1 Samuel 20:1-42
20 Dabí rü Naióxwa niña ga Ramáwa rü Yonatáü̃ íyexmaxü̃wa naxũ nax namaxã nüxü̃ yanaxuxü̃ca̱x, rü ñanagürü: —¿Ta̱xacü ẽ̱xna chaxü i chomax? ¿Ta̱xacü ẽ̱xna nixĩ i chorü chixexü̃? ¿Ta̱xacürü chixexü̃ tümamaxã chaxü ya cunatü rü ngẽmaca̱x cha̱u̱xca̱x tadauxü̃ rü choxü̃ timáxchaü̃xü̃? —ñanagürü.
2 Rü nüma ga Yonatáü̃ nanangãxü̃ rü ñanagürü: —Tupana rü tama nanaxwa̱xe nax cuyuxü̃. ¡Taxũtáma cuxü̃ tima̱x! ¡Nagu rüxĩnü rü chaunatü rü taxuxü̃ma i ta̱xacü taxü ega tama chomaxã nüxü̃ tixuxíragu woo íxraxü̃ rüe̱xna ta̱xacü i taxü̃! ¿Tü̱xcüü̃ ya chorü papa i tama chomaxã nüxü̃ tixuxchaxü̃xü̃ i ngẽma nax cuxü̃ timáxchaü̃xü̃? Rü taxũtáma ngẽmaãcü nixĩ —ñanagürü.
3 Natürü ga Dabí rü nüxü̃ nixuchigüama rü ñanagürü: —Curü papa rü meama nüxü̃ tacua̱x nax cuma rü choxü̃ cungechaü̃xü̃ rü ngẽmaca̱x nixĩ i tama cumaxã nüxü̃ tixuxchaü̃xü̃ erü chi tümamaxã cunu. Natürü Cori ya Tupanaégagu rü cuégagutama cumaxã nüxü̃ chixu nax marü choxü̃ yangaicaxü̃ nax chayuxü̃ —ñanagürü.
4 Rü yexguma ga Yonatáü̃ rü nüxna naca rü ñanagürü: —¿Ta̱xacü i cunaxwa̱xexü̃ nax cuxca̱x chaxüxü̃? —ñanagürü.
5 20:5-6 Dabí nanangãxü̃ rü ñanagürü: —Dücax, moxü̃ tá nixĩ i ngexwacaxü̃cü ya tauemacüarü petachiga, rü guxü̃guma ngẽma petaca̱x ãẽ̱xgacümaxã ícharüto nax chachibüxü̃. ¡Natürü choxü̃ ínamuxũchi nax naanegu chayarücúxü̃ca̱x ñu̱xmata pa̱xmaacüarü yáuanecü! Rü ngẽxguma tá curü papa cha̱u̱xca̱x ícaxgu, ¡rü tümamaxã nüxü̃ ixu nax marü cuxna chacaxü̃ nax chorü ĩane ya Beréü̃wa chaxũxü̃ erü guxü̃ma i chautanüxü̃ rü ngéma nanaxüchigagü nax yaguãxü̃ i ãmare i taunecüarü gu̱xgu!
6 Nüü̃ nadau 20:5
7 Ngẽxguma mea cuxü̃ tangãxü̃gu ya cunatü rü ngẽmawa tá nüxü̃ chacua̱x nax nataxuma i guxchaxü̃ i nagu tarüxĩnüxü̃ rü tá chataãxẽ. Natürü ngẽxguma tanuxgux rü ngẽmawa tá nüxü̃ cucua̱x nax choxü̃ timáxchaü̃xü̃.
8 Rü choma nax curü duü̃xü̃ chixĩxü̃ rü chanaxwa̱xe i choxü̃ curüngü̃xẽxẽ erü cuma rü ñu̱xũchi choma rü marü Tupanape̱xewa wüxi i uneta yigümaxã taxü nax yigü ingechaü̃güxü̃. Rü ngẽmaca̱x rü ngẽxguma chi ta̱xacürü chixexü̃ chaxüxgu rü chanaxwa̱xe i cumatama choxü̃ quima̱x rü taxuca̱xma cunatüxü̃tawa choxü̃ cuga nax choxü̃ timáxü̃ca̱x —ñanagürü.
9 Natürü ga Yonatáü̃ rü nanangãxü̃ rü ñanagürü: —Choma rü tagutáma ngẽma chaxü. Natürü ngẽxguma nüxü̃ chacuáxchigagu nax cuxü̃ timáxchaü̃xü̃ ya chaunatü rü tá cumaxã nüxü̃ chixu —ñanagürü.
10 Yexguma ga Dabí rü nüxna naca rü ñanagürü: —¿Natürü texé tá chomaxã nüxü̃ tixu ega choxü̃ timáxchaü̃gu ya cunatü? —ñanagürü.
11 Rü Yonatáü̃ nanangãxü̃ rü ñanagürü: —¡Chowe rüxũ rü naanewa taxĩ! —ñanagürü. Rü yexguma ga yema taxregü rü nügümaxã naanewa naxĩ.
12 Rü yéma rü nüma ga Yonatáü̃ rü Dabíxü̃ ñanagürü: —Cori ya Iraétanüxü̃arü Tupanaégagu cumaxã nüxü̃ chixu rü moxü̃ rüe̱xna pa̱xmaacü i ñaatama i oragu rü chaunatüna tá chaca nax ta̱xacü yixĩxü̃ i cumaxã nagu tarüxĩnüxü̃. Rü ngẽxguma ngẽma cumaxã nagu tarüxĩnüxü̃ rü namexgu rü tá nua cuxca̱x chamuga.
13 Natürü ngẽxguma chaunatü cuxü̃ imáxchaü̃gu, ¡rü Tupana poraãcü choxü̃ poxcu ega tama cumaxã nüxü̃ chixuxgu rü tama cuxü̃ charüngü̃xẽẽgu nax quiñaxü̃ca̱x! ¡Rü Cori ya Tupana cuxü̃ rüngü̃xẽxẽ yema chaunatüxü̃ nangü̃xẽẽxü̃rüxü̃!
14 20:14-15 Rü ngẽxguma chi chamaxyane nawa cunguxgu nax Iraéanearü ãẽ̱xgacü quixĩxü̃ rü chanaxwa̱xe i chomaxã cumecüma ngẽma Cori ya Tupana cumaxã mecümaxü̃rüxü̃. Rü ngẽxguma chayuyane yixĩxgu rü chanaxwa̱xe i chautanüxü̃maxã cumecüma. ¡Rü Cori ya Tupana cuxü̃ rüporamaexẽxẽ nüxü̃ i curü uanügü nax cuyanaxoxẽxẽxü̃ca̱x! —ñanagürü.
15 Nüü̃ nadau 20:14
16 Rü yemaacü ga Yonatáü̃ rü Dabímaxã inaxüga.
17 Rü ñu̱xũchi nüma ga Yonatáü̃ rü Dabímaxã nüxü̃ nixu nax nüma rü ta wenaxarü Yonatáü̃maxã inaxunetaxü̃ yerü poraãcü nüxü̃ nangechaü̃ yema nügütama nangechaü̃xü̃rüxü̃.
18 Rü ñu̱xũchi nüma ga Yonatáü̃ rü ñanagürü nüxü̃: —Rü moxü̃ nixĩ i ngexwacaxü̃cü ya tauemacüarü petachiga, rü ngéma tá cutauxchica erü ngẽma cuxma̱xwa̱xe rü tá nangeãcu.
19 Natürü norü tomaepü̱x i ngunexü̃gu rü yexera tá nüxü̃ nacua̱xgü nax cutaxuxü̃ma. ¡Rü ngẽmaca̱x ngẽma nachica ga ü̃pa nagu quicúxü̃wa naxũ, rü ñu̱xũchi yimá nuta ga Echéxgu ãégacügu icu̱x!
20 20:20-21 Choma rü tá tomaepü̱x i chuxchi ngéma chamaxü̃, ñoma wüxi i ta̱xacü imaxü̃xü̃rüxü̃. Rü tá ñacharügü nüxü̃ i ngẽma chorü ngü̃xẽẽruxü̃: “¡Naxca̱x yadau ya yimá chauxnegü!” ñacharügü tá. Rü ngẽxguma ñachagu: “Rü yima chauxne rü numamaxü̃ra nangẽxma ¡rü yayaxu!” ñachagu, rü ngẽmawa tá nüxü̃ cucua̱x nax nataxuxü̃ma i ãũcümaxü̃, rü taxũtáma ta̱xacü cuxü̃ naxüpetü. Rü aixcüma Tupanaégagu cumaxã nüxü̃ chixu.
21 Nüü̃ nadau 20:20
22 Natürü ega nüxü̃ ñachagu: “Yéamaxü̃ra nangẽxmagü ya chauxnegü”, ñachagu, rü name nixĩ i quixũgachi, erü Cori ya Tupana rü nanaxwa̱xe nax quixũgachixü̃.
23 Rü ngẽma tórü unetagü i yigümaxã nüxü̃ ixuxü̃wa rü Cori ya Tupana nixĩ ya guxü̃gutáma taétüwa ücü —ñanagürü.
24 Dabí rü naanegu nayarücu̱x. Rü yexguma wena ngexwaca nango̱xgu ya tauemacüarü petachigawa nangu̱xgu rü nüma ga ãẽ̱xgacü ga Chaú rü mechawa nayarüto nax nachibüxü̃ca̱x.
25 Yema tochicaxü̃ ga ĩxtapü̱xwaama üxü̃ ga a̱i̱xrüguma nawa natooxü̃wa narüto ga ãẽ̱xgacü. Rü nüma ga Yonatáü̃ rü nape̱xewa narüto rü nüma ga Abnéx rü Chaúcüwawatama narüto. Rü yema Dabí nawa rütoxü̃ ga naxma̱xwe̱xe rü nangeãcu.
26 Yema ngunexü̃gu ga Chaú rü taxu ñanagürümare, yerü ñaxü̃gu narüxĩnü: —Ngürüãchi ta̱xacü nüxü̃ nangupetü rü tama Tupanape̱xewa nügü namexẽxẽ rü ngẽmaca̱x tama nua naxũ —ñaxü̃gu narüxĩnü.
27 Natürü moxü̃ãcü ga norü taxre ga ngunexü̃gu ga petachiga rü ta nangeãcu ga yema naxma̱xwe̱xe. Rü yexguma ga Chaú rü nane ga Yonatáü̃na naca rü ñanagürü: —¿Tü̱xcüü̃ tama nua naxũ ga ĩnex ga Ichaxí nane nax nachibüxü̃ca̱x rü woo ñu̱xmax? —ñanagürü.
28 20:28-29 Rü nüma ga Yonatáü̃ nanangãxü̃ rü ñanagürü: —Nüma ga Dabí rü choxü̃ naca̱a̱xü̃ nax Beréü̃wa naxũxü̃ca̱x erü naenexẽ naxca̱x nangema nax ngéma naxũxü̃ca̱x naxca̱x ga yema peta ga nagu Tupanaca̱x ínaguxü̃ ga taunecüarü ãmare ga Beréü̃wa. Rü ngẽxgumarüxü̃ ta chomaxã nüxü̃ nixu rü ngẽxguma nüxna chanaxãxgu i ngẽma ngü̃xẽxẽ rü paxa tá natanüxü̃xü̃tawa ínayadau. Rü ngẽmaca̱x nixĩ i tama nua naxũxü̃ nax cumaxã nachibüxü̃ca̱x —ñanagürü.
29 Nüü̃ nadau 20:28
30 Yexguma ga Chaú rü Yonatáü̃maxã nanu rü nüxü̃ ñanagürü: —Chixexü̃ i mama nane quixĩ. ¿Cuxca̱x rü tama nüxü̃ chacuáxü̃ nax Ichaxí nanemücüxüchi quixĩxü̃? Rü ngẽma rü wüxi i ãne nixĩ i cuxca̱x rü cuéca̱x.
31 Rü ñu̱xma nax ñoma i naanewa namaxü̃xü̃ i ngẽma Dabí rü cuma rü ãũcümaxü̃wa cungexma rü tagutáma Iraétanüxü̃arü ãẽ̱xgacüwa cungu. Rü ngẽmaca̱x chanaxwa̱xe i duü̃xü̃güxü̃ naxca̱x cuyadauxẽxẽ nax nua nagagüãxü̃ca̱x, erü tanaxwa̱xe nax nayuxü̃ —ñanagürü.
32 Natürü nüma ga Yonatáü̃ nanangãxü̃ rü ñanagürü: —¿Ta̱xacüca̱x tá inayuxü̃? ¿Ta̱xacürü chixexü̃ ẽ̱xna naxü? —ñanagürü.
33 Rü nüma ga Chaú rü nanayaxu ga norü wocae nax Yonatáü̃xü̃ nacuáxü̃ca̱x. Rü yemawa Yonatáü̃ nüxü̃ nacua̱x nax aixcüma Dabíxü̃ yamáxchaü̃xü̃ ga nanatü.
34 Rü yemaca̱x ga Yonatáü̃ rü nanuxũchi, rü inayuxnagü ga mechawa. Rü tama nachibü ga norü taxre ga ngunexü̃gu ga yema petawa, yerü poraãcü Dabíca̱x nangechaü̃ rü nanatü rü poraãcü ngúxü̃ nüxü̃ ningexẽxẽ.
35 Rü moxü̃ãcü ẽxü̃wa rü yema ora ga Dabímaxã nagu naxunetaxü̃ rü nüma ga Yonatáü̃ rü naanewa naxũ namaxã ga wüxi ga norü ngü̃xẽẽruxü̃ ga ngextü̱xüxü̃.
36 Rü yexguma yema nachicawa nangugügu rü yema norü ngü̃xẽẽruü̃xü̃ namu nax inañaãchixü̃ca̱x rü naxca̱x nadauxü̃ca̱x ga guma naxnegü ga yexma nama̱xgüne. Rü nüma ga yema ngü̃xẽẽruxü̃ rü inañaãchi, rü yexgumayane rü nüma ga Yonatáü̃ rü nai ga naxne nawe narümaxü̃ rü norü yexeragu nayangu.
37 Yexguma yema norü duü̃xü̃ nawa nanguxgu ga yema nachica ga chuxchi nagu nguxü̃, rü Yonatáü̃ rü tagaãcü nüxna nacagü ga yema norü ngü̃xẽẽruxü̃ rü ñanagürü: —Curü yéamaxü̃ra nixĩ i nangẽxmaxü̃ ya yima chuxchi —ñanagürü.
38 20:38-39 Rü wenaxarü yema norü ngü̃xẽẽruü̃na tagaãcü nacagü rü ñanagürü: —¡Paxa inañaachi rü taxṹ i cuyachaxãchixü̃! —ñanagürü. Rü yema Yonatáü̃arü ngü̃xẽẽruxü̃ rü nanade ga guma chuxchigü rü norü corina nayana. Natürü tama nüxü̃ nacua̱x nax ta̱xacüchiga yixĩxü̃ ga yema. Rü Yonatáü̃ rü Dabíxicatama nixĩ ga nüxü̃ cua̱xgüxü̃ ga yema cua̱xruxü̃.
39 Nüü̃ nadau 20:38
40 Rü yemawena ga Yonatáü̃ rü norü ngü̃xẽẽruxü̃na nanana ga guma naxnegü, rü ñu̱xũchi nanamu nax nachiü̃wa nanaxãxü̃ca̱x ga ĩanewa.
41 Rü yexguma marü íyaxũxgux ga yema Yonatáü̃arü ngü̃xẽẽruxü̃, rü Dabí rü nixũxũ ga yema nutatanüwa ga íyacúxü̃wa. Rü waixü̃müanegu tomaepü̱xcüna Yonatáü̃pe̱xegu nayangücuchi. Rü ñu̱xũchi nügü nachúxgü rü wüxigu naxauxe. Natürü Dabí rü yexeraãcü naxaxu.
42 Yexguma ga Yonatáü̃ rü Dabíxü̃ ñanagürü: —¡Taãxẽãcüma nataegu! Cuma rü ñu̱xũchi choma rü marü Tupanaégagu nüxü̃ tixugü nax guxü̃gutáma mexü̃ i yigümücügü nax ixĩgüxü̃. Rü Tupanana taca nax guxü̃gutáma tamaxã nangẽxmaxü̃ i yixema taxre, rü ñu̱xũchi namaxã i ngẽma cutaagü rü chautaagü —ñanagürü. Rü yemawena ga Dabí rü nixũ, rü nüma ga Yonatáü̃ rü ĩaneca̱x nataegu.
