1 Reyes 7:1-51
7 Charomóü̃ rü noxrütama napata ne naxü. Rü 13 ga taunecügu nüxü̃́ ningu.
2 Rü ñu̱xũchi nanaxü ta ga nai ga ĩpata ga “Líbanuarü Naixnecügu” ãégane. Rü guma rü 45 metru nixĩ ga norü ma̱x, rü 22 metruarü ngãxü̃ nixĩ ga norü taxmachiã rü 13 metruarü ngãxü̃ nixĩ ga norü máchane. Rü 4 chimüü̃ nixĩ ga norü caxtagü ga ocayiwanaxca̱x. Rü guma 4 chimüü̃ ga caxtaétügu nanugü ga norü omütagü ga ocayiwanaxca̱x.
3 Rü guma omütagü rü 45 nixĩ ga norü mu. Rü 3 chimüü̃ nixĩ ga norü omütagü rü wüxichimüü̃chigüwa rü nayexma ga 15 ga omütagü ga norü caxtawa nucune. Rü ñu̱xũchi guma omütaétüwa nananucu ga mürapewa ga iyaxcüxü̃ ga ocayiwanaxca̱x.
4 Rü nayexma ga 3 chimüü̃ ga beü̃tánagü ga mea we̱xgu nuxü̃ rü yema 3 chimüü̃ ga beü̃tánagü ga wüxichimüü̃wachigü rü nügüarü to̱xma̱xtawa niyexmachigü.
5 Guxü̃ma ga yema ĩã̱xgü rü beü̃tánagüarü naxpenüxü̃ rü mea nacuadradugü. Rü nügüarü to̱xma̱xtawa niyexmachigü ga yema ĩã̱xgü rü beü̃tánagü. Rü 3 chimüü̃ nixĩ ga guxü̃wama.
6 Rü ñu̱xũchi Charomóü̃ nanaxü ta ga wüxi ga ãxmachiãmarexü̃ ga caxtagümaxã ípuxegumarexü̃. Rü 22 metruarü ngãxü̃gu nixĩ ga norü ma̱x, rü 13 metruarü ngãxü̃ nixĩ ga norü taxmachiã. Rü yemape̱xewa nayexma ga to ga naxmachiã ga caxtagümaxã ípuxegumarexü̃ natürü naxãpataétü.
7 Rü yexgumarüxü̃ ta nanaxü ga to ga naxmachiã ga ngextá ãẽ̱xgacü guxchaxü̃ nawa mexẽẽxü̃. Rü yema naxmachiãarü aixepewa rü mürapewa ga ocayiwamaxã ínanapoxegu ga guxü̃wama.
8 Rü guma ĩpata ga Charomóü̃ nagu pexü̃ne rü naweama rü nüxü̃́ nayexma ga wüxi ga naa̱xtü. Rü yexma nanaxü ga nai ga ĩpata ga napataraxü̃netama. Rü yexgumarüxü̃ ta yexma nanaxü ga guma ĩpata ga naxma̱x ga Faraóü̃acüpata. Rü guma ĩpata rü Charomóü̃pataraxü̃netama nixĩ.
9 Rü guxü̃nema ga guma ĩpatagü ga Charomóü̃ íxüxüne rü nutagü ga itatanüxü̃chi rü guxü̃cüwawa cheramaxã meama ngugügu imexẽẽgücüwamaxã nanaxü. Rü guma nutagümaxã nixĩ ga inaxügüxü̃ ga guma ĩpatagü, rü gumaétüwa nixĩ ga nanucuxü̃ ga naxtapü̱xgüarü nutagü ñu̱xmata dauxü̃wa nangu. Rü yexgumarüxü̃ ta ga yema naa̱xtü ga taxü̃arü poxeguxü̃ rü guxü̃wama guma nutagü ga imexẽẽgücüwamaxã ínapoxegu.
10 Rü gumá nutagü ga namaxã inaxügücü ga guma ĩpatagü rü nutagü ga itacü rü itatanücü nixĩ. Rü ñuxre ga gumá nutagü rü 4 metru 50 chentímetru nixĩ ga norü ma̱x rü naigü rü 3 metru 60 chentímetru nixĩ ga norü ma̱x.
11 Rü gumá nutagüétüwa nixĩ ga nanucuxü̃ ga naxtapü̱xgüarü nutagü ga itatanücü rü guxü̃cüwawa cheramaxã meama ngugügu imexẽẽgücü. Rü ñu̱xũchi ocayiwanaxca̱x ga omütagümaxã ínananueguétü.
12 Rü yema naxtapü̱x ga naa̱xtü ga taxü̃arü poxeguxü̃ rü tomaepü̱xchimüü̃ ga nutamaxã ínanapoxegu. Rü naétüwa rü ocayiwanaxca̱x ga omütagümaxã ínananueguétü. Rü yema naxtapü̱x ga naa̱xtü ga aixepewa yexmaxü̃ãcü rü yema nachiã ga Tupanapata ga taxü̃nepe̱xewa yexmaxü̃ãcü nixĩ ga naxüxü̃.
Charomóü̃ rü naxca̱x nangema ga wüxi ga yatü ga Iráü̃gu ãégaxü̃ nax puracü nüxna naxãxü̃ca̱x
13 Nüma ga ãẽ̱xgacü ga Charomóü̃ rü norü duü̃xü̃xü̃ ĩane ga Tíruwa namu nax Iráü̃xü̃ yagaxü̃ca̱x.
14 Rü nüma ga Iráü̃ rü wüxi ga yutecü ngĩne nixĩ. Rü ngĩma rü Netarítanüxü̃ iyixĩ rü gumá ngĩte ga ngĩxna yucü rü wüxi ga Tírucüã̱x nixĩ. Rü nüma rü meama nüxü̃ nacua̱x nax bróũchewa ta̱xacü naxüxü̃. Rü gumá nane ga Iráü̃ rü cua̱x nüxü̃́ nayexma rü nanatürüü̃tama meama nüxü̃ nacua̱x nax ta̱xacü naxüxü̃ ga bróũchewa. Rü nüma ga Iráü̃ rü ãẽ̱xgacü ga Charomóü̃xü̃tawa naxũ rü nanaxü ga guxü̃ma ga yema puracü ga Charomóü̃ nüxna ãxü̃.
15 Rü nanaxü ga taxre ga caxtagü ga bróũchenaxca̱x ga 8 metrugu ixügüne ga norü ma̱x rü 5 metruarü ngãxü̃gu ga norü bomenaxãgü.
16 Rü ñu̱xũchi bróũchewa nanaxü ga taxre ga guma caxtatape̱xearü ngã̱xãẽruü̃gü. Rü yema ngã̱xãẽruü̃gü rü 2 metru 25 chentímetru nixĩ ga norü ma̱x.
17 Rü yexgumarüxü̃ ta bróũchewa cadénaxacü nanamutachinü ga taxre ga to ga ngã̱xãẽruü̃gü. Rü yema cadénaxacü mutachinüxü̃ rü wüxichigü ga caxtatape̱xearü ngã̱xãẽruü̃wa nananucu.
18 Rü yexgumarüxü̃ ta bróũchewa nanaxü ga ibopü̱xüxü̃. Rü wüxichigü ga yema cadénaxacü mutachinüxü̃wa nananucu ga taxrechimüü̃ ya yema ibopü̱xüxü̃. Rü yema taxre ga caxtatape̱xearü ngã̱xãẽruü̃gü rü nawüxigu.
19 Rü guma caxtagü ga Tupanapataarü ücuchicawa nucuchaxü̃nearü ngã̱xãẽruü̃gü rü wixguxüchi taxre ga metrugu nixügü ga norü máchane. Rü putüra i líriuchacuacü nanaxü.
20 Rü wüxichigü ga yema caxtatape̱xearü ngã̱xãẽruü̃arü dauxü̃wa rü yema íyanachexü̃wa ga cadénaxacü mutachinüxü̃wa rü yemawa nixĩ ga nanucuxü̃ ga taxrechimüü̃ ga 200 ga ibopü̱xüxü̃.
21 Rü nüma ga Iráü̃ rü guma Tupanapata ga taxü̃nearü ücuchicawa nananucu ga guma taxre ga caxtagü. Rü gumá caxta ga tügünewaama üxü̃ne rü Yaquíü̃gu nanaxüéga rü gumá to̱xwewaama üxü̃ne rü Boágu nanaxüéga.
22 Rü yema caxtagütape̱xearü ngã̱xãẽruü̃gü rü nanalíriuchacugüraxü̃. Rü yemaacü nixĩ ga nagúxü̃ ga yema puracü ga caxtagüarü ü.
Tupanapata ga taxü̃nearü yemaxü̃güchiga
23 Yemawena ga Iráü̃ rü bróũchewa nanaxü ga wüxi ga dexápáxü̃ ga taxü̃. Yema dexápáxü̃ rü nabo. Rü norü tachiã rü 4 metru 50 chentímetru nixĩ. Rü norü ma̱xü̃ma rü 2 metru 25 chentímetru nixĩ. Rü norü bobera rü 13 metru 50 chentímetru nixĩ.
24 Rü yema dexápaxü̃beratüü̃wa rü ñu̱xũchi nacüwawa rü nüma ga Iráü̃ rü taxrechimüü̃ ga ori̱xchicüna̱xãgümaxã nananga̱xãẽ. Rü yema 45 céü̃tímetruwachigü rü 10 chigü ga ori̱xchicüna̱xã nayexma. Rü yexguma naxüãgu ga yema dexápáxü̃ ga taxü̃ rü nawatama nanaxüxüchi ga norü ngã̱xãẽruü̃gü ga ori̱xchicüna̱xãgü.
25 Rü yema dexápáxü̃ rü 12 ga woca ga iyatüxü̃chicüna̱xãgü ga bróũchenaxca̱xétügu nanaxǘnagü. Rü yema woca ga iyatüxü̃chicüna̱xãgü rü 3 nixĩ ga nórteguama rüdaunüxü̃, rü 3 ga súrguama rüdaunüxü̃, rü 3 ga ésteguama rüdaunüxü̃ rü ñu̱xũchi 3 ga oésteguama rüdaunüxü̃. Rü guma woca ga iyatüxü̃paragü ga naweama ügüne rü yema dexápáxü̃ta̱xmü nayexmagü yerü yema woca ga iyatüxü̃güétügu nixĩ ga naxüxü̃.
26 Norü yaxcü ga yema dexápáxü̃ rü 8 chentímetru nixĩ ga norü yaxcü. Rü yema nabera rü nanalíriuchacuraxü̃. Rü 44,000 litru ga dexá nagu name.
27 Rü ñu̱xũchi Iráü̃ nanaxü ta ga 10 ga dexápáxü̃ta̱xmü ga bróũchenaxca̱x. Wüxichigü ga yema naxta̱xmüxü̃ rü wüxi ga metru rü 80 chentímetru nixĩ ga norü ma̱x. Rü yexgumaepü̱xtama nixĩ ga norü tatachinü. Rü yema norü máchane rü 1 metru rü 35 chentímetru nixĩ.
28 Rü wüxichigü ga yema naxtaxmüxü̃gü rü naxãchina̱xã rü yemawa nangucu ga bróũche tachinügü.
29 Rü yema bróũche tachinügü rü marü naxãmatü namaxã ga leóü̃chicüna̱xãgü rü woca ga iyatüxü̃chicüna̱xãgü rü daxũcüã̱x ga orearü ngeruü̃chicüna̱xãgü ga ixãxpe̱xatüxü̃. Norü daxũwa rü norü ñaxtüwa ga yema woca ga iyatüxü̃chicüna̱xãgü rü leóü̃chicüna̱xãgü rü nayexma ga to ga ngã̱xãẽruü̃gü ga boxü̃ ga naixatüchicüna̱xãgü.
30 Wüxichigü ga yema naxta̱xmüxü̃güpara rü nixãchicu. Rü yema nachicugü rü bróũchenaxca̱x nixĩgü. Rü yema naxpawerugü ga nachicugü nawa ngucuxü̃ rü ta rü bróũchenaxca̱x nixĩgü. Rü yema naxta̱xmüxü̃güarü ãgümücütüxü̃pe̱xewa nayexma ga norü tairuü̃gü ga bróũchenaxca̱x ga dexápáxü̃ nagu üxü̃. Rü yema tairuü̃gü rü guxü̃cüwawa ninga̱xãẽgü namaxã ga ngã̱xãẽruü̃gü ga naixatüchicüna̱xãgü.
31 Rü yema naxta̱xmüxü̃ ga dexápáxü̃ nagu ixücuchixü̃ rü naboxoma. Rü yema boxomaxü̃ rü 46 chentímetru inango̱xenü. Rü yemaxü̃magu nixĩ ga yaxǘcuchixü̃ ga yema dexápáxü̃. Rü yema boxomaxü̃ rü 69 chentímetru nixĩ ga norü taxüma. Rü naberawa rü naixatüchicüna̱xãgümaxã nanga̱xãẽ. Rü yema nacüwagü ga yema naxta̱xmüxü̃ rü nawüxigumare. Rü nacuadradugü rü tama nibo.
32 Rü naxpawerugü ga yema ãgümücü ga nachicu rü naxta̱xmüxü̃güparawa nangucu. Rü yema norü tachicu ga yema naparachicugü rü 68 chentímetru nixĩ ga wüxichigü.
33 Rü yema nachicugü rü nanacaruchicugüraxü̃. Rü yema nachicupawerugü, rü naxpenüü̃chicugü, rü naxpenüü̃güarü texcuruü̃gü, rü yema nachicumaxetügü ga norü texcuruü̃gü nawa ngucuxü̃, rü guxü̃ma ga yemagü rü bróũchenaxca̱x nixĩgü.
34 Rü yexguma naxüãgu ga yema dexáchixü̃ta̱xmüxü̃gü rü nawatama nanaxüxüchigü ga norü tairuü̃gü ga yema norü ãgümücüpe̱xewa yexmagüxü̃.
35 Rü yema naxta̱xmüxü̃güarü dauxü̃waama üxü̃ ga nabera rü inabo rü 22 chentímetruarü ngãxü̃ nixĩ ga inango̱xenüxü̃. Rü naxü̃ne ga yema naxta̱xmüxü̃ rü naparagü rü nawatama nanaxüxüchi.
36 Rü nüma ga Iráü̃ rü wüxichigü ga yema naxta̱xmügüxũnewa nananga̱xãẽ namaxã ga daxũcüã̱xchicüna̱xãgü rü leóü̃chicüna̱xãgü rü palmerachicüna̱xãgü. Rü yexgumarüxü̃ ta nacüwawa rü ínayanuegu namaxã ga to ga ngã̱xãẽruü̃gü ga boxü̃ ga naixatüchicüna̱xãgü. Rü yema ínaxãchicaxü̃wa nananga̱xãẽ namaxã ga naixatüchicüna̱xãgü.
37 Rü yema 10 ga naxta̱xmügü rü yexguma yaxügüãgu rü wüxitama nixĩ ga naxchicüna̱xã ga nawa ínaxüxü̃ãxü̃. Rü guxü̃ma rü nawüxigumare.
38 Yexgumarüxü̃ tá nanaxü ga 10 ga dexáchixü̃gü ga bróũchenaxca̱x. Rü wüxichigü ga yema rü 1 metru 80 chentímetrugü nixĩ ga norü taxüma rü 880 litru ga dexá nagu name. Rü wüxichigü ga yema dexáchixü̃ rü naxta̱xmüétügutama nixüchigü.
39 Rü yema 5 ga naxta̱xmügü rü Tupanapata ga taxü̃nearü tügünecüwagu ninuma rü yema to ga 5 rü Tupanapata ga taxü̃nearü to̱xwecüwagu ninuma. Rü yema taxü̃ ga dexáchixü̃ rü Tupanapata ga taxü̃nearü tügünecüwagu naxü ga súr éstewaama.
40 Ñu̱xũchi Iráü̃ ínanaxüxü̃ ta ga paneragü rü paragü rü tacháũgü. Rü yemaacü nanagu̱xẽxẽ ga yema puracü ga Charomóü̃ nüxü̃ üxẽẽxü̃ nawa ga guma Cori ya Tupanapata ga taxü̃ne.
41 Rü ñaagü nixĩ ga yema puracü ga naxüxü̃: Taxre ga caxtagü, rü taxre ga guma caxtatape̱xearü ngã̱xãẽruü̃gü ga iboxü̃, rü taxre ga yema caxtatape̱xearü ngã̱xãẽruü̃güarü tüxünexü̃ ga cadénaxacü mutachinüxü̃.
42 Rü ñu̱xũchi nanaxü ga 400 ga ibopü̱xüxü̃ naxca̱x ga yema taxre ga caxtaarü ngã̱xãẽruü̃arü tüxünexü̃. Rü taxrechimüü̃ yemagu ínanueguãchi ga wüxichigü ga guma caxtagütape̱xewa.
43 Ñu̱xũchi nanaxü ta ga yema 10 ga dexáchixü̃ta̱xmügü rü ñu̱xũchi yema dexáchixü̃gü ga naétügu nugüxü̃
44 Rü yexgumarüxü̃ ta nanaxü ga yema taxüchixü̃ ga dexáchixü̃ rü ñu̱xũchi 12 ga woca ga iyatüxü̃chicüna̱xãgü nax yemagüétügu naxü̃nagüxü̃ca̱x ga dexáchixü̃.
45 Rü nanaxü ta ga paneragü rü paragü rü tacháũgü. Rü guxü̃ma ga guma Tupanapata ga taxü̃nearü yemaxü̃gü ga ãẽ̱xgacü ga Charomóü̃ Iráü̃xü̃ íxüxü̃xẽẽxü̃, rü bróũche ga meama báixü̃wa ínanaxüxü̃.
46 Rü nüma ga ãẽ̱xgacü ga Charomóü̃ nanamu nax naxnecüwa üxü̃ ga naxchicüna̱xãgüwa nadexẽẽgüãxü̃ca̱x ga guxü̃ma ga yemaxü̃gü ga bróũchenaxca̱x. Rü natü ga Yudáü̃cutüwa ga ínametachinüxü̃wa nixĩ ga naxüaxü̃ ga yema puracü. Rü yema nachica rü guma ĩanegü ga Chucóx rü Charetáü̃arü ngãxü̃wa nayexma.
47 Rü yema nax namuxũchixü̃ ga yema Tupanapataarü yemaxü̃gü rü yemaca̱x ga Charomóü̃ rü tama naxca̱x ínaca nax ínayagüaxü̃ca̱x.
48 7:48-50 Ñu̱xũchi Charomóü̃ rü nanaxüxẽxẽ ta ga guxü̃ma ga togüama ga yemaxü̃gü ga Cori ya Tupanapata ga taxü̃newa yexmagüxü̃. Rü yema nixĩ ga yema pumarate̱xearü guruxü̃ ga úirunaxca̱x, rü yema mecha ga úirunaxca̱x ga paũ ga üünexü̃arü üruxü̃, rü yema 10 ga omügü ga muxchiraü̃xü̃ ga úirunaxca̱xgü ga naxmachiã ga üünexüchixü̃pe̱xegu nuxü̃, rü 5 ga norü tügünecüwawa rü 5 ga norü to̱xwecüwawa. Rü yexgumarüxü̃ ta nanaxü ga yema ngã̱xãẽruü̃gü ga putüragü, rü omügü, rü ãxchataxü̃gü ga úirunaxca̱x, rü copugü, rü pirañagü ga omüchiraü̃arü yoyeruxü̃, rü tacháũgü, rü cucharóü̃gü, rü pumarate̱xearü guruü̃gü. Rü guxü̃ma ga yemagü rü úirunaxca̱x nixĩgü. Rü yexgumarüxü̃ ta ga yema aixepewa yexmaxü̃ ga naxmachiã ga üünexü̃chixü̃arü ĩã̱xgüarü bichágragü rü yema Tupanapata ga taxü̃nearü ĩã̱xgüarü bichágragü rü úirunaxca̱x nixĩgü.
49 Nüü̃ nadau 7:48
50 Nüü̃ nadau 7:48
51 Rü yexguma marü nagu̱xgu ga guxü̃ma ga yema puracü ga ãẽ̱xgacü ga Charomóü̃ üxẽẽxü̃ ga Cori ya Tupanapata ga taxü̃newa, rü nüma ga Charomóü̃ rü nanade ga yema naxpáü̃gü ga úirunaxca̱x rü diẽrumünaxca̱x ga nanatü ga Dabí Cori ya Tupanana ãxü̃. Rü yema Tupanapata ga taxü̃nearü ucapu ga Cori ya Tupanaarü yemaxü̃gü nagu nuxü̃gu nayanu.
