1 Reyes 19:1-21
19 Rü nüma ga Acáx rü naxma̱x ga Yechabémaxã nüxü̃ nixu ga guxü̃ma ga yema Ería üxü̃, rü nax nadaü̃naaxü̃ ga yema Baáarü orearü uruü̃gü.
2 Rü yexguma ga Yechabé rü wüxi ga ngĩrü duü̃xü̃xü̃ imu ga Eríamaxã nüxü̃ nax yanaxuxü̃ca̱x ga ngĩrü dexa rü ngĩgürügü: “Cuma rü Ería quixĩ rü choma rü Yechabé chixĩ. Rü cumaxã nüxü̃ chixu rü name nixĩ i chorü tupanagü poraãcü choxü̃ napoxcu ega moxü̃ ñoma i oragu tama cumaxã chanaxüxgu i ngẽma Baáarü orearü uruü̃gümaxã cuxüxü̃”, ngĩgürügü.
3 Rü nüma ga Ería rü nüxü̃ nicua̱xãchi ga ãũcümaxü̃wa nax nayexmaxü̃, rü yemaca̱x ĩane ga Bechébawa ga Yudáanewa yexmanewa naña. Rü yéma nanata̱x ga guma norü ngü̃xẽẽruxü̃.
4 Rü yemawena rü taxúema íxãpataxü̃wa naxũ. Rü wüxi ga ngunexü̃ inixũ, rü wüxi ga naixtüü̃wa nayarütoõchi. Rü nügügu naxĩnügu rü nayuxchaü̃. Rü yemaca̱x Cori ya Tupanaxü̃ ñanagürü: —¡Marütama, Pa Corix, rü choxna nayaxu i ñaa chorü maxü̃! Erü woetátama chayu rü narümemae nax ñu̱xmatama chayuxü̃ —ñanagürü.
5 Rü yexma naixtüxü̃gu naca rü yéma nape. Natürü wüxi ga daxũcüã̱x ga Tupanaarü orearü ngeruxü̃ rü yéma nangu rü nüxü̃ ningogü rü ñanagürü nüxü̃: —¡Írüda rü nachibü! —ñanagürü.
6 Rü Ería rü nanadauane, rü nüxü̃ nadau ga naeruxü̃tagu naxüxü̃ ga wüxi ga paũ ga maixcuraxü̃ ga üxüétüwa iguxü̃ rü dexá ga yexma üweü̃xü̃. Rü yexguma ga nümax rü ínarüda rü nachibü rü naxaxe. Rü yemawena rü wena ínaca.
7 Natürü ga Cori ya Tupanaarü orearü ngeruxü̃ ya daxũcüã̱x rü wenaxarü Eríaxü̃tawa naxũ. Rü ínayabaixgü, rü ñanagürü nüxü̃: —¡Írüda rü nachibü! Erü yáxü̃gu tá quixũ i ngẽma ícuxũxü̃wa —ñanagürü.
8 Rü nüma ga Ería rü ínarüda, rü nachibü rü naxaxe. Rü yema õna rü pora nüxna naxã. Rü 40 ga ngunexü̃ rü 40 ga chütaxü̃ nixũ ñu̱xmata nawa nangu ga guma ma̱xpǘne ga Oréx.*
9 Rü yexguma guma ma̱xpǘnewa nanguxgu ga Ería rü wüxi ga ãxmaxü̃gu naxücu, rü yéma nanangupetüxẽxẽ ga chütaxü̃. Rü nüma ga Cori ya Tupana rü namaxã nidexa, rü ñanagürü nüxü̃: —¿Ta̱xacü nua cuxü, Pa Eríax? —ñanagürü.
10 Rü nüma ga Ería nanangãxü̃ga rü ñanagürü: —Poraãcü choxü̃́ cuchúxu, Pa Chorü Cori ya Tupana ya Guxü̃étüwa Ngẽxmacüx. Erü ngẽma Iraéanecüã̱xgü rü marü nüxü̃ inarüngümae i ngẽma curü uneta ga namaxã nüxü̃ quixuxü̃, rü nagu napogüe i ngẽma curü ãmarearü guruü̃gü, rü taramaxã tüxü̃ nadai ya yíxema curü orearü uruü̃gü. Rü chaxicatama íchayaxǘ, rü ñu̱xma rü cha̱u̱xca̱x rü ta nadaugü nax choxü̃ yama̱xgüxü̃ca̱x —ñanagürü.
11 Rü nüma ga Cori ya Tupana rü ñanagürü nüxü̃: —¡Ínaxũxũ rü chopexe yachi ya daa ma̱xpǘneétüwa! —ñanagürü. Rü nüma ga Ería rü yemaacü nanaxü. Rü nüma ga Cori ya Tupana rü yéma naxüpetü. Rü wüxi ga poraxüchicü ga buanecü rü nagu nangu ga guma ma̱xpǘne, rü nabu rü ga nutagü rü nipue rü narüyiixü̃chipanü, natürü nüma ga Tupana rü tama gumá buanecüwa nayexma. Rü gumá buanecüwena rü naxĩã̱xãchiane, natürü nüma ga Tupana rü tama yema ĩã̱xãchianewa nayexma.
12 Rü yema ĩã̱xãchianewe naxã ga wüxi ga üxüema, natürü nüma ga Tupana rü nataxuma ga yema üxüemawa. Rü yema üxüemawena rü yéma inanaxũ ga wüxi ga ígaxü̃ ga naga ga mexẽchixü̃.
13 Rü yexguma yema nagaxü̃ naxĩnügu ga Ería, rü nügü nidüxchiwe norü gáuxü̃chirumaxã. Rü ínaxũxũ ga yema ma̱xpǘnearü ãxmaxü̃wa rü naa̱xgu nayachi. Rü yexma nachiyane rü nüxü̃ naxĩnü ga wüxi ga naga ga nüxü̃ ñaxü̃. —¿Ta̱xacü ngéma cuxü, Pa Eríax? —ñaxü̃.
14 Rü nüma ga Ería rü nanangãxü̃ rü ñanagürü: —Nüxü̃ chicua̱xãchi nax poraãcü choxü̃́ cuchúxuxü̃, Pa Cori Pa Tupana ya Guxãxétüwa Ngẽxmacüx. Natürü ngẽma Iraéanecüã̱xgü rü marü nüxü̃ inayarüngümae ga yema namaxã nax icuxügaxü̃. Rü nagu napogüe i ngẽma curü ãmarearü guruü̃gü, rü yimá curü orearü uruü̃gü rü taramaxã nanadai. Rü chaxicatama íchayaxǘ i ñu̱xmax natürü cha̱u̱xca̱x rü ta nadaugü nax choxü̃ yama̱xgüxü̃ca̱x —ñanagürü.
15 Rü yexguma ga Cori ya Tupana rü Eríaxü̃ ñanagürü: —¡Ẽcü nataegu nagu i ngẽma nama ga noxri nagu quixũxü̃ i Damácuarü chianexü̃wa daxü̃! Rü ngẽxguma Damácuarü ĩanewa cunguxgu ¡rü chíxü̃maxã nabaeru ya Achaé nax Chíriaarü ãẽ̱xgacü nax yixĩxü̃ca̱x!
16 ¡Rü ngẽxgumawena rü chíxü̃maxã nabaeru ya Yeú ya Nimchí nane, nax Iraéanecüã̱xgüarü ãẽ̱xgacü nax yixĩxü̃ca̱x! ¡Rü ngẽxgumarüxü̃ ta chíxü̃maxã nabaeru ya Erichéu ya Chapáx nane ya Abé-meurácüã̱x nax cuchicüxü chorü orearü uruxü̃ nax yixĩxü̃ca̱x!
17 Rü yíxema Achaéme̱xẽwa iñaxẽ rü Yeú tá tüxü̃ nima̱x. Rü yíxema Yeúme̱xẽwa iñaxẽ rü Erichéu tá nixĩ i tüxü̃ daixcü.
18 Rü dücax, rü cumaxã nüxü̃ chixu rü choma rü marü íchayaxügüxẽxẽ i 7,000 i Iraéanecüã̱xgü i taguma Baápe̱xegu caxã́pü̱xügüxü̃ nax nüxü̃ yacua̱xüü̃güxü̃ca̱x —ñanagürü ga Tupana.
Tupana rü Erichéuxü̃ nayaxu
19 Rü yexguma ga nüma ga Ería rü inaxũãchi, rü Erichéu ga waixü̃müarü aiegumüanewa puracücüxü̃ yexma nangau. Rü guma Erichéupe̱xegu naxĩ ga 12 chimüü̃ ga woca ga taxrechigü nügüwa ngacuxü̃, rü nümatama ga Erichéu namaxã nixũ ga yema nawa iyacuáxü̃. Rü nüma ga Ería rü Erichéuca̱x nixũ rü naétügu nanacha̱xanagü ga naxchiru ga mámüxü̃.
20 Rü nüma ga Erichéu rü nüxna yéma niña ga norü wocagü, rü Eríawe nangẽ, rü ñanagürü nüxü̃: —Chanaxwa̱xe i choxü̃ cuxüchica nax chaunatüxü̃ rü chauéxü̃ chayameãẽxü̃ca̱x, rü ñu̱xmachi tá cuwe charüxũ —ñanagürü. Rü yexguma ga nüma ga Ería rü ñanagürü nüxü̃: —Marü name i ngéma cuxũ, natürü ¡nüxna nacua̱xãchi nax Tupana marü cuxca̱x caxaxü̃ nax norü orearü uruxü̃ quixĩxü̃ca̱x! —ñanagürü.
21 Rü nüma ga Erichéu rü Eríana nixũgachi rü taxre ga woca ga yatüxü̃ niyaxu, rü nanadai, rü ãgümücügu inanachexcu. Rü yema naixmena̱xãgü ga wocawa inaixgüxü̃maxã naxãxü̃xü̃. Rü yemawa ínanagu ga namachi, rü namücügüxü̃ nanangõ̱xẽxẽ. Rü yemawena rü Eríawe narüxũ norü ngü̃xẽẽruxü̃.
Notas
^ 19:8 Rü gumawa nixĩ ga Tupana ga Moichéca̱x nangóxü̃.
