1 Samuel 14:1-52
14 14:1-2 Wüxi ga ngunexü̃gu ga Yonatáü̃ ga Chaú nane, rü norü ngü̃xẽẽruü̃xü̃ ñanagürü: —¡Ngĩxã tichoü̃ i ñaa natü rü naxca̱x ítayaxüãchi i Firitéugüarü churaragü i tocutüwa ngẽxmagüxü̃! —ñanagürü. Natürü nüma ga Yonatáü̃ rü tama nanatümaxã nüxü̃ nixu ga yema naxüxü̃. Rü nüma ga nanatü ga Chaú rü wüxi ga ma̱xpǘnearü tuãchiwa nayexma, natüxü̃wa ga wüxi ga nai ga granada. Rü yema nachicawa nixĩ ga duü̃xü̃gü trigu pu̱xgüxü̃ rü nüma ga Chaú rü yéma nayexma namaxã ga 600 ga churaragü ga íyaxümücügüxü̃.
2 Nüü̃ nadau 14:1
3 Rü yema chacherdóte ga Tupanaarü Efóxarü ngeruxü̃ nixĩ ga Aíax ga Aitúx nane. Rü nüma ga Aitúx rü Icabú naenexẽ nixĩ. Rü Icabú rü Fineéx nane nixĩ. Rü Fineéarü papa ga Erí nixĩ ga Tupanaarü chacherdóte ga ĩane ga Chilówa. Natürü ga duü̃xü̃gü rü tama nüxü̃ nacua̱xgü nax Yonatáü̃ rü marü inaxũãchixü̃.
4 14:4-5 Rü nüma ga Yonatáü̃ rü nayoxnie nax nawa nanguxü̃ ga yema Firitéugüarü churaragütücumü íyexmagüxü̃wa. Natürü yéma nax nanguxü̃ca̱x rü nanaxwa̱xe ga guma taxre ga ma̱xpǘnearü ngatewa yachoü̃xü̃. Rü naégagü ga guma taxre ga ma̱xpǘnegü rü Bóche nixĩ ga wüxi rü guma nai rü Chené nixĩ. Rü wüxi rü nórtewaama nayexma ga Mixmáxarü to̱xma̱xtawa, rü guma nai rü súrwaama nayexma ga Guibeáarü to̱xma̱xtawa.
5 Nüü̃ nadau 14:4
6 Rü nüma ga Yonatáü̃ rü norü ngü̃xẽẽruxü̃xü̃ ñanagürü: —Ngĩxã, rü tocutüwa taxĩ, ñu̱xmatáta ngẽma Firitéugüarü churaragütücumü i tama Tupanaaxü̃́ yaxõgüxü̃ íngẽxmaxü̃wa ingugü. Bexmana nüma ya Cori ya Tupana rü tá tüxü̃ narüngü̃xẽxẽ, erü taxuxü̃ma nüxü̃́ naguxcha nax tüxü̃ naporamaexẽẽxü̃ woo imuxgu rüe̱xna inoxregu —ñanagürü.
7 Rü namücü rü nanangãxü̃ rü ñanagürü: —¡Ẽcü naxü i guxü̃ma i ngẽma cuãẽwa nagu curüxĩnüxü̃! Rü choma rü íchamemare nax cuxü̃ charüngü̃xẽẽxü̃ i ngẽma cuma cuxüxchaü̃xü̃wa —ñanagürü.
8 Rü yexguma ga Yonatáü̃ rü ñanagürü nüxü̃: —Dücax ¡ngĩxã rü toxcutüca̱x tichoü̃ i ngẽma ínangexmagüxü̃wa i ngẽma Firitéugü! ¡Rü ngĩxã yigü nüxü̃ tadauxẽxẽgü!
9 Rü ngẽxguma tüxü̃ ñaxgu: “¡Rü ngéma toxü̃ peyanguxẽxẽgü! Rü toma rü tá pexca̱x ítarüxĩgü”, ñaxgu, rü ngẽxguma i yixema rü ngéma tátama tananguxẽxẽ rü taxũtáma taxĩgü nax ngéma ínangexmagüxü̃wa ingugüxü̃ca̱x.
10 Natürü ngẽxguma tüxü̃ ñaxgu: “¡Nua pexĩ!” ñaxgu tüxü̃, rü tá taxĩgü, erü ngẽmawa tá nüxü̃ tacua̱x nax Cori ya Tupana tá nüxü̃ tüxü̃ naporamaexẽẽxü̃ —ñanagürü.
11 Rü yemaacü ga yema taxre rü Firitéugüarü churaragütücumüxü̃ nügü nadauxẽẽgü. Rü yexguma nüxü̃ nadaugügu, rü ñanarügügü: —Dücax, yea Ebréugü rü marü ngẽma naxmaxü̃gü i nagu yacu̱xgüxü̃wa ínachoxü̃ —ñanagürügü.
12 Rü yexgumata tagaãcü Yonatáü̃na rü norü ngü̃xẽẽruü̃na nacagüe rü ñanagürügü: —¡Pexĩgü rü nua pexĩ ítangexmagüxü̃wa, erü pemaxã wüxi i orexü̃ tixuxchaü̃! —ñanagürügü. Rü yexguma ga Yonatáü̃ rü norü ngü̃xẽẽruü̃xü̃ ñanagürü: —¡Chowe rüxũ! Erü nüma ya Cori ya Tupana rü Iraéanecüã̱xme̱xẽgu tá nanayixẽxẽ i ngẽma Firitéugü —ñanagürü.
13 Rü nüma ga Yonatáü̃ rü naxme̱xmaxã rü nacutümaxã nügü natunagü rü daxũ naxĩ. Rü norü ngü̃xẽẽruxü̃ rü nawe narüxũ. Rü yema norü uanü ga Yonatáü̃ rütaechigüxü̃ rü yema norü ngü̃xẽẽruxü̃ noxtacüma nayama̱xü̃chichigü.
14 Yema namaxã inaxügüxü̃ ga daixgu rü Yonatáü̃ rü norü ngü̃xẽẽruü̃maxã rü ínaxĩanexü̃gu nanadai ga 20 ga yatügü.
15 Rü guxü̃ma ga yema Firitéugüarü churaragü ga ínapegüxü̃wa yexmagüxü̃ rü yema napechinüwa yexmagüxü̃ rü poraãcü namuü̃e. Rü yexgumarüxü̃ ta poraãcü namuü̃e ga yema tomaepü̱x ga churaragüchimü ga tóxnamana ĩxü̃ rü yema churaragü ga daiwa ĩxü̃. Rü yexgumayane rü naxĩã̱xãchiane rü yemaca̱x yexeraãcü namuü̃e.
16 Yema Chaúarü churaragü ga dauxü̃taeruü̃gü ga Guibeáwa ga Bẽyamíü̃arü naanewa yexmagüxü̃ rü nüxü̃ nadaugü ga Firitéugü ga nu ne yabuxmüxü̃.
17 Rü yexguma ga Chaú rü ñanagürü nüxü̃ ga yema churaragü ga íyaxümücügüxü̃: —¡Pegü picagü nax texé taxuxü̃ i tatanüwa! —ñanagürü. Rü yexguma nügü yacagügu, rü nüxü̃ nacua̱xgü nax Yonatáü̃ rü norü ngü̃xẽẽruxü̃ yixĩxü̃ ga tauxexü̃ ga natanüwa.
18 Rü yema ngunexü̃gu rü Tupanaarü efóx rü Iraétanüwa nayexma. Rü yemaca̱x ga Chaú rü chacherdóte ga Aíaxü̃ ñanagürü: —¡Nua nange i Tupanaarü efóx! —ñanagürü.
19 Natürü yoxni nax Chaú rü chacherdótemaxã íyadexayane rü nüma ga Firitéugüarü churaragü rü yema ínayexmagüxü̃wa rü yexeraãcü nanaxi̱xãchiãẽgü. Rü yemaca̱x ga Chaú rü chacherdótexü̃ ñanagürü: —¡Ngexrüma nax nua cungexü̃ i ngẽma efóx! —ñanagürü.
20 Rü yemawena ga Chaú rü guxü̃ma ga norü churaragümaxã nügü nanutaque̱xe rü inaxĩãchi nax Firitéugüxü̃ yadaixü̃. Rü yema nax poraãcü naxĩ̱xãchiãẽxü̃ ga yema Firitéugü, rü nügümücümaxãtama nügü nadai.
21 Rü yema Ebréugü ga ü̃paacü Firitéugümaxã wüxiwa yexmagüxü̃ rü norü churaragü ixĩgüxü̃, rü natanüwa nachoü̃ ga Iraétanüxü̃arü churaragü ga Chaúxü̃ rü Yonatáü̃xü̃ ümücügüxü̃.
22 Rü yema Iraétanüxü̃ ga Efraíü̃arü ma̱xpǘneanegu yarücu̱xgüxü̃, rü yexguma nüxü̃ nacua̱xgügu nax yabuxmüxü̃ ga Firitéugü, rü nawe nangegü rü nayadaix.
23 Rü yema nügü nax nada̱i̱xü̃ rü ñu̱xmata Bex-abéü̃wa nangu. Rü nüma ya Cori ya Tupana rü yema ngunexü̃gu Iraétanüxü̃xü̃ ínanguxü̃xẽxẽ.
Chaú rü norü churaragümaxã nanaxuegu
24 Natürü yema ngunexü̃gu ga Iraéanecüã̱xgü rü poraãcüxüchima nipae, yerü taguma nachibüe, yerü nüma ga Chaú rü norü churaragümaxã nanaxuegu rü ñanagürü: —Chixexü̃ tüxü̃ ngupetü ya yíxema õna ngṍxe naxü̃pa nax nayáuanexü̃, rü naxü̃pa nax chanadaixü̃ i chorü uanügü —ñanagürü.
25 Rü yexguma ga yema churaragü rü nawa nangugü ga wüxi ga naixnecü ga ngextá berure waixü̃müanewa nawa ngẽxmaxü̃.
26 Rü yexguma yema churaragü rü yema naixnecüwa nangugügu, rü guma berure rü namaxã niya̱xmare ñoma dexárüxü̃. Natürü bai ga ngexü̃ ga churara nüxü̃ wenetaxü̃, yerü nüxü̃ namuü̃e ga yema Chaú namaxã ueguxü̃.
27 Natürü ga Yonatáü̃ ga tama nüxü̃ ĩnüxü̃ ga yema nanatü churaragümaxã ueguxü̃, rü nanayaxu ga gumá norü naixmena̱xã rü wüxi ga berurechiãü̃gu nayawe̱xcuchi rü yemaacü nanawe ga guma berure. Rü yexgumatama nawa niporaxüneãchi.
28 Rü yexguma ga wüxi ga Iraétanüxü̃arü churara rü Yonatáü̃xü̃ ñanagürü: —Cunatü rü churaragümaxã tanaxuegu, rü ñatagürü: “Rü texé ya ñu̱xma õna ngṍxe, rü tá chixexü̃wa tangexma”, ñatagürü. Rü ngẽmaca̱x nixĩ i churaragü i poraãcüma naturaxü̃negüxü̃, erü taxuxü̃ma nangõ̱xgü —ñanagürü.
29 Rü nüma ga Yonatáü̃ rü nanangãxü̃ rü ñanagürü: —Chaunatü rü poraãcüxüchima Iraétanüxü̃maxã chixexü̃ naxü. Dücax i chomax nax íxrane ya berure nax changṍxü̃ rü choxü̃ naporaxẽxẽ.
30 Rü ngẽxguma chi ñaa churaragü rü nachibüegu nawa i ngẽma õna i norü uanügüna yapugüxü̃, rü poraãcü chi yexeraãcü Firitéugüxü̃ nadai —ñanagürü.
31 Yema ngunexü̃gu ga Iraétanüxü̃ rü poraãcü Firitéugüxü̃ nadai, rü Mixmáwa inanaxügüe rü ñu̱xmata ĩane ga Ayaróü̃wa nangugü. Natürü nüma ga Iraécüã̱xgüarü churaragü rü poraãcü nipae.
32 Rü yemaca̱x nanangõ̱xgü ga yema naxü̃nagü ga norü uanügüna napuxü̃xü̃ ga carnérugü, rü wocagü rü wocaxacügü. Rü nanadai rü nanagõ̱xgü ga namachi ga nagüã́xü̃.
33 Natürü nümaxü̃ ga churaragü rü Chaúmaxã nüxü̃ narüxugüe rü ñanagürügü nüxü̃: —Ngẽma churaragü rü Cori ya Tupanape̱xewa chixexü̃ naxüe. Erü namachi i nagüã́xü̃ tanangõ̱xgü —ñanagürügü. Rü yexguma ga Chaú rü ñanagürü: —Pema rü Tupanape̱xewa chixexü̃ pexü. ¡Rü ñu̱xmatama wüxi ya nuta ya tacü nua penadixchigü!
34 ¡Rü ñu̱xũchi duü̃xü̃gümaxã pidexagü rü namaxã nüxü̃ pixu nax wüxichigü nua nagaãxü̃ i norü woca i yatüxü̃, rüe̱xna norü carnéru nax pematama penada̱i̱xü̃ca̱x rü penangṍxü̃ca̱x nax ngẽmaãcü tama Tupanape̱xewa chixexü̃ pexügüxü̃ca̱x rü ãgüxü̃ i namachi pengṍxü̃ca̱x! —ñanagürü. Rü yematama chütaxü̃gu rü wüxichigü ga duü̃xü̃ rü nümatama yéma nanaga ga norü woca ga yatüxü̃ rü yexma nayama̱x.
35 Rü nüma ga Chaú rü yexma Cori ya Tupanaaxü̃́ nanaxü ga wüxi ga ãmarearü guruxü̃. Rü yema nixĩ ga nüxíraxü̃xü̃ ga ãmarearü guruxü̃ ga Tupanaca̱x naxüxü̃.
36 Rü yexguma ga Chaú rü ñanagürü: —¡Ngĩxã, rü ñaa chütaxü̃gu tayarüchoü̃ nawa ya daa ma̱xpǘne nax Firitéugüwe ingẽgüxü̃ca̱x rü nadexü̃ca̱x i guxü̃ma i norü ngẽmaxü̃gü ñu̱xmata yangóone! ¡Rü taxuxü̃táma tamaxẽxe, rü bai i wüxi! —ñanagürü. Rü guxü̃ma rü nanangãxü̃gü rü ñanagürügü: —¡Naxü i ngẽma cuxca̱x mexü̃! —ñanagürügü. Natürü ga gumá chacherdóte rü ñanagürü: —Naxü̃pa i guxü̃ma rü name nixĩ i Cori ya Tupanana naxca̱x tacagü i ngẽmachiga —ñanagürü.
37 Rü yexguma ga Chaú rü Tupanana naca rü ñanagürü: —¿Name nax nawe changẽxü̃ i Firitéugü? ¿Rü Iraétanüxü̃me̱xẽgu tá cunayixẽẽxü̃? —ñanagürü. Natürü nüma ga Cori ya Tupana rü yema ngunexü̃gu rü tama Chaúxü̃ nangãxü̃.
38 Rü yemaca̱x ga Chaú rü ñanagürü: —¡Nua pexĩ i guxãma i pemax i churaragümaxã icua̱xgüxe, rü naxca̱x peda̱u̱x nax texé tixĩ ya yíxema ñu̱xma naxǘxe i ñaa pecadu!
39 Rü Cori ya Tupana ya Iraétanüxü̃arü poxü̃ruxü̃pe̱xewa nüxü̃ chixu rü woo chaune ya Yonatáü̃ yixĩxgu ya chixexü̃ ücü, rü tá nayu —ñanagürü. Rü taxuxü̃ma ga churara nanangãxü̃.
40 Rü yemaca̱x ga Chaú rü guxü̃ma ga yema Iraétanüxü̃xü̃ ñanagürü: —Rü name nixĩ i pemax rü ñaãcüwawaama pexĩ, rü choma rü chaune i Yonatáü̃maxã rü tá tocüwawaama taxĩ —ñanagürü. Rü nüma ga norü churaragü nanangãxü̃gü rü ñanagürügü: —¡Naxü i ngẽma cuxca̱x mexü̃! —ñanagürügü.
41 Rü yexguma ga Chaú rü tagaãcü ñanagürü: —Pa chorü Cori ya Iraétanüxü̃arü Tupanax, ¿tü̱xcüü̃ tama curü duü̃xü̃xü̃ cungãxü̃ i ñu̱xma? Rü yima taxre ya nutagü ya Uríü̃ rü Tumíü̃wa tá cupe̱xewa naxca̱x tadau nax texé chixexü̃ üxü̃. Rü ngẽxguma choma rüe̱xna chaune ya Yonatáü̃ yixĩxgu i chixexü̃ taxüxü̃ rü tá ínanexechi ya yimá nuta ya Uríü̃. Rü ngẽxguma ngẽma curü duü̃xü̃gü ya Iraécüã̱xgü nixĩ i chixexü̃ ügüxü̃ rü tá ínanexechi ya yimá nuta ya Tumíü̃ —ñanagürü. Rü yexguma naxca̱x nadaugügu rü Yonatáü̃gu rü Chaúgu nangu. Rü duü̃xü̃güwa rü nataxuma ga yema pecadu.
42 Rü yemawena ga Chaú rü ñanagürü: —Rü ñu̱xmax rü chomaxã rü chaune i Yonatáü̃maxãxicatama tá naxca̱x pedaugü rü tá texégu nangu nax pecadu taxüxü̃ —ñanagürü. Rü Yonatáü̃gu nangu.
43 Rü yemaca̱x ga Chaú rü Yonatáü̃xü̃ ñanagürü: —¡Chomaxã nüxü̃ ixu i ngẽma cuxüxü̃! —ñanagürü. Rü nüma ga Yonatáü̃ rü ñanagürü: —Aixcüma nüxü̃ chaweneta ga íxrane ga berure namaxã ga gumá chorü naixmena̱xã ga ichingexü̃ne, natürü daxe chixĩ, rü íchamemare nax chayuxü̃ —ñanagürü.
44 Rü nüma ga Chaú rü tagaãcü ñanagürü: —¡Cori ya Tupana poraãcü choxü̃ poxcu ega ngẽxguma taxũtáma cuyu̱xgu, Pa Yonatáü̃x! —ñanagürü.
45 Natürü nüma ga Iraétanüxü̃ ga duü̃xü̃gü rü Chaúxü̃ nangãxü̃gü rü ñanagürügü: —¿Ta̱xacüca̱x chixarü i Yonatáü̃ i nayuxü̃ erü nüma nixĩ i tórü uanüxü̃ tüxü̃ naporamaexẽẽxü̃? ¡Taxũtáma ngẽmaãcü nixĩ! Rü Cori ya Tupanaégagu cumaxã nüxü̃ tixu rü taxuxü̃táma i wüxi i nayae waixü̃mügu nangu, rü bai i wüxi i nayae i naeruwa ngẽxmaxü̃. Rü ngẽma ñu̱xma naxüxü̃, rü Cori ya Tupanaarü ngü̃xẽẽmaxã nixĩ i naxüaxü̃ —ñanagürügü. Rü yemaacü ga duü̃xü̃gü rü yuwa Yonatáü̃xü̃ ínapoxü̃gü.
46 Rü yexguma ga Chaú rü yexma nüxü̃ narüchau nax Firitéugüwe yangẽchigüxü̃. Rü nümagü ga Firitéugü rü wenaxarü norü naaneca̱x nawoegu.
47 Rü yemaacü ga Chaú rü nügü nango̱xẽxẽ nax nüma rü aixcüma Iraéanecüã̱xgüarü ãẽ̱xgacü yixĩxü̃. Rü nüma rü guxü̃wama ga norü naanewa rü nanadai ga norü uanügü ga Moátanüxü̃, rü Amóü̃tanüxü̃, rü Edóü̃tanüxü̃, rü Chobáarü ãẽ̱xgacügü rü Firitéugü. Rü yema íyadaixetanüãxü̃wa rü nüma nixĩ ga guxü̃xü̃ma naporamaexü̃.
48 Rü nüma ga Chaú rü nananutaque̱xe ga norü churaragü rü Amaréxtanüxü̃xü̃ narüporamae. Rü yemaacü Iraécüã̱xgüxü̃ ínanguxü̃xẽxẽ naxme̱xwa ga yema ngĩ́ta̱xagüxü̃.
49 Rü Chaú nanegü rü ñaagü nixĩ: Yonatáü̃, rü Ichuí, rü Maquichúa. Rü taxre iyixĩ ga naxacügü. Rü yema rüyamaecü rü Meráx iyixĩ. Rü yema rübumaecü rü Micá iyixĩ.
50 Rü ngĩma ga Chaú naxma̱x rü Ainóü̃ nixĩ ga ngĩéga. Rü ngĩma rü Aimaáacü iyixĩ. Rü yema norü churaragüeru rü Abnéx nixĩ ga naéga. Rü nüma ga Abnéx rü Néx nane nixĩ. Rü nüma ga Néx rü Chaúnepü nixĩ.
51 Rü Chaú nanatü rü Chíx nixĩ, rü Abnéx nanatü rü Néx nixĩ. Rü nanatü ga Chíx rü Néx, rü Abié nixĩ.
52 Rü guxü̃ma ga Chaúarü maxü̃gu rü wüxi ga taxü̃ ga guxchaxü̃ nixĩ nax Firitéugümaxã nügü nada̱i̱xü̃. Rü yemaca̱x ga Chaú rü nanade ga guxü̃ma ga yatügü ga iporaexü̃ rü tama muü̃exü̃ nax norü churaragü yixĩgüxü̃ca̱x.
