1 Samuel 19:1-24
19 Rü nüma ga Chaú rü nane ga Yonatáü̃xü̃ rü guxü̃ma ga norü churaragüxü̃ namu ga Dabíxü̃ nax yama̱xgüxü̃ca̱x. Natürü nüma ga Yonatáü̃ rü poraãcü Dabíxü̃ nangechaü̃.
2 Rü yemaca̱x ga Yonatáü̃ rü Dabímaxã nüxü̃ nixu ga yema nanatüarü ore, rü ñanagürü: —Chorü papa ya Chaú rü cuxü̃ timáxchaü̃. Rü ngẽmaca̱x i moxü̃ pa̱xmama ¡rü naxuãxẽ rü nawa naxũ i ngẽma naane i taxúema nawa cuxü̃ dauxü̃, rü ngẽxma icu̱x!
3 Rü choma rü ngẽma naane i nagu quicúxü̃wa tá chaunatümaxã chaxũ. Rü cuchigaxü̃ tá tümamaxã chixu, rü ñuxũ ñatagü. Rü yixcama tá cuxü̃ nüxü̃ chacua̱x i ngẽma chaunatüarü ore —ñanagürü.
4 Rü nüma ga Yonatáü̃ rü nanatü ga Chaúmaxã nidexa rü Dabíétüwa nachogü rü ñanagürü: —Pa Ãẽ̱xgacüx, tama name i chixexü̃ cuxü namaxã i curü duü̃xü̃ i Dabí, erü taxuxü̃ma i chixexü̃ cumaxã naxü. Rü guxü̃ma i ngẽma naxüxü̃wa rü cuxca̱x mexü̃ naxü.
5 ¿Ẽ̱xna marü nüxü̃ curüngü̃ma ga yexguma norü maxü̃ ãũcümaxü̃wa nayexmaxẽẽgu ga Goriáxü̃ yama̱xgu, rü yemaacü ga Cori ya Tupana rü Iraéanecüã̱xgüxü̃ guxchaxü̃wa ínanguxü̃xẽxẽ? Cumax, Pa Ãẽ̱xgacüx, rü nüxü̃ cudau ga yema, rü cutaãxẽ. ¿Rü tü̱xcüü̃, Pa Ãẽ̱xgacüx, i cuyamáxchaü̃xü̃ i wüxi i duü̃xü̃ i taxuxü̃ma i chixexü̃ cumaxã üxü̃? ¿Rü ta̱xacüca̱x tá cuyama̱x ya Dabí? —ñanagürü.
6 Rü yexguma Chaú nüxü̃ ĩnügu ga yema Yonatáü̃ namaxã nüxü̃ ixuxü̃, rü tagaãcü ñanagürü: —Cori ya Tupanaégagu nüxü̃ chixu rü taxũtáma chayama̱x ya Dabí —ñanagürü.
7 Yexguma ga Yonatáü̃ rü Dabíca̱x nayaca rü namaxã nüxü̃ nixu ga nanatüarü dexa. Rü yemawena rü nanatü ga Chaúxü̃tawa namaxã naxũ, rü Dabí rü wenaxarü Chaúxü̃tawa nayexma noxrigurüxü̃tama.
8 Rü wenaxarü Firitéugümaxã nügü nadai. Rü Dabí rü inaxũãchi nax Firitéugümaxã nügü nada̱i̱xü̃. Rü Firitéugüxü̃ narüporamae, rü muxũchixü̃ma ga Firitéugü nadai. Rü togü rü nayabuxmüxẽxẽ.
9 19:9-10 Rü wüxi ga ngunexü̃gu ga Chaú rü napatamachiãwa narüto. Rü norü wocae naxme̱xwa nayexma rü Dabí rü nape̱xewa napaxeta. Rü ngürüãchi wenaxarü Chaúwa nangu ga chixexü̃ ga naãxẽ ga Tupana nagu muxü̃. Rü yemaca̱x Dabíxü̃ nanacu̱x ga norü wocae nax gumamaxã Dabíxü̃ yamutanüxü̃ca̱x ĩxtapü̱xwa. Natürü nüma ga Dabí rü ínanapoxü̃ãma ga Chaúarü wocae rü ĩxtapü̱xwa narüwa̱x. Rü nüma ga Dabí rü niña rü yematama chütaxü̃gu nixũ.
10 Nüü̃ nadau 19:9
11 Rü yexgumatama ga Chaú rü norü duü̃xü̃güxü̃ namu nax Dabípatawa naxĩxü̃ca̱x nax nüxna yéma yadaugüxü̃ca̱x rü moxü̃ãcü yama̱xgüãxü̃ca̱x. Natürü Micá ga Dabí naxma̱x rü ngĩtexü̃ ngĩgürügü: —Ngẽxguma taxũtáma quiñaxgu i ñaa chütaxü̃gu, rü moxü̃ ẽxü̃wa rü tá cuyu —ngĩgürügü.
12 Rü yexgumatama ga Micá rü Dabíxü̃ írüchü̱xüe nawa ga wüxi ga beü̃tána ga dauxü̃wa yexmaxü̃, rü yemaacü niña ga Dabí.
13 Rü yemawena ga Micá rü wüxi ga naxchicüna̱xã ga naiwa üxü̃ iyaxu rü Dabíarü pechicaxü̃gu inacaxẽxẽ. Rü naeruwa rü cabrata̱xa imuchapa̱xaxü̃maxã inaxüyae rü ñu̱xũchi iyadüxü wüxi ga düxruü̃maxã.
14 Rü yexguma Chaú norü duü̃xü̃güxü̃ muxgu nax Dabíxü̃ yayauxgüxü̃ca̱x rü Micá rü nüxü̃ yaxu ga nax yada̱xawexü̃ ga Dabí.
15 Natürü Chaú rü wena norü duü̃xü̃güxü̃ namu nax Dabíca̱x yadaugüxü̃, rü ñanagürü: —¡Woo norü pechicaü̃wa nangẽxmagu, rü ípenatúxuchi rü nua penaga nax chayamáxü̃ca̱x! —ñanagürü.
16 Rü Chaúarü duü̃xü̃gü rü Dabípatagu nachocu, natürü norü pechicaü̃gu nüxü̃ inayangaugü i naxchicüna̱xã i naiwa üxü̃ i cabrata̱xa imuchapa̱xaxü̃maxã ãyaexü̃.
17 Rü yexguma ga Chaú rü Micáxü̃ ñanagürü: —¿Tü̱xcüü̃, ngẽmaãcü choxü̃ cuwomüxẽxẽ, rü cuyañaxẽxẽ i chorü uanü? —ñanagürü. Rü Micá rü inangãxü̃ rü ngĩgürügü: —Erü nüma rü chomaxã nanaxuegu nax choxü̃ yamáxü̃ i ngẽxguma chi taxũchima chayañaxẽẽgu —ngĩgürügü.
18 Rü yemaacü nixĩ ga yañaxü̃ ga Dabí. Rü Ramáwa naxũ Chamuéxü̃tawa, rü Chamuémaxã nüxü̃ nixu ga guxü̃ma ga Chaú namaxã üxü̃. Rü yemawena rü Dabí rü Chamué rü ĩane ga Naióxwa naxĩ, rü yéma nayexmagü.
19 19:19-20 Rü yexguma Chaú nüxü̃ cua̱xgu rü Dabí rü Naióxwa ga Ramáanewa nax nayexmaxü̃, rü norü duü̃xü̃güxü̃ yéma namugü nax yanaya̱u̱xgüãxü̃ca̱x. Rü yexguma yéma nangugügu ga Chaúarü duü̃xü̃gü rü nüxü̃ nadaugü ga wüxitücumü ga Tupanaarü orearü uruü̃gü ga Tupanaãxẽ nüxna nguxü̃. Rü Chamué nixĩ ga namaxã icuáxü̃ ga yema. Rü yexgumatama Chaúarü duü̃xü̃güna nangu ga Tupanaãxẽ, rü nümagü rü ta inanaxügü nax Tupanaarü oremaxã yadexagüxü̃.
20 Nüü̃ nadau 19:19
21 Rü yemaxü̃ nacua̱xgu ga Chaú, rü togü ga norü duü̃xü̃güxü̃ yéma namugü. Natürü yemagü rü tá rü yexguma yéma nangugügu rü Tupanaãxẽ nüxna nangu rü inanaxügüe nax Tupanaarü oremaxã yadexagüxü̃. Rü norü tomaepü̱xtücumü inamuãchitanü ga Chaú, rü yema duü̃xü̃gü rü ta rü yematama nüxü̃ nangupetü.
22 19:22-23 Rü yexguma ga Chaú rü düxwa nümaxüchi inaxũãchi nax Ramáwa naxũxü̃. Rü yexguma Checúwa yexmaxü̃ ga taxü̃ ga dexáchicawa nanguxgu rü Chamuéca̱x rü Dabíca̱x ínaca. Rü wüxi ga duü̃xü̃ rü nanangãxü̃ rü ñanagürü: —Naióxwa i Ramáanewa nangẽxmagü —ñanagürü. Rü nüma ga Chaú rü yéma naxũ. Natürü Cori ya Tupanaãẽ rü nüxna rü ta nangu, rü inanaxügü nax Tupanaarü oremaxã yadexaxü̃. Rü yemaacütama ínixũãma ñu̱xmata Naióxwa nangu ga ĩane ga Ramáwa.
23 Nüü̃ nadau 19:22
24 Rü naétü ínacuxuchi ga naxchiru, rü guxü̃ma ga yema ngunexü̃ rü chütaxü̃ rü Chamuépe̱xewa ngexchiruãcü Tupanaarü oremaxã nidexa. Rü ngéma nixĩ i nangóxü̃ i ore i ñaxü̃: —¿Chaú rü ta ẽ̱xna Tupanaarü orearü uruxü̃ nixĩ? —ñaxü̃.
