1 Reyes 16:1-34
16 Rü nüma ga Cori ya Tupana rü Ananí nane ga Yeúxü̃ nüxü̃ nixuxẽxẽ ga yema Baacháxü̃ tá ngupetüxü̃, rü ñanagürü:
2 —Choma nixĩ ga waixü̃müte̱xewa cuxü̃ ichachixẽẽxü̃ rü chorü duü̃xü̃gü ga Iraétanüxü̃arü ãẽ̱xgacüxü̃ cuxü̃ ichamuxü̃. Natürü cuma rü Yeruboáü̃rüxü̃ chixexü̃gu cunayixẽxẽ i chorü duü̃xü̃gü i Iraétanüxü̃. Rü yemaacü choxü̃ cunuxẽxẽ namaxã ga yema chixexü̃ ga cuxüxü̃.
3 Rü ngẽmaca̱x, Pa Baacháx, rü cuxü̃ rü cutanüxü̃xü̃ tá icharüxoxẽxẽ. Rü yema Yeruboáü̃ ga Nabáx nanetanüxü̃maxã chaxüxü̃rüxü̃ tá pemaxã chaxü.
4 Rü ngexü̃rüüxü̃mare i cutanüxü̃ i ĩanegu yuxü̃ rü airugü tá nanangõ̱xgü, rü ngẽma cutanüxü̃ i naanegu yuxü̃ rü ngurucugü tá nanangõ̱xgü —ñanagürü ga Cori ya Tupana.
5 Rü guxü̃ma ga yema togü ga Baacháchiga, rü yema naxüxü̃chiga, rü norü daichiga, rü yema popera ga Iraéanearü ãẽ̱xgacügüchiga nagu ümatüxü̃gu nixĩ i naxümatüxü̃.
6 Rü yexguma nayu̱xgu ga Baachá rü ĩane ga Tirchágu nanata̱xgü. Rü nawena rü nachicüxü ãẽ̱xgacüxü̃ nixücu ga nane ga Erá.
7 Rü Cori ya Tupana rü norü orearü uruxü̃ ga Yeú ga Ananí nanewa Baachámaxã rü natanüxü̃maxã nanaxuegu ga poxcu, yerü Cori ya Tupanape̱xewa chixexü̃ naxü. Rü Baachá rü Cori ya Tupanaxü̃ nanuxẽxẽ, yerü yema chixexü̃ ga Baachá üxü̃ rü namaxã nawüxigu ga yema chixexü̃ ga naxüxü̃ ga Yeruboáü̃ rü natanüxü̃ ga Tupana daixü̃.
Erá rü Zimrí rü Iraéanearü ãẽ̱xgacügü nixĩgü
8 Rü yexguma Achá marü 26 ga taunecü ãẽ̱xgacü yixĩxgu ga Yudáanewa, rü Erá ga Baachá nane inanaxügü nax ãẽ̱xgacü yixĩxü̃ ga ĩane ga Tircháwa ga Iraéanewa. Rü taxre ga taunecüxicatama ãẽ̱xgacü nixĩ ga Iraéanewa.
9 Natürü Zimrí ga churaragüeru ga ngãxü̃tücumü ga Eráarü carugümaxã icuáxü̃ rü Eráchi naxai rü naxca̱x nadau nax ñuxãcü yamáaxü̃. Rü wüxi ga ngunexü̃gu ga yexguma ãẽ̱xgacü ga Erá rü Tircháwa nayexmagu napatawa ga Arüchá ga norü yemaxü̃gümaxã icuáxü̃, rü yéma naxaxe ñu̱xmata nangãxü̃.
10 Rü ngürüãchimare yéma nangu ga Zimrí rü Eráxü̃ nima̱x nax nüma nachicüxü ãẽ̱xgacü yixĩxü̃ca̱x ga Iraéanewa. Rü yema nangupetü ga yexguma Achá marü 27 ga taunecü ãẽ̱xgacü yixĩxgu ga Yudáanewa.
11 Rü yexguma yatocuchigu ga Zimrí nax ãẽ̱xgacü yixĩxü̃ rü inanaxügü nax nadaiaxü̃ ga guxü̃ma ga Baachátanüxü̃. Rü taxuxü̃ma ga yatüxü̃ ínayaxüxẽxẽ ga Baachátanüxü̃wa rü woo namücügütanüxü̃wa nax yemaacü taxuxü̃ma ütanüxü̃ca̱x.
12 Rü yemaacü ga Zimrí rü guxü̃ma ga Baachátanüxü̃xü̃ nayarüxoxẽxẽ, yema Cori ya Tupana norü orearü uruxü̃ ga Yeúwa nüxü̃ ixuxü̃rüxü̃ ga yexguma poxcu Baachámaxã naxuegugu.
13 Rü yemaacü Tupana nanapoxcu nagagu ga guxü̃ma ga yema chixexü̃ ga Baachá rü nane ga Erá üxü̃ ga yexguma Iraéanecüã̱xgüxü̃ chixexü̃gu nayixẽẽgu rü Cori ya Iraéarü Tupanaxü̃ nanuxẽẽgügu namaxã nax tupananetachicüna̱xãxü̃ yacua̱xüü̃güxü̃.
14 Rü guxü̃ma ga yema togü ga Eráchiga rü yema naxüxü̃chiga rü yema popera ga Iraéanearü ãẽ̱xgacügüchiga nagu ümatüxü̃gu nixĩ i naxümatüxü̃.
15 Yexguma marü 27 ga taunecü ãẽ̱xgacü yixĩxgu ga Achá ga Yudáanewa, rü nüma ga Iraéanearü churaragü rü nügü nanutaque̱xe nax Firitéugüarü ĩane ga Guibetóü̃ca̱x íyaxüãchixü̃. Rü yexguma nixĩ ga nüma ga Zimrí rü yexwaca̱xtama ãẽ̱xgacü nixĩ ga Tircháwa. Natürü 7 ga ngunexü̃xicatama ãẽ̱xgacü nixĩ.
16 Rü yema ngunexü̃ ga nagu nangutaque̱xegüxü̃ ga churaragü rü nüxü̃ nacuáchigagü nax nüma ga Zimrí rü bexma nügü nanutaque̱xexü̃ nax ãẽ̱xgacüxü̃ yama̱xgüxü̃ca̱x rü yemaacü nayama̱xgü. Rü yexgumatama ga guxü̃ma ga yema churaragü rü ínapegüxü̃wa nüxü̃ naxunetagü ga Iraéanearü churaragüeru ga Omrí nax Iraéanearü ãẽ̱xgacü yixĩxü̃ca̱x.
17 Rü yexguma ga Omrí rü guxü̃ma ga Iraéanearü churaragümaxã ínayachaxãchi nax ĩane ga Guibetóü̃ca̱x íyaxüãchixü̃, rü ĩane ga Tircháca̱x ínayaxüãchi.
18 Rü yexguma Zimrí nüxü̃ da̱u̱xgu nax marü guma ĩanegu nachocuxü̃ ga Iraéanearü churaragü, rü wüxi ga ucapu ga ãẽ̱xgacüpatawa yexmaxü̃gu nangaxi rü ñu̱xũchi nawa nanangixichi ga guma ãẽ̱xgacüpata. Rü yexma nixa rü nayu.
19 Rü yemaacü nüxü̃ nangupetü ga Zimrí nagagu ga yema chixexü̃gü ga Tupanape̱xewa naxüxü̃. Yerü nanaxü ga yematama pecadugü ga Yeruboáü̃ üxü̃ rü yemamaxã chixexü̃gu nanayixẽxẽ ga Iraétanüxü̃.
20 Rü yema popera ga Iraéanearü ãẽ̱xgacügüchiga nagu ümatüxü̃gu nixĩ i naxümatüxü̃ ga guxü̃ma ga yema naxüxü̃ ga Zimrí rü ñu̱xũchi yema nax bexma nügü nanutaque̱xexü̃ nax ãẽ̱xgacüxü̃ yama̱xgüxü̃ca̱x.
Omrí rü Iraéanearü ãẽ̱xgacü nixĩ
21 Rü yexguma ga Iraéanecüã̱x ga duü̃xü̃gü rü taxrechimüü̃gu nügü nitoye. Rü wüxichimüü̃ rü Tixní ga Guináx nanewa naxügü nax norü ãẽ̱xgacü yixĩxü̃ca̱x, rü toxchimüü̃ rü Omríwa naxügü nax norü ãẽ̱xgacü yixĩxü̃ca̱x.
22 Rü yema duü̃xü̃gü ga Omríwa ügüxü̃ rü yema duü̃xü̃gü ga Tixníwa ügüxü̃xü̃étüwa naxügü. Rü nüma ga Tixní ga Guináx nane rü nayu rü yemaacü ga Omrí rü Iraéanearü ãẽ̱xgacüxü̃ ningucuchi.
23 16:23-24 Rü Omrí rü inanaxügü nax Iraéanearü ãẽ̱xgacü yixĩxü̃ ga yexguma Achá marü 31 ga taunecü ãẽ̱xgacü yixĩxgu ga Yudáanewa. Rü 6 ga taunecü nixĩ ga ĩane ga Tircháwa nayexmaxü̃ rü 6 ga taunecü ga Chamáriawa. Rü guxü̃wama rü 12 ga taunecü nixĩ ga Iraéanewa ãẽ̱xgacü yixĩxü̃. Rü Cheméruxü̃tawa naxca̱x nataxe ga wüxi ga ma̱xpǘne, rü 66 quíru ga diẽrumümaxã nanaxütanü. Rü yexma nanaxü ga wüxi ga ĩane ga meama ípoxegune rü Chamáriagu nanaxüéga, yerü nüxíraü̃cü ga norü yora ga guma ma̱xpǘne rü Cheméru nixĩ ga naéga.
24 Nüü̃ nadau 16:23
25 Rü yema Tupanape̱xewa naxüxü̃ ga Omrí rü nachixe. Rü yema nüxíraxü̃güxü̃ ga ãẽ̱xgacügü ügüxü̃arü yexera chixexü̃ naxü.
26 Yerü yematama ga chixexü̃gü ga Nabáx nane ga Yeruboáü̃ üxü̃tama naxü, rü yemamaxã Iraétanüxü̃xü̃ chixexü̃gu nayixẽxẽ. Yerü tupananetachicüna̱xãgüxü̃ nicua̱xüü̃gü rü yemaacü Cori ya Iraéanearü Tupanaxü̃ nanuxẽẽgü.
27 Rü guxü̃ma ga yema togü ga Omríchiga, rü yema naxüxü̃chiga, rü norü daichiga, rü yema popera ga Iraéanearü ãẽ̱xgacügüchiga nagu ümatüxü̃gu nixĩ i naxümatüxü̃.
28 Rü yexguma nayu̱xgu rü Chamáriagu nanata̱xgü. Rü nawena rü nachicüxü ãẽ̱xgacüxü̃ ningucuchi ga nane ga Acáx.
Acáx rü Iraéanearü ãẽ̱xgacü nixĩ
29 Rü yexguma 38 ga taunecü ãẽ̱xgacü yixĩxgu ga Achá ga Yudáanewa rü Acáx ga Omrí nane rü yexwacax ningucuchi ga ãẽ̱xgacü nax yixĩxü̃ ga Iraéanewa. Rü 22 ga taunecü ãẽ̱xgacü nixĩ ga Iraéanewa. Rü ĩane ga Chamáriawa nixĩ ga nayexmaxü̃.
30 Natürü poraãcüxüchima nachixe ga norü maxü̃ ga Cori ya Tupanape̱xewa. Rü yema nüxíra ãẽ̱xgacügü ixĩgüxü̃arü yexera poraãcü chixexü̃ naxü.
31 Rü yematama chixexü̃gü ga Yeruboáü̃ ga Nabáx nane üxü̃ naxü. Rü naétü rü Yechabé ga Chidóü̃arü ãẽ̱xgacü ga Ex-baáxacümaxã naxãxma̱x. Rü düxwa ngĩgagu nawa nangu ga norü tupananeta ga Baáxü̃ nax yacua̱xüxü̃xü̃.
32 Rü ĩane ga Chamáriagu Baáca̱x nanaxü ga wüxi ga tupauca rü wüxi ga ãmarearü guruxü̃.
33 Rü yexgumarüxü̃ ta Chamáriawa nanaxü ga tupananeta ga Acheráchicüna̱xã. Rü yemamaxã poraãcü Cori ya Iraéanecüã̱xgüarü Tupanaxü̃ nanuxẽxẽ, guxü̃ ga yema nüxíraxü̃xü̃ ga Iraéanecüã̱xgüarü ãẽ̱xgacügüarü yexera.
34 Rü yexguma Acáx ãẽ̱xgacü ixĩxgu rü nüma ga Ié ga Betécüã̱x rü wena nanaxü ga guma ĩane ga Yericú. Rü yexguma inanuãgu ga gumá nutagü ga guma ĩane nawa ixügücü rü nane ga rüyamaecü ga Abiráü̃maxã naxãtanü rü nayu. Rü yexguma nanucuãgu ga naxtapü̱xarü ĩã̱xgü rü nane ga Chegú ga rübumaecümaxã naxãtanü rü nüma rü ta nayu. Yerü yemaacü nanaxuegu ga Cori ya Tupana nawa ga Yochué ga Núü̃ nane.
