1 Reyes 8:1-66
8 Rü yexguma ga Charomóü̃ rü Yerucharéü̃wa naxca̱x nangema ga guxü̃ma ga yema norü ngü̃xẽẽruü̃gü ga ãẽ̱xgacügü rü guxü̃ma ga yema ãẽ̱xgacügü ga wüxichigü ga Iraéanecüã̱xtücumümaxã icua̱xgüxü̃. Rü nanangutaque̱xexẽxẽ nax Chióü̃wa yayauxgüãxü̃ca̱x ga yema baú ga Cori ya Tupanaarü mugü nawa yexmaxü̃ nax Tupanapatawa nangegüãxü̃ca̱x.
2 Rü gumá taunecüarü 7 ga tauemacü ga Etanígu* nixĩ ga Charomóü̃ nangutaque̱xexẽẽxü̃ ga yema Iraéanecüã̱xgü nax yaxãxü̃chigüãxü̃ca̱x ga gumá Tupanapata. Natürü meama nagu nangu ga yema norü peta ga wüxichigü ga taunecügu norü düxenügü nagu naxüchigagüxü̃.
3 8:3-4 Rü yéma nangugü ga guxü̃ma ga Iraéanecüã̱xgüarü ãẽ̱xgacügü. Rü yema chacherdótegü rü nanayauxgü ga yema baú ga Tupanaarü mugü nawa yexmaxü̃. Rü guma ĩpata ga Moiché üxü̃ne ga nawa Tupana namaxã idexane rü nayangegü namaxã ga guxü̃ma ga yemaxü̃gü ga üünexü̃ ga yéma yexmagüxü̃. Rü yemagü rü chacherdótegü rü Lebítanüxü̃ nixĩ ga yanaxü̃.
4 Nüü̃ nadau 8:3
5 Rü nüma ga ãẽ̱xgacü ga Charomóü̃ rü guxü̃ma ga yema Iraéanecüã̱xgü ga yexma ngutaque̱xegüxü̃ rü yema baúpe̱xewa rü Tupanaca̱x nanadai rü nayagu ga muxũchixü̃ma ga carnérugü rü wocagü. Rü taxucürüwama texé ixugüxü̃ ga norü mu.
6 8:6-7 Rü yemawena ga yema chacherdótegü rü Tupanapata ga taxü̃nearü aixepegu nanangecuchigü ga yema baú. Rü yema nachiã ga üünexü̃chixü̃gu nayaxǘgü natüxü̃gu ga guma naxpe̱xatügü ga yema taxre ga Tupanaarü orearü ngeruü̃güchicüna̱xãgü. Rü guma naxpe̱xatügü rü nayadüxü ga yema Tupanaarü mugüchixü̃ wüxigu namaxã ga naxpawerugü.
7 Nüü̃ nadau 8:6
8 Natürü guma naxpawerugü rü nima̱xü̃chi, rü yemaca̱x nachiã ga üünexü̃wa ne ida̱u̱xgu ga norü to̱xma̱xtawa ga yema nachiã ga Üünexüchixü̃, rü nüxü̃ tadau ga naxpawerugüpe̱xe. Natürü Tupanapataarü düxétüwaama tama nüxü̃ tadau. Rü ñu̱xma rü ta rü ngéma nangẽxmagü.
9 Rü yema baúwa nayexma ga yema taxre ga nutatachinü ga yexma nucuxü̃ ga Moiché ga yexguma ma̱xpǘne ga Oréxwa nayexmagügu. Rü yema nutatachinügügu naxümatü ga yema Tupanaarü uneta ga Iraétanüxü̃maxã naxüxü̃ ga yexguma Equítuanewa ínachoxü̃gu.
10 Rü yexguma ínachoxü̃xgu ga chacherdótegü ga yema nachiã ga üünexüchixü̃wa, rü caixanexü̃maxã nanapa ga guma Cori ya Tupanapata ga taxü̃ne.
11 Rü nagagu ga yema caixanexü̃ rü nüma ga yema chacherdótegü rü taxuacüma yexma narücho nax Tupanaxü̃ yacua̱xüü̃güxü̃ca̱x, yerü Cori ya Tupanaarü üünemaxã nanapa ga guma Tupanapata ga taxü̃ne.
Charomóü̃ rü Tupanana nanaxuaxü̃ ga guma napata ga taxü̃ne
12 Rü yexguma ga Charomóü̃ rü ñanagürü: —Pa Chorü Tupanax, cuma rü nüxü̃ quixu nax nawa cumaxü̃xü̃ i caixanexü̃ i pamüemaxü̃.
13 Natürü i ñu̱xmax rü cuxca̱x chanaxü ya wüxi ya cupata ya taxü̃ne nax guxü̃guma ngéma cumaxü̃xü̃ca̱x —ñanagürü.
14 Rü yemawena nüma ga ãẽ̱xgacü rü guxü̃ma ga yema Iraétanüxü̃ ga yexma chigüxü̃ca̱x nadauegu, rü mexü̃ namaxã naxuegu.
15 Rü ñanagürü: —Namecümaxüchi ya Cori ya Iraétanüxü̃arü Tupana erü nayanguxẽxẽ ga yema uneta ga chaunatü ga Dabímaxã nüxü̃ yaxuxü̃ ga yexguma ñaxgu nüxü̃:
16 “Yema ngunexü̃ ga Equítuanewa íchanguxü̃xẽẽgucürüwa ga chorü duü̃xü̃gü ga Iraétanüxü̃, rü taguma nüxü̃ chaxuneta ya wüxi ya ĩane natanüwa ya Iraétanüxü̃ ga duü̃xü̃gü nax yimagu naxüxü̃ca̱x ya chopata ya taxü̃ne ya nawa changexmane. Natürü nüxü̃ chaxuneta ga Dabí nax chorü duü̃xü̃gü ga Iraétanüxü̃maxã inacuáxü̃ca̱x”, ñaxgu nüxü̃ ga Tupana.
17 Rü nüma ga chaunatü ga Dabí rü nanaxüxchaü̃chire̱x ya wüxi ya ĩpata ya taxü̃ne naxca̱x ya tórü Cori ya Iraétanüxü̃arü Tupana.
18 Natürü nüma ya Cori ya Tupana rü ñanagürü nüxü̃: “Wüxi i mexü̃ nixĩ nax cunaxüxchaxü̃xü̃ ya wüxi ya chopata ya taxü̃ne.
19 Natürü taxũtáma cuma cunaxü, rü wüxi i cune tá nixĩ i naxüxü̃”, ñanagürü nüxü̃ ga Cori ya Tupana.
20 Rü nüma ya Cori ya Tupana rü nayanguxẽxẽ i ngẽma norü uneta. Rü yema nüxü̃ yaxuxü̃rüxü̃ rü ñu̱xmax rü chaunatü ga Dabíchicüxü Iraétanüxü̃arü ãẽ̱xgacü chixĩ rü namaxã ichacua̱x. Rü ñu̱xmax, rü chanaxü ya wüxi ya napata ya taxü̃ne naxca̱x ya tórü Cori ya Iraétanüxü̃arü Tupana.
21 Rü ñu̱xũchi chanamexẽxẽ i wüxi i nachica i Tupanapatawa nax ngẽxma yaxǘcuchixü̃ca̱x i ngẽma baú i nawa nangẽxmaxü̃ i ngẽma mugü ya Tupana tórü o̱xigümaxã nüxü̃ ixuxü̃ ga yexguma Equítuanewa ínanguxü̃xẽẽãgu —ñanagürü ga Charomóü̃.
22 Rü yemawena ga Charomóü̃ rü nape̱xegu nachi ga yema guruxü̃ ga ngextá Cori ya Tupanaca̱x ãmaregü íguxü̃wa. Rü guxü̃ma ga yema Iraétanüxü̃pe̱xewa dauxü̃ naxunagüme̱xẽ.
23 Rü ñanagürü: —Pa Cori ya Iraétanüxü̃arü Tupanax, rü dauxü̃guxü̃ i naanewa rü woo ñoma i naanewa rü nataxuma i ta̱xacü i cuxrüxü̃ Tupana ixĩxü̃. Erü cumax rü cuyanguxẽxẽ i curü uneta rü tüxü̃ cungechaü̃ ya guxãma ya yíxema aixcüma cuga ĩnüexe.
24 8:24-25 Pa Iraétanüxü̃arü Tupanax, ñu̱xma rü cuyanguxẽxẽ ga yema uneta ga curü duü̃ ga chaunatü ga Dabímaxã nüxü̃ quixuxü̃. Rü yema nüxü̃ quixuxü̃ rü ñoma i ngunexü̃gu nixĩ i yanguxü̃. ¡Rü ẽcü yanguxẽxẽ ta ga yema chaunatü ga Dabímaxã nüxü̃ quixuxü̃ nax guxü̃gutáma curü ngü̃xẽẽmaxã Iraéanemaxã inacua̱xgüxü̃ i wüxi i nataxa ega chaunatü ya Dabírüxü̃ tá cuma cunaxwa̱xexü̃ãcü namaxẽgu!
25 Nüü̃ nadau 8:24
26 Rü ngẽmaca̱x Pa Iraétanüxü̃arü Tupanax ¡rü yanguxẽxẽ ga yema curü uneta ga chaunatü ga Dabímaxã nüxü̃ quixuxü̃!
27 Natürü i cumax, rü ¿ñuxũcürüwa yanguxü̃ i ñoma i naanewa nax nawa cungexmaxü̃? Rü ngẽxguma chi guxü̃ma i ngẽma daxũguxü̃ i naane i taxüchixü̃ rü tama yanguxgu nax nawa cungexmaxü̃ ¿rü ñuxãcü tá yanguxü̃ ya daa ĩpata ya taxü̃ne ya cuxca̱x chaxüxü̃ne nax nawa cungexmaxü̃?
28 Natürü Pa Corix, Pa Chorü Tupanax, ¡rü choxü̃́ nüxü̃ naxĩnü i chorü yumüxẽ rü naxü i ngẽma ñu̱xma cuxü̃ naxca̱x chacaxü̃xü̃! Erü i choma rü curü duü̃xü̃ chixĩ.
29 ¡Rü taxṹ i nüxü̃ curüchauxü̃ nax ngunecü rü chütacü nüxü̃ cudawenüxü̃ ya daa cupata ya taxü̃ne rü cuma tomaxã nüxü̃ quixu nax yimawa tá cungexmaxü̃! ¡Rü nüxü̃ naxĩnü i ñaa chorü yumüxẽ i cupata ya taxü̃newa cumaxã nüxü̃ chixuxü̃ i choma nax curü duü̃xü̃ chixĩxü̃!
30 ¡Rü nüxü̃ naxĩnü i ngẽma naxca̱x íchacaxaxü̃, rü nüxü̃ naxĩnü i curü duü̃xü̃gü i Iraétanüxü̃arü yumüxẽ ega ngẽxguma ñaa nachicagu tarüdaunüãcüma tayumüxẽgügu! ¡Rü nüxü̃ naxĩnü i daxũguxü̃ i naanewa i ngextá ícumaxü̃xü̃wa rü toxü̃́ nüxü̃ rüngüma i torü chixexü̃gü!
31 8:31-32 Rü ngẽxguma texé tümamücümaxã ta̱xacürü guxchaxü̃ uxgu, rü ngẽxguma daa cupata ya taxü̃nearü ãmarearü guruü̃pe̱xewa tüxü̃ nagagügu nax ngéma nüxü̃ tixuxü̃ca̱x i ngẽma tümaarü guxchaxü̃ ¡rü nüxü̃ naxĩnü i daxũguxü̃ i naanewa rü nüxü̃ rüngü̃xẽxẽ i ngẽma curü duü̃xü̃gü! ¡Rü napoxcu i ngẽma aixcüma chixexü̃ ügüxü̃, rü tüxü̃ ínanguxuchixẽxẽ ya yíxema taxuxü̃ma i chixexü̃ üxe!
32 Nüü̃ nadau 8:31
33 8:33-34 Rü ngẽxguma chi curü duü̃xü̃gü i Iraétanüxü̃ cupe̱xewa chixexü̃ ügügu rü ngẽmagagu norü uanügü nüxü̃ rüporamaegu nax to i nachixü̃anewa nagagüãxü̃ca̱x, natürü ega chi wenaxarü cuxca̱x nawoegugu rü daa cupata ya taxü̃newa naxca̱x ínacagügu i curü ngü̃xẽxẽ, ¡rü daxũguxü̃ i naanewa nüxü̃́ nüxü̃ naxĩnü i norü yumüxẽ rü nüxü̃́ nüxü̃ irüngüma i norü chixexü̃gü, rü ñaa torü naane ga torü o̱xigüna cuxãxü̃ca̱x nawoeguxẽxẽ!
34 Nüü̃ nadau 8:33
35 8:35-36 Rü ngẽxguma yapagüanegu rü taguma napuxgu nagagu nax chixexü̃ cupe̱xewa naxügüxü̃ i curü duü̃xü̃gü i Iraétanüxü̃, natürü ngẽxguma cuxca̱x nawoegugu rü daa cupatawa yayumüxẽgügu, rü cuxü̃ yacua̱xüü̃gügu, rü nüxü̃ naxoegu i norü chixexü̃gü i naxca̱x cupoxcuexü̃, ¡rü daxũguxü̃ i naanewa nüxü̃́ nüxü̃ naxĩnü i norü yumüxẽ rü nüxü̃́ nüxü̃ irüngüma i norü chixexü̃gü rü nangúexẽxẽ nax mexü̃ i nacümagu naxĩxü̃ca̱x rü napuxẽxẽ nagu i ñaa naane i torü o̱xigüna cuxãxü̃!
36 Nüü̃ nadau 8:35
37 8:37-39 Rü ngẽxguma ñaa nachixü̃anewa nangemagu i taiya, rüe̱xna ínanguxgu i nanetüarü da̱xaweane, rüe̱xna naianexü̃maxã nayuegu i nanetügü, rüe̱xna ínangugügu i munügü, rüe̱xna õxmigü, rüe̱xna naweanegü, rü ngẽxguma torü uanügü nüxü̃ íchomaeguãchigu i torü ĩanegü nax toxü̃ nada̱i̱xü̃ca̱x, rüe̱xna ta̱xacürü to i guxchaxü̃, rüe̱xna da̱xaweanegü toxca̱x ínguxgu, natürü ega curü duü̃xü̃gü i Iraétanüxü̃ nüxü̃ naxoegu i norü chixexü̃gü rü daa cupata ya taxü̃newa yayumüxẽgügu, ¡rü daxũguxü̃ i naanewa nüxü̃́ nüxü̃ naxĩnü rü nüxü̃́ nüxü̃ irüngüma i norü chixexü̃gü! ¡Rü nüxü̃́ naxütanü i wüxichigü i duü̃xü̃ ngẽxgumarüxü̃ nax ñuxãcü cupe̱xewa namaxü̃xü̃! Erü cuxicatama nixĩ i nüxü̃ cucuáxü̃ i wüxichigüarü maxü̃.
38 Nüü̃ nadau 8:37
39 Nüü̃ nadau 8:37
40 Rü ngẽmaãcü i curü duü̃xü̃gü rü ngẽxguma namaxẽyane nawa i ñaa naane i torü o̱xigüna cuxãxü̃ rü tá cuxü̃ namuü̃e rü tá cuga naxĩnüe.
41 8:41-43 Rü ngẽxguma chi wüxi i duü̃xü̃ i to i nachixü̃anecüã̱x i tama Iraétanüxü̃ ixĩxü̃ cuchiga ĩnügu nax ñuxãcü cuporaxüchixü̃ rü yáxü̃wa cuxca̱x ne naxũxgu nax nua daa cupata ya taxü̃newa yayumüxẽxü̃ca̱x ¡rü daxũguxü̃ i naane i ngextá ícumaxü̃xü̃wa irüxĩnü rü nüxü̃ nangãxü̃ i norü yumüxẽ nax ngẽmaãcü guxü̃táma i ñoma i naanecüã̱x i nachixü̃anegü cuxü̃ cua̱xgüxü̃ca̱x rü cuga naxĩnüexü̃ca̱x ngẽma curü duü̃xü̃gü i Iraétanüxü̃rüxü̃. Rü ngẽmaãcü i nümagü i yáxü̃wa ne ĩxü̃ rü tá nüxü̃ nacua̱xgü nax nua daa cupata ya cuxca̱x chaxüxü̃newa yixĩxü̃ i cumaxã yadexagüxü̃ i duü̃xü̃gü.
42 Nüü̃ nadau 8:41
43 Nüü̃ nadau 8:41
44 8:44-45 Rü ngẽxguma curü duü̃xü̃gü i Iraétanüxü̃ rü norü uanügümaxã nügü yadaixgu i ngexta cuma ícumugüxü̃wa, rü ngẽxguma daa ĩane ya cuma nüxü̃ cuxunetane rü daa cupata ya taxü̃ne ya cuxca̱x chaxüxü̃neguama nadaunüãcüma yumüxẽgügu ¡rü daxũguxü̃ i naanewa irüxĩnü i norü yumüxẽ rü ínapoxü̃ i norü uanügüme̱xẽwa!
45 Nüü̃ nadau 8:44
46 Rü ngẽxguma curü duü̃xü̃gü guxü̃ i duü̃xü̃gürüxü̃ cupe̱xewa chixexü̃ naxügügu rü ngẽmaca̱x namaxã cunuxgu, rü norü uanügüme̱xẽgu cunayixẽẽgu nax ngẽmaãcü to i nachixü̃ane i yáxü̃guxü̃wa rüe̱xna ngaicamaguxü̃wa nagagüãxü̃ca̱x,
47 natürü ega chi ngẽma nachixü̃anewa nüxna yacua̱xãchigügu i norü chixexü̃ i cupe̱xewa naxügüxü̃ rü cuxca̱x nawoegu̱xgu rü cuxna nacagügu nax nüxü̃́ nüxü̃ curüngü̃maxü̃ca̱x i norü chixexü̃gü,
48 rü ega ngẽma nachixü̃anewa aixcüma cuga naxĩnüegu rü ñaa naane ga torü o̱xigüna cuxãxü̃guama nadaunüãcüma nayumüxẽgügu, rü daa ĩane ya Yerucharéü̃ ga cuma nüxü̃ cuxunetanegu rü daa cupata ya taxü̃ne ya cuxca̱x chaxüxü̃neguama nadaunüãcüma nayumüxẽgügu,
49 ¡rü daxũguxü̃ i naanewa i ngextá ícumaxü̃xü̃wa rü nüxü̃́ nüxü̃ naxĩnü i norü yumüxẽgü i nawa cuxü̃ naca̱a̱xü̃güxü̃, rü ínapoxü̃ i norü uanügüme̱xẽwa!
50 ¡Rü curü duü̃xü̃güaxü̃́ nüxü̃ iyarüngüma i norü chixexü̃gü i cupe̱xewa naxügüxü̃ rü ngẽma nax tama cuga naxĩnüexü̃! Rü ngẽma ãẽ̱xgacügü i to i nachixü̃anewa nagagüxü̃ i curü duü̃xü̃gü ¡rü naxüchicüxü i norü ĩnü nax curü duü̃xü̃gü nüxü̃́ ngechaü̃tümüxü̃güxü̃ca̱x!
51 Erü curü duü̃xü̃gü nixĩ rü cuma nixĩ ga Equítuanewa ícunagaxü̃xü̃ ga ngextá poraãcü ngúxü̃ íyangegüxü̃wa.
52 ¡Rü choma nax curü duü̃xü̃ chixĩxü̃ rü choxü̃́ nüxü̃ naxĩnü i chorü yumüxẽ rü nüxü̃ naxĩnü i curü duü̃xü̃gü i Iraétanüxü̃arü yumüxẽ! ¡Rü toxü̃ naxĩnü, Pa Tupanax, ega ngẽxguma cuxna tacagüegu!
53 Erü cumax, Pa Corix, rü natanüwa ga guxü̃ma ga yema togü ga nachixü̃anegü i ñoma i naanewa ngẽxmagüxü̃ rü nüxü̃ cuxuneta ga curü duü̃xü̃gü ga Iraétanüxü̃ yema curü duü̃ ga Moichémaxã nüxü̃ quixuxü̃rüxü̃ ga yexguma Equítuanewa ícunanguxü̃xẽẽgu ga torü o̱xigü —ñanagürü ga Charomóü̃.
54 8:54-55 Rü yexguma Charomóü̃ nüxü̃ rüchauxgu ga yema ãmarearü guruü̃pe̱xegu nacaxã́pü̱xüãcüma rü naxunagüme̱xẽãcüma nax norü yumüxẽwa Tupanamaxã yadexaxü̃, rü inachi rü guxü̃ma ga Iraéanecüã̱xgümaxã mexü̃ naxuegu. Rü tagaãcü ñanagürü:
55 Nüü̃ nadau 8:54
56 —Poraãcü tamaxã namecüma ya tórü Cori ya Tupana ya tüxü̃ ípoxü̃cü nüxna i tórü uanügü, yema inaxunetaxü̃rüxü̃, yerü nüma rü aixcüma nayanguxẽxẽ ga guxü̃ma ga yema norü unetagü ga mexü̃ ga norü duü̃ ga Moichéwa nüxü̃ yaxuxü̃.
57 Rü ñu̱xma ya Cori ya Tupana rü nataxü̃tagu ga yexguma tórü o̱xigütanüwa nayexmagurüxü̃. Rü taxũtáma tüxna nixũgachi rü taxũtáma tüxü̃ ínawogü.
58 Rü tüxü̃ naporaexẽxẽ nax ngẽmaãcü naxca̱x idaugüxü̃ca̱x rü norü ngúchaü̃ ixügüxü̃ca̱x, rü nagu imaxẽxü̃ca̱x i guxü̃ma i norü mugü ga tórü o̱xigümaxã nüxü̃ yaxuxü̃.
59 Rü guxü̃ma i ñaa nüxna naxca̱x chacaxü̃ ya tórü Cori ya Tupana, rü chanaxwa̱xe i nüma rü chütacü rü ngunecü nagu narüxĩnü nax ngẽmaãcü choxü̃ nangü̃xẽẽxü̃ca̱x rü pexü̃ nangü̃xẽẽxü̃ca̱x i pema i Iraétanüxü̃ i norü duü̃xü̃gü ixĩgüxü̃.
60 Rü ngẽmaãcü guxü̃ma i nachixü̃anegü i ñoma i naanewa ngẽxmagüxü̃ tá nüxü̃ nacua̱xgü nax aixcüma Tupana yixĩxü̃ ya tórü Cori rü nataxuxü̃ma i to i naxrüxü̃ ixĩxü̃.
61 Rü ngẽmaca̱x i pemax rü penaxwa̱xe nax tórü Cori ya Tupanamaxã pixaixcümagüxü̃ rü peyanguxẽẽgüxü̃ rü naga pexĩnüexü̃ i guxü̃ma i norü mugü ñoma i ngunexü̃gurüxü̃ —ñanagürü ga Charomóü̃.
62 Rü yemawena ga ãẽ̱xgacü rü guxü̃ma ga Iraétanüxü̃ rü Cori ga Tupanaca̱x nanadai rü ínanagu ga naxü̃nagü.
63 Rü nüma ga Charomóü̃ rü Tupanaca̱x ínanagu ga 22,000 ga wocagü ga iyatüxü̃gü rü 120,000 ga carnérugü ga Tupanaarü taãẽxẽẽruxü̃. Rü yemaacü ga ãẽ̱xgacü rü guxü̃ma ga Iraétanüxü̃ rü Tupanana nanaxuaxü̃gü ga guma napata ga taxü̃ne.
64 Rü yematama ga ngunexü̃gu nüma ga ãẽ̱xgacü rü Tupaname̱xẽgu nanaxǘ ga yema naxã̱xtü ga Cori ya Tupanapata ya taxü̃nepe̱xewa yexmaxü̃. Rü yéma naxa̱xtüwa Tupanaca̱x ínanagu ga naxü̃nagü rü ãmaregü ga chebáda rü trigu rü norü chíxü̃ ga yema naxü̃nagü ga nada̱i̱xü̃ nax Tupanaxü̃ nataãẽxẽẽgüxü̃ca̱x. Yerü yema ãmarearü guruxü̃ ga bróũchenaxca̱x ga Tupanapata ga taxü̃nepe̱xewa yexmaxü̃ rü naxíra naxca̱x ga guxü̃ma ga yema ãmaregü ga íguxü̃ nax yemaacü Cori ya Tupanaxü̃ nataãẽxẽẽgüxü̃ca̱x.
65 Yexguma nixĩ ga yexma Charomóü̃maxã nangutaque̱xegü ga muxũchixü̃ma ga duü̃xü̃gü ga guxü̃wama ga Iraéanewa ne ĩxü̃. Rü Amáwa inaxügü ga nórtewaama ne ĩxü̃ rü ñu̱xmata Equítuarü natüwa nangu ga súrwaama ne ĩxü̃. Rü yexguma naxüchigagüãgu ga guma Tupanapata ga taxü̃ne, rü 7 ga ngunexü̃ nagu ningegü. Rü yexgumarüxü̃ ta Tupanaarü cua̱xüü̃xü̃ca̱x nanaxüchigagü ga düxenüchiga ga to ga 7 ga ngunexü̃ nagu yangegüxü̃. Rü yemaacü guxü̃wama 14 ga ngunexü̃wa nangu nax naxüchigagüãxü̃.
66 Rü moxü̃ãcü ga Charomóü̃ rü guxü̃ma ga yema duü̃xü̃güxü̃ narümoxẽ nax nachiü̃ca̱x nawoeguxü̃ca̱x. Rü nüma ga duü̃xü̃gü rü norü ãẽ̱xgacümaxã mexü̃ naxuegugü. Rü taãẽãcüma nawoegu yerü Tupana rü nüxü̃ nanawe̱x nax ñuxãcü poraãcü norü duü̃ ga Dabítanüxü̃xü̃ nangechaü̃xü̃, rü ñuxãcü poraãcü nüxü̃ nax nangü̃xẽẽxü̃ i guxü̃ma i norü duü̃xü̃gü i Iraéanecüã̱xgü.
Notas
^ 8:2 Octúbre.
