1 Reyes 14:1-31
14 Yexgumaü̃cüxü rü Yeruboáü̃ nane ga Abía rü nida̱xawe.
2 Rü nümax ga Yeruboáü̃ rü naxma̱xü̃ ñanagürü: —¡Cugü natoraxü̃xẽxẽ nax ngẽmaãcü taxúema cuxü̃ cuáxü̃ca̱x nax chauxma̱x quixĩxü̃! ¡Rü ñu̱xũchi Chilówa naxũ, rü napatawa naxũ ya Tupanaarü orearü uruxü̃ ixĩcü ya Aía! Yerü nüma nixĩ ga choxü̃ naxunetaxü̃ nax ãẽ̱xgacü chixĩxü̃ i ñaa nachixü̃anewa.
3 ¡Nayaxu i 10 i paũ rü ñu̱xũchi ñuxre i maixcuraxü̃ i paũ rü ñu̱xũchi wüxiwexü̃ ta ya berure, rü íyana rü naxü̃tawa naxũ nax cumaxã nüxü̃ yaxuxü̃ca̱x i ngẽma tanexü̃ tá ngupetüxü̃! —ñanagürü.
4 Rü yemaacü ínaxü ga Yeruboáü̃ naxma̱x. Rü ngĩgü imexẽxẽ rü ñu̱xũchi Chilówa ixũ rü Aíapatawa ingu. Natürü ga Aía rü marü tama tüxü̃ nadau yerü guma naxetügü rü nixogü, yerü marü nayaxüchi.
5 Natürü ga Cori ya Tupana rü marü Aíaxü̃ nüxü̃ nacua̱xẽxẽ nax guxema Yeruboáü̃ naxma̱x rü naxü̃tawa tá taxũxü̃ rü tümanechigaxü̃ tá namaxã tayarüxuxü̃ ga nax yada̱xawexü̃. Rü yexgumarüxü̃ ta Cori ya Tupana rü marü Aíaxü̃ nüxü̃ nacua̱xẽxẽ ga yema namaxã tá tü̃xü̃ nangãxü̃xü̃. Rü Tupana namaxã nüxü̃ nixu nax tügü tanatoraxü̃xẽẽãcü yéma naxü̃tawa tá tanguxü̃.
6 14:6-7 Rü yexguma Aía tüxü̃ ĩnügu ga nax ĩã̱xwa tixücuxü̃ rü tüxü̃ ñanagürü: —¡Ixücu Pa Yeruboáü̃ naxma̱x! ¿Ta̱xacüruxü̃ cugü cunatoraxü̃xẽxẽ? Rü choxna nixĩ i naxãgaxü̃ ya Tupana nax cumaxã chaporagaxü̃ca̱x. Ẽcü ¡nataegu rü Yeruboáü̃maxã nüxü̃ yarüxu i ngẽma ore i Iraétanüxü̃güarü Tupana nüxü̃ ixuxü̃ i ñaxü̃!: “Choma rü Iraétanüxü̃tanüwa ü̃paama cuxü̃ chaxuneta nax Iraéanearü ãẽ̱xgacü quixĩxü̃ca̱x.
7 Nüü̃ nadau 14:6
8 Rü Dabítanüxü̃na chanayaxu nax ãẽ̱xgacü yaxĩgüxü̃ nax cuxna chanaxãxü̃ca̱x. Natürü i cumax rü tama Dabí ga chorü duü̃rüxü̃ mea cumaxü̃. Yerü nüma rü nayanguxẽxẽ ga yema chorü mugü rü ñu̱xũchi aixcüma norü maxü̃nemaxã cha̱u̱xca̱x nadau, rü guxü̃ma ga yema naxüxü̃ rü name ga chope̱xewa.
9 Natürü i cuma rü yema nüxíraxü̃güxü̃ ga ãẽ̱xgacügüarü yexera chixri cumaxü̃. Rü choxü̃ cunuxẽxẽ ga yexguma cunaxü̱xgu ga tupananetachicüna̱xãgü rü togüama ga naxchicüna̱xãgü ga fierumünaxca̱x. Rü yemaca̱xama choxü̃ cuxo.
10 Rü ngẽmaca̱x tá cutanüxü̃ca̱x guxchaxü̃ íchanguxẽxẽ. Rü tá chanadai i guxü̃ma i cutanüxü̃ i iyatüxü̃ i Iraéanewa, rü taxuxü̃táma maxü̃xü̃ ínayaxü. Rü tá íchayanaxoxẽẽxü̃chi i ñoma naü̃ i guxü̃rüxü̃.
11 Rü ngẽma cutanüxü̃ i ĩanegu yuexü̃ rü airugü tá nanangõ̱xgü rü ngẽma cutanüxü̃ i naanegu yuexü̃ rü ngurucugü tá nanangõ̱xgü erü choma i Cori ya Tupana rü ngẽmaãcü namaxã chanaxuegu”, ñaxü̃ —ñanagürü ga Aía.
12 Rü yemawena ga Aía rü Yeruboáü̃ naxma̱xü̃ ñanagürü: —Natürü i cumax, Pa Ngecüx ¡inachi rü cupataca̱x nataegu! Rü ngẽxguma tá yima ĩanewa cunguxgux rü tá nayu ya yima cune.
13 Rü guxü̃ma i Iraétanüxü̃ rü tá naxca̱x naxauxe rü tá naxca̱x nangechaxü̃gü rü tá inanata̱xgü. Natürü yimá nanexica tá nixĩ i itácü i natanüwa i guxü̃ma i ngẽma Yeruboáü̃tanüxü̃. Erü yimá nanewaxicatama nixĩ ya Cori ya Iraéanearü Tupana nüxü̃ nadauxü̃ nax namexü̃ i norü maxü̃.
14 Rü ngẽmawena ya Tupana rü Iraéanegu tá nanamu i wüxi i ãẽ̱xgacü i guxü̃táma i Yeruboáü̃tanüxü̃xü̃ daixü̃. Rü ngẽma rü paxa tá ínangu.
15 Rü nüma ya Cori ya Tupana rü taxü̃ i guxchaxü̃maxã tá Iraéanexü̃ nixĩãcüüxẽxẽ ñoma dexá i poraxü̃chíüxü̃ i dexnegüxü̃ ixĩãxtanücüüxẽẽxü̃rüxü̃. Rü ñaa naane i mexü̃ ga nüxíraxü̃güxü̃ ga petanüxü̃na naxãxü̃wa tá pexü̃ ínawoxü̃. Rü tá natü i Eufrátearü yéama pexü̃ nawogü nagagu nax penaxüxü̃ ga yema tupananeta i Ataréchicüna̱xãgü. Rü yemaca̱x nixĩ ga penanuxẽẽxü̃ ga Cori ya Tupana.
16 Rü nüma ya Cori ya Tupana rü to i nachixü̃aneme̱xẽgu tá nananguxẽxẽ i Iraéane nagagu ga yema pecadugü ga Yeruboáü̃ üxü̃ rü yema pecadugü ga Iraétanüxü̃xü̃ naxüxẽẽxü̃ —ñanagürü.
17 Rü yexguma ga Yeruboáü̃ naxma̱x rü itachi rü itixũ, rü ĩane ga Tircháwa tangu. Rü yexguma tümapataarü ĩã̱xwa tixücuxgu rü nayu ga yema buxü̃.
18 Rü guxü̃ma ga Iraétanüxü̃ rü nayata̱xgü rü naxca̱x naxauxe. Rü yemaacü ningu ga yema Tupanaarü orearü uruxü̃ ga Aíawa Cori ya Tupana nüxü̃ ixuxü̃.
19 Rü yema togü ga naxüxü̃ ga Yeruboáü̃ rü yema dai ga nawa inaxãxü̃chiga rü toomachigü rü guxü̃ma i ngẽma rü Iraéanearü ãẽ̱xgacügüchiga nagu ümatüxü̃ i poperagu nixĩ i naxümatüxü̃.
20 Rü nüma ga Yeruboáü̃ rü 22 ga taunecü ãẽ̱xgacü nixĩ ga Iraéanewa. Rü yexguma nayuxguwena rü nane ga Nadáx rü nachicüxü nixücu nax ãẽ̱xgacü yixĩxü̃ca̱x.
Yudáanearü ãẽ̱xgacü ga Roboáü̃chiga
21 Rü yoxni ga Yudáanewa rü Charomóü̃ nane ga Roboáü̃ nixĩ ga ãẽ̱xgacü ixĩcü. Rü nüma rü nüxü̃́ nayexma ga 41 ga taunecü ga yexguma yaxücuxgu nax ãẽ̱xgacü yixĩxü̃. Rü 17 ga taunecü nixĩ ga ãẽ̱xgacü yixĩxü̃ ga Yerucharéü̃wa. Rü guma ĩane nixĩ ga Tupana nüxü̃ unetane natanüwa ga guxü̃ma ga Iraéanearü ĩanegü nax gumáwa nayexmaxü̃ca̱x ga napata. Rü Roboáü̃ naé rü wüxi ga Amóü̃tanüxü̃ iyixĩ rü Naamá nixĩ ga ngĩéga.
22 Natürü yexguma ãẽ̱xgacü yixĩxgu ga Roboáü̃ rü yema Yudáanecüã̱xgü ga duü̃xü̃gü üxü̃ rü poraãcü nachixexüchi ga Tupanape̱xewa. Rü yema norü chixexü̃gü ga naxügüxü̃ rü guxü̃ma ga norü o̱xigü ügüxü̃ ga chixexü̃xü̃ narüyexera ga Tupanape̱xewa.
23 Yerü nümagü ga duü̃xü̃gü rü wüxichigü ga ma̱xpǘnewa rü wüxichigü ga nai ga itaetaxü̃tüxü̃wa norü tupananetagüca̱x nanaxü ga norü cua̱xüxü̃chicagü. Rü yéma nanatogüxẽxẽ ga nutagü rü naixpǘtagü nax yemaxü̃ yacua̱xüü̃güxü̃ca̱x.
24 Rü guxü̃ma ga yema nachixü̃anewa rü nügürüü̃tama yatüxü̃gü nügümaxã namaxẽ. Rü yemaacü nüxü̃ nicua̱xüü̃gü ga norü tupananetachicüna̱xãgü. Rü yemaacü yema duü̃xü̃gü ga Yudátanüxü̃ rü naxca̱x nadauxü̃taegü ga nacüma ga yema togü ga nachixü̃anegüarü duü̃xü̃gü ga tama Tupanaxü̃ cua̱xgüxü̃ ga nüma ga Cori ya Tupana Iraétanüxü̃pe̱xewa íwoxü̃xü̃.
25 14:25-26 Rü yexguma 5 ga taunecü ãẽ̱xgacü yixĩxgu ga Roboáü̃, rü Chicháx ga Equítuanearü ãẽ̱xgacü yéma naxũ rü Yerucharéü̃ca̱x ínayagoõchi. Rü nanade ga guxü̃ma ga yema Cori ya Tupanapata ga taxü̃nearü yemaxü̃gü rü guma ãẽ̱xgacüpataarü yemaxü̃gü. Rü guxü̃ma nade. Rü yexgumarüxü̃ ta nanade ga guxü̃ma ga yema poxü̃ruü̃gü ga úirunaxca̱x ga Charomóü̃ íxüxüxü̃.
26 Nüü̃ nadau 14:25
27 Rü yemawena ga ãẽ̱xgacü ga Roboáü̃ rü yema poxü̃ruü̃gü ga úirunaxca̱xchicüxü rü poxü̃ruü̃gü ga bróũchenaxca̱x inaxüxü̃. Rü ñu̱xũchi yema churaragüerugü ga guma ãẽ̱xgacüpataarü ĩã̱xgüarü dauruü̃güna nüxü̃ nadauxẽxẽ.
28 Rü guxü̃guma ga yexguma ãẽ̱xgacü Tupanapata ga taxü̃newa ũũxgux rü yema norü dauruü̃gü rü yéma nananaü̃xü̃. Rü yexguma nataegu̱xgu ga ãẽ̱xgacü, rü yema churaragü rü norü ucapugu nayanuuxü̃.
29 Rü guxü̃ma ga yema togü ga naxüxü̃ ga Roboáü̃ rü yema popera ga guxü̃ma ga Yudáanearü ãẽ̱xgacügüchiga nagu ümatüxü̃gu nixĩ i naxümatüxü̃.
30 Rü guxü̃guma nügümaxã guerra naxü ga Roboáü̃ rü Yeruboáü̃.
31 Rü yexguma nayu̱xgu ga Roboáü̃, rü ĩane ga Yerucharéü̃arü üye ga Dabíarü Ĩanegu ãégaxü̃gu nata̱x norü o̱xigütanügu. Rü naé rü wüxi ga Amóü̃tanüxü̃ iyixĩ rü Naamá nixĩ ga ngĩéga. Rü nachicüxü ãẽ̱xgacüxü̃ ningucuchi ga nane ga Abiáü̃.
