1 Samuel 26:1-25
26 Rü yema duü̃xü̃gü ga ĩane ga Chíxgu ãchiü̃güxü̃ rü Guibeáwa naxĩ ga Chaúxü̃tawa, rü ñanagürügü nüxü̃: —Dabí rü yima ma̱xpǘne ya Aquirágu nicu̱x ngẽma naxnücüane i taxúema íxãpataxü̃arü to̱xma̱xtagu —ñanagürügü.
2 Rü yexguma ga Chaú rü inaxũãchi namaxã ga 3,000 ga Iraéanecüã̱xgüarü churaragü ga nüxü̃ rücua̱xmaegüxü̃ ga daiwa. Rü Chíxarü chianexü̃wa naxĩ nax Dabíca̱x yadaugüxü̃ca̱x.
3 Rü nüma ga Chaú rü norü churaragümaxã ma̱xpǘne ya Aquirágu nayape ga namacüwagu ga yema chianexü̃arü to̱xma̱xtawa. Natürü nüma ga Dabí ga yema chianexü̃wa nax nayexmaxü̃, rü nüxü̃ nacua̱x ga Chaú nawe nax ngexü̃.
4 Rü yemaca̱x ga Dabí rü ngugütaeruü̃gü yéma namugü nax nüxü̃ nacuáxü̃ca̱x ga ngextá nax nanguxü̃ ga Chaú.
5 Rü yemawena ga Dabí rü Chaú íyexmaxü̃wa naxũ, rü nayangugü nax ngexta napegüxü̃ ga Chaú rü Abnéx ga Néx nane ga Chaúarü churaragüeru. Rü nüma ga Chaú rü norü duü̃xü̃güarü ngãxü̃tanügu nape.
6 Rü yexguma ga nüma ga Dabí rü nidexa namaxã ga Aimérex ga Itítanüxü̃ ixĩcü, rü Abichái ga Cheruiá nane ga Yoáenexẽ. Rü yemagüna naca rü ñanagürü: —¿Texé ya ímemarexe nax chowe tarüxũxü̃ nax Chaú íngẽxmaxü̃wa ixĩxü̃? —ñanagürü. Rü nüma ga Abichái nanangãxü̃ rü ñanagürü: —Choma tá cuwe charüxũ —ñanagürü.
7 Rü yematama chütaxü̃gu ga Dabí rü Abichái rü yéma Chaú íyexmaxü̃wa naxĩ. Rü nüma ga Chaú rü norü churaragüarü ngãxü̃tanügu nape rü norü wocae rü naeruxü̃taguama napu. Rü nüma ga Abnéx rü norü churaragümaxã nüxü̃ ínacamaeguãchi.
8 Rü yexguma ga Abichái rü Dabíxü̃ ñanagürü: —Ñu̱xma ya Tupana rü cuxü̃́ nanatauxchaxẽxẽ nax cuyamáxü̃ca̱x i curü uanü. Chayama̱xtaxa̱x nixĩ, rü norü wocaemaxã tátama mairaxü̃anewa chayapaitü, rü marü ngẽmamaxã tátama nayu —ñanagürü.
9 Natürü nüma ga Dabí rü nanangãxü̃ rü ñanagürü: —¡Taxṹ i cuyamáxü̃! Erü texé ya yíxema yamáxe i ngẽma ãẽ̱xgacü ya Tupana nüxü̃ unetaxü̃, rü Tupana rü taxũtáma nanangupetüxẽẽmare nax tüxü̃ napoxcuxü̃.
10 Rü Cori ya Tupanaégagu cumaxã nüxü̃ chixu, rü nüma ya Tupana tá nixĩ i norü maxü̃ nüxna nayaxuxü̃, rü nayumarexü̃ rüe̱xna daigu nayuxü̃.
11 ¡Rü Cori ya Tupana choxü̃ rüngü̃xẽxẽ nax tama nagu charüxĩnüxü̃ca̱x nax chayamáxü̃ ya yimá ãẽ̱xgacü ya nümatama ya Cori ya Tupana nüxü̃ unetacü! ¡Rü nayaxu ya yimá wocae ya naeruxü̃tagu puxcü rü ngẽma dexápáxü̃, rü ngĩxã ítixĩ! —ñanagürü.
12 Rü yemaacü ga Dabí rü nanayaxu ga gumá wocae rü dexápáxü̃ ga Chaúeruxü̃tagu nuxü̃, rü ínixĩ. Rü taxuxü̃ma nüxü̃ nadau rü bai nüxü̃ naxĩnü. Rü taxuxü̃ma naba̱i̱xãchi. Rü guxü̃ma napeexüchi, yerü Cori ya Tupana nanapeexẽẽxüchi.
13 Rü yemawena ga Dabí rü namücü rü yema doxonexü̃arü tocutüwa naxĩ rü wüxi ga ma̱xpǘnetape̱xegu naxĩgü, rü yemaacü nüxna niyáxü̃tanüãchi.
14 Rü yexguma ga Dabí rü tagaãcü Abnéxna rü norü churaragüna nacagü, rü ñanagürü: —¡Pa Abnéx, choxü̃ nangãxü̃! —ñanagürü. Rü nüma ga Abnéx rü nanangãxü̃ rü ñanagürü: —¿Texé quixĩ i cumax rü ngẽmaca̱x tagaãcü ãẽ̱xgacüna cucaxü̃? —ñanagürü.
15 Rü Dabí nanangãxü̃ rü ñanagürü: —¿Tama ẽ̱xna cuma quixĩxü̃ i guxü̃ma i Iraéanecüã̱xgüarü churaragümaxã icucuáxü̃? ¿Rü ñuxãcü tama mea nüxna cudauxü̃ ya curü cori ya ãẽ̱xgacüx? Erü wüxi i duü̃xü̃ ngẽxma naxücu nax yamáãxü̃ca̱x.
16 Rü tama name i ngẽma cuxüxü̃. Choma rü Cori ya Tupanaégagu cumaxã nüxü̃ chixu rü name nixĩ nax cuyuxü̃, erü tama mea nüxna cudau ya curü ãẽ̱xgacü ya Cori ya Tupana nüxü̃ unetacü. ¡Naxca̱x nadau ya norü wocae rü norü dexápaü̃ ga naeruxü̃taguama nuxü̃, rü tá ngextá nüxü̃ cuyangaux! —ñanagürü.
17 Rü yexguma Chaú nüxü̃ cua̱xgu nax Dabí yixĩxü̃ ga yéma idexaxü̃, rü tagaãcü yexma nacagü rü ñanagürü: —¿Ẽ̱xna cuma quixĩxü̃, Pa Chaunex, Pa Dabíx? —ñanagürü. Rü nüma ga Dabí rü nanangãxü̃ rü ñanagürü: —Ngü̃, Pa Ãẽ̱xgacüx, choma chixĩ.
18 ¿Natürü tü̱xcüü̃ chowe quingechigü Pa Ãẽ̱xgacüx, i choma nax curü duü̃xü̃ chixĩxü̃? ¿Rü ta̱xacü chaxü? ¿Rü ta̱xacürü chixexü̃ cumaxã chaxü?
19 Choma i curü duü̃xü̃ nax chixĩxü̃ rü cuxü̃ chaca̱a̱xü̃ Pa Ãẽ̱xgacüx nax choxü̃́ icuxĩnüxü̃. Rü ngẽxguma chi Tupana cuxna ĩnügu, Pa Ãẽ̱xgacüx, nax chomaxã curüxuanüxü̃ca̱x ¡rü nayaxu i chorü ãmare nax chomaxã curüngü̃xmüxü̃ca̱x! Natürü ngẽxguma chi cumatama nagu curüxĩnügu nax chauxchi cuxaixü̃, rü Tupana tá nixĩ ya nüxü̃ cuácü nax cuxü̃́ naxütanüãxü̃ naxca̱x i ngẽma. Yerü cuma nixĩ ga Tupanaarü duü̃xü̃güarü naanewa choxü̃ ícuta̱xüchixü̃ nax ngẽmaãcü togü i tupanagüxü̃ chicua̱xüü̃xü̃ca̱x.
20 Rü tama chanaxwa̱xe i Tupanaarü duü̃xü̃güarü naanearü yáxü̃gu chayu i ngextá togü i tupanaxü̃ íyacua̱xüü̃güxü̃wa. Natürü i cumax, Pa Ãẽ̱xgacüx, rü ñoma wüxi i naixchinaweca̱x idauxü̃rüxü̃ cha̱u̱xca̱x cudau rü ñoma wüxi i ngugaca̱x idauxü̃rüxü̃ chowe quingechigü i daa ma̱xpǘnegüwa —ñanagürü.
21 Rü yexguma ga Chaú rü ñanagürü: —Pa Chaunex, Pa Dabíx, rü nüxü̃ chicua̱xãchi nax chixexü̃ chaxüxü̃. Rü ñoma wüxi i duü̃xü̃ i ngeãẽmarexü̃rüxü̃ chamaxü̃, rü poraãcü íchatü. ¡Ẽcü nataegu, rü taxuxü̃táma i chixexü̃ cumaxã chaxü! Erü ñoma i ngunexü̃gu rü nüxü̃ cungechaü̃ i chorü maxü̃, rü tama choxü̃ quima̱x —ñanagürü.
22 Rü nüma ga Dabí rü nanangãxü̃, rü ñanagürü: —Daa nixĩ ya curü wocae, Pa Ãẽ̱xgacüx ¡rü wüxi i curü duü̃xü̃ nua ũx nax yayauãxü̃ca̱x!
23 ¡Rü Tupana tüxü̃́ naxütanü ya wüxíechigü naxca̱x i ngẽma mexü̃ nax taxüxü̃ rü ngẽma nax tixaixcümaxü̃! Rü woo nüma ya Cori ya Tupana rü ñoma i ngunexü̃gu cho̱xme̱xgu cuxü̃ nanguxẽxẽ, Pa Ãẽ̱xgacüx, rü tama cuxü̃ chiima̱x, erü nüma ya Cori ya Tupana nixĩ ga ãẽ̱xgacüxü̃ cuxü̃ naxunetaxü̃.
24 Rü ngẽma nax ñu̱xma curü maxü̃xü̃ changechaü̃xü̃rüxü̃, Pa Ãẽ̱xgacüx, rü ngẽxgumarüxü̃ ta chanaxwa̱xe nax Cori ya Tupana nüxü̃ nangechaü̃xü̃ i chorü maxü̃ rü nawa choxü̃ ínanguxuchixẽẽxü̃ i guxü̃ma i ñaa guxchaxü̃gü —ñanagürü.
25 Rü yexguma nüma ga Chaú rü tagaãcü ñanagürü: —¡Tupana cuxü̃ rüngü̃xẽxẽ, Pa Chaunex, Pa Dabíx! Cuma rü tá taxü̃ i mexü̃ cuxü, rü guxü̃watáma mea cuxü̃́ ínanguxuchi —ñanagürü. Rü yemawena ga Chaú rü nachiü̃ca̱x nataegu. Rü nüma ga Dabí rü nixũchigüama.
