1 Samuel 28:1-25
28 Rü yema ngunexü̃gügu rü nüma ga Firitéugü nanangutaque̱xexẽxẽ ga norü churaragü nax Iraéanecüã̱xgüca̱x íyaxü̃ãchixü̃ca̱x. Rü nüma ga Aquí rü Dabíxü̃ ñanagürü: —Marü nüxü̃ cucua̱x i cuma rü curü duü̃xü̃gü rü tá chowe perüxĩ nawa i ngẽma dai —ñanagürü.
2 Rü nüma ga Dabí rü nanangãxü̃ rü ñanagürü: —Marü name. Rü ñu̱xma rü tá nüxü̃ cudau, Pa Ãẽ̱xgacüx, nax chomaxã nanguxü̃xü̃ nax chanaxüxü̃ i ngẽma choxü̃ cumuxü̃ —ñanagürü. Rü nüma ga ãẽ̱xgacü rü nanangãxü̃ rü ñanagürü: —Rü ñu̱xma nax ngẽmaãcü quixĩxü̃, rü tá cuxü̃ chaxuneta nax naeru quixĩxü̃ i ngẽma chorü churaragü i choxna dauxü̃ —ñanagürü.
Chaú rü ĩane ga Endóxwa naxũ ngĩxü̃tawa ga ngecü ga yuücü
3 Rü yexguma ga Chamué rü marü nayu, rü guxü̃ma ga Iraéanecüã̱xgü rü naxca̱x naxauxe. Rü yemawena rü guma ĩane ga nagu nabuxü̃ne ga Ramágu nanata̱xgü. Rü nüma ga Chaú rü ü̃paacü marü ínanawoxü̃ ga guxü̃ma ga yema ẽxü̃guxü̃xü̃ cua̱xgüxü̃ rü yema yuetaãẽgüca̱x ngẽmagüxü̃.
4 Rü nüma ga Firitéugüarü churaragü rü nügü nangutaque̱xegü rü Chunéü̃wa naxĩ rü yexma nügü ninu. Rü nüma ga Chaú rü guxü̃ma ga Iraéanecüã̱xgüarü churaragüxü̃ nangutaque̱xexẽxẽ rü Guibóagu nügü ninu.
5 28:5-6 Natürü nüma ga Chaú rü yexguma yema Firitéugüarü churaragüxü̃ nada̱u̱xgu, rü naba̱i̱xãchi rü poraãcü namuü̃. Rü Cori ya Tupanana naca ga ta̱xacü tá nax naxüxü̃. Natürü nüma ga Cori ya Tupana rü tama nanangãxü̃ woo nanegüwa, rü woo yema cua̱xruxü̃ ga Uríü̃wa, rü woo Tupanaarü orearü uruü̃güwa.
6 Nüü̃ nadau 28:5
7 Rü yemaca̱x ga Chaú rü norü churaragüxü̃ namu rü ñanagürü: —¡Ẽcü ngĩxca̱x peda̱u̱x i wüxi i nge i nüxü̃ cua̱xcü nax yuetaca̱x nangemaxü̃, nax ngéma chaxũxü̃ca̱x, rü ngĩxna chayaca̱xaxü̃ca̱x! —ñanagürü. Rü nüma ga churaragü rü nanangãxü̃gü rü ñanagürügü: —Rü Endóxwa ingẽxma i wüxi i nge i nüxü̃ cua̱xcü nax yuetaca̱x nangemaxü̃ —ñanagürügü.
8 Rü nüma ga Chaú rü nügü nanatoxchiruraü̃xẽxẽ, rü taxre ga namücügü ínigagü. Rü chütacü yema ngexü̃tawa naxũ, rü ñanagürü ngĩxü̃: —Namaxã chidexachaü̃ i wüxi i duü̃xü̃ i yuxü̃. ¿Rü cuxü̃́ natauxchaxü̃ i naãxẽca̱x nax cungemaxü̃? —ñanagürü.
9 Rü ngĩma ga yema nge rü inangãxü̃ rü ngĩgürügü: —Cuma nüxü̃ cucua̱x ga Chaú rü guxü̃ma ga yema ẽxü̃guxü̃xü̃ cua̱xgüxü̃ rü duü̃xẽ ga yuetaca̱x ngẽmagüxü̃ rü ínanawoxü̃ ga ñaa nachixü̃anewa. ¿Rü tü̱xcüü̃ nagu choxü̃ cungu̱xẽẽchaü̃xü̃ i ngẽma guxchaxü̃ i ngürüãchi tá naxca̱x chayuxü̃? —ngĩgürügü.
10 Natürü nüma ga Chaú rü Cori ya Tupanaégagu ñanagürü ngĩxü̃: —Tupanaégagu cumaxã nüxü̃ chixu rü taxũtáma i ta̱xacürü chixexü̃ cuxü̃ nangupetü naxca̱x i ngẽma cuxü̃ chaxüxẽẽxü̃ —ñanagürü.
11 Rü ngĩma ga yema nge rü inangãxü̃ rü ngĩgürügü: —¿Rü texé cutümawa̱xe nax tümaca̱x changemaxü̃? —ngĩgürügü. Rü nüma ga Chaú rü ngĩxü̃ nangãxü̃ rü ñanagürü: —¡Chamuéca̱x nangema! —ñanagürü.
12 Rü ngürüãchi ga yema nge rü Chamuéxü̃ idau, rü aita ixü. Rü ñu̱xũchi Chaúxü̃ ngĩgürügü: —¿Tü̱xcüü̃ choxü̃ cuwomüxẽxẽ? Cuma rü Chaú quixĩ —ngĩgürügü.
13 Natürü nüma ga ãẽ̱xgacü rü ñanagürü ngĩxü̃: —¡Taxṹ i cumuü̃xü̃! ¿Ta̱xacüxü̃ cudau? —ñanagürü. Rü ngĩma ga nge rü inangãxü̃ rü ngĩgürügü: —Nüxü̃ chadau i wüxi i naãxẽ i ñoma i naanewa chü̱xnagüxü̃ —ngĩgürügü.
14 Rü nüma ga Chaú rü ínaca rü ñanagürü: —¿Nañuxraxü̃xü̃? —ñanagürü. Rü ngĩma ga yema nge rü inangãxü̃ rü ngĩgürügü: —Wüxi i yaxguã̱x i ma̱xpáxü̃ nixĩ —ngĩgürügü. Rü nüma ga Chaú rü yexgumatama nüxü̃ nicua̱xãchi ga Chamué nax yixĩxü̃. Rü ñaxtüanegu nanangücuchi.
15 Rü yexguma ga Chamué rü ñanagürü: —¿Ta̱xacüca̱x i choxü̃ cuchixewexü̃ rü nua choxü̃ cuxũxẽxẽxü̃? —ñanagürü. Rü nüma ga Chaú nanangãxü̃ rü ñanagürü: —Poraãcü chaxoegaãxẽ, erü nüma i Firitéugü rü toxca̱x ínayaxüãchi, natürü nüma ya Tupana rü marü choxna nixũgachi rü tama choxü̃ nacuáxchaü̃, rü tama choxü̃ nangãxü̃ga i orearü uruü̃güwa rüe̱xna chaunegüwa. Rü ngẽmaca̱x nixĩ i cuxca̱x changemaxü̃ nax chomaxã nüxü̃ quixuxü̃ca̱x nax ta̱xacü tá chaxüxü̃ —ñanagürü.
16 Rü nüma ga Chamué nanangãxü̃ rü ñanagürü: —¿Tü̱xcüü̃ choxna cuca ega Tupana rü marü cuxna yaxũgachigu rü curü uanüxü̃ nügü yaxĩxẽxẽgu?
17 Rü Cori ya Tupana cumaxã nayanguxẽxẽ ga yema chowa cumaxã nüxü̃ yaxuxü̃. Rü marü cuxü̃ ínamuxũchi nax ãẽ̱xgacü quixĩxü̃ rü yimá cumücü ya Dabína nanaxã.
18 Rü ngẽmaãcü cumaxã naxüpetü ya Tupana yerü tama naga cuxĩnü ga yema cuxü̃ namuxü̃wa rü tama cuyanguxẽxẽ ga Amaréxtanüxü̃xü̃ nax cuda̱i̱xü̃.
19 Rü ngẽmaca̱x i nüma ya Tupana rü tá Firitéugüme̱xẽgu pexü̃ nayixẽxẽ i cuma rü cunegü rü guxü̃ma i Iraéanecüã̱xgüarü churaragü. Rü tá pexü̃ nadai, rü ngẽmaca̱x i moxü̃ i cuma rü cunegü rü nua chauxü̃tawa tá pengẽxmagü. Rü ngẽxgumarüxü̃ ta ya nüma ya Cori ya Tupana rü tá ngẽma Firitéugüme̱xẽgu nanayixẽxẽ i guxü̃ma i Iraéanearü churaragü —ñanagürü.
20 Rü yexguma yema Chamuéarü orexü̃ naxĩnügu ga Chaú, rü poraãcü namaxã naba̱i̱xãchiãxẽ rü yexma niyuãchi rü niwa̱x. Rü naétü rü naturaxü̃ne yerü taguma nachibü ga wüxi ga ngunexü̃ rü wüxi ga chütaxü̃.
21 Rü yexguma Chaúxü̃ nada̱u̱xgu ga yema nge ga ñuxãcü nax naxĩ̱xãchiãẽxü̃, rü naxca̱x iyaxũ rü ngĩgürügü nüxü̃: —Choma nax curü duü̃xü̃ chixĩxü̃ rü marü chanaxü i ngẽma naxca̱x ícuca̱xaxü̃. Rü woo ãũcümaxü̃wa chanangexmaxẽxẽ i chorü maxü̃, rü cuga chaxĩnü rü chanaxüama i ngẽma choxü̃ cumuxü̃.
22 Rü ngẽmaca̱x i ñu̱xma rü cuxna chaca nax chauga cuxĩnüxü̃. Rü íxraxü̃ i õna tá cuxna chaxã nax ngẽmaãcü cuporaxü̃ca̱x nax cutaeguxü̃ca̱x —ngĩgürügü.
23 Rü nüma ga Chaú rü tama nachibüchaü̃, natürü ga yema norü churaragüerugü rü ñu̱xũchi ga ngĩma ga yema nge rü nüxü̃ ica̱a̱xü̃güama. Rü yemaca̱x düxwa: —Ngü̃ —ñanagürü. Rü yexgumatama inachi ga ñaxtüanegu nax nanguxü̃, rü wüxi ga pechicaxü̃wa narüto.
24 Rü yexgumayane ga ngĩma ga yema nge rü iyama̱x ga wüxi ga wocaxacü ga ingüxü̃ ga ngĩchiü̃wa yexmaxü̃. Rü iyañumü ga trigute̱xe, rü paũ ga ngearü pu̱xẽẽruü̃ã́xü̃ ixü.
25 Rü ñu̱xũchi inaxüwemü ga gumá ãẽ̱xgacü rü norü duü̃xü̃gü. Rü nümagü rü nachibüe, rü yemawena yematama chütaxü̃gu nawoegu.
