1 Reyes 17:1-24
17 Rü nüma ga Tupanaarü orearü uruxü̃ ga Ería, ga Garaáxanewa yexmane ga ĩane ga Tibécüã̱x, rü Acáxü̃ ñanagürü: —Yimá nüxü̃́ chapuracücü ya Cori ya Iraéanecüã̱xgüarü Tupanaégagu cumaxã nüxü̃ chixu, rü doma taunecügu rü tagutáma napu rü bai tá i cherena nax rünguxü̃ ñu̱xmatáta choma wena nüxü̃ chixu —ñanagürü.
2 Rü yemaca̱x ga Cori ya Tupana rü Eríaxü̃ ñanagürü:
3 17:3-4 —¡Ínaxũxũ i nua rü éstewaama naxũ! ¡Rü natü i Yudáü̃arü éstewaama ngẽxmaxü̃ i natüxacü i Queríxgu ãégaxü̃xü̃tagu yarücu̱x! Rü ngẽma natüxacüwa tá cuxaxe rü ngurucugüxü̃ tá chamu nax ngéma cuxü̃ nangewemügüxü̃ca̱x —ñanagürü.
4 Nüü̃ nadau 17:3
5 Rü nüma ga Ería rü nanaxü ga yema Cori ya Tupana namaxã nüxü̃ ixuxü̃. Rü natü ga Yudáü̃arü éstewaama naxũ, rü yema natüxacü ga Queríxü̃tawa nayayexma.
6 Rü nümagü ga ngurucu rü pa̱xmama rü yáuanecü paũ rü namachi Eríaca̱x yéma nangegüxü̃. Rü yema natüxacüwa naxaxe ga Ería.
7 Natürü marü ñuxre ga ngunexü̃ ngupetügu rü yema natüxacü rü nipa yerü taguma napu ga yema nachixü̃anewa.
Ería rü yutecü ga ĩane ga Charétacüã̱x
8 Rü yexguma ga Cori ya Tupana rü Eríaxü̃ ñanagürü:
9 —¡Ĩane ya Charéta ya Chidóü̃anewa ngẽxmanewa naxũ, rü ngẽxma yarüxã̱ũ̱x rü ngẽxma nape! Rü marü ngĩxü̃ chamu i wüxi i yutecü i ngẽxma ãchiü̃cü nax cuxü̃ nachibüxẽẽxü̃ca̱x —ñanagürü.
10 Rü nüma ga Ería rü inaxũãchi, rü ĩane ga Charétawa naxũ. Rü yexguma guma ĩanearü ũũchiwa nanguxgu, rü yéma ngĩxü̃ nadau ga wüxi ga yutecü ga yéma üxüwa ũcü. Rü ngĩxca̱x naca rü ñanagürü ngĩxü̃: —¿Taxũchima cuxü̃́ name i wüxi i axepáxü̃gu dexá choxü̃́ nuata cunge nax chaxaxexü̃ca̱x? —ñanagürü.
11 Rü yemataax marü yéma nangeãgu, rü nüma ga Ería rü wenaxarü ngĩxna naca, rü ñanagürü ngĩxü̃: —¿Taxũchima cuxü̃́ name ega wüxichipe̱xe ta i paũ nua choxü̃́ cungexgu? —ñanagürü.
12 Natürü ga ngĩma rü inangãxü̃ rü ngĩgürügü: —Cori ya Tupanaégagu cumaxã nüxü̃ chixu rü choxü̃́ nataxuma i paũ. Rü wüxime̱xẽãcu i trigute̱xexicatama choxü̃́ nangẽxma ya wüxi ya tü̃xü̃wa, rü íxraxü̃ i chíxü̃ i nachiü̃wa. Rü ngẽmaca̱x nixĩ i üxüta chayayaxuxü̃ nax íxraxü̃ i paũ chaxüxü̃ca̱x nüxü̃́ ya chaune rü chaugüca̱x rü ngẽmawena rü taiyamaxã tá tayue —ngĩgürügü.
13 Rü nüma ga Ería rü ngĩxü̃ nangãxü̃ga rü ñanagürü: —¡Taxuca̱xma cumuü̃! ¡Rü cüx yaxü i ngẽma nüxü̃ quixuxü̃! Natürü i ngẽma curü trigute̱xe i cuxü̃́ ngẽxmaxü̃wa ¡rü choxü̃́ naxüxíra i wüxi i íxraxü̃ i paũ i maixcuraxü̃ rü nua choxü̃́ nange, rü ngẽmawena rü cugüaxü̃́ rü cuneaxü̃́ naxü!
14 Erü nüma ya Cori ya Iraéanecüã̱xarü Tupana rü nüxü̃ nixu rü ngẽma curü trigute̱xe i tü̃xü̃wa ngẽxmaxü̃ rü ngẽma curü chíxü̃ i nachiü̃wa ngẽxmaxü̃ rü tagutáma nagu̱x, rü ñu̱xmatáta Cori ya Tupana ñoma i naanegu napuxẽxẽ —ñanagürü.
15 Rü ngĩma ga yema yutecü rü íyaxũ rü inaxü ga yema Ería ngĩmaxã nüxü̃ ixuxü̃. Rü yemaacü ga ngĩma rü ngĩne rü Ería rü muxü̃ma ga ngunexü̃güca̱x naxãwemügü.
16 Rü taguma nagu̱x ga trigute̱xe ga tü̃xü̃wa rü yema chíxü̃ ga nachiü̃wa yema Cori ya Tupana Eríawa nüxü̃ yaxuxü̃rüxü̃.
17 Natürü wüxi ga ngunexü̃gu rü nida̱xawe ga yema yutecü ngĩne rü nayu.
18 Rü yexguma ga ngĩma ga yema yutecü rü Eríaxü̃ ngĩgürügü: —¿Ta̱xacü chomaxã cuxü, Pa Tupanaarü Orearü Ngeruxü̃x? ¿Rü nua cuxũ nax choxna nüxü̃ cucua̱xãchixẽẽxü̃ i chorü chixexü̃gü rü ngẽmagagu cunayuxẽẽxü̃ ya chaunex? —ngĩgürügü.
19 Rü nüma ga Ería ngĩxü̃ nangaxü̃ rü ñanagürü: —¡Nua namu ya cune! —ñanagürü. Rü yema yutecüxü̃newa nanaganagü, rü yema ucapu ga nagu napexü̃gu nanagacuchi, rü norü pechicaxü̃gu nayacaxẽxẽ.
20 Rü yemawena ga Ería rü tagaãcü Cori ya Tupanana naca rü ñanagürü: —Pa Cori ya Chorü Tupanax ¿rü ngúxü̃ tá ẽ̱xna ngĩxü̃ quingexẽxẽ i ñaa yutecü i ngĩchiü̃gu chapecü, rü ngẽmaca̱x cunayuxẽẽxü̃ ya ngĩne? —ñanagürü.
21 Rü yexgumatama ga Ería rü tomaepü̱xcüna guxema buxeétü nayarüñuãchi rü tagaãcü Cori ya Tupanana naca rü ñanagürü: —Pa Corix, Pa Chorü Tupanax, rü cuxü̃ chaca̱a̱xü̃ nax wena cunamaxẽẽxü̃ca̱x i ñaa buxü̃ —ñanagürü.
22 Rü nüma ga Cori ya Tupana rü nüxü̃ naxĩnü ga Ería nüxü̃ naca̱a̱xü̃xü̃. Rü wenaxarü tüxü̃ namaxẽxẽ ga guxema buxe.
23 Rü yexgumatama ga Ería rü tüxü̃ naganagü ga guxema buxe rü yema ínapexü̃wa tümamaxã ínarüxĩ rü ĩpatachiü̃ ga ñaxtüguxü̃wa tüxü̃ naga. Rü tümaéna tüxü̃ nayamu, rü ngĩxü̃ ñanagürü: —¡Dücax, nüxü̃ nadau ya cune rü namaxü̃! —ñanagürü.
24 Rü ngĩma ga yema nge rü inangãxü̃ rü ngĩgürügü: —Ñu̱xma waxi nixĩ i meama nüxü̃ chacuáxü̃ i Tupanaarü duü̃xü̃ nax quixĩxü̃ rü ngẽma nüxü̃ quixuxü̃ rü Cori ya Tupanawa ne naxũxü̃ —ngĩgürügü.
