1 Samuel 16:1-23
16 Rü yemawena ga Tupana rü Chamuéxü̃ ñanagürü: —Marütama nax Chaúca̱x nax cungechaü̃echaxü̃, erü marü tama chanaxwa̱xe nax Iraéanecüã̱xgüarü ãẽ̱xgacü nax yixĩxü̃. ¡Rü wüxi i carnéruchatacu̱xre nayaxu rü oribuarü chíxü̃maxã naxüãcu! ¡Rü Beréü̃wa naxũ rü ngẽxma naxca̱x yadau ya wüxi ya yatü ya Ichaxígu ãégacü! Erü wüxi ya nanexü̃ chayaxu nax Iraéanecüã̱xgüarü ãẽ̱xgacü yixĩxü̃ca̱x —ñanagürü.
2 Natürü nüma ga Chamué rü ñanagürü: —Pa Chorü Tupanax ¿ñuxãcü tá ngéma chaxũ? Erü ngẽxguma tá Chaú nüxü̃ cua̱xgu rü tá choxü̃ nima̱x —ñanagürü. Natürü Cori ya Tupana rü Chamuéxü̃ nangãxü̃ rü ñanagürü: —Ẽcü ngéma naga i wüxi i wocaxacü rü namaxã nüxü̃ ixu nax cha̱u̱xca̱x tá cuyamáxü̃ rü cuyaguxü̃ i ngẽma naxü̃na.
3 ¡Rü ngẽmawena rü nüxna naxu i Ichaxí nax cuxü̃ naxümücüxü̃ca̱x i ngẽma naxü̃naarü ma̱xwa! Rü choma rü tá cumaxã nüxü̃ chixu nax ngexcürüücü ya nane tá yixĩxü̃ ya cubaerucü nax Iraétanüxü̃arü ãẽ̱xgacü yixĩxü̃ca̱x —ñanagürü.
4 Rü nüma ga Chamué rü nanaxü ga yema Tupana namaxã nüxü̃ ixuxü̃. Rü yexguma Beréü̃wa nanguxgu, rü guma ĩanearü ãẽ̱xgacügü rü namuü̃eãcüma nanayauxgü. Rü nüxna nacagüe rü ñanagürügü: —¿Ta̱xacüwa nua cuxũ? ¿Ẽ̱xna ngüxmüxẽxẽwa nua cuxũ? —ñanagürügü.
5 Rü nüma ga Chamué rü nanangãxü̃ rü ñanagürü: —Taxuxü̃ma nixĩ i ngupetüxü̃. Rü nua chaxũ nax Tupanaca̱x wüxi i naxü̃na chimáxü̃ca̱x. ¡Rü ngẽmaca̱x Tupanaca̱x pegü pimexẽxẽgü rü choxü̃ ípixümücü nax ngẽma naxü̃naarü ma̱xwa rü Tupanaarü cua̱xüü̃wa ipexãgüxü̃ca̱x! —ñanagürü. Rü yemawena ga Chamué rü Ichaxíxü̃ rü nanegüxü̃ Tupanaca̱x nimexẽẽgü, rü nüxna naxu nax íyaxümücügüãxü̃ca̱x ga Tupanaarü cua̱xüxü̃wa.
6 Rü yexguma Tupanaxü̃ íyacua̱xüü̃güxü̃wa nangugügu ga Ichaxí rü nanegü, rü nüma ga Chamué rü Ichaxí nane ga Eriáxü̃ nadawenü rü ñaxü̃gu narüxĩnü: —Cuxá daa nixĩ ya yimá yatü ya Tupana nayaxucü nax Iraéanecüã̱xgüarü ãẽ̱xgacü yixĩxü̃ca̱x —ñaxü̃gu narüxĩnü.
7 Natürü ga Tupana rü Chamuéxü̃ ñanagürü: —Tama name i norü düxétümarewa rü norü máchanemarewa nax cungugüxü̃ ya wüxi ya yatü. Tama daa nixĩ. Choma rü tama duü̃xü̃gü nangugüxü̃ãcüma chanayaxu ya wüxi ya yatü. Duü̃xü̃gü rü ngẽma düxétüxü̃nemare nixĩ i nangugügüxü̃, natürü i choma rü ngẽma norü maxü̃ rü norü ĩnü nixĩ i ngẽma changugüxü̃ —ñanagürü.
8 Rü yexguma ga Ichaxí rü nane ga Abinadáca̱x naca, rü Chamuéxü̃tawa nanaga. Natürü nüma ga Chamué rü nüxü̃ nixu ga tama gumá nax yixĩxü̃ ga Tupana nayaxucü.
9 Rü yemawena ga Ichaxí rü nane ga Chamáxü̃ Chamuéxü̃tawa naga, natürü nüma ga Chamué rü ñanagürü: —Tama daa nixĩ ya Tupana nayaxucü —ñanagürü.
10 Rü nüma ga Ichaxí rü 7 ga nane Chamuépe̱xewa nagagü, natürü nüma ga Chamué rü nüxü̃ nixu nax taxucüma ga gumátanüwa Tupana nayaxuxü̃.
11 Rü nüma ga Chamué rü Ichaxína naca rü ñanagürü: —¿Nangexmaxü̃ ya nai ya cune? —ñanagürü. Rü nüma ga Ichaxí nanangãxü̃ rü ñanagürü: —Yimá rübumaecüxicatama nixĩ ya taxucü erü yea naanewa carnérügüna nadau —ñanagürü ga Ichaxí. Rü yexguma ga nüma ga Chamué rü ñanagürü: —¡Ẽcü ñu̱xmatama wüxi i duü̃xü̃xü̃ ngéma namu nax naxca̱x yacaxü̃ca̱x! Erü taxũtáma ítarütogü nax ichibüexü̃ca̱x ñu̱xmatáta ínangu i nümax —ñanagürü.
12 Rü yexguma ga nüma ga Ichaxí rü wüxi ga duü̃xü̃xü̃ yéma namu nax naxca̱x yacaxü̃ca̱x. Rü nüma ga gumá ngextü̱xücü rü nadáuxcha̱xmüxü̃ rü namecüma rü namechametü. Rü nüma ga Tupana rü Chamuéxü̃ ñanagürü: —Daa nixĩ. ¡Rü ẽcü nabaeru! —ñanagürü.
13 Rü nüma ga Chamué rü nanayaxu ga yema carnéruchatacu̱xre ga chíxü̃maxã ããcuxü̃, rü Dabíerugu nanaba ga naenexẽgüpe̱xewa. Rü yexgumatama ga Tupanaãxẽ rü Dabína nangu rü namaxã inacua̱x. Rü yemawena ga nüma ga Chamué rü narümoxẽ rü norü ĩane ga Ramáca̱x nataegu.
Dabí rü Chaúarü ngü̃xẽẽruxü̃ nixĩ
14 Rü yexgumayane ga Tupanaãẽ rü Chaúna nixũgachi. Rü nüxna nangu ga wüxi ga naãxẽ ga chixexü̃ ga naxĩ̱xãchiãẽxẽẽxü̃ ga Cori ya Tupana yéma muxü̃.
15 Rü yemaca̱x ga yema norü duü̃xü̃gü ga ngü̃xẽẽruü̃gü ixĩgüxü̃ rü ñanagürügü nüxü̃: —Pa Ãẽ̱xgacüx, wüxi i chixexü̃ i naãxẽ ya Tupana nua muxü̃ cuxna nangu, rü ngẽma nixĩ i cuxü̃ naxĩ̱xãchiãẽxẽẽxü̃.
16 ¿Rü tü̱xcüü̃ tama toxü̃ cumu nax wüxi i meama paxetaxü̃ cuáxü̃ca̱x nax tadauxü̃ rü cupe̱xewa árpa nax napaxüxü̃ca̱x ega ngẽxguma cuxna nanguuxü̃gu i ngẽma naãxẽ i chixexü̃? Rü ngẽma paxeta tá cuxü̃ nataãẽxẽxẽ rü mexü̃ tá cumaxã naxü̃ —ñanagürügü.
17 Rü nüma ga Chaú rü ñanagürü: —Marü name ¡Naxca̱x choxü̃́ peda̱u̱x i wüxi i paxetatanüxü̃ i árpaarü paxüxü̃ mea cuáxü̃, rü nua penaga! —ñanagürü.
18 Rü yexguma ga wüxi ga norü duü̃xü̃ rü ñanagürü: —Choma nüxü̃ chadau i wüxi i Ichaxí nane i Beréü̃wa ngẽxmaxü̃, rü meama paxetaxü̃ nacua̱x. Rü ñu̱xmachi wüxi i poracü nixĩ i daiwa rü nüxü̃ cuácü nixĩ ega yadexaxgu. Rü nüma rü mecü nixĩ rü Cori ya Tupana nüxü̃ rüngü̃xẽẽcü nixĩ —ñanagürü.
19 Rü yexguma ga Chaú rü Ichaxíxü̃tawa nanamugü ga norü duü̃xü̃gü nax nüxü̃ ñagüxü̃ca̱x: —¡Nua namu ya cune ya Dabí ya yimá carnérugüarü daruxü̃ ixĩcü! —nüxü̃ ñagüxü̃ca̱x.
20 Rü nüma ga Ichaxí rü nane ga Dabíxü̃ Chaúxü̃tawa namu. Rü gumá nanemaxã Chaúca̱x yéma nanamu ga wüxi ga búru ga paũmaxã ãxwetaxü̃, rü wüxiwexü̃ ga bínu rü wüxi ga chíbuxacü.
21 Rü yemaacü ga Dabí rü Chaúxü̃tawa naxũ, rü yéma naxü̃tawa nayexma. Rü nüma ga Chaú rü Dabíxü̃ nangechaü̃xü̃chi, rü norü ngü̃xẽẽruxü̃ nayaxĩxẽxẽ.
22 Rü nüma ga Chaú rü Ichaxíxü̃tawa namuga rü Dabíca̱x ínaca nax nügüxü̃tawa nayexmaxẽẽãxü̃ca̱x, yerü poraãcü norü me nixĩ.
23 Rü yexguma Chaúna nanguuxü̃gu ga yema naãxẽ ga chixexü̃ ga Tupana naxca̱x yéma muxü̃, rü nüma ga Dabí rü nanayaxuxü̃ ga árpa rü nanapaxüxü̃. Rü yemaacü ga nüma ga Chaú rü nataãẽãxü̃ rü naxca̱x nitaaneãxü̃, rü nüma ga naãxẽ ga chixexü̃ rü nüxna nixũgachiãxü̃.
