1 Samuel 2:1-36
2 Rü ñaãcü iyumüxẽ ga Ána:—Pa Corix, rü poraãcü cumaxã chataãxẽ erü choxna cunamu ya chaune.Rü ñu̱xma rü choxü̃́ natauxcha nax chanangãxü̃gaxü̃ i ngẽma choxü̃ cugüexü̃ erü cuma choxü̃ curüngü̃xẽxẽ.Rü ngẽmaca̱x chataãẽxü̃chi.
2 Rü tataxuma ya texé ya cuxrüxü̃ üünexe, Pa Corix.Rü tataxuma ya texé cuxrüxü̃ duü̃xü̃güna dauxe, Pa Torü Tupanax.Rü nataxuma i ta̱xacü i cuxü̃ rüporamaexü̃.
3 Rü tama name i texé tügü ticua̱xüxü̃ i ngẽxguma tidexagu rü tama name i tügü ítarüta,erü Cori ya Tupana ya Guxü̃xü̃ma Cuáxcü rü nanangugü i guxü̃ma i ngẽma naxüxü̃ i wüxichigü i duü̃xü̃.
4 Tupana rü nagu nabügü ya norü würagü i ngẽma poraexü̃,natürü pora tüxna naxã ya yíxema turaexe.
5 Guxemagü noxri õna tüxü̃́ íyaxügüxe rü ñu̱xma rü íxraxü̃ i õnaca̱x tügü itanã.Natürü guxemagü noxri taiya ingegüxe rü ñu̱xma rü marü tama tataiyae.Ngẽma nge i taguma ãxacücü rü ñu̱xma rü marü 7 e̱xpü̱xcüna ixíraxacü.Natürü ngẽma muxacüchirécü rü ñu̱xma rü marü ingexacü.
6 Rü nüma ya Cori ya Tupana rü duü̃xü̃güna nanayaxu i maxü̃ rü ngẽxgumarüxü̃ tá nüxna nanaxã.Rü wüxi i naxmaxü̃gu nayaxǘcuchi rü ngẽmawa wenaxarü ínanadaxẽxẽ.
7 Rü nüma ya Cori ya Tupana rü tüxü̃ nangearü ngẽmaxü̃xã̱xẽxẽ rü ngẽxgumarüxü̃ ta tüxü̃ namuarü ngẽmaxü̃xã̱xẽxẽ.Rü guxchaxü̃ taxca̱x ínangu̱xẽxẽ rü ngẽxgumarüxü̃ ta guxchaxü̃wa tüxü̃ ínanguxuchixẽxẽ.
8 Tupana rü tümaarü guxchaxü̃wa tüxü̃ narüngü̃xẽxẽ ya yíxema ngearü diẽruã̱xgüxe.Rü guxchirepáü̃wa tüxü̃ ínayaxuchi ya yíxema diẽruca̱x caxaxü̃wa̱xegüxe rü ãẽ̱xgacüxü̃ tüxü̃ nixĩxẽxẽ nax ngẽmaãcü tachigaxü̃ i yatügütanüwa tarütoxü̃ca̱x rü ãẽ̱xgacütanüwa tangexmaxü̃ca̱x.Erü Cori ya Tupana nixĩ i norü yora i ngẽma nagu naxǘnagüxü̃ i ñoma i naane,yerü nüma nixĩ ga nagu naxǘnagüãxü̃.
9 Tupana rü tüxna nadau ya yíxema naga ĩnüexenatürü ngẽma tama naga ĩnüexü̃ rü ẽanexü̃gu nayue.Erü taxúema nüxü̃ tacua̱x nax tümaarü poramaxãtama tügü tamaxẽẽxü̃.
10 Rü nüma ya Cori ya Tupana rü tá nanadai i norü uanügü.Rü daxũguxü̃ i naanewa tá naxca̱x ne nanamu ya tagaxü̃ ga duruanexü̃.Rü nüma ya Cori ya Tupana rü tá nüxna naca i norü maxü̃chiga i guxü̃ma i duü̃xü̃gü i ñoma i naanewa maxẽxü̃.Rü tá pora nüxna naxã ya yimá ãẽ̱xgacü ya nüma nüxü̃ naxunetacü,rü tá yexeraãcü nayaporachigüxẽxẽ
—ngĩgürügü.
11 Rü ñu̱xũchi nüma ga Ercaná rü naxacüã̱xgü rü naxma̱xgümaxã napataca̱x nawoegu ga ĩane ga Ramáwa. Natürü nüma ga gumá nane ga bucü rü yexma chacherdóte ga Eríxü̃tagu narüxã̱ũ̱x nax yéma Cori ya Tupanaaxü̃́ napuracüxü̃ca̱x.
Erí nanegüarü chixexü̃gü
12 Rü yema Erí nanegü rü poraãcüma chixexü̃gu namaxẽ rü tama Cori ya Tupanaxü̃ nacua̱xgüchaü̃.
13 2:13-14 Rü nacüma nixĩ ga yema chacherdótegü rü yexguma texé Tupanaca̱x yama̱xgu ga wüxi ga naxü̃na rü nüma ga chacherdóte rü yéma nanamu ga wüxi ga norü ngü̃xẽẽruxü̃ namaxã ga wüxi ga tacü ga cuyera ga ãchatacü. Rü yexguma ínamuxrayane ga yema namachi rü yema chacherdótearü ngü̃xẽẽruxü̃ rü gumá panera ga namachi nawa muxracügu nanama̱x ga gumá cuyera ga ãchatacü. Rü guxü̃ma ga yema namachi ga panerawa ínacuixü̃xü̃ namaxã ga gumá cuyera ga ãchatacü rü chacherdóteca̱x nixĩ. Rü yemaacü tümamaxã nixĩgü ga guxãma ga Iraétanüxü̃ ga Chilówa tümaarü ãmare ngegüxe.
14 Nüü̃ nadau 2:13
15 Rü ñu̱xũchi naxü̃pa ga nax tayagugüxü̃ ga chíxü̃ ga ãmarearü guruü̃wa rü yéma nangu ga chacherdótearü ngü̃xẽẽruxü̃ rü ñanagürü tüxü̃ ga guxema tümaarü ãmare íguxchaxü̃xe: —¡Choxna tanaxã i namachi nax chacherdóteaxü̃́ chayaguxü̃ca̱x! Erü taxũtáma cuxü̃́ nanayaxu i ngẽma namachi i marü muxraxü̃, rü ngẽma ngãxü̃ nixĩ i nanaxwa̱xexü̃ —ñanagürü.
16 Rü ngẽxguma tanangãxü̃gügu ya duü̃xẽgü nax chíxü̃íra tigugüxü̃ rü ñu̱xũchi ngẽmawena rü name nax nüma i chacherdótearü ngü̃xẽẽruxü̃ naya̱u̱xãxü̃ i ngẽma nanaxwa̱xexü̃ i namachi, rü nüma ga chacherdótearü ngü̃xẽẽruxü̃ rü tüxü̃ nangãxü̃ rü ñanagürü: —Tama nixĩ. Rü chanaxwa̱xe nax ñu̱xmatama choxna cunaxãxü̃, rü ngẽxguma taxũtáma choxna cunaxãxgu rü tá cuxna chanapuama —ñanagürü.
17 Rü yemaacü naxãũcümaxü̃chi ga yema chixexü̃ ga yema chacherdótearü ngü̃xẽẽruü̃gü üxü̃ Cori ya Tupanape̱xewa, yerü nagu nidauxcüraxü̃gü ga yema ãmaregü ga nüma ga Cori ya Tupanaarü ixĩxü̃.
Chamuéxü̃ nayaxu ga Cori ya Tupana
18 Rü nüma ga gumá bucü ga Chamué rü niyachigü rü Cori ya Tupanaaxü̃́ napuracü. Rü naxchiru rü chacherdótegüchirurüxü̃ nixĩ nax línuchinaxca̱x yixĩxü̃.
19 Rü wüxichigü ga taunecügu ga yexguma norü mama tümatemaxã gumá Tupanapatawa taxĩĩxü̃gu nax Tupanaca̱x yéma tanangegüxü̃ca̱x ga tümaarü ãmaregü, rü Chamuéca̱x rü ta yéma tanangeexü̃ ga wüxi ga naxchiru ga nüxü̃́ taxüxü̃.
20 Rü nüma ga gumá chacherdóte ga Erí rü Ercanámaxã rü naxma̱xmaxã mexü̃ naxuegu rü ñanagürü: —Nüma ya Cori ya Tupana rü tá cuxü̃́ nanaxütanü namaxã nax cuxü̃́ nax yaxãxacüchigüxü̃ca̱x i ñaa nge natanü ya yimá ngĩne ya Corina namuãcü —ñanagürü. Rü yemawena ga Ercaná rü Ána rü napataca̱x nawoegu.
21 Rü nüma ga Cori ya Tupana rü Ánaxü̃ narüngü̃xẽxẽ rü yemaca̱x iyaxãxacüchigü. Rü yemaacü tomaepü̱xwa nangu ga ngĩne rü taxre ga ngĩxacü. Rü yoxni ga gumá ngĩne ga Chamué rü Tupanape̱xewa niyachigü.
22 Rü nüma ga gumá chacherdóte ga Erí rü marü poraãcü nayaxüchi. Natürü nüxü̃ nacua̱xama ga yema chixexü̃ ga nanegü Iraétanüxü̃tanüwa ixügüxü̃, rü ñuxãcü yema ngexü̃gü ga Tupanapataarü ücuchicawa puracüexü̃maxã nax namaxẽxü̃.
23 Rü yemaca̱x nanegüxü̃ ñanagürü: —Guxü̃ma i duü̃xü̃gü rü chomaxã nüxü̃ nixugügü nax ñuxãcü chixexü̃ pexügüxü̃ rü chixri pemaxẽxü̃. ¿Rü tü̱xcüü̃ ngẽmaãcü pemaxẽ?
24 Rü dücax, Pa Chaunegüx, rü nachixexüchima nixĩ i ngẽma ore i Tupanaarü duü̃xü̃gü nüxü̃ nixugügüxü̃ i pechiga.
25 Rü ngẽxguma wüxi i duü̃xü̃ rü to i duü̃xü̃maxã chixexü̃ uxgux rü nangẽxma i norü mexẽẽruxü̃. Natürü ngẽxguma wüxi i duü̃xü̃ Tupanape̱xewa chixexü̃ uxgux ¿rü texé tá tanamexẽxẽ i ngẽma? —ñanagürü. Natürü ga nümagü ga nanegü rü tama naga naxĩnüechaü̃, yerü ga Tupana rü marü namaxã nanaxuegu ga nax nadaiaxü̃.
26 Rü yoxni ga nüma ga gumá ngextü̱xücü ga Chamué rü niyachigü. Rü Cori ya Tupana rü poraãcü namaxã nataãxẽ, rü duü̃xü̃gü rü ta namaxã nataãẽgü.
27 Rü yexgumaü̃cüxü rü Eríxü̃tagu nanaxũane ga wüxi ga orearü uruxü̃ rü ñanagürü nüxü̃: —Cori ya Tupana rü nüxü̃ nixu rü ñanagürü: “Yexguma curü o̱xigü Equítuanewa yexmagügu rü Faraóü̃arü puracütanüxü̃ yaxĩgügu rü choma rü meama curü o̱xigümaxã nüxü̃ chixu i chorü ore.
28 Ñu̱xũchi natanüwa ga guxü̃ma ga Iraétanüxü̃ rü chanade ga curü o̱xigü nax chorü chacherdótegü yixĩgüxü̃ca̱x rü chorü ãmarearü guruü̃wa yagugüãxü̃ca̱x i ãmaregü rü cha̱u̱xca̱x yagugüãxü̃ca̱x ga pumarate̱xe rü chope̱xewa nagu yacu̱xgüxü̃ca̱x i chacherdótechiru. Rü yexgumarüxü̃ ta rü guxü̃ma ga ãmaregü ga Iraétanüxü̃ cha̱u̱xca̱x ígugüxü̃wa rü curü o̱xigüna chanaxã ga yema nüxna üxü̃.
29 ¿Tü̱xcüü̃ chixri namaxã ipecua̱x i ngẽma ãmaregü i cha̱u̱xca̱x pedaixü̃ rü cha̱u̱xca̱x ípeguxü̃ rü ngẽma togü i ãmaregü i choma chamuxü̃ nax choxna naxãgüxü̃ i duü̃xü̃gü? ¿Tü̱xcüü̃ natanüwa i guxü̃ma i ngẽma ãmaregü i chorü duü̃xü̃gü i Iraétanüxü̃ choxna ãgüxü̃ rü cunegünaama cunaxã i ngẽma ãmaregü i rümemaegüxü̃ rü ngẽmamaxã cuyangüexẽxẽ i cunegü?
30 Rü choma ya Cori i Iraétanüxü̃arü Tupana rü marü ü̃pa nüxü̃ chixu rü cuma rü cutanüxü̃ rü guxü̃gutáma choxü̃́ pepuracüe. Natürü i ñu̱xma rü ngẽma chixexü̃ i cunegü ügüxü̃gagu rü chanaxuegu rü tagutáma chanangexrü i ngẽma ñu̱xma ngupetüxü̃. Erü tüxü̃ chicua̱xü̃xü̃ ya yíxema choxü̃ icua̱xüxü̃güxe rü yíxema choxü̃ oexe rü choma rü tá tüxü̃ chaxãneexẽxẽ.
31 Marü ningaica i ngẽma ngunexü̃ i nagu tá chayanaxoxẽẽxü̃ i curü pora rü yema pora ga curü o̱xigüna chaxãxü̃. Rü taxuxü̃táma i cutanüxü̃ tá narüyae.
32 Rü cuma rü tá cungechaü̃ rü quixãũxãchi i ngẽxguma nüxü̃ cuda̱u̱xgu i ngẽma mexü̃ i Iraétanüxü̃tanü̃wa chaxüxü̃. Rü taxuxü̃táma i cutanüxü̃ tá narüyae.
33 Rü chorü ãmarearü guruü̃arü ngaicamana tá íchayaxüxẽxẽ i ñuxre i cutanüxü̃ nax nümagü poraãcü yaxãũãchiexü̃ca̱x rü ngúxü̃ yangegüxü̃ca̱x. Rü guxü̃táma i ngẽma togü i cutanüxü̃ rü tá nadai.
34 Rü wüxi i curü cua̱xruxü̃ tá nixĩ i ngẽma taxre i cune i Oní rü Fineéxü̃ ngupetüxü̃, erü ngẽma taxre rü ngẽmatama i ngunexü̃gu tá nayue.
35 Rü ngẽmawena i choma rü tá chayanguxuchixẽxẽ ya wüxi ya chacherdóte ya aixcüma chauga ĩnücü ya choma chanaxwa̱xexü̃ãcüma puracücü rü naxücü i chorü ngúchaü̃. Rü choma rü tá guxü̃gutáma nüxü̃ charüngü̃xẽxẽ nax yamuxü̃ca̱x i nataagü. Rü tá chanamu ya yimá chacherdóte nax guxü̃gutáma yimá choma nüxü̃ chaxunetacü ya ãẽ̱xgacüxü̃ nangü̃xẽẽxü̃.
36 Rü ñu̱xũchi guxü̃ma i cutanüxü̃ i íyaxügüxü̃ rü maxẽxü̃ rü yimá chacherdótepe̱xegu tá nayacaxã́pü̱xügü, rü tá wüxitachinü i diẽruca̱x rü wüxichipe̱xe i paũca̱x ínacagü. Rü tá ñanagürügü nüxü̃, ‘¡Toxü̃ rüngü̃xẽxẽ rü toxna naxã i puracü natanüwa i ngẽma chacherdótegü nax toxü̃́ nangẽxmaxü̃ca̱x i torü õna!’ ñanagürügü tá” —ñanagürü ga Tupana.
