1 Samuel 13:1-23
13 13:1-2 Rü yexguma inaxügüãgu nax Iraéanecüã̱xgümaxã inacuáxü̃ ga Chaú rü 30 ga taunecü nüxü̃́ nayexma. Rü yexguma marü ñuxre ga taunecü ãẽ̱xgacü yixĩxgu rü nayadexechi ga 3,000 ga churaragü natanüwa ga Iraéanecüã̱xgü. Rü natanüwa ga yema rü 2,000 ga churaragümaxã Mixmágu rü Betéarü ma̱xpǘneanegu namaxã narüxã̱ũ̱x. Rü yema togü ga 1,000 rü nane ga Yonatáü̃maxã ĩane ga Guibeá ga Bẽyamíü̃anewa yexmanewatama nayexmagü. Rü yema togü rü Chaú ínayamugü nax napataca̱x nawoeguxü̃ca̱x.
2 Nüü̃ nadau 13:1
3 Rü nüma ga Yonatáü̃ rü naxca̱x ínayaxüãchi ga guma Firitéugüarü churaragüpata ga Guibeáwa yexmane rü nanadai. Rü nüma ga Firitéugü rü nüxü̃ nacuáchigagü. Rü yemaca̱x nüma ga Chaú rü nanamu nax guxü̃wama ga Iraéanewa nagu yacuegüxü̃ca̱x ga cornéta nax yemaacü nüxü̃ nacua̱xgüxü̃ca̱x ga Iraéanecüã̱xgü.
4 Rü guxü̃ma ga Iraétanüxü̃ rü nüxü̃ nacuáchigagü nax Chaú rü Firitéugüxü̃ nada̱i̱xü̃ rü yemaca̱x ga Firitéugü rü Iraétanüxü̃chi naxaie. Rü yemaca̱x ga yema Iraéanearü churaragü rü Guirigáwa Chaúmaxã nangutaque̱xegü.
5 Rü nüma ga Firitéugü rü nügü nanutaque̱xe nax nügü nada̱i̱xü̃ca̱x namaxã ga Iraéanearü churaragü. Rü nüxü̃́ nayexma ga 30,000 ga daixwexü̃ ga carugü ga cowaru itúgüne, rü 6,000 ga churaragü ga cowarugu ĩxü̃, rü ñu̱xũchi muxũchixü̃ ga churaragü ga nacutügumare ĩxü̃. Rü norü mu ga yema churaragü rü ñoma márpechinüwa ngẽxmacü ya naxnücüte̱xerüxü̃ nixĩ i norü mu. Rü guxü̃ma ga yemagü rü Mixmáwa naxĩ rü yexma napegü ga Bex-abéü̃arü éstewaama.
6 Rü yexguma yema Iraéanecüã̱xgü ga churaragü nüxü̃ icua̱xãchitanügu ga taxü̃ ga guxchaxü̃wa nax nayexmagüxü̃ rü namuü̃e yerü namuxũchi ga yema norü uanügü. Rü yemaca̱x nutaarü ãxmaxü̃gügu, rü waixü̃müarü ãxmaxü̃gügu rü nutatanügu rü ngatexü̃gügu, rü puchugügu nicu̱xgü.
7 Rü muxü̃ma rü nichoü̃ ga natü ga Yudáü̃. Rü Gáxanewaama rü Garaáxanewaama nabuxmü. Natürü nüma ga Chaú rü ĩane ga Guirigáwatama nayexma, rü guxü̃ma ga norü churaragü rü poraãcü namuü̃eãcüma nawe narüxĩ.
8 Rü nüma ga Chaú rü 7 ga ngunexü̃ yéma Chamuéxü̃ nananguxẽxẽ, yerü yema nixĩ ga Chamué namaxã nüxü̃ ixuxü̃. Natürü nüma ga Chamué rü tama paxa Guirigáwa nangu rü yemaca̱x ga duü̃xü̃gü rü yoxni inanaxügü ga nax naxĩgüxü̃.
9 Rü yemaca̱x nüma ga Chaú rü norü duü̃xü̃güxü̃ namu rü ñanagürü: —¡Nua chauxü̃tawa penana i naxü̃nagü nax Tupanaca̱x nada̱i̱xü̃ca̱x rü ínaguxü̃ca̱x nax tamaxã inangüxmüxü̃ca̱x! —ñanagürü. Rü nümatama nixĩ ga Tupanaca̱x ínaguaxü̃.
10 Natürü yexguma marü naxü̃nagü ínaguxguwena rü yéma nangu ga Chamué. Rü nüma ga Chaú rü Chamuéca̱x niña, rü nüxü̃ narümoxẽ.
11 13:11-12 Natürü nüma ga Chamué rü Chaúxü̃ ñanagürü: —¿Tü̱xcüü̃ cunaxü i ngẽma? —ñanagürü. Rü nüma ga Chaú rü nanangãxü̃ rü ñanagürü: —Nüxü̃ chadau nax tama paxa nua cunguxü̃ rü ngẽma chorü churaragü rü yoxni choxna naxĩgü. Rü ngẽma Firitéugü rü marü Mixmágu nangutaque̱xe. Rü ngẽmaca̱x nagu charüxĩnü nax toxca̱x chi yanachoü̃xü̃ nax toxca̱x íyaxü̃ãchixü̃ca̱x i Guirigáwa naxü̃pa nax Cori ya Tupaname̱xẽgu chaugü chaxüxü̃. Rü ngẽmaca̱x nixĩ i chomatama chanaxüxü̃ nax ãmare íchaguxü̃ —ñanagürü.
12 Nüü̃ nadau 13:11
13 Rü Chamué nanangãxü̃ga rü ñanagürü: —Ngẽma cuxüxü̃ rü wüxi i ngeãẽmare nixĩ, erü tama naga cuxĩnü ya Cori ya Tupanaarü mu. Rü ngẽxguma chi naga cuxĩnügu i ngẽma Cori ya Tupana cumaxã nüxü̃ ixuxü̃, rü nüma rü guxü̃guchima Iraétanüxü̃arü ãẽ̱xgacü cuxü̃ nixĩxẽxẽ.
14 Natürü i ñu̱xma rü taxũtáma guxü̃gu Iraétanüxü̃maxã icucua̱x. Rü nüma ya Cori ya Tupana rü tá naxca̱x nadau i wüxi i yatü i nüma namaxã nataãẽxü̃. Rü tá nüxü̃ naxuneta nax norü duü̃xü̃güarü ãẽ̱xgacü yixĩxü̃ca̱x, erü cuma rü tama naga cuxĩnü i ngẽma cumaxã nüxü̃ yaxuxü̃ —ñanagürü.
15 Rü yema ñaxguwena ga Chamué rü inaxũãchi ga Guirigáwa, rü Guibeá ga Bẽyamíü̃arü naanewa yexmanewa naxũ. Rü nüma ga Chaú rü nayaxugü ga yema churaragü ga nawe rüxĩxü̃, rü 600 nixĩ ga norü mu.
16 Rü nüma ga Chaú rü nane ga Yonatáü̃ rü yema 600 ga churaragümaxã rü Guibeá ga Bẽyamíü̃anewa yexmanegu narücho. Rü nüma ga Firitéugü rü woetama marü Mixmáwatama nayexmagü.
17 Natürü yema Firitéugüarü churaragütanüwa rü ínachoxü̃ ga tomaepü̱xchimü ga churaragü. Rü wüxichimüü̃ rü Chuáanewa yexmane ga ĩane ga Ofáwaama naxĩ.
18 Rü yema tochimü rü Bex-oróü̃waama naxĩ. Rü yema norü tomaepü̱xchimü rü nawa naxĩ ga guma ma̱xpǘne ga nawa nüxü̃ idauxü̃ne ga yema doxonexü̃ ga Cheboíü̃ ga ínachianexü̃waama.
19 Rü yexguma rü guxü̃ma ga Iraéanewa rü nataxuma ga Iraéanecüã̱x ga nüxü̃ cuáxü̃ ga fieruwa ta̱xacü íyaxüxü̃güxü̃. Yerü nüma ga Firitéugü rü tama nanangúexẽẽchaü̃ nax fieruwa ta̱xacü naxügüxü̃. Yerü nüma ga Firitéugü rü nagu narüxĩnüe nax yemaacü ga yema Iraéanecüã̱xgü rü taxucürüwa naxnegü ga taragü rü wocaegü naxügüxü̃ca̱x nawa ga yema fierumü.
20 Rü yemaca̱x ga yema Iraéanecüã̱xgü rü yexguma nawaixmagugüchaü̃ãgu ga norü aimüaneruxü̃ rü norü para rü norü yuema, rü norü pico rü Firitéugüxü̃tawa nanana.
21 Rü yexguma nüma ga Iraéanecüã̱xgü nawaixmagugüchaü̃gu ga norü aimüaneruü̃gü rü norü paragü rü nanaxütanü ga taxretachinü ga diẽru. Rü yexguma nawaixmagugüchaü̃gu ga norü yuemagü rü norü wocaarü canetaruxü̃gü rü nanaxütanü ga wüxitachinü ga diẽru.
22 Rü yemaca̱x guxü̃ma ga yema Iraétanüxü̃arü churaragü rü nüxü̃́ nataxuma ga norü taragü rü norü wocaegü ga fierumaxã ãmaguxü̃. Rü Chaú rü Yonatáü̃xicatama nixĩ ga nüxü̃́ nayexmaxü̃ ga yema tara rü wocae ga fierumaxã ãmaguxü̃.
23 Rü yoxni rü wüxichimüxü̃ ga Firitéugüarü churaragü rü Mixmáarü ma̱xpǘnegüchate̱xewa dapetüxü̃ ga namawaama naxĩ.
