1 Reyes 4:1-34
4 Rü nüma ga Charomóü̃ rü guxü̃ma ga Iraéanecüã̱xgüarü ãẽ̱xgacü nixĩ.
2 Rü yema norü ngü̃xẽẽruü̃gü rü ñaagü nixĩ: Acharía ga chacherdóte ga Chadóx nane nixĩ ga wüxi.
3 Rü yema to ga taxre rü Erioré rü Aía ga Chichá nanegü nixĩgü. Rü nümagü nixĩ ga naxümatügüãxü̃ ga guxü̃ma ga yema Iraéanewa ngupetüxü̃. Rü Yochapáx ga Ailúx nane rü ãẽ̱xgacüarü poperaarü ümatüruxü̃ nixĩ. Rü nüma nixĩ ga naxümatüaxü̃ ga guxü̃ma ga yema ngupetüxü̃ ga ãẽ̱xgacü íyexmaxü̃wa.
4 Rü to nixĩ ga Benaía ga Yoiadá nane ga churaragümaxã icuácü. Rü togü nixĩ ga Chadóx rü Abiatá ga chacherdótegü ixĩgüxü̃.
5 Rü to nixĩ ga Acharía ga Natáü̃ nane ga yema Iraéanearü üyechigüarü ãẽ̱xgacügümaxã icuáxü̃. Rü to nixĩ ga Chabúx ga chacherdóte ga Natáü̃ nane ga ãẽ̱xgacüarü ucu̱xẽruxü̃ ixĩcü.
6 Rü togü nixĩ ga Áicha ga ãẽ̱xgacüpatamaxã icuáxü̃, rü Adoniráü̃ ga Adá nane ga ĩanearü puracü i guaca̱x ixĩxü̃maxã icuáxü̃.
7 Charomóü̃ rü nüxü̃ naxuneta ga 12 ga norü ngü̃xẽẽruü̃gü nax Iraéanearü 12 ga üyeanechigümaxã inacua̱xgüxü̃ca̱x. Rü yema norü puracügü nixĩ nax ãẽ̱xgacü ga Charomóü̃ca̱x rü napatacüã̱xaxü̃́ nadeaxü̃ ga guxü̃ma ga õna ga naxwa̱xexü̃. Rü wüxichigü ga nüma ga ãẽ̱xgacügü rü gumá tauemacü ga nüxna ücügu nanaxwa̱xe nax nadeaxü̃ ga guxü̃ma ga yema õna ga Charomóü̃ naxca̱x íca̱xü̃.
8 Rü ñaagü nixĩ ga yema 12 ga ngü̃xẽẽruü̃gü, Ben-úr rü ãẽ̱xgacü nixĩ ga máxpü̱xane ga Efraíü̃gu ãégaxü̃wa.
9 Rü Ben-déca rü ãẽ̱xgacü nixĩ ga Macáxanewa rü Chaabíü̃anewa rü Bex-cheméanewa rü Eróü̃anewa rü Bex-anáü̃anewa.
10 Rü Ben-éche rü ãẽ̱xgacü nixĩ ga Arubúanewa rü Chocóanewa rü guxü̃ i Éfeanewa.
11 Rü Ben-abinadá rü ãẽ̱xgacü nixĩ ga guxü̃ma ga Dóxanewa. Rü naxma̱x rü Táfa ga Charomóü̃acü iyixĩ.
12 Rü Baaná ga Ailúx nane rü ãẽ̱xgacü nixĩ ga Taanáxwa rü Meguíduwa rü guxü̃ma i Bex-cheáü̃ane ga Charetáü̃na ngaicamaxü̃ ga Yereéarü súrwaama yexmaxü̃. Rü Bex-cheáü̃wa inaxügü ñu̱xmata Abé-meurágu yacuáx ga Yoxmeáü̃arü yeama.
13 Rü Ben-guébe rü ãẽ̱xgacü nixĩ ga ĩane ga Ramóx ga Garaáxanewa yexmane. Rü naxme̱xwa nayexmagü ga Garaáxarü ĩanexacügü ga Manaché nane ga Yaír namaxã icuáxü̃ne Rü yexgumarüxü̃ ta naxme̱xwa nayexma ta ga Argóx ga Bacháü̃anewa yexmaxü̃. Rü yéma nayexmagü ga 60 ga ĩanegü ga itaxü̃ne rü ípoxegugüne. Rü norü ĩã̱xgü rü bróũchenaxca̱x nixĩgü.
14 Rü Ainadá ga Idó nane rü ãẽ̱xgacü nixĩ ga Maanaíü̃anewa.
15 Rü Aimaá ga Charomóü̃xacü ga Bachemáxmaxã ãmaxü̃ rü ãẽ̱xgacü nixĩ ga Netaríanewa.
16 Rü Baaná ga Uchái nane rü ãẽ̱xgacü nixĩ ga Achéanewa rü Aróanewa.
17 Rü Yochapáx ga Parúa nane rü ãẽ̱xgacü nixĩ ga Ichacáanewa.
18 Rü Chimí ga Éra nane rü ãẽ̱xgacü nixĩ ga Bẽyamíü̃anewa.
19 Rü Guebé ga Urí nane rü ãẽ̱xgacü nixĩ nawa ga Gáxarü naane ga nũxcüma Amoréugüarü ãẽ̱xgacü ga Chióü̃anearü ixĩxü̃ rü Óx ga Bacháü̃anearü ãẽ̱xgacüarü ixĩxü̃. Rü ñu̱xũchi yema 12 ga Iraéanearü ãẽ̱xgacügüétüwa nayexma ga wüxi ga namaxã icuáxü̃ ga guxü̃ma ga Iraéane.
Tupana rü Charomóü̃na nanaxã i cua̱x rü nüxü̃ narüngü̃xẽxẽ
20 Rü Yudáanewa rü Iraéanewa rü namuxũchima ga norü duü̃xü̃gü ñoma naxnecüte̱xe i márpechinüwa ngẽxmacürüxü̃. Rü taguma nataxu ga õna rü axexü̃, rü ga duü̃xü̃gü rü nataãẽgü.
21 Rü yema naane ga Charomóü̃ namaxã icuáxü̃ rü taxtü ga Eufrátewa inaxügü ga éstewaama ñu̱xmata Firitéugüarü üyeanewa rü Equítuanearü üyeanewa nangu ga oéstewaama. Rü guxü̃ma ga yema nachixü̃anegü ga Charomóü̃ namaxã icuáxü̃ rü nanaxütanügü ga diẽru ga Charomóü̃ unagüxü̃. Rü Charomóü̃me̱xẽwa nayexmagü ga yexguma namaxü̃gu.
22 4:22-23 Yema õna ga wüxichigü ga ngunexü̃gu nanaxwa̱xexü̃ ga Charomóü̃ rü 6,600 quíru ga arína ga ixchicute̱xexü̃ nixĩ rü 13,200 quíru ga arína ga tachicuxte̱xexü̃ nixĩ, rü 10 ga wocagü ga iyatüxü̃ ga ingüexüchixü̃, rü 20 ga wocagü ga iyatüxü̃ ga maxẽmare ngõ̱xgüxü̃, rü 100 ga carnérugü, rü ñuxre ga cowügü rü gácheragü rü gamugü rü ota ga ingüexüchixü̃.
23 Nüü̃ nadau 4:22
24 Rü nüma ga Charomóü̃ rü namaxã inacua̱x ga guxü̃ma ga yema naane ga natü ga Eufrátearü oéstewaama yexmaxü̃. Rü Tífchawa inaxügü ñu̱xmata Gáchawa nangu. Rü guxü̃ma ga yema naanegüarü ãẽ̱xgacügü rü Charomóü̃me̱xẽwa nayexmagü, rü nüma rü nügümaxã inanangüxmüexẽxẽ.
25 Rü yexguma Charomóü̃ maxü̃gu rü ga Yudáanecüã̱xgü rü yema togü ga Iraéanecüã̱xgü rü nügü nangechaü̃gü rü taãẽãcü ínamaxẽ. Rü nórtewaama rü ĩane ga Dáü̃wa inaxügü ñu̱xmata ĩane ga Bechébawa nangu ga súrwaama rü wüxichigü taãẽãcü namaxẽ natüxü̃wa ga nanetügü ga igueragü ga napataxü̃ tüpechitaxü̃.
26 Rü Charomóü̃ rü nüxü̃́ nayexma ga 4,000 ga nachica ga norü cowaru nagu mugüxü̃. Rü yema cowarugü nixĩ ga churaraweü̃ itúgüxü̃. Rü ñu̱xũchi nüxü̃́ nayexma ga 12,000 ga churaragü ga cowaruétügu ĩxü̃.
27 Rü yema 12 ga õnaarü deruü̃gü ga wüxichigü ga Iraéanearü üyechigümaxã icua̱xgüxü̃ rü yexguma nawa nanguxgu ga gumá tauemacü ga nüxna ücü rü nanade ga õna naxca̱x ga ãẽ̱xgacü ga Charomóü̃ rü norü duü̃xü̃gü. Rü yemaacü nanade ga õna nax taxuxü̃ma natauxchicaxü̃ ga yema nadexü̃wa.
28 Rü yexguma nawa nanguxgu ga gumá tauemacü ga nüxna ücü nax nadeaxü̃ ga õna, rü yexgumarüxü̃ ta nanade ga naxü̃nawemü̃ ga chebáda rü maxẽ ga pacü. Rü yema nachica ga ãẽ̱xgacü namaxã inaxunetaxü̃gu nayanu naxca̱x ga churaragüarü cowarugü rü yema cowarugü ga puracüruxü̃ ixĩgüxü̃.
29 Tupana rü taxü̃ma ga cua̱x rü mexü̃ ga ĩnü Charomóü̃na naxã. Rü yemaacü nüxü̃ nacua̱xüchi. Rü norü cua̱x rü ñoma naxnecüte̱xe ya márpechinüwa ngẽxmacürüxü̃ namuxũchi.
30 Rü yemaacü ga Charomóü̃arü cua̱x rü Equítuanecüã̱xgüarü cua̱xü̃ nangupetü, rü yema duü̃xü̃gü ga éstewaama yexmagüxü̃arü yexera nixĩ ga norü cua̱x.
31 Rü guxü̃ma ga togü ga yatügüarü yexera nüxü̃ nacua̱x. Rü Etáü̃ ga Chérataxaarü yexera nüxü̃ nacua̱x. Rü Emáü̃arü yexera, rü Cacúarü yexera rü Dáraarü yexera, rü Maú nanegüarü yexera nüxü̃ nacua̱x. Rü yema nachiga rü guxü̃ma ga yema nachixü̃anegü ga Iraéanecüwawa yexmagüxü̃wa nangu.
32 Rü 3,000 ga ucu̱xẽgüxü̃ nixu, rü nanaxümatü ga 1,005 ga wiyaegü.
33 Rü naigüchiga nidexa rü nanetüchiga. Rü guma ocayiwa ga taxü̃ne ga Líbanuarü naixnecüwa yexmanechiga nidexa rü ñu̱xmata yema natüane ga íxraxü̃ ga ĩxtapü̱xwa rüxügüxü̃chiga nidexa. Rü ñu̱xũchi nachiga nidexa ga naeü̃gü, rü werigü, rü naeü̃gü i naxtanecamaxã itúgüxü̃ rü choxnigü.
34 Rü muxü̃ma ga to ga nachixü̃anecüã̱xarü ãẽ̱xgacügü rü Charomóü̃xü̃tawa nanamu ga norü ngü̃xẽẽruü̃gü nax naxü̃tawa yayauxgüãxü̃ca̱x ga norü ucu̱xẽgü.
