1 Reyes 15:1-34
15 Rü Abiáü̃ inanaxügü ga ãẽ̱xgacü nax yixĩxü̃ ga Yudáanewa ga yexguma Yeruboáü̃ ga Nabáx nane marü 18 ga taunecü ãẽ̱xgacü yixĩxgu ga Iraéanewa.
2 Rü tomaepü̱x ga taunecü nixĩ ga Yerucharéü̃wa ãẽ̱xgacü nax yixĩxü̃. Rü guxema naé rü Maacá nixĩ ga tümaéga. Rü tüma rü Acharóü̃xacü tixĩ.
3 Rü nüma ga Abía rü yematama nanatü üxü̃ ga chixexü̃ naxü, rü tama aixcüma Cori ya norü Tupanaga naxĩnü. Rü tama gumá norü o̱xi ga Dabí ga meama Tupanaca̱x maxü̃cürüxü̃ nixĩ.
4 Natürü yema nax Dabíxü̃ nangechaü̃xü̃gagu rü Tupana nanatauxchaxẽxẽ ga wüxi ga nane nax Yerucharéü̃arü ãẽ̱xgacü yixĩxü̃ca̱x. Rü yemaacü ga Tupana rü tama nayanaxoxẽxẽ nax Dabíwena wüxi ga natanüxü̃ ãẽ̱xgacü yixĩxü̃ nax Yerucharéü̃na nadauxü̃ca̱x.
5 Rü nüma ga Dabí rü mea Tupanape̱xewa namaxü̃ rü guxü̃guma naga naxĩnü rü nayanguxẽxẽ ga yema norü mu. Rü yema chixexü̃ ga Dabí üxü̃, rü Itítanüxü̃ ga Uríaxü̃ nax yamáxü̃xicatama nixĩ.
6 15:6-7 Rü yexguma Roboáü̃ maxü̃gu rü guxü̃guma Yeruboáü̃maxã nügü nadaiecha. Rü yexgumarüxü̃ ta ga ãẽ̱xgacü ga Abiáü̃ rü Yeruboáü̃maxã nügü nadaiecha. Rü guxü̃ma ga yema togü ga naxüxü̃ ga Abiáü̃ rü yema popera ga guxü̃ma ga Yudáanearü ãẽ̱xgacügüchiga nagu ümatüxü̃gu nixĩ i naxümatüxü̃.
7 Nüü̃ nadau 15:6
8 Rü yexguma nayu̱xgu ga Abiáü̃ rü Dabíarü Ĩanegu nanata̱xgü. Rü nawena rü nane ga Achá nixĩ ga ãẽ̱xgacü ixĩcü.
Achá rü Yudáanearü ãẽ̱xgacü nixĩ
9 Rü yexguma Achá inaxügügu nax Yudáanearü ãẽ̱xgacü yixĩxü̃ rü nüma ga Yeruboáü̃ rü marü 20 ga taunecü Iraéanemaxã inacua̱x.
10 Rü nüma ga Achá rü 40 ga taunecü Yerucharéü̃wa ãẽ̱xgacü nixĩ. Rü norü noxẽ rü Acharóü̃xacü tixĩ, rü Maacá nixĩ ga tümaéga.
11 Rü yema Achá üxü̃ rü Tupanape̱xewa name, yema norü o̱xi ga Dabí üxü̃rüxü̃.
12 Rü yema nachixü̃anewa ínanawoxü̃ ga yema yatügü ga nügümaxãtama maxẽxü̃ ga yexguma norü tupananetaca̱x nangutaque̱xegügu. Rü nanaxoxẽxẽ ga guxü̃ma ga yema tupananetachicüna̱xãgü ga norü o̱xigü íxüxü̃xü̃.
13 Rü ñu̱xũchi norü noxẽ ga Maacámaxã nanaxuegu nax tüma rü tama ãẽ̱xgacüarü noxẽ tixĩxü̃, yerü tüma ga norü noxẽ rü tanamu nax tüxü̃́ naxüxchicüna̱xãgüãxü̃ ga tupananeta ga Acherá. Rü nüma ga Achá rü nayawa̱xẽxẽ ga yema naxchicüna̱xã rü Chedróü̃arü ngatewa nayagu.
14 Rü woo tama nanaxoxẽxẽ ga yema tupananetaarü ngutaque̱xechicagü, natürü nüma ga Achá rü guxü̃guma Cori ya Tupanaweama narüxũ.
15 Rü Tupanapata ga taxü̃newa nanana ga guxü̃ma ga yemaxü̃gü ga úirunaxca̱x rü diẽrumünaxca̱xgü ga ü̃pa Cori ya Tupanana naxuaxü̃xü̃ ga nüma rü nanatü.
Ãẽ̱xgacügü ga Achá rü Ben-adáxü̃ rü nügümaxã inaxuneta
16 Rü yexguma Baachá Iraéanearü ãẽ̱xgacüwa nguxgu rü Achámaxã nügü nadaiecha.
17 Rü yexguma Baachá rü Yudáaneca̱x íyagoõchigu rü ínanapoxegu ga guma ĩane ga Ramá nax taxuxü̃ma ga Yudáanecüã̱x yéma nguxü̃ca̱x. Rü yemaacü nüma ga Achá rü taxucürüwama guma ĩanegu naxücu.
18 Rü yemaca̱x ga nüma ga Achá rü nanade ga guxü̃ma ga yema úiru rü diẽru ga Tupanapata ga taxü̃negu rü ãẽ̱xgacüpatagu namaxã nanguxü̃güxü̃. Rü norü churaragüeruna nanana nax Chíriaarü ãẽ̱xgacü ga Ben-adáxü̃tawa nanaaxü̃ca̱x ga Damácuwa. Rü nüma ga Ben-adáxü̃ rü Tabimóü̃ nane nixĩ rü Echióü̃ nataxa nixĩ. Rü Damácugu nixĩ ga naxãpataxü̃. Rü Achá rü Ben-adáxü̃tawa namuga, rü ñanagürü ga yema ore:
19 —Name nixĩ i wüxi i uneta yigümaxã taxü yema chaunatü rü cunatü nügümaxã ügüxü̃rüxü̃. Rü cuxü̃́ ngéma chanamugü i ngẽma ãmaregü i úiru rü diẽrugü. ¡Rü iyanaxoxẽxẽ i ngẽma uneta i Baachá i Iraéanearü ãẽ̱xgacümaxã cuxüxü̃ nax ngẽmaãcü tama choxü̃ nachixewexü̃ca̱x! —ñanagürü ga yema ore ga yéma namuxü̃.
20 Rü nüma ga Bex-adá rü nanayaxu ga ãẽ̱xgacü ga Acháarü ore. Rü norü churaragüerugü yéma namugü nax Iraéanearü ĩanegüca̱x íyaxüãchixü̃. Rü nanapuxü̃ ga ĩanegü ga Ióü̃, rü Dáü̃, rü Abé-béx-maacá rü Quinérex* rü guxü̃ma ga Netaríarü naane.
21 Rü yexguma yemaxü̃ nacuáchigagu ga Baachá rü marü tama nüxna nadau ga guma ĩane ga Ramá. Rü ĩane ga Tircháca̱x nataegu.
22 Rü yexguma ga ãẽ̱xgacü ga Achá rü naxca̱x nangema ga guxü̃ma ga Yudáanewa maxẽxü̃ ga duü̃xü̃gü nax Ramáwa yatoõxü̃ca̱x ga guma nutagü rü mürapewagü ga Baachá ĩane ga Ramáxü̃ namaxã ípoxeguxü̃. Rü nüma ga Achá rü gumá nutagümaxã rü mürapewagümaxã rü ínanapoxegu ga ĩane ga Guéba ga Bẽyamíü̃anewa yexmane rü ĩane ga Mispá.
Nayu ga Achá
23 Rü guxü̃ma ga yema togü ga Acháchiga rü yema naxüxü̃chiga rü norü porachiga rü guma ĩanegü ga naxüxü̃nechiga rü yema popera ga Yudáanearü ãẽ̱xgacügüchiga nagu ümatüxü̃gu nixĩ i naxümatüxü̃. Rü yexguma marü naya̱xgu rü nacutüwa nida̱xawe.
24 Rü yexguma nayu̱xgu ga Achá rü Dabíarü Ĩanegu nanata̱xgü ga norü o̱xigü íta̱xgüxü̃gu. Rü nawena rü nane ga Yochapáx nixĩ ga nachicüxü ãẽ̱xgacü ixĩcü.
Nadáx rü Iraéanewa ãẽ̱xgacü nixĩ
25 Rü yexguma marü taxre ga taunecü ãẽ̱xgacü yixĩxgu ga Achá ga Yudáanewa, rü nüma ga Nadáx ga Yeruboáü̃ nane rü yexwacax inanaxügü ga ãẽ̱xgacü nax yixĩxü̃ ga Iraéanewa. Rü taxretama ga taunecü ãẽ̱xgacü nixĩ ga yéma.
26 Natürü yema naxüxü̃ ga nüma ga Nadáx, rü poraãcü nachixe ga Tupanape̱xewa. Rü yematama chixexü̃gü ga nanatü üxü̃ naxü. Rü muxü̃ma ga tupananetachicüna̱xãgüxü̃ nicua̱xüxü̃. Rü yemaacü poraãcü chixexü̃gu Iraéanecüã̱xgüxü̃ nayixẽxẽ.
27 Natürü ga Baachá ga Aía nane ga Ichacátanüxü̃ ixĩcü rü bexma natanüxü̃xü̃ nanutaque̱xe nax Nadáxü̃ yama̱xgüxü̃ca̱x. Rü Firitéugüarü ĩane ga Guibetóü̃gu Nadáxü̃ nima̱xgü, ga yexguma nüma ga Nadáx guma ĩanexü̃ ínachoeguãchiyane namaxã ga guxü̃ma ga Iraéanecüã̱xgüarü churaragü.
28 Rü nüma ga Baachá rü Nadáxü̃ nima̱x ga yexguma Achá marü tomaepü̱x ga taunecü ãẽ̱xgacü ixĩxgu ga Yudáanewa. Rü Nadáxchicüxü ãẽ̱xgacü nixĩ.
29 Rü yexguma noxritama yangucuchigu ga Baachá nax ãẽ̱xgacü yixĩxü̃ rü tüxü̃ nadai ga guxãma ga Yeruboáü̃tanüxü̃. Rü yema Cori ya Tupana norü orearü uruxü̃ ga Aía ga ĩane ga Chilócüã̱xwa nüxü̃ yaxuxü̃rüxü̃, rü nüma ga Baachá rü guxü̃ma ga Yeruboáü̃tanüxü̃ tüxü̃ nadai rü tüxü̃ nagu̱xẽxẽ. Rü taxúema tüxü̃ ínayaxǘxẽxẽ.
30 Rü yemaacü nangupetü nagagu ga yema Yeruboáü̃ üxü̃ ga chixexü̃. Rü yema norü pecadugagu nixĩ ga chixexü̃gu nayixü̃ ga Iraéanecüã̱xgü rü norü Cori ya Tupanaxü̃ nanuxẽẽgüxü̃.
31 Rü guxü̃ma ga yema Nadáx üxü̃ i tama nua ngóxü̃, rü ngẽma popera i Iraéanecüã̱xgüarü ãẽ̱xgacügüchiga ixümatüxü̃gu naxümatü.
32 Rü gumá Yudáanecüã̱xarü ãẽ̱xgacü ga Achá, rü gumá Iraéanecüã̱xarü ãẽ̱xgacü ga Baachá rü nügümaxã guera naxüecha.
Baachá rü Iraéanewa ãẽ̱xgacü nixĩ
33 Rü yexguma tomaepü̱x ga taunecü ãẽ̱xgacü yixĩxgu ga Achá ga Yudáanewa, rü nüma ga Baachá ga Aía nane rü yexwacax ningucuchi ga Tircháwa nax Iraéanecüã̱xarü ãẽ̱xgacü yixĩxü̃ca̱x. Rü 24 ga taunecü ãẽ̱xgacü nixĩ.
34 Natürü yema Baachá üxü̃ rü poraãcü nachixe ga Cori ya Tupanape̱xewa. Yerü nanaxü ga yematama chixexü̃ ga Yeruboáü̃ Iraéanecüã̱xgüxü̃ nagu nayixixẽẽxü̃, rü muxü̃ma ga tupananetachicüna̱xãgüxü̃ nicua̱xüxü̃.
Notas
^ 15:20 Quinérex rü to i naéga nixĩ i Gariréa.
