1 Reyes 6:1-38
6 Rü yexguma ãgümücü ga taunecü ãẽ̱xgacü yixĩxgu ga Iraéanewa, rü nüma ga Charomóü̃ inanaxügü ga nax naxüaxü̃ ga guma Tupanapata ga taxü̃ne. Rü gumá taunecügu ga norü taxre ga tauemacü ga Chíxgu* nixĩ ga inaxügüãxü̃. Rü yexguma guma Tupanapata ga taxü̃ne ixügügu, rü marü 480 ga taunecü ningu ga nax Equítuanewa ínachoxü̃xü̃ ga Iraétanüxü̃.
2 Rü guma Tupanapata ga taxü̃ne ga ãẽ̱xgacü ga Charomóü̃ Cori ya Tupanaca̱x üxü̃ne rü 27 metru nixĩ ga norü ma̱x, rü 9 metru nixĩ ga norü tachiã, rü 13 metruarü ngãxü̃ nixĩ ga norü máchane.
3 Rü yema naxmachiã ga nüxíra nawa ixücuxü̃ ga guma Tupanapata ga taxü̃ne rü 4 ga metruarü ngãxü̃ nixĩ ga norü tachiã rü 9 metru nixĩ ga norü ma̱x. Rü yemaacü ga yema nüxíra nawa ixücuxü̃arü ma̱x rü Tupanapata ga taxü̃nearü tachiãtama nixĩ.
4 Rü Charomóü̃ nanamu nax fierumenaxãwa naxügüãxü̃ ga norü beü̃tánagü ga Tupanapata ga taxü̃ne.
5 Rü nüma ga Charomóü̃ rü nanamu nax naxüxpacugüãxü̃ca̱x ga Tupanapata ga taxü̃ne ga norü guxü̃cüwawa. Rü yema naxpacuwa rü ucapugu nayapoyechigü.
6 Rü yema naxpacugü rü tomaepü̱xgu naxü̃nagü. Rü yema nüxíraxü̃xü̃ ga norü ünagü ga ñaxtüwa üxü̃ rü 2 metru rü 25 chentímetru nixĩ ga norü taxmachiã. Rü yema to ga norü ünagü ga ngãxü̃wa üxü̃ rü 2 metru rü 70 chentímetru nixĩ ga norü taxmachiã. Rü yema norü tomaepü̱x ga ünagü ga dauxü̃wa üxü̃ rü 3 metru rü 15 chentímetru nixĩ ga norü taxmachiã. Rü guma norü omütagü rü nayaxüchica ga Tupanapata ga taxü̃netaxpü̱xarü düxétüwaama nax tama naxtapü̱xwa yaxüxmaü̃ãxü̃ca̱x.
7 Rü gumá nutagü ga guma Tupanapata ga taxü̃ne namaxã naxügücü rü marü ímemarecü nixĩ. Rü yemaca̱x ga yexguma naxügüãgu ga guma Tupanapata ga taxü̃ne rü taxuxü̃ma ga martíyuga, rüe̱xna yuemaga, rüe̱xna to ga ta̱xacü namaxã ixüxü̃ga taxĩnü ga yema ínaxügüãxü̃wa.
8 Rü yema naxpacuarü ĩã̱x ga ñaxtüwa yexmaxü̃ rü Tupanapata ga taxü̃nearü tügünecüwawa naxü. Rü meruchipaãcü naxü ga guma toxṍõne ga nawa ixĩnagüne naxca̱x ga yema naxmachiã ga ngãxü̃wa üxü̃ rü yema dauxü̃wa üxü̃.
9 Rü yexguma Charomóü̃ yanguxẽẽgu ga nax naxüaxü̃ ga Tupanapata ga taxü̃ne, rü dauxü̃wa nananugü ga norü omütagü. Rü ocayiwanaxca̱x ga mürapewamaxã nananuétü.
10 Rü nüma ga Charomóü̃ rü nanamu nax naxüxpacugüãxü̃ ga Tupanapata ga taxü̃ne ga norü guxü̃cüwawa. Rü norü máchanechiã ga yema naxpacuarü ucapugü rü 2 metru rü 25 chentímetru nixĩgü. Rü norü omütagü ga Tupanapata ga taxü̃nearü poxeguxü̃tapü̱xcüwagu nanugü rü ocayiwanaxca̱x nixĩgü.
11 Rü yexguma ga nüma ga Cori ya Tupana rü Charomóü̃maxã nüxü̃ nixu rü ñanagürü:
12 6:12-13 —Ñu̱xma nax cunaxüxü̃ ya chopata ya taxü̃ne, rü cumaxã nüxü̃ chixu, rü ngẽxguma chi chorü mugü nüxü̃ ixuxü̃ãcüma cumaxü̃gu rü chi nagu quixũxgu i guxü̃ma i chorü mugü, rü choma rü tá chayanguxẽxẽ ga yema uneta ga cunatü ga Dabímaxã nüxü̃ chixuxü̃ ga cuchiga. Rü petanüwa tá chamaxü̃ rü tagutáma pexna chixũgachi i pema i Iraéanecüã̱xgü i chorü duü̃xü̃gü nax pixĩgüxü̃ —ñanagürü.
13 Nüü̃ nadau 6:12
14 Rü nüma ga Charomóü̃ rü marü nüxü̃́ ningu ga nax naxüaxü̃ ga guma Tupanapata ga taxü̃ne.
15 Rü norü aixepetapü̱xwa ga guma ĩpata rü mürapewa ga ocayiwanaxca̱xmaxã nanaxüxtapü̱̃x. Rü daxũwa inanaxügü rü ñu̱xmata ñaxtüwa nangu nax mürapewamaxã nanaxüxtapü̱xgüaxü̃. Rü pínunaxca̱x ga mürapewamaxã nanaxüxmachixü̃.
16 Rü Tupanapata ga taxü̃neweama rü nanaxü ga wüxi ga ĩxmachiã. Rü 9 metru nixĩ ga norü tachiã rü norü máchiã rü norü máchanechiã. Rü yema naxchiã rü mürapewagü ga ocayiwanaxca̱xmaxã nanatüchiã ga guxü̃wama. Rü yemaacü nanamexẽxẽ ga yema naxmachiã nax ucapu ga Üünexüchixü̃ nax yixĩxü̃ca̱x.
17 Rü yema Tupanapata ga taxü̃nemachiã ga nachica ga üünexüchixü̃pe̱xewa üxü̃ rü 18 metru nixĩ ga norü ma̱x.
18 Rü guxü̃ma ga Tupanapata ga taxü̃netaxpü̱x ga aixepewa rü mürapewa ga ocayiwanaxca̱x nixĩgü. Rü ñu̱xũchi putürachicüna̱xãgü rü ori̱xchicüna̱xãgü nawatama nanaxüxüchigü. Rü guxü̃ma ga yema rü ocayiwanaxca̱x nixĩgü. Rü taxuwama nango̱x ga wüxi ga nuta ga naxtapü̱xarü aixepewa ügücü.
19 Rü Charomóü̃ rü Tupanapata ga taxü̃newa meama nanamexẽxẽ ga nachica ga Üünexüchixü̃ nax yexma naxüaxü̃ca̱x ga baú ga Tupanaarü mugü nagu üxü̃.
20 Rü yema nachiã ga Üünexüchixü̃ rü 9 metru nixĩ ga norü ma̱x, rü norü taxmachiã rü 9 metru ta nixĩ rü norü máchanemachiã rü 9 metru ta nixĩ. Rü Charomóü̃ rü nachiã ga üünexüchixü̃pe̱xegu nanaxǘ ga wüxi ga pumarate̱xearü guruxü̃ ga ocayiwanaxca̱x. Rü úirumaxã nanapexene ga guxü̃wama.
21 Rü yexgumarüxü̃ ta ga yema Tupanapata ga taxü̃nemachiã rü úirumaxã nanatüchiã ga guxü̃wama. Rü yema naxmachiã ga Üünexüchixü̃ rü ta úirumaxã nanatüchiã. Rü nape̱xewa rü cadéna ya úirunaxca̱xmaxã nayawaiye.
22 Rü yemaacü ga guma Tupanapata ga taxü̃ne rü guxü̃ma ga nachiãwa úirumaxã nanapexmachiãgü. Rü yexgumarüxü̃ ta úirumaxã nanapexgü ga yema guruxü̃ ga nachica ga üünexüchixü̃pe̱xegu üxü̃.
23 6:23-24 Rü nai ga oribuwa nanaxü ga taxre ga orearü ngeruü̃gü ga daxũcüã̱xchicüna̱xã ga ixãxpe̱xatüxü̃ nax yema naxmachiã ga üünexüchixü̃wa yexmagüxü̃ca̱x. Rü wüxichigü ga yema rü 4 metru rü 50 chentímetru nixĩ ga norü máxchane, rü wüxichigü ga naxpe̱xatü rü 2 metru rü 25 chentímetru nixĩ ga norü máxpe̱xatü. Rü wüxichigü ga yema daxũcüã̱xchicüna̱xã rü guma naxpe̱xatü pe̱xegü ga nügüna nax nayaxü̃xü̃ rü 4 metru rü 50 chentímetru nixĩ.
24 Nüü̃ nadau 6:23
25 6:25-26 Rü yema taxre ga orearü ngeruü̃chicüna̱xãgü rü nawüxigumare yerü nananügügüraü̃xü̃chi. Rü wüxichigü ga norü máchane rü 4 metru rü 50 chentímetru nixĩ.
26 Nüü̃ nadau 6:25
27 Rü nüma ga Charomóü̃ rü yema nachiã ga üünexü̃chixü̃gu nanachigüxẽxẽ. Rü yema taxre ga orearü ngeruü̃güchicüna̱xãgü rü nixuuchipe̱xatügü. Rü yema tügünecüwawa üxü̃ rü wüxi ga naxpe̱xatü rü ĩxtapü̱xwa nayaxũ̱x Rü yema to̱xwecüwawa üxü̃ rü wüxi ga naxpe̱xatü rü norü toxtapü̱xwa nayaxũ̱x. Rü guma nai ga naxpe̱xatügü rü meama yema naxmachixü̃arü ngãxü̃wa nügüpe̱xewa nayaxũ̱xgüpe̱xe.
28 Rü Charomóü̃ rü úirumaxã nanatüxüne ga yema Tupanaarü orearü ngeruü̃güchicüna̱xãgü.
29 Rü guxü̃ma ga norü aixepetapü̱xwa rü düxétütapü̱xwa ga Tupanapata ga taxü̃ne rü nanaxüxüchigü ga orearü ngeruxü̃ i dauxü̃cüã̱xgüchicüna̱xãgü, rü palmerachicüna̱xãgü, rü putürachicüna̱xãgü. Rü yemaacü nananga̱xãẽtapü̱xgü.
30 Rü yexgumarüxü̃ ta ga yema taxre ga naxmachiã ga Tupanapata ga taxü̃ne, rü yema rütamaexü̃ rü yema Üünexüchixü̃, rü úirutachinümaxã nanaxüxmachiã.
31 Rü yema nawa ixücuxü̃ naxca̱x ga yema naxmachiã ga Üünexüchixü̃, rü yema taxretachinü ga norü ĩã̱x rü mürapewa ga oribunaxca̱xwa nanaxü. Rü ĩã̱xarü naxpenüxü̃ ga dauxnagu idaxü̃ rü guma caxtagü ga ĩã̱xcüwawa nuxcune rü 5 cüwa nüxü̃́ nayexma.
32 Rü yema taxretachinü ga ĩã̱x, rü mürapewa ga oribunaxca̱x nixĩgü. Rü natachinüwatama nanaxüxüchigü ga Tupanaarü orearü ngeruü̃chicüna̱xãgü, rü palmerachicüna̱xãgü, rü putürachicüna̱xãgü. Rü ñu̱xũchi úirumaxã nanatü ga guxü̃ma.
33 Rü Tupanapata ga taxü̃nearü ĩã̱x ga nawa ixücuxü̃ naxca̱x ga naxmachiã ga taxü̃, rü naxpenüxü̃ rü nai ga oribunaxca̱x nixĩgü rü nacuadradu.
34 Rü yema taxretachinü ga Tupanapata ga taxü̃nearü ĩã̱x ga nawa ixücuxü̃ rü pínunaxca̱x nixĩgü rü guxü̃ma niwãxna.
35 Rü natachinüwa nanaxüxüchigü ga Tupanaarü orearü ngeruxü̃ i dauxü̃cüã̱xgüchicüna̱xãgü, rü palmerachicüna̱xãgü, rü putürachicüna̱xãgü. Rü ñu̱xũchi úirumaxã nanapexgü ga yema naxchicüna̱xãgü.
36 Rü nanaxügü ta ga naa̱xtü i aixepewa yexmaxü̃. Rü tomaepü̱xchimüü̃ ga nuta ga meama imexẽẽcüwagücümaxã ínanapoxegu. Rü ñu̱xũchi ocayiwanaxca̱x ga omütagümaxã ínananueguétü.
37 Rü yexguma marü norü ãgümücü ga taunecü ãẽ̱xgacü yixĩxgu ga Charomóü̃, rü tauemacü ga Chífgu* nixĩ ga inata̱xgüãxü̃ ga gumá nutagü ga tacü ga Tupanapata ga taxü̃ne nawa ixügücü.
38 Rü gumá Tupanapata ga taxü̃ne rü guxü̃ma ga norü yemaxü̃gümaxã ningu ga yexguma Charomóü̃ 11 ga taunecü marü ãẽ̱xgacü yixĩxgu. Rü gumá taunecüarü 8 ga tauemacü ga bulgu* nixĩ ga yanguxü̃. Rü yemaacü 7 ga taunecügu nixĩ ga yanguxü̃ ga guma Tupanapata ga taxü̃ne ga Charomóü̃ üxü̃ne.
