1 Samuel 1:1-28
1 Efraíü̃arü ma̱xpǘneanewa nayexma ga wüxi ga nachica ga Ramágu ãégaxü̃. Rü yexma naxãpata ga wüxi ga yatü ga Chúxtanüxü̃ ixĩcü ga Ercanágu ãégacü. Rü nüma ga Ercaná rü Yeruáü̃ nane nixĩ, rü Eriútaxa nixĩ. Rü norü o̱xinatü nixĩ ga Tóu. Rü nüma ga Tóu rü Chúx ga Efraíü̃tanüxü̃ ixĩcü nane nixĩ.
2 Rü gumá Ercaná rü nüxü̃́ iyexma ga taxre ga naxma̱x. Rü wüxi ga naxma̱x rü Ána nixĩ ga ngĩéga, rü yema nai ga naxma̱x rü Peniná nixĩ ga ngĩéga. Rü yema naxma̱x ga Peniná rü ixãxacü, natürü ga yema naxma̱x ga Ána rü ingexacü.
3 Rü guxcüma ga taunecügu rü nüma ga Ercaná rü wüxigu naxma̱xgümaxã guma ĩane ga Chilówa naxũũxü̃ nax Tupana ya Guxãétüwa Ngẽxmacüxü̃ yanacua̱xüü̃xü̃ca̱x, rü naxca̱x yaguãxü̃ca̱x ga norü ãmare. Rü gumá ĩanewa nayexma ga chacherdóte ga Erí ga taxre ga nanegü nüxü̃́ yexmacü. Rü nümagü rü ta chacherdótegü nixĩgü. Rü wüxi rü Oní nixĩ ga naéga, rü yema to rü Fineéx nixĩ ga naéga.
4 Rü yexguma Ercaná norü ãmare Tupanana naxãxgu, rü naxma̱x ga Peninána nanaxã ga yema namachi ga ngĩxna üxü̃, rü yexgumarüxü̃ ta ngĩxacügüna rü ngĩnena nanaxã ga yema namachi ga nüxna üxü̃.
5 Natürü ga naxma̱x ga Ána rü ngĩxna nanaxã ga namachi ga taxre ga duü̃xü̃gu mexü̃, yerü poraãcü ngĩxü̃ nangechaü̃ woo Tupana ngĩxü̃ nax ngexacüxẽẽxü̃.
6 Rü yema nax nangexacüxü̃ ga Ána, rü ngĩma ga Peniná rü guxü̃guma Ánagu iyadauxcüraxü̃ rü ngĩxü̃ icugü.
7 Rü guxcüma ga taunecügu ga yexguma Tupanapatawa naxĩĩxü̃gu rü ngĩma ga Peniná rü yemaacü Ánaxü̃ icugüãxü̃. Rü yemaca̱x ga Ána rü ngĩgümaxã ingechaü̃ rü ixaxu rü tama ichibüchaü̃.
8 Rü nüma ga Ercaná rü naxma̱x ga Ánana naca rü ñanagürü ngĩxü̃: —¿Ta̱xacüca̱x cuxaxu? ¿Rü ta̱xacüca̱x cungechaü̃ rü tama cuchibü? ¿Tama ẽ̱xna i choma rü 10 ya cunearü yexera cuxü̃́ chamexü̃? —ñanagürü.
9 Rü yexguma ĩane ga Chilówa nayexmagügu, rü wüxi ga yáuanecü ga chibüwena rü ngĩma ga Ána rü Tupanapatawa ixũ. Rü nüma ga chacherdóte ga Erí rü norü tochicaxü̃ ga nawa natooxü̃wa narüto ga Cori ya Tupanapataarü ĩã̱xarü ngaicamana.
10 Rü ngĩma ga Ána rü poraãcü ixaxu, rü ngĩgümaxã ingechaü̃, rü yemaacü iyumüxẽ, rü Tupanana ica.
11 Rü ngĩrü yumüxẽwa rü Tupanamaxã ixuneta rü ngĩgürügü: —Pa Cori ya Tupana ya Daxũwa Ngẽxmacüx, rü ngẽxguma chi nüxü̃ cucua̱xgu nax ñuxãcü ngúxü̃ nax chingexü̃ naxca̱x i ngẽma nax changexacüxü̃ ¡rü choxü̃́ nüxü̃ naxĩnü i ñaa chorü yumüxẽ, rü choxna namu ya wüxi ya chaune! Rü yimá rü tá cuxna chanamu nax cuxrüxü̃ yixĩxü̃ca̱x. Rü ngẽma norü cua̱xruxü̃ nax aixcüma cuxna chanamuxü̃ rü tagutáma niyoeru —ngĩgürügü.
12 Rü ngĩma ga Ána rü imáarü yumüxẽã̱x nax Tupanamaxã yadexaxü̃, rü nüma ga Erí rü ngĩã̱xgu nadawenü.
13 Rü ngĩma rü ngĩãẽwa iyumüxẽ, rü tama nüxü̃ taxĩnü ga ngĩga. Rü ngĩã̱xicatama nixĩ ga ixĩã̱xcüüxü̃. Rü yemaca̱x ga Erí rü nagu narüxĩnü ga nax nangãxü̃xü̃.
14 Rü ñanagürü ngĩxü̃: —¿Ñuxãcü i ngãxãcü nua cuxũxü̃? ¡Rü marütama nax bínu cuyaxaxüxü̃! —ñanagürü ngĩxü̃.
15 Rü ngĩma ga Ána rü inangãxü̃ rü ngĩgürügü: —Tama nixĩ i changãxü̃xü̃, Pa Corix. Tama nixĩ i bínu chayaxaxüxü̃ rüe̱xna ta̱xacürü axchiü i ngúchiáxü̃ chixaxüxü̃. Rü ngẽma choxü̃ ngupetüxü̃ nixĩ nax changexacüxü̃ rü ngẽmaca̱x changechaü̃, rü Tupanamaxã nüxü̃ chixuxü̃ i ngẽma guxchaxü̃.
16 ¡Rü taxṹ i nagu curüxĩnüxü̃ rü choma rü wüxi i nge i chixecü chixĩxü̃! Rü guxü̃ma i ñaa ngunexü̃gügu rü íchayumüxẽ naxca̱x i ngẽma chorü oegaãxẽ rü ĩ̱xãchiãxẽ —ngĩgürügü.
17 Rü yexguma ga Erí rü ngĩxü̃ nangãxü̃ rü ñanagürü: —¡Ẽcü taãẽãcü nataegu! ¡Rü nüma ya Iraéanecüã̱xgüarü Tupana rü cuxna naxã i ngẽma nüxna naxca̱x cucaxü̃! —ñanagürü.
18 Rü ngĩma ga Ána rü inangãxü̃ rü ngĩgürügü: —Moxẽxü̃chi naxca̱x i ngẽma dexa —ngĩgürügü. Rü ñu̱xũchi itaegu rü iyachibü rü marü taguma wena ingechaü̃.
19 Rü moxü̃ãcü ga ngunetüü̃ ga Tupanapatawa nax naxĩxü̃ nax nüxü̃ yanacua̱xüü̃güxü̃ca̱x, rü yemawena rü napataca̱x nawoegu ga ĩane ga Ramáwa. Rü nüma ga Ercaná rü naxma̱x ga Ánaxü̃ nape. Rü nüma ga Tupana rü nanangãxü̃ ga ngĩrü yumüxẽ.
20 Rü yemaca̱x ga Ána rü ixãxacü. Rü yexguma nawa nanguxgu ga nax nabuxü̃ ga gumá ngĩne, rü inaxüéga rü Chamué nixĩ ga naéga yerü Tupanana naxca̱x ica. Rü ngẽma naéga rü “naxca̱x ínacacü”, ñaxü̃chiga nixĩ.
21 Rü gumá nai ga taunecügu rü nüma ga Ercaná rü naxma̱x ga Peninámaxã rü guxü̃ma ga naxacügümaxã rü ĩane ga Chilówa naxĩ nax Tupanana yéma yaxããxü̃ca̱x ga norü ãmaregü, rü nüxü̃ yanacua̱xüü̃güxü̃ca̱x yema guxcüma ga taunecügu naxüüüxü̃rüxü̃.
22 Natürü ga naxma̱x ga Ána rü tama yéma ixũ, rü ngĩgürügü nüxü̃ ga ngĩte: —Taxũtáma ngéma chaxũ i chomax ñu̱xmatáta yamaie ya daa bucü. Rü ngẽxgumaxica tá nixĩ i ngéma chanagaxü̃ nax Cori ya Tupanana chayamuxü̃ca̱x rü ngẽxma nax yanaxã̱ũ̱xũchixü̃ca̱x —ngĩgürügü.
23 Rü nüma ga ngĩte ga Ercaná rü ngĩxü̃ nangãxü̃ rü ñanagürü: —¡Ẽcü naxü i ngẽma cuma nagu curüxĩnügu rümexü̃! Rü marü name i nuxã curüxã̱ũ̱x rü ñu̱xmatata cuyamaie ya yimá cune nax ngẽmaãcü yanguxẽẽãxü̃ca̱x i norü ngúchaü̃ ya Cori ya Tupana —ñanagürü. Rü yemaacü ga ngĩma rü yexma irüxã̱ũ̱x, rü inayaxẽxẽ ga gumá ngĩne rü ñu̱xmata yamaie.
24 Rü yexguma marü yamaieãguwena ga gumá bucü rü Cori ya Tupanapatawa inaga ga ĩane ga Chilówa. Rü yexgumarüxü̃ ta yéma ínagagü ga tomaepü̱x ga wocaxacü ga iyatüxü̃, rü wüxiwetaxü̃ ga trigu, rü wüxi ga tü̃xü̃acu ga bínu.
25 Rü yexguma wüxi ga wocaxacü Tupanaca̱x yama̱xgüguwena, rü chacherdóte ga Erína nayamugü ga gumá bucü.
26 Rü ngĩma ga Ána rü ngĩgürügü nüxü̃ ga gumá chacherdóte: —Pa Corix, ¡choxü̃ nangechaxü̃! Rü ngẽma nax aixcüma cumaxü̃xü̃rüxü̃ rü aixcüma nixĩ nax choma chixĩxü̃ ga yema nge ga ü̃pa cupe̱xewa Tupanaxü̃ chaca̱a̱xü̃ chorü yumüxẽwa.
27 Rü nüxü̃ chaca̱a̱xü̃ nax choxna namuaxü̃ca̱x ya daa chaune, rü nüma rü marü choxü̃ nangãxü̃ ga yema naxca̱x íchaca̱xaxü̃.
28 Rü ngẽmaca̱x i ñu̱xma rü nua cuxü̃tawa chanaga ya daa chaune nax Tupanana chayamuxü̃ca̱x. Rü ñu̱xma nax namaxü̃xü̃gu ya daa chaune rü Tupanaarü tá nixĩ —ngĩgürügü. Rü ñu̱xũchi ga nüma ga Erí rü ñaxtüanegu nayangücuchi rü Cori ya Tupanaxü̃ nicua̱xüxü̃.
