1 Reyes 13:1-34
13 Rü yexguma Betéwa Yeruboáü̃ pumarate̱xe íguyane nawa ga ãmaregüarü guruxü̃, rü yéma nangu ga wüxi ga orearü uruxü̃ ga Yudáanewa ne ũxü̃ ga Cori ya Tupana yéma Yeruboáü̃xü̃tawa muxü̃.
2 Rü Cori ya Tupana namuxü̃ãcüma tagaãcü yema ãmaregüarü guruü̃chiga nidexa rü ñanagürü: —Pa Ãmaregüarü Guruxü̃x, Pa Ãmaregüarü Guruxü̃x, rü Cori ya Tupana rü ñanagürü: “Dabítanüxü̃wa tá nabu i wüxi i õxchana rü Yochía tá nixĩ i naéga. Rü nüma tá nixĩ i cuwa ínaguaxü̃ i ngẽma tupananetachicüna̱xãgüarü chacherdótegü i ñu̱xma cuwa pumarate̱xe ígugüxü̃. Rü ngẽmaãcü duü̃xü̃güchina̱xã tá cuétüwa ínagu” —ñanagürü.
3 Rü yematama ngunexü̃gu ga yema orearü uruxü̃ rü ãẽ̱xgacümaxã nüxü̃ nixu ga wüxi ga cua̱xruxü̃ nax yemawa nüxü̃ nacuáxü̃ca̱x nax aixcüma Tupanaarü ore yixĩxü̃ ga nüxü̃ yaxuxü̃, rü ñanagürü: —Ñaa nixĩ i cua̱xruxü̃ i Cori ya Tupana nüxü̃ ixuxü̃: “Rü ñaa ãmarearü guruxü̃ rü tá nangĩãchi rü yima tanimaca ya naétüwa ngẽxmacü rü tá nagüane” —ñanagürü.
4 Rü yexguma nüma ga ãẽ̱xgacü ga Yeruboáü̃ nüxü̃ ĩnügu ga yema ore ga Tupanaarü orearü uruxü̃ nüxü̃ ixuxü̃ nachiga ga yema ãmarearü guruxü̃ ga Betéwa yexmaxü̃, rü nüma ga Yeruboáü̃ rü nanu rü naxunagüme̱xẽ rü norü purichíagüxü̃ namu rü ñanagürü: —¡Peyayaxux! —ñanagürü. Natürü guma naxme̱x ga naxunagüne rü namaxã nüxü̃ naxunetane rü yéma nayataitü rü marü taxuacüma narüxue.
5 Rü yexgumatama ga yema ãmarearü guruxü̃ rü nangĩãchi rü guma tanimaca ga naétüwa yexmacü rü nagüane yema Cori ya Tupanaarü orearü uruxü̃ nüxü̃ ixuxü̃rüxü̃. Rü yemawa nango̱x nax aixcüma Tupana yixĩxü̃ ga namuxü̃ nax nüxü̃ yaxuxü̃ca̱x ga yema ore.
6 Rü yexguma ga nüma ga ãẽ̱xgacü rü yema orearü uruü̃na naca rü ñanagürü: —Cuxü̃ chaca̱a̱xü̃, rü ¡Cori ya curü Tupanana naca nax ngẽmaãcü charümeméxü̃ca̱x! —ñanagürü. Rü nüma ga orearü uruxü̃ rü Cori ya Tupanana naca, rü yemaacü narümeme̱x ga guma ãẽ̱xgacü, rü noxrirüü̃tama nixĩ.
7 Rü yemawena ga nüma ga ãẽ̱xgacü rü yema orearü uruü̃xü̃ ñanagürü: —¡Ngĩxã rü chowe rüxũ i chauchiü̃wa nax ngéma íxraxü̃ cungṍxü̃ca̱x! Rü tá wüxi i ãmare cuxna chaxã —ñanagürü.
8 Natürü nüma ga orearü uruxü̃ rü ãẽ̱xgacüxü̃ nangãxü̃ga rü ñanagürü: —Woo chi norü ngãxü̃ i curü ngẽmaxü̃gü i cuchiü̃wa ngẽxmagüxü̃ choxna cuxãxgu, rü taxũchima cuwe charüxũ, rü taxũchima chachibü, rü taxũchima chaxaxe i ñaa nachicawa.
9 Yerü yemaacü choxü̃ namu ga Cori ya Tupana. Rü ñanagürü choxü̃: “¡Taxũtáma cuchibü rü taxũtáma cuxaxe rü taxũtáma ngẽma nama i noxri nagu quixũxü̃gu cutaegu!” —ñanagürü choxü̃.
10 Rü ñu̱xũchi nüma ga yema orearü uruxü̃ rü to ga namagu nataegu nax tama yema nama ga noxri Betéwa nagu ne naxũxü̃gu nataeguxü̃ca̱x.
11 Rü yexguma rü Betégu naxãchiü̃ ga wüxi ga orearü uruxü̃ ga marü yacü. Rü guma nanegü rü namaxã nüxü̃ nixugüe ga guxü̃ma ga yéma Betéwa naxüxü̃ ga gumá orearü uruxü̃ ga Yudáanecüã̱x. Rü yexgumarüxü̃ ta nanatümaxã nüxü̃ nixugüe ga yema ore ga ãẽ̱xgacü nüxü̃ ixuxü̃.
12 Rü tümax ga nanatü rü tümanegüna taca rü ñatagürü: —¿Ngexü̃rüüxü̃ i namagu nataeguxü̃? —ñatagürü. Rü nüma ga tümanegü rü tümamaxã nüxü̃ nixugüe ga yema nama ga nagu nataeguxü̃ ga gumá orearü uruxü̃ ga Yudáanecüã̱x.
13 Rü yexguma ga nüma ga orearü uruxü̃ rü nanegüxü̃ ñanagürü: —¡Paxa cha̱u̱xca̱x penaxüxmawexe i chorü búru! —ñanagürü. Rü nümagü rü nanamexẽẽgü ga yema búru, rü yematagu natonagü ga nanatü.
14 Rü nüma rü gumá orearü uruxü̃ ga Yudáanecüã̱xwe nangẽ. Rü nüxü̃ inayangau nax wüxi ga castañatüü̃wa natoxü̃. Rü nüxna naca rü ñanagürü: —¿Cuma quixĩxü̃ i orearü uruxü̃ i Yudáanewa ne cuxũxü̃? —ñanagürü. Rü nüma nanangãxü̃ rü ñanagürü: —Choma chixĩ —ñanagürü.
15 Rü yexguma ga guma orearü uruxü̃ ga yacü rü ñanagürü nüxü̃: —¡Ngĩxã chauchiü̃wa taxĩ nax ngéma ichibüexü̃ca̱x! —ñanagürü.
16 Natürü nüma ga gumá orearü uruxü̃ ga Yudáanecüã̱x rü nanangãxü̃ rü ñanagürü: —Taxuacüma cuxü̃ íchixümücü rü taxuacü cuchiü̃gu chaxücu, rü taxuacüma chachibü rü taxuacüma chaxaxe i ñaa nachicawa.
17 Erü nüma ya Cori ya Tupana rü meama chomaxã nüxü̃ nixu nax tama nua chachibüxü̃ca̱x rü chaxaxexü̃ca̱x rü tama ngẽma nama ga noxri nagu chixũxü̃gu chataeguxü̃ca̱x —ñanagürü.
18 Natürü nüma ga guma yacü ga orearü uruxü̃ rü ñanagürü: —Choma rü ta cuxrüxü̃ orearü uruxü̃ chixĩ. Rü Cori ya Tupanaarü orearü ngeruxü̃ i daxũcüã̱x choxü̃ namu nax chauchiü̃wa cuxü̃ chagaxü̃ca̱x rü ngéma cuxü̃ nax chachibüxẽẽxü̃ca̱x, rü cuxü̃ nax chaxaxexẽẽxü̃ca̱x —ñanagürü. Natürü doramare nixĩ ga yema nüxü̃ yaxuxü̃ ga guma orearü uruxü̃ ga yacü.
19 Rü yexguma ga gumá orearü uruxü̃ ga Yudáanecüã̱x rü düxwa nawe narüxũ rü nachiü̃wa nayachibü rü nayaxaxe.
20 Rü yexguma nügümaxã mechawa natogügu ga guma taxre rü nüma ga Cori ya Tupana rü guma yacü ga orearü uruü̃maxã nidexa.
21 13:21-22 Rü nüma rü tagaãcü gumá orearü uruxü̃ ga Yudáanecüã̱xü̃ ñanagürü: —Nüma ya Cori ya Tupana rü cumaxã nüxü̃ nixu rü ngẽma tama naga nax cuxĩnüxü̃ ga yema cuxü̃ namuxü̃wa, rü cugü nax cutaeguxü̃ nax cuchibüxü̃ca̱x rü cuxaxexü̃ca̱x i ngextá Cori ya Tupana tama cuxü̃́ ínaxwa̱xexü̃wa, rü ngẽmagagu rü taxũtáma curü o̱xigü íta̱xgüxü̃gu cuta̱x —ñanagürü.
22 Nüü̃ nadau 13:21
23 Rü yexguma marü chibüwa rü axewa yanguxgu ga gumá orearü uruxü̃ ga Yudáanecüã̱x, rü nüma ga orearü uruxü̃ ga yacü rü nüxü̃́ nanamexẽxẽ ga norü búru.
24 Rü nüma ga gumá orearü uruxü̃ ga Yudáanecüã̱x rü ínixũ. Natürü namagu nüxü̃ nangau ga wüxi ga leóü̃ rü yexma nayama̱x. Rü yema naxü̃ne rü namagu naxǘ. Rü yema búru rü yema leóü̃ rü naxü̃tagu narücho ga yema naxü̃ne.
25 Rü yexgumayane yéma nachopetü ga ñuxre ga duü̃xü̃gü rü nüxü̃ nadaugü ga naxü̃ne ga namagu üxü̃ rü yema leóü̃ ga naxü̃nexü̃tagu irüxã́ũxü̃. Rü yexguma guma ĩane ga gumá orearü uruxü̃ ga yacü nagu pexü̃newa nangugügu ga yema duü̃xü̃gü, rü nüxü̃ nixuchigagü ga yema nüxü̃ nadaugüxü̃.
26 Rü yexguma guma orearü uruxü̃ ga yacü nüxü̃ nacua̱xgu ga gumá nax yixĩxü̃ ga gumá orearü uruxü̃ ga nataeguxẽẽãcü, rü aita naxü rü ñanagürü: —Yimá yixĩxü̃ ya yimá orearü uruxü̃ ya tama Cori ya Tupanaga ĩnücü. Rü ngẽmaca̱x i nüma ya Cori ya Tupana rü wüxi i leóü̃ nape̱xegu namu nax ngẽmaãcü nagu nawagüxü̃ca̱x rü yamáaxü̃ca̱x, yema Cori ya Tupana namaxã nüxü̃ ixuxü̃ãcüma —ñanagürü.
27 Rü yexgumatama nanegüxü̃ namu ga naxca̱x nax namexẽẽgüãxü̃ca̱x ga wüxi ga búru. Rü nüma ga nanegü rü naxca̱x nanamexẽẽgü.
28 Rü yexguma ga guma orearü uruxü̃ ga yacü rü ínayadau. Rü yexma namagu nüxü̃ nayangau ga naxü̃ne rü yema búru rü yema leóü̃ ga yema naxü̃nexü̃tagu írüchoxü̃. Rü nüma ga leóü̃ rü tama yema naxü̃nexü̃ nangõ̱x rü tama tüxü̃ nima̱x ga guxema búru.
29 Rü yexguma ga nüma ga orearü uruxü̃ ga yacü rü gumá orearü uruxü̃ ga Yudáanecüã̱xü̃ne nangenagü rü búrutagu nanaxǘnagü. Rü norü ĩanewa nanange nax naxca̱x naxaxuxü̃ca̱x rü inatáãxü̃ca̱x.
30 Rü nüma rü noxrütama naxmaxü̃gu nayaxǘcuchi ga naxü̃ne. Rü naxca̱x naxaxu rü ñanagürü: —Poraãcü cuxca̱x changechaü̃, Pa Chauenexẽ —ñanagürü.
31 Rü yexguma marü yexma yaxǘcuchiãguwena, rü nanegüxü̃ ñanagürü: —Ngẽxguma choma chayu̱xgu ¡rü ngẽma naxmaxü̃ i ngẽma Tupanaarü orearü ngeruxü̃ nagu chixücuchiü̃gu tátama choxü̃ pixücuchi! ¡Rü yima chauxchina̱xãgü rü naxchinaxãxü̃tagu tátama penanu!
32 Erü aixcüma tá ningu i guxü̃ma ga yema Cori ya Tupana nüxü̃ nüxü̃ ixuxẽẽxü̃ nachiga i ngẽma tupananetaarü ãmarearü guruxü̃ i Betéwa ngẽxmaxü̃ rü nachiga i guxü̃ma i ngẽma togü i ãmarearü guruxü̃ i Chamáriaanecüã̱xarü ĩanegüwa ngẽxmagüxü̃ —ñanagürü ga nüma ga orearü uruxü̃ ga yacü.
33 Rü woo yemaacü Tupana nüxü̃ nax nüxü̃ dauxẽẽxü̃, rü nüma ga ãẽ̱xgacü ga Yeruboáü̃ rü tama nüxü̃ narüxo ga yema chixexü̃ ga nagu naxĩnüxü̃. Rü wenaxarü duü̃xü̃güxü̃ naxuneta ga chacherdóte nax yixĩgüxü̃ca̱x nawa ga guma ngutaque̱xepataxü̃ ya norü tupanachicüna̱xãca̱x ixĩgüne. Rü guxema tüxü̃́ nangúchaü̃xẽ, rü nüma ga Yeruboáü̃ rü chíxü̃maxã tüxü̃ nabaeru, rü chacherdótexü̃ tüxü̃ ningucuchixẽxẽ nawa ga guma ngutaque̱xepataü̃gü.
34 Rü yema Yeruboáü̃ üxü̃gagu nixĩ ga chixexü̃gu nayixü̃ ga nataagü rü yanaxoxü̃ ga guxü̃ma.
