1 Reyes 3:1-28
3 Rü Charomóü̃ rü Equítuanearü ãẽ̱xgacü ga Faraóü̃xacümaxã naxãxma̱x rü yemaacü Faraóü̃tanüxü̃ nügü nixĩxẽxẽ. Rü nüma ga Charomóü̃ rü Dabíarü Ĩane ga Yerucharéü̃wa yexmanewa ngĩxü̃ naga. Rü yéma ngĩxü̃ nayexmaxẽxẽ ñu̱xmata yangu ga guma ãẽ̱xgacüpata rü guma Tupanapata ga taxü̃ne rü ñu̱xũchi yema Yerucharéü̃arü poxeguxü̃.
2 Rü yexgumaxü̃cüü rü nataxuma ga Tupanapata ga taxü̃ne ga Yerucharéü̃wa. Rü yemaca̱x nüma ga duü̃xü̃gü rü naxü̃na nadai rü Tupanaca̱x ínanagu nawa ga yema nachicagü ga ma̱xpǘnewa yexmagüxü̃ ga ü̃pa nawa tupananetaxü̃ yacua̱xüü̃güxü̃.
Charomóü̃ rü Tupanana naxca̱x naca i cua̱x
3 Rü nüma ga Charomóü̃ rü Cori ya Tupanaxü̃ nangechaü̃ rü nayanguxẽxẽ ga yema mugü ga nanatü ga Dabí nüxü̃ ixuxü̃. Natürü Cori ya Tupanaca̱x ãmare nadai rü pumarate̱xe ínagu nawa ga yema nachicagü ga ma̱xpǘnewa yexmagüxü̃.
4 Rü yemaca̱x Gabóü̃wa naxũxũxü̃ nax Cori ya Tupanaca̱x naxü̃nagü yexma yadaixü̃ca̱x. Yerü guma ma̱xpǘne nixĩ ga guxü̃ ga naigü ga ma̱xpǘnegüarü yexera rümáchanemaene. Rü Charomóü̃ rü yema nachicawa Tupanaca̱x nanadai rü ínanagu ga 1,000 ga naxü̃nagü.
5 Rü wüxi ga chütaxü̃gu rü Gabóü̃wa rü Cori ya Tupana rü Charomóü̃ca̱x nango̱x ga nanegüwa, rü ñanagürü nüxü̃: —¡Choxna naxca̱x naca i ngẽma cunaxwa̱xexü̃ rü choma rü tá cuxna chanaxã! —ñanagürü.
6 Rü nüma ga Charomóü̃ rü nanangãxü̃ga rü ñanagürü: —Cumax, Pa Chorü Tupanax, rü nüxü̃ cungechaü̃xü̃chi ga chaunatü ga Dabí ga curü duü̃xü̃ ixĩcü, yerü nüma rü meama cupe̱xewa inixũ, rü mexü̃ naxü, rü cupe̱xewa rü mea iniwe̱x ga norü maxü̃. Rü yemaca̱x poraãcü nüxü̃ cungechaü̃ rü wüxi ya nanena cunaxã nax nachicawa natoxü̃ca̱x rü Iraéanecüã̱xgüarü ãẽ̱xgacü yixĩxü̃ca̱x.
7 Rü cumax, Pa Corix, Pa Chorü Tupanax, rü choxü̃ cuxuneta nax chaunatü ya Dabíchicüxü ãẽ̱xgacü nax chixĩxü̃ca̱x woo i choma rü wüxi i ngextü̱xüxü̃ i tauxta cua̱xwa nguxe chixĩxü̃.
8 Natürü i ñu̱xma rü cho̱xme̱xwa nangẽxmagü i guxü̃ma i ngẽma Iraéanecüã̱xgü i duü̃xü̃gü i cuma nüxü̃ cuxunetaxü̃. Rü nüma i ngẽma duü̃xü̃gü i ñu̱xma rü namuxũchi rü ngẽmaca̱x taxucürüwa texé tayaxugü.
9 Rü ngẽmaca̱x chanaxwa̱xe i choxna cunaxã i cua̱x nax ngẽmaãcü mea namaxã ichacuáxü̃ca̱x i curü duü̃xü̃gü rü nüxü̃ chacuáxü̃ca̱x i ta̱xacü nixĩ i mexü̃ rü ta̱xacü nixĩ i chixexü̃. ¿Erü texé tüxü̃́ natauxcha nax namaxã itacuáxü̃ i ñaa curü duü̃xü̃gü i muxũchixü̃? —ñanagürü ga Charomóü̃.
10 Rü nüma ga Cori ya Tupana rü namaxã nataãxẽ ga yema Charomóü̃ naxca̱x íca̱xaxü̃.
11 3:11-12 Rü yemaca̱x ñanagürü nüxü̃: —Ñu̱xma nax choxna naxca̱x cuca̱a̱xü̃ i ngẽma, rü tama naxca̱x ícuca nax namáxü̃ca̱x i curü maxü̃, rüe̱xna cumuarü diẽruã́xü̃ca̱x, rüe̱xna curü uanügü chadaixü̃ca̱x, natürü naxca̱x ícuca i cua̱x nax mea namaxã icucuáxü̃ca̱x i ngẽma curü duü̃xü̃gü, rü ngẽmaca̱x tá cuxna chanaxã i ngẽma choxna naxca̱x cucaxü̃. Rü choma rü tá cuxna chanaxã i cua̱x ga ü̃pa taguma texéaxü̃́ yexmaxü̃ rü cuwena tagutáma texéaxü̃́ ngẽxmaxü̃.
12 Nüü̃ nadau 3:11
13 Rü naétü tá cuxna chanaxã i ngẽma tama naxca̱x ícucachiréxü̃. Rü tá cuxna chanaxã i muxü̃tama i curü ngẽmaxü̃gü i mexü̃, rü tá cuxü̃ charüngü̃xẽẽxü̃ nax cumaxã nataãẽgüxü̃ca̱x i ngẽma curü duü̃xü̃gü i Iraéanecüã̱xgü. Rü ngẽmaãcü i cuma rü guxü̃ma i curü maxü̃gu rü nataxutama i to i nachixü̃anearü ãẽ̱xgacü i cumaxã wüxiguxü̃.
14 Rü ngẽxguma mea cunaxü̱xgu i chorü ngúchaü̃ rü cuyanguxẽẽgu i chorü mugü yema cunatü ga Dabí naxüxü̃rüxü̃, rü choma rü tá chanamaxẽxẽ i curü maxü̃ —ñanagürü ga Tupana.
15 Rü yexguma naba̱i̱xãchigu ga Charomóü̃, rü nüxü̃ nicua̱xãchi ga nanegüwa nax yixĩxü̃ ga yema. Rü yexguma Yerucharéü̃wa nanguxgu, rü Tupanapatawa naxũ rü yema baú ga Cori ya Tupanaarü mugüchixü̃pe̱xewa nangu. Rü naxü̃na nadai rü ínanagu rü yemaacü Tupanaxü̃ namaxã nicua̱xüxü̃. Rü yemawena rü taxü̃ma ga õna naxü naxca̱x ga guxü̃ma ga norü ngü̃xẽẽruü̃gü.
Charomóü̃ nanamexẽxẽ ga taxre ga ngexü̃arü guxchaxü̃
16 3:16-17 Rü wüxicana rü taxre ga nge ga naxü̃nemaxã taxexü̃ rü Charomóü̃xü̃tawa ixĩ. Rü yexguma nape̱xewa nayexmagügu, rü wüxi ga yema nge rü ngĩgürügü: —Pa Ãẽ̱xgacüx, choma rü ñaa nai i nge rü wüxi ya ĩpatawatama tangexmagü. Rü yexguma yéma tayexmagüyane, rü chaxíraxacü.
17 Nüü̃ nadau 3:16
18 Rü tomaepü̱x ga ngunexü̃guwena ga nax chaxíraxacüxü̃, rü ngĩma i ñaa nai i nge rü ixíraxacü. Rü toxicatama yéma tayexmagü, rü nataxuma ga to ga duü̃xü̃gü ga guma ĩpatawa. Rü toxicatama tixĩgü.
19 Natürü wüxi ga chütaxü̃gu rü tayu ga guxema ngĩxacü i ñaa nge yerü tümaétü ica.
20 Rü yexguma ga ngĩma rü bexma ngãxü̃cü íirüda. Rü yexguma choma íchapeyane rü bexma chauechita tüxü̃ iyaxu ga guxema chauxacüxe rü ngĩgüxü̃tagu tüxü̃ iyacaxẽxẽ. Rü guxema ngĩxacüxe ga yuxe rü chauxü̃tagu tüxü̃ iyacaxẽxẽ.
21 Rü yexguma pa̱xmama ícharüdaxgu nax tüxü̃ chamaixü̃ca̱x ga guxema chauxacüxe, rü tüxü̃ chadau ga nax tayuxü̃. Natürü ga mea nax yangóonexü̃, rü mea tüxü̃ chadau rü nüxü̃ chicua̱xãchi nax guxema buxe rü tama chauxacüxe nax tixĩxü̃ —ngĩgürügü.
22 Rü ngĩma ga yema nai ga nge rü ngĩgürügü: —Tama nixĩ. Rü chauxacüxe tixĩ ya yíxema maxü̃́xẽ rü yíxema yuxe rü cuxacü tixĩ —ngĩgürügü. Natürü ga ngĩma ga yema nge ga ngĩxíra idexacü rü ngĩgürügüama: —Tama nixĩ. Rü cuxacüxe tixĩ ya yíxema yuxe rü chauxacüxe tixĩ ya yíxema maxü̃́xẽ —ngĩgürügüama. Rü yemaacü ngĩgümaxã yéma iyaporagatanücüxü ãẽ̱xgacüpe̱xewa.
23 Rü yexguma ga nüma ga ãẽ̱xgacü rü meama nagu narüxĩnü rü nügüãẽwa ñanagürü: —Ñaa nge rü: “Ngĩxacüxe tixĩ ya yíxema maxü̃́xẽ rü yíxema yuxe rü ngẽma nai i ngexacü tixĩ”, ngĩgürügü. Natürü ngẽma nai i nge rü toõcü nüxü̃ iyaxu —ñanagürü ga naãxẽwa.
24 3:24-25 Rü ñu̱xũchi ga nüma ga ãẽ̱xgacü rü ñanagürü: —¡Nua penange i wüxi i tara! —ñanagürü. Rü yexguma ãẽ̱xgacüxü̃tawa nangegüãgu ga tara, rü nanamu rü ñanagürü: —¡Ẽcü ngãxü̃gu tüxü̃ perüdate ya daxe buxe rü wüxichipanü ngĩxna pixãchigü i ngẽma nge! —ñanagürü.
25 Nüü̃ nadau 3:24
26 Natürü ga yema nge ga tümaé ixĩcü ga guxema buxe yamaxü̃́xe rü poraãcü ingechaü̃xü̃chi tümaca̱x ga guxema ngĩxacüxe, rü ãẽ̱xgacüxü̃ ica̱a̱xü̃ rü ngĩgürügü: —Pa Chorü Ãẽ̱xgacüx ¡taxṹ i tüxü̃ quimáxü̃ ya yíxema buxe! Rü narümemae nixĩ i ngĩxna tüxü̃ cumu i ngẽma nai i nge —ngĩgürügü. Natürü ga yema nai ga nge rü ngĩgürügüama: —Marü name i cunadate i ngẽma buxü̃ nax taxuearüma nax yixĩxü̃ca̱x —ngĩgürügü.
27 Rü yexguma nüma ga ãẽ̱xgacü rü ñanagürü: —¡Ngĩxna tüxü̃ pemu i ngẽma tama naxwa̱xecü nax tüxü̃ rüdatexü̃ ya yíxema buxe! Erü ngẽma iyixĩ i aixcüma tümaé ixĩcü —ñanagürü.
28 Rü guxü̃ma ga Iraéanecüã̱xgü rü nüxü̃ nacuáchigagü ga yema ãẽ̱xgacü üxü̃ ga ñuxãcü nanamexẽẽãxü̃ ga yema taxüchixü̃ ga guxchaxü̃. Rü yemaca̱x nüxü̃ nangechaü̃gü yerü nüxü̃ nacuáchigagü ga ñuxãcü Tupana cua̱x nüxna ãxü̃ nax namexẽẽãxü̃ca̱x ga guxchaxü̃gü.
