1 Samuel 30:1-31
30 Rü norü tomaepü̱x ga ngunexü̃gu rü nüma ga Dabí rü ñu̱xũchi yema norü churaragü rü ĩane ga Chicáxca̱x nawoegu. Natürü yexguma yéma nangugügu rü nüxü̃ nayangaugü nax marü Négueanegu nachocuxü̃ ga Amaréxtanüxü̃ rü naxca̱x íyaxüãchixü̃ rü yagugüãxü̃ ga guma ĩane ga Chicáx.
2 Rü yexgumarüxü̃ ta tüxü̃ nigagü ga guxema ingexe rü guxãma ga buxe ga iyaxe ga yéma yexmagüxe. Natürü taxúxexü̃ma nima̱xgü.
3 30:3-4 Rü yexguma guma ĩanewa nangugügu ga Dabí namaxã ga norü duü̃xü̃gü, rü nüxü̃ nadaugü ga guma ĩane ga nax yagugüãxü̃ rü tüxü̃ yagagüxü̃ ga guxema naxma̱xgü rü nanegü rü naxacügü, rü tagaãcü naxauxe ñu̱xmata nangegagü nax naxauxexü̃.
4 Nüü̃ nadau 30:3
5 Rü yexgumarüxü̃ ta tüxü̃ nigagü ga guxema taxre ga Dabí naxma̱xgü ga Ainóaü̃ ga Yereécüã̱x, rü ñu̱xũchi Abigái ga naxma̱xchire̱x ixĩcü ga gumá Nabáx ga Carméxcüã̱x ga yucü.
6 Rü nüma ga Dabí rü naxoegaãẽ yerü ga yema norü duü̃xü̃gü rü nagu narüxĩnüe nax Dabíxü̃ nutamaxã ínamuxũchigüxü̃ yerü poraãcüma naxacügüca̱x nanue. Natürü nüma ga Dabí rü Cori ya Tupanana narüyoe rü nayaxõ nax Tupana tá nüxü̃ rüngü̃xẽẽxü̃.
7 Rü yemaca̱x chacherdóte ga Abiatá ga Aimérex nanexü̃ ñanagürü: —¡Nua nange i Tupanaarü efóx! —ñanagürü. Rü yexguma nüma ga Abiatá rü Dabíxü̃tawa nanange ga yema efóx.
8 Rü yexguma nüma ga Dabí rü Cori ya Tupanana naca rü ñanagürü: —¿Namexü̃ nax nawe changexü̃ i ngẽma ngĩ́ta̱xagüxü̃? ¿Rü nüxü̃ tá chayangauxü̃? —ñanagürü. Rü yexguma nüma ga Cori ya Tupana rü Dabíxü̃ nangãxü̃ rü ñanagürü: —¡Nawe nangẽ rü tá nüxü̃ cuyangau, rü tá tüxü̃ cupuxü̃ ya yíxema tüxü̃ yagagüxe! —ñanagürü.
9 30:9-10 Rü yexgumatama ga nüma ga Dabí rü namaxã inaxũãchi ga 600 ga norü duü̃xü̃gü ga naxümücügüxü̃. Rü Bechóxarü doxonexü̃wa nangugü. Rü 200 ga norü duü̃xü̃gü ga marü ipaexüchixü̃ rü taxuacüma nichoü̃ nawa ga yema doxonexü̃ rü yemaca̱x yexmatama narücho. Natürü nüma ga Dabí rü yema to ga 400 ga norü duü̃xü̃gümaxã nichoü̃ rü Amaréxtanüxü̃we nangẽgü.
10 Nüü̃ nadau 30:9
11 Rü yema namagu nüxü̃ nangaugü ga wüxi ga yatü ga Equítuanecüã̱x rü Dabíxü̃tawa nanagagü. Rü nüxna nanaxã ga paũ rü nanangõ̱x. Rü nanaxaxexẽẽgü ga dexá.
12 Rü nüxna nanaxãgü ga íxraxü̃ ga iguarü paũ, rü taxre ga úbaarü patanüxü̃arü paũ. Rü yema nangõ̱xguwena rü naxca̱x nitaane, yerü tomaepü̱x ga ngunexü̃ rü tomaepü̱x ga chütaxü̃ rü taguma nachibü rü bai ga ta̱xacü yaxaxüxü̃.
13 Rü yexguma nüma ga Dabí rü nüxna naca rü ñanagürü nüxü̃: —¿Texé nixĩ ya curü cori? ¿Rü ngextá ne cuxũ? —ñanagürü. Rü yexguma nüma ga gumá Equítuanecüã̱x rü Dabíxü̃ nangãxü̃ rü ñanagürü: —Choma rü Equítuanecüã̱x chixĩ rü ngẽma chorü cori rü wüxi i Amaréxtanüxü̃ nixĩ. Rü tomaepü̱x i ngunexü̃ nixĩ nax chorü cori nua choxü̃ táxü̃ yerü chida̱xawe.
14 Natürü naxü̃pa ga nax chida̱xawexü̃ rü Queretéugüarü naane i súrwaama ngẽxmaxü̃wa taxĩ rü tanadeãcu. Rü yexgumarüxü̃ ta tanadeãcu ga Yudátanüxü̃arü naanewa rü Caréxtanüxü̃arü naanewa. Rü ñu̱xũchi tayagu ya yima ĩane ya Chicáx —ñanagürü.
15 Rü yexguma ga Dabí rü nüxna naca rü ñanagürü: —¿Cunaxwa̱xexü̃ nax ngẽma ngĩ́ta̱xa̱xgüxü̃ íngẽxmagüxü̃wa choxü̃ cugaxü̃? —ñanagürü. Rü yexguma ga nüma ga Equítuanecüã̱x rü Dabíxü̃ nangãxü̃ rü ñanagürü: —Ngẽxguma Tupanaégagu chomaxã nüxü̃ quixuxgu nax taxũtáma choxü̃ quimáxü̃, rü taxũtáma nüxna choxü̃ cumuxü̃ i chorü cori, rü ngẽma ínangexmagüxü̃wa tá cumaxã chaxũ —ñanagürü.
16 Rü nüma ga gumá yatü rü yema Amaréxtanüxü̃ íyexmagüxü̃wa Dabíxü̃ naga. Rü yexguma natanüwa nanguxgu, rü nüma ga Amaréxtanüxü̃ rü nügü yema naanegu ninu. Rü ínachibüe rü ínaxaxegü rü ínapetaegü namaxã ga yema Firitéugüanewa rü Yudáanewa naxca̱x nangĩ̱xgüxü̃ ga yemaxü̃gü.
17 Rü yexguma nüma ga Dabí rü norü duü̃xü̃gümaxã naxca̱x ínayagoõchi. Rü pa̱xmama inanaxügü nax nügü nada̱i̱xü̃ rü ñu̱xmata nayáuane. Rü guxü̃xü̃ma nadai. Rü 400 ga ngextü̱xüxü̃gü ga caméyugügu ibüxmüxü̃xicatama nixĩ ga íyaxügüxü̃.
18 Rü yemawena ga Dabí rü wenaxarü nanade ga guxü̃ma ga yema yemaxü̃gü ga Amaréxtanüxü̃ naxca̱x ngĩ̱xgüxü̃. Rü yexgumarüxü̃ ta tüxü̃ nigagü ga guxema taxre ga naxma̱x.
19 Rü guxü̃ma ga yema Amaréxtanüxü̃ naxca̱x ngĩ́xü̃tanüwa rü woo ga yemaxü̃gü ga íxraxü̃ rü taxuxü̃ma natauxchica. Rü yexgumarüxü̃ ta ga buxegü, rü yaxegü rü taxúxema tatauxchica. Rü yemaacü ga Dabí rü wenaxarü guxü̃ma nina rü guxãxü̃ma nigagü.
20 Rü yexgumarüxü̃ ta nüma ga Dabí rü nayagagü ga guxü̃ma ga wocagü rü carnérugü ga yéma yexmagüxü̃. Rü yema woca rü carnérugümaxã icua̱xgüxü̃ rü ñanagürügü: —Ñaa nixĩ i norü natanü ya Dabí —ñanagürügü.
21 Rü yexguma Dabí Bechóxarü doxonexü̃wa nguxgu ga yema 200 ga ípaexüchixü̃ ínayexmagüxü̃wa, rü nümagü rü Dabíca̱x nibuxmü, rü nanayauxgü namaxã ga yema namücügü ga íyaxümücügüxü̃. Rü nüma ga Dabí rü nüxü̃ narümõxe.
22 Natürü natanüwa ga yema Dabímaxã daiwa ne ĩxü̃ rü nayexmagü ga duü̃xü̃gü ga ichixecümaxü̃ rü nügüguxicatama rüxĩnüexü̃. Rü yemagü rü ñaãcü nidexagü rü ñanagürügü: —Ngẽma 200 i churaragü i tama tüxü̃ ümücügüxü̃ i daiwa, rü taxuxü̃táma nüxna taxã nawa i ngẽma ngẽmaxü̃gü i Amaréxtanüxü̃na ipuxü̃xü̃. Rü name nixĩ i nüxna tanamugü i naxma̱xgü, rü naxacügü rü ñu̱xũchi nawoegu —ñanagürügü.
23 Natürü nüma ga Dabí rü ñanagürü: —Pa Chomücügüx, tama name nax ngẽmagu perüxĩnüexü̃, erü nüma ya Cori ya Tupana nixĩ ya tüxna naxãcü i guxü̃ma i ngẽma ipuxü̃xü̃, rü nüma nixĩ i tüxna nadauxü̃ nax tama iyuexü̃ rü taxme̱xgu nayixẽẽãxü̃ ga yema ngĩ́xta̱xagüxü̃ ga taxca̱x íyaxüãchixü̃.
24 Rü ngẽmaca̱x taxũtáma texé pexü̃́ tanayaxu i ngẽma nagu perüxĩnüexü̃. Erü ngẽxguma namaxã inuegu i ngẽma ipuxü̃xü̃, rü ngẽma tama daiwa ĩxü̃ natürü nüxna daugüxü̃ i tórü ngẽmaxü̃gü rü nüma rü tá ta nanayauxgü i ngẽma ipuxü̃xü̃ —ñanagürü.
25 Rü yexgumacürüwa rü ñu̱xma rü ta rü ngẽma nacümagu naxĩ i ngẽma Iraétanüxü̃.
26 Rü yexguma Chicáxwa nanguxgu ga Dabí, rü yema yemaxü̃gü ga napuxü̃tanüwa nanayaxu ga ñuxre rü namücügü ga Yudátanüxü̃arü ãẽ̱xgacügüxü̃ yéma nanamugü namaxã ga ñaa ore ga ñaxü̃: —Rü ñaa nixĩ i perü ãmaregü i Tupanaarü uanügüna chapuxü̃xü̃ —ñaxü̃.
27 30:27-28 Rü norü ãmare naxca̱x yéma namugü ta ga yema ãẽ̱xgacügü ga Betéwa yexmagüxü̃, rü ĩane ga Ramóx ga Négueanewa yexmagüxü̃, rü Yatíxwa yexmagüxü̃, rü Aroéwa yexmagüxü̃, rü Chimóxwa yexmagüxü̃, rü Etemóawa yexmagüxü̃.
28 Nüü̃ nadau 30:27
29 30:29-30 Rü yexgumarüxü̃ ta norü ãmare naxca̱x yéma namugü ga yema ãẽ̱xgacügü ga Racáxwa yexmagüxü̃, rü guma ĩanegü ga Yerameéwa yexmagüxü̃, rü Quenéutanüxü̃arü ĩanegüwa yexmagüxü̃, rü Ormáwa yexmagüxü̃, rü Coracháü̃wa yexmagüxü̃, rü Atáxwa yexmagüxü̃.
30 Nüü̃ nadau 30:29
31 Rü yexgumarüxü̃ ta norü ãmare naxca̱x yéma namugü ga yema ãẽ̱xgacügü ga Ebróü̃wa yexmagüxü̃. Rü yexgumarüxü̃ ta norü ãmare naxca̱x yéma namugü ga yema ãẽ̱xgacügü ga guxü̃ma ga yema nachicagü ga nüma ga Dabí rü norü duü̃xü̃gümaxã nagu yaxũgüchigüxü̃wa yexmagüxü̃.
