1 Reyes 5:1-18
5 Rü yexguma Iráü̃ ga ĩane ga Tíruarü ãẽ̱xgacü nüxü̃ cua̱xgux ga Charomóü̃ rü nanatü ga Dabíchicüxü ãẽ̱xgacü nax yixĩxü̃, rü nüma ga Iráü̃ rü yéma Charomóü̃xü̃tawa nanamugü ga norü ngü̃xẽẽruü̃gü nax nüxü̃ namoxẽxü̃ca̱x, yerü guxü̃guma Dabíxü̃ nangechaü̃.
2 Rü yexguma Charomóü̃ nayauxãgu ga Iráü̃arü ore rü nanangãxü̃ rü ñanagürü:
3 —Cuma nüxü̃ cucua̱x ga gumá chaunatü ga Dabí nax taxucürüwama naxüaxü̃ ga guma Cori ya Tupanapata ya taxü̃ne nagagu ga yema dai ga nagu tamaxü̃xü̃, ñu̱xmata Cori ya Tupana tümame̱xẽwa nayexmagüxẽxẽ ga yema tümaarü uanügü.
4 Natürü i ñu̱xmax i nüma ya Cori ya Tupana rü taãxẽ toxna naxã i guxü̃wama i tochixü̃anewa rü nataxuma i torü uanügü rü nataxuma i chixexü̃ i toxca̱x ínguxü̃.
5 Rü ngẽmaca̱x nagu charüxĩnü nax chorü Tupanaca̱x chanaxüxü̃ ya wüxi ya napata ya taxü̃ne yema chaunatümaxã inaxunetaxü̃rüxü̃ nax choma tá yixĩxü̃ i naxca̱x chanaxüxü̃. Yerü Tupana rü ñanagürü tüxü̃ ga chaunatü: “Rü yimá cune ya cuchicüxü cuchicawa charütoxẽẽcü, rü yimá tá nixĩ ya naxücü ya chopata ya taxü̃ne”, ñanagürü tüxü̃.
6 Rü ngẽmaca̱x, Pa Ãẽ̱xgacüx, Pa Iráü̃x, rü cuxna chaca i ñu̱xmax nax ñaa i puracüwa choxü̃ curüngü̃xẽẽxü̃ca̱x. ¡Rü namu i curü duü̃xü̃gü nax Líbanuarü naixnecüwa ocayiwa choxü̃́ ne nadexü̃ca̱x! Rü chomax rü tá chorü duü̃xü̃gü ngéma chamugü nax curü duü̃xü̃güxü̃ nangü̃xẽẽgüxü̃ca̱x. Rü chomax rü tá cuxü̃́ chanaxütanü i ngẽma naxca̱x ícuca̱xaxü̃ẽ̱xpü̱x naxca̱x i curü duü̃xü̃güarü puracü. Erü cuma nüxü̃ cucua̱x rü taxúema ya Iraéanecüã̱xgü nüxü̃ tacua̱x nax mürapewa tayaxuxü̃ i ngẽma curü duü̃xü̃gü i Chidóü̃cüã̱xgürüxü̃ —ñanagürü.
7 Rü nüma ga Iráü̃ rü nataãẽxüchi namaxã ga yema dexa ga Charomóü̃ yéma muxü̃, rü ñanagürü: —Tupanaxü̃ chicua̱xüxü̃, erü Dabína nanamu ga wüxi ya nane ya nüxü̃ cuácü nax ãẽ̱xgacü nax yixĩxü̃ca̱x i Iraéanecüã̱xgüchixü̃anewa —ñanagürü.
8 Rü ñu̱xũchi nüma ga Iráü̃ rü Charomóü̃ca̱x yéma namuga rü ñanagürü: —Marü chanayaxu i ngẽma ore i nua cha̱u̱xca̱x cumuxü̃, rü tá chanaxü i ngẽma naxca̱x ícuca̱xaxü̃. Rü cuxna tá chanana i ngẽma ocayiwapütagü rü pínupütagü.
9 Rü ngẽma chorü puracütanüxü̃ rü tá Líbanuwa ne nanatúgü i ngẽma naixpütagü rü ñu̱xmatáta márwa nangugü. Rü ngéma rü tá nügüwa nayana̱i̱xgü rü ngẽmaãcü tá nayatugü ñu̱xmatáta ngẽma türe i chomaxã cuxunetaxü̃wa nangugü. Rü ngéma rü tá ínayawẽgü rü cuma tá cunanugü. Rü natanü ya yima naixpütagü rü chanaxwa̱xe nax chauxü̃tawa cunamugüxü̃ i õnagü naxca̱x i ngẽma duü̃xü̃gü i chopatawa ngẽxmagüxü̃ —ñanagürü ga Iráü̃.
10 Rü yemaacü ga Iráü̃ rü Charomóü̃na nanana ga guxü̃ma ga yema ocayiwapüta rü pinupüta ga nanaxwa̱xexü̃.
11 Rü nüma ga Charomóü̃ rü Iráü̃na nanana ga õnagü naxca̱x ga yema duü̃xü̃gü ga napatawa yexmagüxü̃. Rü nüxna nanaxã ga 4’400,000 quíru naguxü̃ ga trigu rü 4,400 litru ga oribuarü chíxü̃. Rü yema nixĩ ga Charomóü̃ Iráü̃na ãxü̃ ga wüxichigü ga taunecügu.
12 Rü yemaacü ya Tupana rü nayanguxẽxẽ ga norü uneta, rü Charomóü̃na nanaxã ga cua̱x. Rü ñu̱xũchi ga Iráü̃ rü Charomóü̃ rü nügümaxã naxügagü, rü yemaacü taãẽwa nügümaxã nayexmagü.
13 Rü yexguma ga Charomóü̃ rü 30,000 ga puracütanüxü̃ nade ga guxü̃ma ga Iraéanewa.
14 Rü yemagü nixĩ ga Líbanuwa namugüxü̃ nax yéma napuracüexü̃ca̱x. Rü wüxi ga tauemacügu rü 10,000 yéma namugü rü nai ga tauemacügu rü to ga 10,000 yéma namugü. Rü yemaacü nanapuracüexẽxẽ ga yema tomaepü̱xtücumü. Rü wüxichigü ga yatü rü wüxi ga tauemacü Líbanuwa nayexma rü taxre ga tauemacü nachiü̃wa nayexma. Rü Adoniráü̃ nixĩ ga namaxã icuáxü̃ ga yema puracü.
15 Rü nüma ga Charomóü̃ rü nüxü̃́ nayexma ta ga 70,000 ga yatügü ga nugütaeruxü̃ rü 80,000 ga yatügü ga nutaarü mexẽẽcüwawa puracüexü̃ ga ma̱xpǘneanewa.
16 Rü yemaétü nüxü̃́ nayexma ga 3,300 ga norü duü̃xü̃gü ga yema puracütanüxü̃maxã icua̱xgüxü̃.
17 Rü nüma ga ãẽ̱xgacü ga Charomóü̃ rü nanamu ga duü̃xü̃gü nax ma̱xpǘnearü tuãchiwa ne nayauxgüãxü̃ca̱x ga nutagü ga itacü ga imexẽchicü ga mea itogücüwacü nax gumawa inaxügüãxü̃ca̱x ga guma Tupanapata ga taxü̃ne.
18 Rü yema Charomóü̃arü puracütanüxü̃ rü Iráü̃arü puracütanüxü̃ rü ñu̱xũchi guma ĩane ga Guebácüã̱x ga duü̃xü̃gü rü mürapewa naxügü nawa ga yema naixpütagü rü nayamexẽẽcüwagü ga nutagü nax naxügüã̱xü̃ca̱x ga Tupanapata ga taxü̃ne.
