1 Samuel 29:1-11
29 Rü nüma ga Firitéugüarü churaragüerugü rü Aféxgu nanangutaque̱xexẽxẽ ga guxü̃ma ga norü churaragü. Rü yoxni ga nüma ga Iraétanüxü̃ rü yema natüxacü ga ĩane ga Yereéwa yexmaxü̃gu nügü nanutaque̱xe.
2 Rü yema Firitéugüarü churaragüerugü rü ñu̱xũchi norü churaragü rü 100 gu rü ñu̱xũchi 1,000 gu nügü ininu nax inaxĩãchixü̃ca̱x. Rü nüma ga Dabí rü norü duü̃xü̃gümaxã Aquíweama nixĩxü̃tanü.
3 Rü Aquína nacagüe ga yema Firitéugüarü churaragüerugü rü ñanagürügü: —¿Ta̱xacü nua naxüe i ñaa Ebréugü? —ñanagürügü. Rü nüma ga Aquí rü nanangãxü̃ rü ñanagürü: —Ñaa nixĩ i Dabí ga Iraéanearü ãẽ̱xgacü ya Chaúarü churaragüeru. Natürü marü ñuxre ya taunecü chauxü̃tawa nangẽxma. Rü yema ngunexü̃gu ga chauxü̃tawa nayexmagucürüwa rü taguma ta̱xacürü chixexü̃ nawa ichayangau —ñanagürü.
4 Natürü yema Firitéugüarü churaragüerugü rü poraãcü Aquímaxã nanue rü ñanagürügü: —¡Namaxã nüxü̃ ixu rü íyaxũ nax ngẽma nachica i cuma nüxna cuxãxü̃ca̱x nataeguxü̃ca̱x, guxü̃ma i natanüxü̃maxã! Rü tama tanaxwa̱xe nax toxü̃ naxümücüxü̃ i daiwa, erü ngürüãchi tá torü uanüxü̃ nixĩ i ngẽxguma daiwa tangexmagüyane. Erü ngürüãchi tá nanadaü̃eru i torü churaragü rü ngẽma norü ãẽ̱xgacü ya Chaúxü̃tawa tá nanana nax ngẽmaãcü nüxü̃́ natauxchaxü̃ca̱x nax namaxã inangüxmüxü̃.
5 Ñaatama nixĩ i Dabí ga nagu nawiyaegüxü̃ ga yexguma íyadaü̃chagügu rü ñaxgu: “Chaú rü 1,000 i yatügüxü̃ nadai, natürü nüma ga Dabí rü 10,000 nadai”, ñaxgu —ñanagürügü.
6 29:6-7 Rü yexguma ga Aquí rü Dabíca̱x naca rü ñanagürü nüxü̃: —Ngẽma nax Tupana aixcüma maxü̃xü̃rüxü̃, rü cumaxã nüxü̃ chixu rü cuma rü aixcüma wüxi i mexü̃ i yatü nax quixĩxü̃. Rü poraãcü chorü me nixĩ i cucüma i churaragütanüwa. Rü taxuxü̃ma i ta̱xacürü chixexü̃xü̃ cuwa chadau yema ngunexü̃ ga nagu chauxü̃tawa cuxũxü̃gucürüwa. Natürü ngẽma Firitéugüarü churaragüerugü rü tama cumaxã nataãẽgü, ¡rü ngẽmaca̱x mea nataegu i ñu̱xma nax ngẽmaãcü tama cunaxüxü̃ca̱x i ngẽma tama norü me ixĩxü̃! —ñanagürü nüxü̃.
7 Nüü̃ nadau 29:6
8 Rü Dabí nanangãxü̃ rü ñanagürü: —¿Ta̱xacü chaxü i chomax? ¿Ta̱xacüxü̃ chowa cudau, Pa Ãẽ̱xgacüx, i ñaa ngunexü̃gügu, rü ngẽmaca̱x tama cunaxwa̱xe nax togü namaxã tadaixü̃ i ngẽma perü uanügü? —ñanagürü.
9 Rü nüma ga Aquí nanangãxü̃ rü ñanagürü: —Choma nüxü̃ chacua̱x nax aixcüma cumexü̃ ñoma wüxi i daxũcüã̱x i Tupanaarü duü̃xü̃rüxü̃. Natürü ngẽma Firitéugüarü churaragüeru rü tama nanaxwa̱xegü nax totanüwa cungexmaxü̃ i daiwa.
10 Rü ngẽmaca̱x i cuma rü ñu̱xũchi curü duü̃xü̃gü rü name nixĩ i íperüdagü i moxü̃ ẽxü̃wa rü ngẽxguma yangunegu rü name nixĩ i ipexĩãchi nax pewoeguxü̃ca̱x —ñanagürü.
11 Rü yemaacü ga moxü̃ãcü ẽxü̃wa rü naba̱i̱xãchi ga Dabí rü ñu̱xũchi norü duü̃xü̃gü rü Firitéugüarü ĩaneca̱x nawoegu. Rü nüma ga yema Firitéugüarü churaragü rü yoxni Yereéwaama naxĩxü̃tanü.
