxü̃güwa rü nüxü̃ narüyexeramae ga guxü̃ma ga togü ga ãẽ̱xgacügü ga ñoma ga naanewa yexmagüxü̃.
24 Rü guxü̃ma ga togü ga nachixü̃anearü ãẽ̱xgacügü rü naxü̃tawa ínayadaugüchaü̃ nax nüxü̃ naxĩnüexü̃ca̱x ga yema cua̱x ga Tupana nüxna ãxü̃.
25 Rü ñu̱xũchi wüxichigü ga taunecügu rü guxü̃ma ga yema íyadaugüxü̃ rü norü ãmaregümaxã yéma naxĩĩxü̃, rü nüxna nanaxã ga diẽrumü rü úiru, rü naxchiru rü naxnegü, rü pumaragü, rü cowarugü rü mulagü.
Charomóü̃ rü churaraweü̃gü ga carugüca̱x rü cowarugüca̱x nataxe rü ñu̱xũchi nüma rü ta namaxã nataxe
26 Charomóü̃ rü nananutaque̱xe ga carugü rü duü̃xü̃gü ga cowarugümaxã icua̱xgüxü̃. Rü nüxü̃́ nayexma ga 1,400 ga carugü ga churaraweü̃gü rü 12,000 ga duü̃xü̃gü ga cowarugümaxã icua̱xgüxü̃. Rü guma carugü ga dairuxü̃ rü churaragüpatagu namaxã nanguxü̃. Rü guma naigü rü ãẽ̱xgacüpatana nadaugü ga Yerucharéü̃wa.
27 Rü nüma ga ãẽ̱xgacü rü Yerucharéü̃gu nananutaque̱xe ga diẽrumü, rü yemaca̱x ñoma nutagürüxü̃ namuxũchi. Rü yexgumarüxü̃ ta ga guma ocayiwagü ga inatogüne rü ñoma igunecü i naixnecüwa rüxügüxü̃rüxü̃ namuxũchi.
28 Rü yema Charomóü̃arü cowarugü rü Musriwa rü Chiríchiaanewa nixĩ ga ne nagagüãxü̃. Yerü yéma nixĩ ga ãẽ̱xgacüarü taxeruü̃gü ga naxca̱x nataxegüxü̃.
29 Rü wüxi ga caru ga churaraweü̃ ga Equítuwaxü̃ne rü 600 tachinü ga diẽru naxãtanü, rü wüxi ga cowaru rü 150 tachinü ga diẽru naxãtanü. Rü yixcüama rü guxü̃ma ga Itítanüxü̃arü ãẽ̱xgacügü rü Chíriaanearü ãẽ̱xgacügü rü Charumóü̃arü taxetanüxü̃güxü̃tawa naxca̱x nataxegü.
