1 Samuel 27:1-12
27 Natürü nüma ga Dabí rü ñaxü̃gu narüxĩnü: —Ngexü̃rüü̃xü̃ i ñaa ngunexü̃gügumare i Chaú rü tá choxü̃ nima̱x. Rü ngẽmaca̱x name nixĩ i Firitéugüarü naanewa chaxũ nax tama choxü̃ nachixewexü̃ca̱x i Chaú, rü tama guxü̃ i Iraéanegu cha̱u̱xca̱x nadauxü̃ca̱x. Rü ngẽmaãcü tá naxcha̱xwa chiña —ñaxü̃gu narüxĩnü.
2 Rü yemaacü ga Dabí rü yema 600 ga yatügü ga íyaxümücügüxü̃maxã inaxĩãchi nax Aquí ga Maóx nane ga ĩane ga Gáxarü ãẽ̱xgacüxü̃tawa naxĩxü̃ca̱x.
3 Dabí rü ñu̱xũchi yema yatügü ga íyaxümücügüxü̃ rü Gáxwa nangugü rü yéma nayexmagü naxü̃tawa ga Aquí. Rü wüxichigü ga yema yatügü rü naxma̱xgümaxã yéma nayexmagü. Rü nüma ga Dabí rü yéma tüxü̃ nagagü ga guxema taxre ga naxma̱x ga Ainóaü̃ ga ĩane ga Yereécüã̱x, rü ñu̱xũchi Abigái ga naxma̱xchire̱x ixĩcü ga gumá Nabáx ga ĩane ga Carméxcüã̱x ga yucü.
4 Rü yexguma Chaú nüxü̃ cua̱xgu ga Dabí rü Gáxwa nax naxũxü̃, rü marü tama nawe ningechigü.
5 Dabí rü Aquímaxã nidexa rü ñanagürü: —Pa Chorü Ãẽ̱xgacüx, wüxi i ngü̃xẽẽca̱x tá cuxna chaca nax wüxi i nachica choxna cuxãxü̃ca̱x i ngexnerüxüne ya curü ĩanewa i nua curü naanewa. Erü tama name i choma i curü puracütanüxü̃ nax nua daa ĩane i cuma ícungexmaxü̃wa changexmaxü̃ —ñanagürü.
6 Rü yematama ngunexü̃gu ga Aquí rü ĩane ga Chicáx nüxna naxã. Rü ngẽmaca̱x nixĩ i ñu̱xma rü ta ya Chicáx rü Yudáarü naanena naxüxü̃.
7 Rü nüma ga Dabí rü Firitéugüarü naanewa nayexma wüxi ga taunecü rü naétü 4 ga tauemacü.
8 Rü yexguma yema naanewa nayexmagu ga Dabí rü norü duü̃xü̃gümaxã ínaxũxũãxü̃ nax ngĩ́xwa naxũxü̃ca̱x natanüwa ga Guechúxtanüxü̃, rü Guéchetanüxü̃, rü Amaréxtanüxü̃ ga yema naanewa yexmagüxü̃. Rü yema duü̃xü̃güarü naane rü Teraíü̃wa inanaxügü rü Chúxwaama nadaxüchi ñu̱xmata Equítuanewa nangu.
9 Rü nanadai ga guxü̃ma ga yémacüã̱xgü, rü taxuxü̃ma ga yatüxü̃ rü ngexü̃ namaxẽxẽ. Rü naétü rü guxü̃ma ga norü carnérugü, rü wocagü, rü búrugü, rü caméyugü nayagagü. Rü woo naxchirugü rü nayana. Rü yemawena rü Aquí nawa yexmane ga ĩaneca̱x nataegu.
10 Rü nümax ga Aquí rü nüxna nacaüxü̃ rü ñanagürü: —¿Ngexnerüxüne ya ĩane ya pedaiãcune i ñu̱xma? —ñanagürü. Rü Dabí rü nanangãxü̃ rü ñanagürü: —Yudáanearü súrwaama ngẽxmagüne, rü Yerameéxarü súrwaama ngẽxmagüne, rü Quenéutanüxü̃arü naanearü súrwaama ngẽxmagüne —ñanagürü.
11 Rü nüma ga Dabí rü taxuxü̃ma ga duü̃xü̃ ga yatüxü̃ rü ngexü̃ namaxẽxẽ nax yemaacü taxúema ĩane ga Gáxwa nüxü̃ yarüxuxü̃ca̱x ga yema ínaxüxü̃. Rü guxü̃ma ga ngunexü̃gü ga yexguma Firitéugüarü naanewa namaxü̃gu rü yema naxǘ.
12 Rü nüma ga Aquí rü Dabíaxü̃́ nayaxõ rü yemaca̱x ñaxü̃gu Dabímaxã narüxĩnü: —Rü ñu̱xma i ngẽma Iraéanecüã̱xgü rü Dabíchi naxaie, rü ngẽmaca̱x i nüma rü guxü̃gutáma chorü duü̃xü̃ nixĩ —ñaxü̃gu narüxĩnü.
