1 Samuel 22:1-23
22 Rü nüma ga Dabí rü nixũchigü ga yéma, rü ãxmaxü̃ ga Aduráü̃gu nayarücu̱x. Rü yexguma naenexẽgü rü guxü̃ma ga natanüxü̃ nüxü̃ cua̱xgügu rü naxü̃tawa naxĩ rü nayaxümücügü.
2 Rü yexgumarüxü̃ ta naxü̃tawa naxĩ ga yema duü̃xü̃gü ga ãẽ̱xgacü ngetanüãcü puracüexẽẽxü̃ rü yema duü̃xü̃gü ga nangetanügüxü̃ rü yema duü̃xü̃gü ga tama ãẽ̱xgacümaxã taãẽgüxü̃. Rü nüma ga Dabí rü yema duü̃xü̃güeru nixĩ. Rü yema duü̃xü̃gü ga Dabíwe rüxĩxü̃ rü 400 ga yatügüwa nangu.
3 Rü yéma inaxũãchi ga Dabí rü Mispáwa naxũ ga Moáanewa. Rü Moáarü ãẽ̱xgacüxü̃ ñanagürü: —Rü cuxna chaca, Pa Ãẽ̱xgacüx, nax chaunatü rü chaué napexü̃tawa tangexmagüxü̃ca̱x ñu̱xmatáta Cori ya Tupana choxü̃ nawé i ngẽma chomaxã nanaxwa̱xexü̃ —ñanagürü.
4 Rü yemaca̱x ga Dabí rü nanatüxü̃ rü naeü̃ Moáarü ãẽ̱xgacüxü̃tawa tüxü̃ nagagü. Rü yéma tayexmagü ga yexguma Dabí yema ãxmaxü̃gu yacu̱xyane.
5 Rü wüxi ga ngunexü̃gu ga Tupanaarü orearü uruxü̃ ga Gáx rü Dabíxü̃ naxuxcu̱xẽ rü ñanagürü: —¡Taxṹ i ngẽma ãxmaxü̃gu curüxã́ũxü̃! ¡Rü Yudáarü naanewa naxũ! —ñanagürü. Rü yemaca̱x ga nüma ga Dabí rü nixũ rü naixnecü ga Érewa nangu.
Chaú rü Nóxwa yexmagüxü̃ ga chacherdótegüxü̃ nadai
6 22:6-7 Rü yexguma ga Chaú rü Guibeáwa nayexma. Rü guma maxü̃newa rüxüxü̃ ga pamatüxü̃wa narüto. Rü norü wocae rü nanange, rü guxü̃ma ga norü churaragüerugü rü nüxü̃ ínachimaeguãchi. Rü yexguma nüxü̃ nacua̱xgu nax ngextá nayexmagüxü̃ ga Dabí namaxã ga yema yatügü ga naxümücügüxü̃, rü nüma ga Chaú rü ñanagürü nüxü̃ ga norü churaragüerugü ga nüxü̃ íchimaeguãchixü̃: —Pa Yatügü i Bẽyamíü̃tanüxü̃x, ¡choxü̃ iperüxĩnüe! ¿Ẽ̱xna pema nüxü̃ pecua̱xgu rü Ichaxí nane i Dabí rü tá guxãna nanaxã i perü naanegü rü perü úbanecügu, rü tá pexü̃ naxuneta ya guxãma i pema nax norü churaragüeru pixĩgüxü̃ca̱x?
7 Nüü̃ nadau 22:6
8 Rü ñu̱xma nüxü̃ chacua̱x i ta̱xacüca̱x guxãma i pema rü chomaxã penuexü̃. Rü taxúema chomaxã nüxü̃ tixu rü ngẽma chaune i Yonatáü̃ rü Ichaxí nane i Dabímaxã inaxügaxü̃. Rü taxúema i pema rü cha̱u̱xca̱x pixoegaãxẽ. Rü taxúema chomaxã nüxü̃ tixu nax chaune rü chomaxã naxuanüxü̃, rü nüxü̃ nangü̃xẽẽxü̃ i Dabí nax choxü̃ íyacu̱xeü̃xü̃ca̱x nax ngẽmaãcü choxü̃ yamáxü̃ca̱x. Rü ngẽma nixĩ i ñu̱xma chomaxã naxüxü̃ —ñanagürü.
9 Rü yexguma ga Doéx ga Edóü̃cüã̱x ga Chaúarü churaragüerutanüwa yexmaxü̃, rü Chaúxü̃ nangãxü̃ rü ñanagürü: —Choma rü nüxü̃ chadau ga Ichaxí nane ga Dabí ga yexguma Nóxwa naxũxgu nax chacherdóte ga Aimérex ga Aitúx nanemaxã yadexaxü̃.
10 Rü nüma ga Aimérex rü Cori ya Tupanana naca nax Dabíxü̃ nangü̃xẽẽxü̃ca̱x. Rü õnagü nüxna naxã, rü ñu̱xũchi nüxna nanaxã ga Firitéu ga Goriáxarü tara —ñanagürü.
11 22:11-12 Rü yexguma ga Chaú rü norü duü̃xü̃güxü̃ namu nax chacherdóte ga Aimérexca̱x yacagüxü̃ca̱x namaxã ga guxü̃ma ga chacherdótegü ga natanüxü̃ ixĩgüxü̃ ga guma ĩane ga Nóxwa yexmagüxü̃. Rü yexguma guxü̃ma ga chacherdótegü ãẽ̱xgacüpe̱xewa ngugügu rü nüma ga Chaú rü Aimérexü̃ ñanagürü: —¡Mea choxü̃ írüxĩnü, Pa Aitúx nanex! —ñanagürü. Rü nüma ga Aimérex rü nanangãxü̃ rü ñanagürü: —Íchamemare, Pa Ãẽ̱xgacüx, nax cuxü̃́ icharüxĩnüxü̃ —ñanagürü.
12 Nüü̃ nadau 22:11
13 Rü nüma ga Chaú rü nüxna naca rü ñanagürü: —¿Tü̱xcüü̃ i cuma rü wüxigu ngẽma Ichaxí nane i Dabímaxã chomaxã penuexü̃? Cuma i chacherdóte rü nüxna cunaxã i paũ rü wüxi i tara, rü ñu̱xũchi Cori ya Tupanaarü ngü̃xẽẽca̱x Dabíaxü̃́ ícuca nax chomaxã naxuanüxü̃ca̱x rü choxü̃ íyacu̱xeü̃xü̃ca̱x ngẽma ñu̱xma naxüxü̃rüxü̃ —ñanagürü.
14 Rü yexguma ga Aimérex rü ãẽ̱xgacüxü̃ nangãxü̃ rü ñanagürü: —¿Texé i guxü̃ma i curü churaragüerutanüwa, Pa Ãẽ̱xgacüx, i aixcüma cuga ĩnüxe Dabírüxü̃? Rü naétü, Pa Ãẽ̱xgacüx, rü cuã̱xte nixĩ rü naeru nixĩ i ngẽma churaragü i cuxna daugüxü̃. Rü ngẽmaca̱x natachiga i cupatawa, Pa Ãẽ̱xgacüx.
15 ¿Cuma nagu curüxĩnügu rü ñu̱xmaricatama nixĩ i Cori ya Tupanana chacaxü̃ nax Dabíxü̃ nangü̃xẽxẽxü̃ca̱x? Tama nixĩ. Rü ngẽmaca̱x, Pa Ãẽ̱xgacüx, rü tama name nax choxna cunaxuxü̃ i choma nax curü duü̃xü̃ nax chixĩxü̃ rü tama name nax nüxna cunaxuxü̃ i chautanüxü̃. Chomax rü tama nüxü̃ chacua̱x nax ta̱xacürü guxchaxü̃ nangẽxmaxü̃ —ñanagürü.
16 Natürü nüma ga ãẽ̱xgacü ga Chaú rü ñanagürüama: —¡Cumaxã nüxü̃ chixu, Pa Aimérex, rü cuma rü guxü̃ma i cutanüxü̃ rü aixcüma tá pexü̃ chadai! —ñanagürü.
17 Rü yexgumatama rü nüma ga ãẽ̱xgacü rü norü dauruü̃xü̃ namu rü ñanagürü: —¡Penada̱i̱x i ngẽma Cori ya Tupanaarü chacherdótegü! Erü nümagü rü Dabíwa naxügü, rü woo nüxü̃ nax nacua̱xgüchiréxü̃ nax Dabí rü cha̱u̱xcha̱xwa yañaxü̃, rü tama chomaxã nüxü̃ nayarüxugüe —ñanagürü. Natürü ga yema ãẽ̱xgacüarü dauruü̃gü rü taxuxü̃ma naxunagüme̱xẽchaü̃ yerü namuü̃e nax Cori ya Tupanaarü chacherdótegüxü̃ nada̱i̱xü̃.
18 Rü yemaca̱x nüma ga ãẽ̱xgacü rü Doéx ga Edóü̃tanüxü̃xü̃ namu rü ñanagürü: —¡Cumax nadai! —ñanagürü nüxü̃. Rü yexguma ga Doéx rü yema chacherdótegüca̱x niña. Rü yema ngunexü̃gu rü nanadai ga 85 ga chacherdótegü ga naxchiru ga línunaxca̱xgu icu̱xgüxü̃.
19 Rü yemawena rü chacherdótegüarü ĩane ga Nóxwa naxũ ga Chaú. Rü taramaxã nanadai ga duü̃xü̃gü ga iyatüxü̃, rü ngexegü, rü buxü̃gü. Rü woo õxchanagü ya ngexwaca íxraexe tüxü̃ nadai. Rü yexgumarüxü̃ ta nanadai ga guxü̃ma ga tümaarü wocagü, rü búrugü, rü carnérugü.
20 Natürü chacherdóte ga Aimérex nane ga Abiatá rü niña, rü Dabí íyexmaxü̃wa naxũ.
21 Rü yéma nüxü̃ narüxu nax Chaú rü Cori ya Tupanaarü chacherdótegüxü̃ nada̱i̱xü̃.
22 Rü Dabí rü nanangãxü̃ rü ñanagürü: —Choma rü yema ngunexü̃gu nüxü̃ chacua̱x nax yéma nayexmaxü̃ ga Doéx, rü ñu̱xũchi tá Chaúmaxã choxü̃ yaxuxü̃. Chaugagu nixĩ i nayuexü̃ i guxü̃ma i cutanüxü̃.
23 ¡Natürü nua chauxü̃tawa nangẽxma rü taxṹ i cumuü̃xü̃! Erü ngẽma cuxü̃ imáxchaü̃xü̃ rü choxü̃ rü ta nimáxchaü̃. Natürü i choma rü tá cuxü̃ íchapoxü̃ —ñanagürü.
