1 Reyes 11:1-43
11 11:1-2 Rü nüma ga Charomóü̃ rü Equítuanecüã̱xarü ãẽ̱xgacü ga Faraóü̃acümaxã naxãxma̱x. Rü yexgumarüxü̃ ta namaxã naxãxma̱x ga muxü̃ma ga ngexü̃gü ga togü ga nachixü̃anecüã̱x ixĩgüxü̃ ga: Moátanüxü̃, rü Amóü̃tanüxü̃ rü Edóü̃tanüxü̃, rü Chidóü̃tanüxü̃ rü Itítanüxü̃ ga Cori ya Tupana Iraéanecüã̱xgüna chu̱xuxü̃ ga namaxã nax yaxãmaxü̃ yerü ngürüãchi yema Iraéanecüã̱xgü rü tá yema ngexü̃güarü tupanagüwe narüxĩ. Natürü nüma ga Charomóü̃ rü yema ngexü̃güxü̃ nangẽ̱xẽ, rü yemaca̱x namaxã naxãxma̱x.
2 Nüü̃ nadau 11:1
3 Rü nüxü̃́ nayexma ga 700 ga naxma̱xü̃chi, rü nai ga 300 ga naxma̱xabagü. Rü yema naxma̱xgügagu nixĩ ga Tupanana yaxũgachixü̃ ga Charomóü̃.
4 Rü yexguma marü yaxguã̱x yixĩxgu ga Charomóü̃, rü yema naxma̱xgü rü nanatoãẽgü nax yemaacü togü ga tupanagüwe naxũxü̃ca̱x. Rü tama nanatü ga Dabírüxü̃ aixcüma Cori ya Tupanawe narüxũ.
5 Rü nüma ga Charomóü̃ rü Chidóü̃cüã̱xgüarü tupana ga Ataréxü̃ nicua̱xüxü̃. Rü yexgumarüxü̃ ta nüxü̃ nicua̱xüüxü̃ ga Mícoü̃ ga Amóü̃cüã̱xarü tupana ga buxe naxca̱x tüxü̃ yagugüxü̃.
6 Rü yemaacü ga yema Charomóü̃ üxü̃ rü Cori ya Tupanape̱xewa tama name. Rü tama nanatü ga Dabírüxü̃ aixcüma Cori ya Tupanaga naxĩnü.
7 Rü yemaca̱x ga Charomóü̃, rü guma ma̱xpǘne ga Yerucharéü̃arü éstewaama yexmanegu nanaxü ga wüxi ga ngutaque̱xepataxü̃ naxca̱x ga Quemó ga Moácüã̱xgüarü tupanachicüna̱xã ga buxe naxca̱x tüxü̃ yagugüxü̃. Rü yexgumarüxü̃ ta nanaxü naxca̱x ga Molóx, ga Amóü̃tanüxü̃arü tupanachicüna̱xã ga buxe naxca̱x tüxü̃ yagugüxü̃ ta.
8 Rü yemaacü ta tümaca̱x nanaxü ga guxãma ga naxma̱xgü ga togü ga nachixü̃anecüã̱xgü ixĩgüxe nax pumara ítagute̱xegüxü̃ca̱x rü naxü̃na nax tadaixü̃ca̱x naxca̱x ga tümaarü tupanagü.
9 11:9-10 Rü nüma ga Cori ya Iraéanecüã̱xgüarü Tupana rü Charomóü̃maxã nanu yerü nüxna nixũgachi, woo taxree̱xpü̱xcüna naxca̱x nax nangóxü̃, rü namaxã nüxü̃ yaxuxü̃ nax tama togü ga duü̃xü̃güarü tupanachicüna̱xãxgüxü̃ yacua̱xüü̃xü̃ca̱x. Natürü ga nüma ga Charomóü̃ rü tama Cori ya Tupanaga naxĩnü.
10 Nüü̃ nadau 11:9
11 Rü yemaca̱x ga Cori ya Tupana rü Charomóü̃xü̃ ñanagürü: —Ñu̱xma nax ngẽmaãcü tama chauga cuxĩnüxü̃ rü tama cuyanguxẽẽxü̃ i ngẽma yigümaxã ixunetaxü̃, rü ngẽmaca̱x marü tauxü̃táma cunegüwa nangu nax nüxí guxü̃ma i Iraéanecüã̱xgüarü ãẽ̱xgacügü yixĩgüxü̃ca̱x. Rü wüxi i curü ngü̃xẽẽruü̃na tá chanaxã i ñaa Iraéane.
12 Natürü ngẽma cunatü ga Dabígu nax charüxĩnüxü̃gagu, taxũtáma ñu̱xma cumaxyane cuxna chanayaxu i ñaa Iraéane. Natürü cunena tá nixĩ i chanayaxuxü̃.
13 Natürü taxũtáma guxü̃ i ñaa naane nüxna chayaxu. Rü wüxi i Iraéanecüã̱xtücumümaxã tá ichanacua̱xẽxẽ i cune, erü cunatü ga Dabígu rü yima ĩane ya Yerucharéü̃ ya choma chayaxúnegu charüxĩnü —ñanagürü ga Cori ya Tupana.
14 Rü nüma ga Cori ya Tupana rü Edóü̃arü ãẽ̱xgacütanüxü̃ ga Adáxü̃ namu nax Charomóü̃maxã naxuanüxü̃ca̱x.
15 Rü ü̃pa ga Dabí rü wüxigu Yoámaxã Edóü̃anecüã̱xgüxü̃ nadai, rü yemawena rü nüma ga Yoá rü yéma naxũ nax inata̱xgüãxü̃ca̱x ga yema Iraéanearü churaragü ga daigu yuexü̃. Rü yexgumayane nayoxnie nax nadaiaxü̃ ga guxü̃ma ga Edóü̃cüã̱xgü ga iyatüxü̃.
16 Rü Yoá rü 6 ga tauemacü Iraéanearü churaragümaxã yéma nayexma ñu̱xmata nagu̱xẽẽã ga guxü̃ma ga Edóü̃cüã̱xgü ga iyatüxü̃.
17 Natürü yexguma ga Adáx rü nabumare rü niña. Rü Equítuanewa naña namaxã ga ñuxre ga Edóü̃cüã̱xgü ga norü papaarü ngü̃xẽẽruü̃gü ixĩgüxü̃.
18 Rü naxĩgü ga Madiáü̃anewa rü Paráü̃wa nangugü. Rü yéma rü duü̃xü̃güca̱x naca nax íyaxümücügüãxü̃ca̱x. Rü yemaacü Equítuanewa nangugü, rü ãẽ̱xgacü ga Faraóü̃xü̃tawa naxĩ. Rü nüma ga Equítuanearü ãẽ̱xgacü rü Adáxna nanaxã ga wüxi ga ĩpata rü õnagü rü naanegü.
19 Rü yemaacü ga nüma ga Adáx rü nanayaxu ga Faraóü̃arü ngü̃xẽxẽ. Rü ãẽ̱xgacü ga Faraóü̃ rü naxma̱x ga Tapenéxeya̱xmaxã Adáxü̃ naxüxma̱x.
20 Rü ngĩma ga Tapenéxeya̱x rü ixãxãcü nüxü̃́ ga Adáx, rü Guenubáxgu nanaxüéga. Rü ngĩma ga Tapenéx rü wüxigu ngĩnegümaxã ãẽ̱xgacüpatawa inayaexẽxẽ.
21 Natürü yexguma Equítuwa Adáx nüxü̃ cuáchigagu ga nax nayuxü̃ ga Dabí rü nayuxü̃ ga yema norü churaragüeru ga Yoá, rü nüma ga Adáx rü Faraóü̃xü̃tawa naxũ nax nügüca̱x íyaca̱xaxü̃, rü ñanagürü: —¡Choxü̃́ natauxchaxẽxẽ nax chorü naaneca̱x chataeguxü̃ca̱x! —ñanagürü.
22 Rü yexguma nüma ga Faraóü̃ rü nanangãxü̃ rü ñanagürü: —¿Tü̱xcüü̃ curü naaneca̱x cutaeguchaü̃? ¿Rü ta̱xacü cuxü̃́ nataxu i nua chauxü̃tawa? —ñanagürü. Rü nüma ga Adáx rü nanangãxü̃ rü ñanagürü: —Taxuxü̃machire̱x choxü̃́ nataxu, natürü chanaxwa̱xe nax choxü̃́ cunatauxchaxẽẽxü̃ nax chataeguxü̃ca̱x —ñanagürü.
23 Rü yexgumarüxü̃ ta Tupana rü Rechóü̃ ga Eriadá naneãẽwa ínanangu̱xẽxẽ nax Charumóü̃arü uanü nax yixĩxü̃ca̱x. Rü nüma ga Rechóü̃ rü norü cori ga Adáx-éche ga Chobáarü ãẽ̱xgacüna niña.
24 Rü yemawena ga Rechóü̃ rü nananutaque̱xe ga ñuxre ga yatügü rü yemaacü wüxi ga natücumü ga ngĩ́ta̱xagüxü̃maxã inacua̱x. Natürü yexguma Dabí Chobáarü ãẽ̱xgacüxü̃ rüporamaegu, rü nüma ga Rechóü̃ rü ĩane ya Damácuwa naxũ. Rü yéma ãẽ̱xgacüxü̃ nügü ningucuchixẽxẽ.
25 Rü yexguma Charomóü̃ maxü̃gu rü nüma ga Rechóü̃ rü Iraéarü duü̃xü̃gümaxã narüxuanü yerü Iraéchi naxai rü wüxigu Adáxmaxã Charumóü̃arü uanü nixĩ. Rü nüma ga Rechóü̃ rü düxwa Chíriaanearü ãẽ̱xgacüwa nangu.
26 Rü Yeruboáü̃ ga Nabáx nane rü ta rü ãẽ̱xgacü ga Charomóü̃maxã narüxuanü. Rü nüma ga Yeruboáü̃ rü ĩane ga Cheredácüã̱x nixĩ, rü Efraíü̃tanüxü̃ nixĩ. Rü naé rü tayute rü Cherúa nixĩ ga tümaéga. Rü nüma ga Yeruboáü̃ rü wüxi ga Charumóü̃arü puracütanüxü̃eru nixĩ.
27 Rü yema Charomóü̃maxã naxca̱x narüxuanüãxü̃ ga Yeruboáü̃. Rü nüma ga Charomóü̃ rü ĩane ga Yerucharéü̃wa nanamexẽẽane rü nanamexẽẽtapü̱x ga norü poxeguxü̃ ga nanatü ga Dabíarü Ĩanewa.
28 Rü nüma ga Yeruboáü̃ rü wüxi ga yatü ga poraxü̃ rü mea naãẽxü̃ cuáxü̃ nixĩ. Rü yexguma yemaxü̃ nada̱u̱xgu ga nüma ga Charomóü̃ rü guxü̃ma ga Yúchetanüxü̃maxã inanacua̱xẽxẽ.
29 Rü wüxi ga ngunexü̃ ga yexguma nüma ga Yeruboáü̃ Yerucharéü̃wa ínaxũxũxgu, rü namagu nüxü̃ nangau ga wüxi ga orearü uruxü̃ ga Aía ga Chilócüã̱x ixĩcü. Rü nüma ga Aía rü wüxi ga ngexwaca̱xü̃xü̃ ga gáuxü̃chirugu nicu̱x. Rü yema taxre rü nüxicatama yema naanewa nayexmagü.
30 Rü ñu̱xũchi nüma ga Aía rü 12 gu inanagáuü̃gü ga yema norü gáuxü̃chiru ga nagu yacúxü̃.
31 Rü ñu̱xũchi Yeruboáü̃xü̃ ñanagürü: —Ñaa 10 i natüchi rü cuxna chanana nax cuxrü yixĩxü̃ca̱x erü nüma ya Cori ya Iraéanearü Tupana rü ñanagürü cuxü̃: “Charomóü̃na tá chanayaxu nax ãẽ̱xgacü yixĩxü̃ rü tá cuxü̃ namaxã ichacua̱xẽxẽ i 10 i Iraétücumü.
32 Natürü Charomóü̃na tá chanaxã i wüxitücumü i Iraétanüxü̃ yerü nüxü̃ changechaü̃ ga gumá chorü duü̃ ga Dabí rü nüxü̃ changechaü̃ ya yima ĩane ya Yerucharéü̃ yerü guma nixĩ ga nüxü̃ chaxunetane natanüwa ga guxü̃nema ga Iraétanüxü̃arü ĩanegü.
33 Erü nüma i Charomóü̃ rü choxü̃ ínata̱x rü Chidóü̃cüã̱xarü tupananeta i Ataréxü̃ nicua̱xüxü̃. Rü nüxü̃ nicua̱xüxü̃ i Moácüã̱xarü tupananeta i Quemó. Rü ngẽxgumarüxü̃ ta nüxü̃ nicua̱xüxü̃ i Amóü̃cüã̱xarü tupananeta i Mícoü̃. Rü ngẽma Charomóü̃ üxü̃ rü tama namaxã chataãxẽ erü tama nayanguxẽxẽ i ngẽma chorü mugü. Rü tama nanatü ga Dabí ga chauga ĩnücürüxü̃ nixĩ.
34 Natürü naétüwa i ngẽma rü taxũtáma íchanamuxũchi nax ãẽ̱xgacü yixĩxü̃ rü ngéma tátama chanangexmaxẽxẽ ñu̱xma nax namaxü̃xü̃ erü nüxü̃ changechaü̃ ya yimá chorü duü̃ ya Dabí ga nüxü̃ chaxunetacü yerü mea nayanguxẽxẽ ga chorü mugü.
35 Natürü Charomóü̃ nanena tá chanayaxu nax Iraétücumügümaxã inacuáxü̃, rü tá cuxna chanaxã i ngẽma 10 i Iraétücumügü nax cuma namaxã icucuáxü̃ca̱x.
36 Natürü i Charomóü̃ nane rü wüxitücumümaxã tátama inacua̱x nax ngẽmaãcü nangẽxmaxü̃ca̱x i wüxi i Dabítanüxü̃ i ãẽ̱xgacü ixĩxü̃ nawa ya yima ĩane ya Yerucharéü̃ ga nüxü̃ chaxunetane.
37 Rü choma rü cuxü̃ chayaxu nax Iraéanearü ãẽ̱xgacü quixĩxü̃ca̱x rü ngẽma cuma cunaxwa̱xexü̃ãcüma namaxã icucuáxü̃ca̱x i guxü̃ma i Iraéane.
38 Rü ngẽxguma tá chauga cuxĩnügu i ngẽma cuxü̃ chamuxü̃ rü cunaxü̱xgu i ngẽma cha̱u̱xca̱x mexü̃ rü cuyanguxẽẽgu i chorü mugü, naxrüxü̃ ga chorü duü̃ ga Dabí, rü choma rü cuxü̃tawa tá changexma rü cuxme̱xwa tá chanangexmaxẽxẽ i Iraéane rü ngẽma cutaagü rü Iraéarü ãẽ̱xgacügüwa tá nangugü naxrüxü̃ ga Dabítaagü yema choma namaxã chaxueguxü̃rüxü̃.
39 Rü tá chanapoxcu i ngẽma Dabítaagü nagagu ya Charomóü̃ yerü tama chauga naxĩnü, natürü taxũtáma guxü̃guca̱x chanapoxcu”, ñanagürü cuxü̃ ga Tupana —ñanagürü ga Aía.
40 Rü yexguma Charomóü̃ nüxü̃ cuáchigagu ga yema Tupanaarü orearü uruxü̃ Yeruboáü̃maxã nüxü̃ ixuxü̃ rü Yeruboáü̃xü̃ nimáxchaü̃. Natürü nüma ga Yeruboáü̃ rü Equítuanewa naña ga Chicháx ãẽ̱xgacü íyixĩxü̃wa. Rü yéma nayamaxü̃ ñu̱xmata nayu̱x ga Charomóü̃.
Nayu ga Charomóü̃
41 Rü guxü̃ma ga yema togü ga Charomóü̃chiga rü norü cuáchiga rü guxü̃ma ga yema naxüxü̃chiga, rü noxrütama poperagu naxümatü.
42 Rü nüma ga Charomóü̃ rü 40 ga taunecü nixĩ ga guxü̃ma ga Iraéanecüã̱xgümaxã inacuáxü̃ ga Yerucharéü̃wa.
43 Rü yexguma nayu̱xgu rü ĩane ga Yerucharéü̃arü üye ga nanatü ga Dabíarü Ĩane ñaxü̃gu ãégaxü̃gu nanata̱xgü. Rü yemawena rü nane ga Roboáü̃ nachicüxü ãẽ̱xgacü nixĩ.
