1 Samuel 25:1-44
25 Rü nüma ga Chamué rü nayu. Rü yexguma nayu̱xgu rü guxü̃ma ga Iraéanecüã̱xgü rü naxĩtaque̱xe rü naxauxe. Rü napatagu nanata̱xgü ga ĩane ga Ramáwa. Rü yemawena ga Dabí rü yema chianexü̃ ga Paráü̃wa naxũ.
Dabí rü Abigái
2 Rü Maóü̃gu naxãchiü̃ ga wüxi ga yatü ga muarü diẽruã́xü̃. Rü 3,000 nixĩ ga norü carnérugü rü 1,000 nixĩ ga norü cabragü. Rü ĩane ga Carméxwa nüxü̃́ nayexma ga norü taxepataxü̃. Rü yéma nixĩ ga norü carnéru tüxü̃ ínayoü̃ta̱xaxü̃.
3 Rü yema yatü rü Nabáx nixĩ ga naéga rü Caréxtanüxü̃ nixĩ. Rü nüma rü tama cua̱x nüxü̃́ nayexma rü nachixecüma. Natürü ngĩma ga naxma̱x ga Abigái rü imexẽchi rü cua̱x ngĩxü̃́ nayexma.
4 25:4-5 Rü yexguma Dabí yema chianexü̃wa nayexmagu, rü nüxü̃ nacua̱x nax Nabáx rü ĩane ga Carméxwa norü carnéru tüxü̃ ínayoü̃ta̱xaxü̃. Rü nüma ga Dabí rü 10 ga norü duü̃xü̃güxü̃ yéma namugü nax naégagu Nabáxü̃ yanamõxẽgüxü̃ca̱x namaxã ga ñaa ore: —¡Nayaxu, Pa Chauenexẽx, i ñaa chorü moxẽ!
5 Nüü̃ nadau 25:4
6 Chanaxwa̱xe nax mexü̃ cuxü̃ ngupetüxü̃ wüxigu namaxã i cutanüxü̃ rü guxü̃ma i cuxacügü.
7 25:7-8 Rü nüxü̃ chacuáchiga nax curü carnérugü tüxü̃ ícuyoü̃ta̱xaxü̃. Rü cuma rü nüxü̃ cucua̱x rü ngẽma curü carnérugüarü dauruü̃gü rü tomaxã nanuxmagü ga nua Carméxwa. Natürü ga toma rü yexguma totanüwa nayexmagügu rü taguma nüxü̃́ tangĩ̱xgü rü taguma ta̱xacürü chixexü̃ namaxã taxüe. Dücax ¡nüxna naca i ngẽma curü duü̃xü̃gü rü aixcümaxü̃ tá cumaxã nixugü! Rü ngẽmaca̱x cuxna naxca̱x chaca nax mea cunayaxuxü̃ i ñaa chorü duü̃xü̃gü i ícupetaeyane cuxü̃tawa ngugüxü̃. Rü ngẽxgumarüxü̃ ta chanaxwa̱xe i toxna cunaxãxü̃ i ngẽma cuxü̃́ tauxchaxü̃ nax nüxna rü choxna cunaxãxü̃. Erü choma i Dabí rü ñoma wüxi ya cunerüxü̃ chixĩ —ñanagürü.
8 Nüü̃ nadau 25:7
9 Rü yéma naxĩ ga Dabíarü duü̃xü̃gü rü Nabáxmaxã nüxü̃ nixugü ga Dabíarü ore. Rü yéma nayanguxẽẽgü ga norü ngãxü̃.
10 Natürü nüma ga Nabáx rü nanangãxü̃ rü ñanagürü: —¿Ta̱xacü nixĩ i ngẽma Dabí, rü ta̱xacü nixĩ i ngẽma Ichaxí nane? Rü ñu̱xma rü namu i ngẽma puracütanüxü̃ i norü coricha̱xwa ĩgüxü̃.
11 ¿Ẽ̱xna tá nüxna chanayaxuxü̃ i ngẽma õna rü axexü̃ rü namachi i chorü yoü̃ta̱xaruü̃güca̱x chaxüxü̃, nax nüxna chanaxãxü̃ca̱x i duü̃xü̃gü i tama nüxü̃ chacuáxü̃ nax ngextá ne naxĩxü̃? —ñanagürü.
12 Rü yexguma rü nawoegu ga Dabíarü duü̃xü̃gü. Rü yexguma ínangugügu, rü Dabímaxã nüxü̃ nixugüe ga Nabáxarü ngãxü̃ga.
13 Rü yexguma nüma ga Dabí rü norü duü̃xü̃güxü̃ namu rü ñanagürü: —¡Guxãma penade i pexne! —ñanagürü. Rü yexguma nüma ga Dabí rü ñu̱xũchi 400 ga norü duü̃xü̃gü rü nananucu ga norü taragü rü inaxĩãchi. Rü yema togü ga 200 ga duü̃xü̃gü rü yema ínapegüxü̃gutama narücho, rü nüxna nadaugü ga norü yemaxü̃gü.
14 Natürü wüxi ga Nabáxarü duü̃ rü Abigái ga Nabáx naxma̱xmaxã nüxü̃ nayarüxu rü ñanagürü: —Dabí rü chorü cori i Nabáxü̃tawa nanamugü i norü duü̃xü̃gü nax nüxü̃ yanamõxẽgüxü̃ca̱x. Natürü nüma i chorü cori rü chixexü̃maxã nanangãxü̃.
15 Natürü i nümagü rü tomaxã namecümagü yexguma naanewa tomaxã nayexmagügu. Rü taguma toxü̃́ nangĩ̱xgü, rü taguma chixeãcü tomaxã nixĩgü.
16 Rü guxü̃ma ga ngunexü̃ rü chütaxü̃ rü toxna nadaugü wüxigu namaxã ga torü carnérugü.
17 Natürü yimá cute rü nachixecümaxü̃chi rü ngẽmaca̱x taxuacüma texé mea namaxã tidexa. ¡Rü nagu rüxĩnü nax ta̱xacü tá cuxüxü̃! Erü aixcüma tá cuteca̱x rü guxü̃ma i natanüxü̃ca̱x ínayagoõchi i Dabí —ñanagürü ngĩxü̃.
18 25:18-19 Rü yexguma ngĩma ga Abigái rü ipaxaãẽ rü inade ga 200 ga paũ rü taxrepü̱xü̃ ga bínu. Rü 5 ga carnéru ga íguxü̃, rü 40 quíru naguxü̃ ga trigu ga goxtanüxü̃, rü 100 ya̱xa ga úbaarü patanüxü̃, rü 200 ga iguarü paũ. Rü guxü̃ma ga yema rü ñuxre ga búrugu iyanuü̃. Rü ngĩrü puracütanüxü̃xü̃ ngĩgürügü: —¡Yoxni wixpe̱xegu pexĩ rü ñu̱xmaüra tá ngéma chaxũ! —ngĩgürügü. Rü yema rü tama ngĩtemaxã nüxü̃ iyaxu.
19 Nüü̃ nadau 25:18
20 Rü ngĩma ga Abigái rü wüxi ga búrugu itonagü rü yemaacü cúãcü írüxĩtaxü̃ nawa ga guma ma̱xpǘne. Rü ngürüãchi Dabíxü̃ rü ñu̱xũchi norü duü̃xü̃güxü̃ idau ga ngĩpe̱xewa ne ĩxü̃, rü inayaxu.
21 Rü nüma ga Dabí rü yéma nagu ne naxĩnüchigü ga ñaxü̃: —Natüca̱xmamare íchanapoxü̃ ga guxü̃ma ga yema Nabáxarü carnérugü ga ínachianexü̃wa yexmagüxü̃, rü taxuxü̃ma nüxna chanapu. Rü ñu̱xmax rü chixexü̃maxã choxü̃́ nanaxütanü ga yema mexü̃ ga naxca̱x chaxüxü̃.
22 Rü Tupana poraãcü choxü̃ poxcu ega ñu̱xma rü moxü̃ rü taxũtáma guxü̃ chadaixgu i ngẽma natanüxü̃ i yatüxü̃ —ñaxü̃gu yéma ne naxĩnüchigü.
23 Rü yexguma ngĩma ga Abigái Dabíxü̃ nada̱u̱xgu rü ngĩrü búruwa íixüe rü Dabípe̱xegu iyangücuchi.
24 Rü ñu̱xũchi Dabícutügu iyaca rü ngĩgürügü nüxü̃: —Pa Chorü Corix, ñaa guxchaxü̃ rü chowa nangẽxma, rü ngẽmaca̱x cuxna naxca̱x chaca nax choxü̃́ icurüxĩnüxü̃ i ngẽma cumaxã nüxü̃ chixuxchaü̃xü̃.
25 ¡Rü taxṹ i naga cuxĩnüxü̃ i Nabáx erü wüxi i yatü i chixexü̃ i nacümagü nüxü̃́ ngẽxmaxü̃ nixĩ! Rü ngẽma naégatama rü nüxü̃ nixu nax tama naãẽxü̃ nacuáxü̃. Choma i cuxü̃taxü̃ nax chixĩxü̃ rü tama nüxü̃ chadau ga yema curü duü̃xü̃gü ga yéma Nabáxü̃tawa cumugüxü̃.
26 Natürü nüma ya Cori ya Tupana rü tama nanaxwa̱xe nax nua cuxũxü̃ nax cunadaixü̃ca̱x i ngẽma duü̃xü̃gü naxca̱x i ngẽma guxchaxü̃ i naxügüxü̃. Rü Tupanana naxca̱x chaca nax napoxcueãxü̃ i guxü̃ma i ngẽma curü uanügü, rü guxü̃ma i ngẽma chixexü̃maxã cuxü̃ itoxyepe̱xegüxü̃, Nabáxrüxü̃.
27 Rü ñu̱xma rü cumaxã nüxü̃ chixu nax curü duü̃xü̃güxü̃ cuyanuxü̃ i ñaa ãmare i õna i nua cuxü̃́ changexü̃.
28 ¡Rü choxü̃́ nüxü̃ irüngüma nax cupe̱xewa íchatüxü̃! Rü aixcümaxü̃chi Cori ya Tupana rü tá cuxü̃ narüngü̃xẽxẽ nax cuma rü cutaagü rü guxü̃gutáma Iraétanüxü̃maxã ipecua̱xgüxü̃. Erü cuma rü naxca̱x cugü icuxã nax nüxü̃ curüporamaexü̃ca̱x i Cori ya Tupanaarü uanügü. Rü ñu̱xma nax cumaxü̃xü̃gu rü naxca̱x íchaca nax tagutáma ta̱xacürü chixexü̃ cuxü̃ üpetüxü̃.
29 Rü ngẽxguma curü uanü cuwe ingẽchigügu rü cuxü̃ yamáxchaü̃gu rü Cori ya Tupana tá cuxna nadau nax taxuxü̃táma cuxü̃ üpetüxü̃. Rü ngẽma curü uanügü rü Tupana tá yea nanawogü ñoma wüxi i nutaxacü i wüxi i maxgütaeruü̃maxã yea imaxü̃xü̃rüxü̃.
30 25:30-31 ¡Rü taxṹ i cunada̱i̱xü̃ i duü̃xü̃gü i taxuxü̃ma i chixexü̃ ügüxü̃! Erü ngẽxguma yanguxgu ga yema mexü̃ ga cumaxã naxueguxü̃ ga Cori ya Tupana rü Iraéanecüã̱xgümaxã cuxü̃ inacua̱xẽẽgu, rü taxũtáma cuxü̃́ nangu̱x rü bai tá naxca̱x cungechaü̃ nax cumatama nua cunada̱i̱xü̃ i ngẽma duü̃xü̃gü i taxuxü̃ma i chixexü̃ ügüchiréxü̃. Rü ngẽxguma Cori ya Tupana cuxü̃ rüngü̃xẽẽgu nax ãẽ̱xgacüwa cunguxü̃, rü ¡ẽcü choxna nacua̱xãchi i choma nax cuxü̃taxü̃ chixĩxü̃! —ngĩgürügü.
31 Nüü̃ nadau 25:30
32 Rü yexguma nüma ga Dabí rü ngĩxü̃ nangãxü̃ rü ñanagürü: —Namecüma ya yima Iraéanecüã̱xarü Tupana ya nua chope̱xewa cuxü̃ mucü.
33 ¡Tupana cuxü̃ rüngü̃xẽxẽ̱x erü mexü̃gu curüxĩnü! Rü ngẽmaca̱x choxna cuchogü nax tama chanadaixü̃ca̱x i duü̃xü̃gü i tama chixexü̃ ügüxü̃.
34 Natürü Cori ya Iraétanüxü̃arü Tupanaégagu cumaxã nüxü̃ chixu rü ngẽxguma chi taxũchima paxa nua cuxũxgu rü moxü̃arü pa̱xmama rü bai chi i wüxi i Nabáxarü duü̃xü̃ i maxü̃xü̃ —ñanagürü.
35 Rü yemawena nüma ga Dabí rü nanade ga yema õna ga Abigái naxca̱x yéma naxü̃ rü ñanagürü ngĩxü̃: —Marü name i taãẽãcü cutaegu. Rü marü nüxü̃ chaxĩnü i ngẽma choxna naxca̱x cuca̱xaxü̃, rü marü cuxü̃́ chanayaxu i ngẽma naxca̱x ícuca̱xaxü̃ —ñanagürü ngĩxü̃.
36 Rü yexguma ngĩma ga Abigái nataeguxgu rü nüxü̃ iyangau ga gumá ngĩte ga Nabáx ga napatawa peta ixücu. Rü taxü̃ ga õna ínaxü ñoma wüxi i ãẽ̱xgacü i réica̱x üxü̃rüxü̃. Rü nüma rü nataãxẽ rü poraãcü nangãxü̃. Rü yemaca̱x ga ngĩma rü taxuxü̃ma namaxã iyaxu ñu̱xmata moxü̃ãcüama.
37 Rü moxü̃ãcü pa̱xmama ga yexguma marü nüxü̃ nangupetügu nax nangãxü̃xü̃ ga Nabáx rü ngĩma ga Abigái rü meama namaxã nüxü̃ iyaxu ga yema ngupetüxü̃. Rü yexguma nüma ga Nabáx rü ngürüãchimare niyuãchi rü taxuacüma nixĩã̱xcüxü.
38 Rü 10 ga ngunexü̃guwena rü wenaxarü Cori ya Tupana rü naxca̱x ínananguxẽxẽ nax yayuãchixü̃ rü yemaacü nayuxuchi.
39 25:39-40 Rü yexguma Dabí nüxü̃ cua̱xgu nax marü nayuxü̃ ga Nabáx rü ñanagürü: —Name ya Tupana erü Nabáxü̃ napoxcu naxca̱x ga norü chixexü̃ ga chomaxã naxüxü̃. Rü moxẽ nüxna chaxã erü tama nanaxwa̱xe nax choma chayamáxü̃ —ñanagürü. Rü yemawena ga Dabí rü ĩane ga Carméxwa nanamugü ga ñuxre ga norü duü̃xü̃ nax Abigáimaxã nüxü̃ yanaxugüxü̃ca̱x nax ngĩmaxã naxãxma̱xchaü̃xü̃ ga nüma ga Dabí.
40 Nüü̃ nadau 25:39
41 Rü yexguma ngĩma ga Abigái rü waixü̃mügu iyangücuchi rü ngĩgürügü: —Choma rü wüxi i naxü̃taxü̃mare chixĩ nüxü̃́ ya Dabí, rü íchamemare nax chayayauxcutügüxü̃ca̱x i norü duü̃xü̃gü ega nüma choxü̃ naxüxẽẽãgu —ngĩgürügü.
42 Rü yema ngĩxguwena rü paxãma ngĩgü imexẽxẽ. Rü 5 ga ngĩxü̃taxü̃gü ngĩxü̃ ínixümücügü. Rü wüxi ga búrugu ixaunagü rü yema Dabíarü duü̃xü̃güwe irüxũ, rü Dabímaxã iyaxãte.
43 Rü nüma ga Dabí rü marü naxãxma̱x ngĩmaxã ga wüxi ga nge ga ĩane ga Yereécüa̱x ga Ainóaü̃ ga ngĩéga. Rü yemaacü Abigáimaxã nataxrema̱x.
44 Rü Micá ga Chaúxacü rü Dabíma̱xchire̱x iyixĩ, natürü nüma ga Chaú rü ngĩxü̃ naxüte namaxã ga wüxi ga Garíü̃cüã̱x ga Patí ga Laíx nane.
