1 Samuel 21:1-15
21 Rü nüma ga Dabí rü ĩane ya Nóxwa naxũ nax chacherdóte ya Aimérexü̃ íyadauxü̃ca̱x. Rü yexguma Dabíxü̃ nada̱u̱xgu ga Aimérex rü naba̱i̱xãchiãxẽ rü Dabína naca rü ñanagürü: —¿Tü̱xcüü̃ cuxicatama nua cuxũ rü taxuxü̃ma cuxü̃ ínixümücü? —ñanagürü.
2 Rü nüma ga Dabí rü nanangãxü̃ rü Aimérexü̃ ñanagürü: —Ãẽ̱xgacü rü nua choxü̃ namu nax chayanguxẽẽxü̃ca̱x i ngẽma nüma choxü̃ namuxü̃. Natürü tama nanaxwa̱xe nax texé nüxü̃ cuáxü̃ nax ta̱xacüca̱x nua choxü̃ namuxü̃ rü ta̱xacü yixĩxü̃ i norü ore i nua namuxü̃. Rü ngẽmaca̱x i ngẽma chorü duü̃xü̃gü rü tama chowe narüxĩ. Rü to i nachicagu namaxã chaxuneta nax ngẽxma nüxü̃ chayangauxü̃ca̱x.
3 ¿Dücax, rü ta̱xacürü cuwemü cuxü̃́ nangẽxma? ¡Rü choxna naxã i 5 i paũ rüe̱xna ta̱xacü i cuxü̃́ ngẽxmaxü̃! —ñanagürü.
4 Rü yexguma nüma ga gumá chacherdóte rü nanangãxü̃ rü ñanagürü: —Ngẽma paũ i choxü̃́ ngẽxmaxü̃ rü tama ngexü̃rüüxü̃ i paũmare nixĩ erü ngẽma choxü̃́ ngẽxmaxü̃ rü marü Tupanana chanaxuaxü̃. Natürü tá cuxna chanaxã ega ngẽxguma ngẽma curü duü̃xü̃gü rü tama ngexü̃ nadaugügu —ñanagürü.
5 Rü nüma ga Dabí rü nanangãxü̃ rü ñanagürü: —Guxü̃guma ngẽxguma daiwa taxĩxgu rü tama toxma̱xgümaxã tamaxẽ. Rü woo tama daiwa taxĩxü̃ i ñu̱xma natürü guxü̃ma i ngẽma chorü duü̃xü̃gü rü marü Tupanaca̱x nügü nimexẽẽgü naxü̃pa nax itaxĩãchixü̃. Rü ngẽmaca̱x i ñu̱xma rü marü Tupanape̱xewa nime —ñanagürü.
6 Rü yexguma nüma ga gumá chacherdóte rü Dabína nanana ga yema paũ ga Tupanaca̱x ixĩxü̃ yerü nataxuma ga to ga paũ. Natürü yematama ga ngunexü̃gu rü mecha ga üünexü̃wa nanade ga yema paũ ga Dabína nanaxü̃, rü yemachicüxü yexma nananu ga ngexwacaxü̃xü̃ ga paũ ga inaixü̃.
7 Rü yema ngunexü̃gu rü yéma Tupanapatawa nayexma ga wüxi ga Chaúarü ngü̃xẽẽruxü̃ ga woetama yéma yexmaxü̃. Rü nüma rü wüxi ga Edóü̃tanüxü̃ nixĩ rü Doéxgu naxãéga. Rü nüma rü Chaúarü carnérugüarü dauruü̃güeru nixĩ.
8 Rü yexguma ga nüma ga Dabí rü Aimérexü̃ ñanagürü: —¿Nayima i curü wocae rüe̱xna curü tara? Erü ñu̱xãẽãcü nua choxü̃ namu ya ãẽ̱xgacü rü ngẽmaca̱x taxuxü̃ma i chorü tara rüe̱xna to i chauxne íchinge —ñanagürü.
9 Rü nüma ga gumá chacherdóte rü nanangãxü̃ rü ñanagürü: —Choxü̃́ nangẽxma i ngẽma norü tara ga yema Firitéu ga Goriáx ga Eráarü doxonexü̃gu quimáxü̃. Rü ngẽma Tupanaarü efóx íxüxü̃ca̱xwe̱xgu naxǘ. Rü wüxi i naxchirumaxã nanuque. ¡Rü ẽcü nayaxu rü yange ega cunaxwa̱xegu! Erü to i naxne rü choxü̃́ nataxuma —ñanagürü. Rü yexguma nüma ga Dabí rü nanangãxü̃ rü ñanagürü: —¡Ẽcü nua naxã! Erü nataxuma i tara i ngẽmaxü̃ rümemaexü̃ —ñanagürü.
10 Rü yematama ngunexü̃gu nixũchigü ga Dabí nax Chaúcha̱xwa yaxũxü̃. Rü Firitéugüarü ĩane ga Gáxwa naxũ. Rü yexguma yéma nanguxgu rü guma ĩanearü ãẽ̱xgacü ga Aquíxü̃tawa naxũ.
11 Rü gumá ãẽ̱xgacü ga Aquíarü churaragüerugü rü nüxü̃ ñanagürügü: —Ñaa nixĩ i Dabí i Iraétanüxü̃arü ãẽ̱xgacü ixĩxü̃. Rü ngẽmachigagu nixĩ i íyaxüãchixü̃güxü̃ rü nawiyaegüxü̃ namaxã i ñaxü̃ i wiyae: “Chaú rü nanadai i 1,000 i churaragü, natürü Dabí rü nanadai i 10,000”, ñaxü̃ i wiyae —ñanagürügü.
12 Rü yexguma yemaxü̃ naxĩnügu ga Dabí rü Gáxarü ãẽ̱xgacü ga Aquíxü̃ namuü̃.
13 Rü yemaca̱x yema yéma yexmagüxü̃pe̱xewa nügü naxãũãẽxẽẽneta. Rü ĩã̱x nawütü rü nügüchinaguwa nichurua̱xẽẽneta.
14 21:14-15 Rü yexguma nüma ga Aquí rü norü churaragüeruxü̃ ñanagürü: —Rü pema nax nüxü̃ pedauxü̃ i ñaa yatü nax naxãũãẽxü̃, ¿rü tü̱xcüü̃ i nua chauxü̃tawa penagaxü̃? ¿Rü pema nüxü̃ pecua̱xgu rü choxü̃́ nataxuma i ãũãẽxü̃ i chauxü̃tawa rü ngẽmaca̱x nua penaga nax nua chauchiü̃wa ngeãxẽ naxüxü̃ca̱x? —ñanagürü.
15 Nüü̃ nadau 21:14
