1 Reyes 21:1-29
21 Rü wüxi ga yatü ga ĩane ga Yereécüã̱x ga Nabúgu ãégacü rü guma ĩanewa nüxü̃́ nayexma ga wüxi ga úbanecü ga ãẽ̱xgacü ga Acáxpataarü ngaicamana.
2 Rü wüxi ga ngunexü̃ ga Acáx rü Nabúxü̃ ñanagürü: —¡Choxna naxã i curü úbanecü nax ngẽmaãcü choxü̃́ nangẽxmaxü̃ca̱x i chorü nanetünecü erü chopatana nangaicama! Rü ngẽmachicüxü tá cuxna chanaxã i wüxi i úbanecü i irümemaexü̃, rüe̱xna ega cunaxwa̱xegu rü diẽrumaxã cuxü̃́ chanaxütanü —ñanagürü.
3 Natürü ga Nabú rü Acáxü̃ nangãxü̃ rü ñanagürü: —Tupana tama nanaxwa̱xe nax cuxna chanaxãxü̃ i ñaa naane i chaunatü choxna ãxü̃ —ñanagürü.
4 Rü yema Nabúarü ngãxü̃gagu rü nüma ga Acáx rü nangechaü̃ãcüma rü nanuãẽãcüma napataca̱x nataegu, yerü Nabú rü namaxã nüxü̃ nixu ga tagutáma nüxna nax naxããxü̃ ga yema naane ga nanatü nüxna ãxü̃. Rü nüma ga Acáx rü nachiü̃wa nangu, rü naxchiãü̃gü nayaca, rü ĩxtapü̱xguama nabuenü, rü tama nachibüchaü̃.
5 Rü yexguma ga naxma̱x ga Yechabé rü naxca̱x iyaxũ rü ngĩgürügü nüxü̃: —¿Ta̱xacüca̱x cuma rü tama cuchibüchaü̃? —ngĩgürügü.
6 Rü nüma ga Acáx rü ngĩxü̃ nangaxü̃ rü ñanagürü: —Nabú i Yereécüã̱xmaxã chidexa, rü nüxna naxca̱x chaca nax choxü̃ namaxã nataxexü̃ca̱x i norü úbanecü. Rü ngẽxgumachi choxna naxããxgu rü to i úbanecümaxã nüxü̃́ chanaxüchicüxü. Natürü i nümax rü tama choxna nanaxãxchaü̃ —ñanagürü.
7 Rü yexguma ga naxma̱x ga Yechabé rü inangãxü̃ rü ngĩgürügü nüxü̃: —Natürü cuma quixĩ i nua Iraéanewa ãẽ̱xgacü quixĩxü̃. ¡Rü yachibü rü nataãxẽ! Rü marü choma cuxü̃́ tá chanayaxu i Nabúarü úbanecü —ngĩgürügü.
8 Rü yexgumatama ga ngĩma rü Acáxégagu inaxümatü ga ñuxre ga popera. Rü yemagu iyaxǘcuchi ga Acáxarü cua̱xruxü̃ ga norü ãnerawa yexmaxü̃. Rü ñu̱xũchi iyamu naxca̱x ga guma ĩane ga Yereéarü ãẽ̱xgacügü.
9 21:9-10 Rü yema ngĩrü poperagüwa rü ñanagürü: —¡Ẽcü, guxü̃ma i duü̃xü̃gümaxã nüxü̃ pixu nax nangutaque̱xegüxü̃ca̱x nax tama pechibüeãcüma peyumüxẽgüxü̃ca̱x! ¡Rü nüxna pexu ya Nabú nax petanüwa naxũxü̃ca̱x! ¡Rü naxca̱x pedau i taxre i yatü i nüxü̃ ixugüxü̃ nax nüma ya Nabú rü Tupanamaxã naguxchigaxü̃ rü ãẽ̱xgacümaxã chixexü̃ naxueguxü̃! ¡Rü ngẽmaxü̃ pexĩnüeguwena, rü ípenagaxüchi rü nutamaxã ípenamuxũchi rü peyamá! —ñanagürü ga yema ngĩrü poperagüwa.
10 Nüü̃ nadau 21:9
11 Rü nüma ga yema ãẽ̱xgacügü ga guma ĩanecüã̱x rü nayanguxẽẽgü ga yema ngĩrü poperagüwa namaxã nüxü̃ yaxuxü̃.
12 Rü nanaxügü ga yema ngutaque̱xe rü yéma Nabúna nacagüe.
13 Rü nüma ga yema taxre ga yatügü rü guxü̃ma ga duü̃xü̃güpe̱xewa doraxü̃mare nixugüe Nabúchiga. Rü ñanagürügü: —Ñaa Nabú rü Tupanamaxã naguxchiga rü ãẽ̱xgacü ya Acáxmaxã rü ta naguxchiga —ñanagürügü. Rü yexguma nüxü̃ naxĩnüegu ga duü̃xü̃gü, rü Nabúxü̃ niyauxgü rü ĩanepemawa nanagáuchigügü. Rü yexma nutamaxã ínanamuxũchigü rü yemaacü nayama̱xgü.
14 Rü yexü̃ nawagüeguwena ga guma ĩanearü ãẽ̱xgacügü, rü Yechabéxü̃tawa namugagü rü ñanagürügü: —Nabú rü marü nutamaxã ínanamuxũchigü i duü̃xü̃gü, rü marü nayu —ñanagürügü.
15 Rü yexguma Yechabé nüxü̃ cuáchigagu ga Nabú rü marü nax nayuxü̃ rü ngĩgürügü nüxü̃ ga guma ngĩte ga Acáx: —Yema úbanecü ga Nabú i Yereécüã̱x tama cuxü̃ namaxã taxechaü̃xü̃, rü ñu̱xma rü ngetanüãcüma cuxrü nixĩ. Erü nüma ya Nabú rü marü nayu —ngĩgürügü.
16 Rü yemaxü̃ naxĩnügu ga Acáx rü ínayadau ga yema Nabúarü úbanecü, rü noxrüxü̃ nayaxĩxẽxẽ.
17 Natürü nüma ga Cori ya Tupana rü Ería ga Tibécüã̱xü̃ ñanagürü:
18 —Dücax, rü ñu̱xmatama ĩane ya Chamáriawa naxũ i naxü̃tawa i Iraéanecüã̱xgüarü ãẽ̱xgacü ya Acáx. Rü nüma i ñu̱xma rü nawa nangẽxma i ngẽma Nabúarü úbanecü i noxrüxü̃ yaxĩxẽẽxü̃.
19 Rü ñacurügü tá nüxü̃: “Pa Acáx, rü Cori ya Tupana rü ñanagürü cuxü̃: ‘Ñu̱xma nax cuyamáxü̃ ya Nabú rü nüxna nax cuyapuxü̃ i ngẽma noxrütama ixĩxü̃, rü ngẽmaca̱x i ñu̱xma i cumax rü tá ta cugü nadexgü i airugü ngẽmatama nachica ga Nabúgü nawa nadexgüãxü̃wa’ ” —ñanagürü. Rü nüma ga Ería rü yéma Acáxü̃tawa naxũ nax namaxã nüxü̃ yanaxuxü̃ca̱x.
20 Rü nüma ga Acáx rü Eríaxü̃ nangãxü̃ rü ñanagürü: —¿Cumax, Pa Chorü Uanüx, rü choxü̃ icuyangauama? —ñanagürü. Rü nüma ga Ería rü nanangãxü̃ rü ñanagürü nüxü̃: —Ngü̃, cuxü̃ ichayangau nax cumaxã nüxü̃ chayarüxuxü̃ca̱x nax Cori ya Tupanape̱xewa poraãcü chixexü̃ nax cuxüxü̃.
21 Rü ngẽmaca̱x ya Cori ya Tupana rü ñanagürü cuxü̃: “Tá cuxca̱x íchananguxẽxẽ i taxü̃ i guxchaxü̃, rü cugagu tá ichayanaxoxẽxẽ i guxü̃ma i cutanüxü̃. Rü tá chanadai i guxü̃ma i cutanüxü̃ i yatüxü̃gü i Iraéanewa ngẽxmagüxü̃.
22 Rü yema Nabáx nane ga Yeruboáü̃tanüxü̃maxã, rü yema Aía nane ga Baachátanüxü̃maxã chaxüxü̃rüxü̃ tá chanaxü namaxã i ngẽma cutanüxü̃. Erü yema ãẽ̱xgacügürüxü̃ choxü̃ cunuxẽxẽ nagagu nax chixexü̃gu cunayixẽẽxü̃ i Iraéanecüã̱xgü”, ñanagürü ya Tupana.
23 Rü Yechabéchiga rü Cori ya Tupana rü ñanagürü: “Rü ngẽma airugü rü tá ngĩxü̃ nangṍmachigü i Yereéarü ĩxpemawa.
24 Rü ngẽma cutanüxü̃ i ĩanegu yuexü̃, rü airugü tá nanangṍmachi. Rü ngẽma cutanüxü̃ i ĩanearü düxétügu yuexü̃, rü ẽxchagü tá nanangṍmachigü”, ñanagürü ga Tupana —ñanagürü ga Ería.
25 Rü nataxuma ga to ga Iraéanecüã̱xarü ãẽ̱xgacü ga Acáxrüxü̃ naxma̱xgagu chixexü̃ üxü̃ ga Tupanape̱xewa.
26 Rü nüma ga Acáx rü poraãcü Tupanape̱xewa chixexü̃ naxü ga yexguma yema tupananetachicüna̱xãxü̃ yacua̱xüxü̃gü naxrüxü̃ ga yema Amoréutanüxü̃ ga Cori ya Tupana Iraétanüxü̃tanüwa íwoxü̃xü̃.
27 Rü yexguma yema Ería namaxã nüxü̃ ixuxü̃xü̃ naxĩnügu ga Acáx rü nügüchirugu nagáugü. Rü témüxü̃ ga naxchirugu nicu̱x rü tama nachibü. Rü yema témüxü̃ ga naxchirumaxã napeexü̃ rü nangechaü̃ãcüma inarüxũũxü̃.
28 Rü yexguma ga Cori ya Tupana rü Eríaxü̃ ñanagürü:
29 —¿Nüxü̃ cudauxü̃ yixĩxü̃ ya Acáx nax ñuxãcü chope̱xewa nügü ínaxíraxü̃? Rü ngẽma nax chope̱xegu nügü ínaxíxraxü̃gagu rü taxũtáma chixexü̃ naxacügütanüwa changuxẽxẽ i ñu̱xma nax namaxü̃xü̃gu i nüma ya Acáx. Natürü ngẽxguma marü nayuxguwena rü nane ãẽ̱xgacü ixĩxgu tá nixĩ i Acáxacügüca̱x íchananguxẽẽxü̃ i ngẽma chixexü̃ nax ngẽmaãcü yanaxoxü̃ca̱x i natanüxü̃ —ñanagürü.
