1 Reyes 12:1-33
12 Rü nüma ga Charomóü̃ nane ga Roboáü̃ rü ĩane ga Chiquéü̃wa naxũ yerü guxü̃ma ga Iraéanecüã̱xgü yéma naxĩ nax yéma ãẽ̱xgacüxü̃ yangucuchixẽẽgüãxü̃ca̱x.
2 Natürü ga Nabáx nane ga Yeruboáü̃ ga ü̃paacü Charomóü̃cha̱xwa Equítuanewa ñacü, rü yéma nüxü̃ nacuáchiga nax ãẽ̱xgacüxü̃ yangucuchixü̃ ga Roboáü̃.
3 Rü Yeruboáü̃ca̱x nangemagü ga namücügü. Rü nüma rü Iraéaneca̱x nataegu rü guxü̃ma ga Iraéanecüã̱xgümaxã ãẽ̱xgacü ga Roboáü̃xü̃tawa naxĩ nax namaxã yadexagüxü̃ca̱x. Rü ñanagürügü nüxü̃:
4 —Gumá cunatü ga Charomóü̃ rü poraãcü taxü̃ ga diẽru toxü̃tawa nayaxu. Rü ñu̱xma i cuma rü tama tanaxwa̱xe i cunatürüxü̃ quixĩ. Rü tanaxwa̱xe i toxü̃́ ícunaxĩxẽẽxü̃ i ngẽma. Rü ngẽxguma tomaxã cumecümagu rü toxü̃́ ícunaxĩxẽẽgu rü mea tomaxã icucua̱xgux, rü tá cuga taxĩnüe rü cuxü̃́ tapuracüe —ñanagürügü.
5 Rü nüma ga Roboáü̃ nanangãxü̃ga rü ñanagürü: —¡Ípixĩ rü tomaepü̱x i ngunexü̃guwena nua pexĩ! —ñanagürü. Rü nüma ga duü̃xü̃gü rü nawoegu.
6 Rü yexgumayane ga nüma ga ãẽ̱xgacü ga Roboáü̃ rü naxca̱x nangema ga yema ucu̱xẽruü̃gü ga nanatü ga Charomóü̃axü̃́ puracüexü̃ ga yexguma namaxü̱̃xgux. Rü nüxna naca rü ñanagürü: —¿Ta̱xacümaxã i choxü̃ pixucu̱xẽxü̃ i pemax, rü ñuxãcü tá chanangãxü̃gaxü̃ i ñaa duü̃xü̃gü? —ñanagürü.
7 Rü nümagü rü nanangãxü̃gü rü ñanagürügü: —Ngẽxguma chi mea quixĩxgu namaxã i ngẽma duü̃xü̃gü rü mexü̃ i dexamaxã cunangãxü̃gu, rü nümagü rü guxü̃gutáma cuxü̃́ napuracüe —ñanagürügü.
8 Natürü ga Roboáü̃ rü tama yema nanatüarü ucu̱xẽruü̃güaxü̃́ inaxĩnü. Rü naxca̱x nangema ga yema namücügü ga wüxigu namaxã yaexü̃ rü nüxü̃́ puracüexü̃, rü nüxna naca rü ñanagürü:
9 —¿Ta̱xacümaxã i choxü̃ pixucu̱xẽxü̃ i pemax? ¿Rü ñuxãcü tá chanangãxü̃xü̃ i ngẽma duü̃xü̃gü i choxna cagüxü̃ nax namaxã íchanaxĩxẽẽxü̃ca̱x i ngẽma diẽru i natanüwa chayaxuxü̃ rü tama chaunatürüxü̃ poraãcü taxü̃ i diẽru natanüwa chayaxuxü̃ca̱x? —ñanagürü.
10 Rü nümagü ga yema namücügü ga namaxã wüxigu yaexü̃ rü nanangãxü̃gü rü ñanagürügü: —Ngẽma duü̃xü̃gü i cuxna cagüxü̃ nax tama cunatürüxü̃ taxü̃ i diẽru natanüwa cuyaxuxü̃ca̱x rü ñaãcü tá cunangãxü̃: “Gumá chaunatü rü poraãcü pexü̃ namu natürü i choma rü tá norü yexera poraãcü pexü̃ chamu.
11 Rü aixcüma nixĩ ga chaunatü rü poraãcü taxü̃ ga diẽru petanüwa nayaxu natürü i chomax rü tá yexeraãcü taxü̃ i diẽru petanüwa chayaxu. Rü chaunatü rü goyexü̃maxã pexü̃ nicua̱i̱xgü natürü i choma rü tá cua̱i̱xruxü̃ i fierumaxã ãpexexü̃maxã pexü̃ chicua̱i̱xgüxü̃” —ñanagürügü nüxü̃.
12 Rü yema ãẽ̱xgacü ga Roboáü̃ nüxü̃ ixuxü̃rüxü̃, rü tomaepü̱x ga ngunexü̃ ngupetüguwena rü wenaxarü Roboáü̃ca̱x nataegu ga Yeruboáü̃ namaxã ga guxü̃ma ga duü̃xü̃gü.
13 Natürü nüma ga ãẽ̱xgacü ga Roboáü̃ rü nanuãcüma nanangãxü̃, rü tama naga naxĩnü ga yema nanatüarü ucu̱xẽruü̃gü ga yaexü̃.
14 Rü duü̃xü̃gümaxã nüxü̃ nixu ga yema ore ga namücügü ga namaxã wüxigu yaexü̃ nüxü̃ ixugüxü̃, rü ñanagürü: —Aixcüma nixĩ ga chaunatü rü poraãcü taxü̃ ga diẽru petanüwa nayaxuxü̃ natürü i choma rü tá yexeraãcü taxü̃ i diẽru petanüwa chayaxu. Rü chaunatü rü goyexü̃maxã pexü̃ nicua̱i̱xgü, natürü i choma rü tá cua̱i̱xruxü̃ i fierumaxã ãpexexü̃maxã pexü̃ chicua̱i̱xgü —ñanagürü.
15 Rü yemaacü ga nüma ga ãẽ̱xgacü rü tama yema duü̃xü̃güga naxĩnü yerü woetama Cori ya Tupana rü yemaacü nayaxĩxẽxẽ nax yanguxü̃ca̱x ga norü ore ga Nabáx nane ga Yeruboáü̃maxã nüxü̃ yaxuxü̃ naa̱xwa ga norü orearü uruxü̃ ga Aía ga Chilócüã̱x.
16 12:16-17 Rü yexguma guxü̃ma ga yema duü̃xü̃gü ga Iraétanüxü̃gü nüxü̃ icua̱xãchitanügu nax nüma ga ãẽ̱xgacü tama naya̱u̱xãxü̃ ga yema naxca̱x ínacagüxü̃, rü inanaxügüe nax yaxáichaxü̃ rü ñagüxü̃: —Taxuwama tüxü̃́ name i Dabí rü natanüxü̃. ¡Ngĩxã tachixü̃aneca̱x tawoegu! ¡Rü Roboáü̃ rü natanüxü̃arü ãẽ̱xgacü yixĩ rü tama i tóxrü! —ñagüxü̃. Rü guxü̃ma nawoegu. Rü yema Yudátanüxü̃xica yéma nayaxügü rü Roboáü̃xü̃ nayauxgü ga ãẽ̱xgacü nax yixĩxü̃.
17 Nüü̃ nadau 12:16
18 Rü nüma ga ãẽ̱xgacü ga Roboáü̃ rü nanamu ga norü ngü̃xẽẽruxü̃ ga Aduráü̃ ga norü puracümaxã icuácü. Rü namaxã nüxü̃ nixu nax norü puracüca̱x nangutaque̱xexẽẽãxü̃ca̱x ga yema Iraéanecüã̱xgü ga tama naga ĩnüechaü̃xü̃. Natürü nüma ga yema duü̃xü̃gü rü nanueama rü nutamaxã Aduráü̃xü̃ nima̱xgü. Rü yexguma yemaxü̃ nacua̱xgu ga ãẽ̱xgacü ga Roboáü̃ rü paxa naweü̃ ga cowaru itúchigünegu nixüe rü Yerucharéü̃wa naña.
19 Rü yemaacü ga yema togü ga Iraéanecüã̱xgü rü nanue Roboáü̃maxã rü guxü̃ma ga Dabítanüxü̃maxã. Rü ñu̱xma rü ta ngẽmaãcü nixĩ.
20 Rü guxü̃ma ga yema Iraéanecüã̱xgü rü nüxü̃ nacuáchigagü nax Equítuanewa ne naxũxü̃ ga Yeruboáü̃. Rü yemaca̱x ga yema duü̃xü̃gü rü Yeruboáü̃ca̱x nangemagü nax namaxã nangutaque̱xexü̃ca̱x. Rü nayangucuchixẽẽgü nax Iraéanecüã̱xarü ãẽ̱xgacü yixĩxü̃ca̱x. Rü guxü̃ma ga yema duü̃xü̃gü rü Yeruboáü̃we narüxĩ. Rü Yudátanüxü̃xicatama nixĩ ga naxwa̱xegüxü̃ nax Dabítaxa ga Roboáü̃we naxĩxü̃.
21 Rü yexguma Yerucharéü̃wa nanguxgu ga Roboáü̃, rü Yudátanüxü̃tanüwa rü Bẽyamíü̃tanüxü̃tanüwa nananutaque̱xe ga 180,000 ga churaragü nax yema togü ga Iraétücumügümaxã nügü nada̱i̱xü̃ca̱x nax yemaacü wenaxarü guxü̃ma ga Iraétücumügüarü ãẽ̱xgacü yixĩxü̃ca̱x.
22 Natürü nüma ga Cori ya Tupana rü norü duü̃xü̃ ga Chemaíaxü̃ namu rü ñanagürü nüxü̃:
23 12:23-24 —¡Charomóü̃ nane ya Yudáanearü ãẽ̱xgacü ya Roboáü̃maxã rü guxü̃ma i Yudátanüxü̃maxã rü Bẽyamíü̃tanüxü̃maxã rü guxü̃ma i ngẽma togü i duü̃xü̃gümaxã nüxü̃ ixu, rü ngexrüma i nügü nax nada̱i̱xü̃ i ngẽma togü i natanüxü̃ i Iraétanüxü̃maxã! ¡Rü guxü̃ma i duü̃xü̃gü napataca̱x woegu! Erü chomatama ngẽmaãcü chanaxwa̱xe —ñanagürü. Rü yema Cori ya Tupanaarü dexaxü̃ nax naxĩnüexü̃, rü guxü̃ma ga duü̃xü̃gü rü napataca̱x nawoegu, rü yema Cori ya Tupana naxwa̱xexü̃ãcü nayanguxẽẽgü.
24 Nüü̃ nadau 12:23
Yeruboáü̃ rü Iraéanecüã̱xgüxü̃ namu nax tupananetachicüna̱xãgüxü̃ yacua̱xüü̃güxü̃ca̱x
25 Rü nüma ga Yeruboáü̃ rü wenaxarü nanamexẽxẽ ga guma ĩane ga Chiquéü̃ ga Efraíü̃arü ma̱xpǘneanewa yexmane. Rü gumagu naxãchiü̃ ga nüma ga ãẽ̱xgacü ga Yeruboáü̃. Rü guma Chiquéü̃ namexẽẽguwena rü nanamexẽxẽ ga guma ĩane ga Penué.
26 Natürü ga nüma ga Yeruboáü̃ rü ñaxü̃gu narüxĩnü: —Ngẽxguma taũtáma chaxũãẽgu, rü ngürüãchi ngẽma Dabítanüxü̃ rü tá choxü̃ ínata̱xüchigü nax Iraéanecüã̱xarü ãẽ̱xgacü chixĩxü̃.
27 Rü ngẽxguma ñaa duü̃xü̃gü Yerucharéü̃wa ĩxgu nax Tupanapata ya taxü̃negu Cori ya Tupanaca̱x naxü̃nagü yadaixü̃ca̱x, rü ngürüãchi tá Roboáü̃ ya Yudáanearü ãẽ̱xgacüxü̃ nangechaü̃gü, rü tá choxü̃ nima̱xgü, rü wena táxarü Roboáü̃we narüxĩ —ñaxü̃gu narüxĩnü ga Yeruboáü̃.
28 Rü norü ucu̱xẽruü̃güna naca ga yemachiga. Rü yemawena ga nüma ga ãẽ̱xgacü ga Yeruboáü̃ rü taxre ga wocaxacü ga úirunaxca̱x naxüxẽxẽ rü duü̃xü̃güxü̃ ñanagürü: —Pemax, Pa Iraéanecüã̱xgüx, rü wüxi i taxü̃ i guxchaxü̃ nixĩ nax Yerucharéü̃wa pexĩĩxü̃ nax ngéma Tupanapata ya taxü̃newa nüxü̃ peyarücua̱xüü̃güxü̃ca̱x. Rü dücax, ñaa wocaxacüchicüna̱xãgü nixĩ i perü tupanagü ga Equítuanewa pexü̃ ígaxü̃xü̃ —ñanagürü.
29 Rü yexguma rü ĩane ga Betégu nanaxǘ ga wüxi ga yema wocaxacüchicüna̱xã, rü yema to rü ĩane ga Dáü̃gu nanaxǘ.
30 Rü yemagagu nixĩ ga chixexü̃gu nayixü̃ ga Iraéanecüã̱xgü. Rü yema duü̃xü̃gü rü Betéwa rü Dáü̃wa naxĩĩxü̃ nax yema wocaxacüchicüna̱xãgüxü̃ yanacua̱xüü̃güxü̃ca̱x.
31 Rü nüma ga Yeruboáü̃ rü ma̱xpǘnegügu tupananetagüca̱x nayaxüa ga ngutaque̱xepataxü̃ rü chacherdótexü̃ nüxü̃ naxuneta ga ngexü̃rüüxü̃mare ga duü̃xü̃gü ga tama Lebítanüxü̃ ixĩxü̃.
32 Rü ñu̱xũchi guma 8 ga tauemacüarü 15 gu nanaxü ga wüxi ga peta naxca̱x ga norü tupananetagü. Yema peta naxüchigagügu rü Yudáanewa naxügüxü̃rüxü̃ nanaxügü. Rü nümatama ga Yeruboáü̃ nixĩ ga ínaguaxü̃ ga woca nawa ga yema ãmarearü guruxü̃ ga ĩane ga Betégu naxüxü̃. Rü yema wocachicüna̱xã ga úirunaxca̱x ga nümatama naxüxü̃pe̱xegu naxü̃nagü nadai rü naxca̱x ínanagu. Rü nanaxüarü chacherdóteã̱xgü ga yema ãmarechicagü ga nüma ínaxüxüxü̃ nax nawa norü tupananetaxü̃ yacua̱xüü̃güxü̃ca̱x.
33 Rü gumá 8 ga tauemacüarü 15 gu rü nüma ga Yeruboáü̃ rü naxü̃nagü nadai rü yema tupananetana nanaxuaxü̃ nawa ga yema ãmareruxü̃ ga nüma Betégu naxüxü̃. Rü gumá tauemacügu nixĩ ga nangu̱xẽẽãxü̃ ga yema peta ga nümatama nagu naxĩnüxü̃ãcüma naxunagüxü̃ nax peta yixĩxü̃ ga yema ngunexü̃ nax Iraétanüxü̃ yema tupananetaxü̃ nagu icua̱xüü̃güxü̃ca̱x. Rü gumá tauemacügu rü nüma ga Yeruboáü̃ rü yema ãmareruxü̃ ga tupananetaxü̃ nawa yacua̱xüü̃güxü̃ca̱x ínaxüãchi nax yéma pumara ga yixichixü̃ yaguxü̃ca̱x.
