1 Samuel 5:1-12
5 Rü yexguma marü yapugüãgu ga yema baú ga Tupanaarü mugüchixü̃, rü nüma ga Firitéugü rü ĩane ga Ebéü̃-échewa nanayauxgü rü norü ĩane ga Adúxwa nanangegü.
2 Rü ñu̱xũchi norü tupana ga Dagóü̃patagu nayaxǘcuchigü. Rü Dagóü̃chicüna̱xãxü̃tagu nanaxǘgü.
3 Rü moxü̃ãcü ga yexguma ínangugügu ga yema Adúxcüã̱x, rü Dagóü̃chicüna̱xãxü̃ inayangaugü ga ñaxtüanegumare nguxü̃ nape̱xegu ga yema baú ga Tupanaarü mugü nawa yexmaxü̃. Rü yexguma ga yema duü̃xü̃gü rü nanayauxgü ga yema Dagóü̃chicüna̱xã rü wena nachicagu nanachixẽẽgü.
4 Natürü yexguma moxü̃ãcü pa̱xmama yéma naxĩxgu ga yema Adúxcüã̱x, rü nüxü̃ inayangaugü ga Dagóü̃chicüna̱xã ga wenaxarü ñaxtüanegu ümarexü̃ nape̱xegu ga yema baú ga Tupanaarü mugü nawa yexmaxü̃. Rü ga naeru rü gumá taxre ga naxme̱x rü nabüü̃ rü ĩã̱xgu nayanumare. Rü yema naxü̃nerica nixĩ ga mexü̃.
5 Rü ngẽmaca̱x nixĩ i woo i ñu̱xma i ngẽma Dagóü̃arü chacherdótegü rü ngẽxguma yima Dagóü̃pata ya Adúxwa ngẽxmanegu nachocuxgu rü tama ngẽma mürapewa i ĩã̱xwa itoxexü̃wa nangagüxü̃.
6 Natürü nüma ga Cori ya Tupana rü poraãcü nanapoxcue rü nanamuü̃exẽxẽ ga yema duü̃xü̃gü ga Adúxcüã̱x. Rü yema duü̃xü̃gü ga yema naanegu pegüxü̃ rü taixnamaxã nayada̱xaweexẽxẽ.
7 Rü yemaxü̃ nadaugügu ga yema duü̃xü̃gü ga Adúxcüã̱x rü ñanagürügü: —Ngẽma baú ya Iraéanecüã̱xgüarü Tupanaarü ixĩxü̃ rü tama tanaxwa̱xe i tatanüwa nax nangẽxmaxü̃ erü ngẽmagagu nixĩ i ngẽma Tupana rü taxca̱x rü tórü tupana i Dagóü̃ca̱x rü poraãcü guxchaxü̃ ínanguxẽẽxü̃ —ñanagürügü.
8 Rü yemaca̱x ga yema Asdóxcüã̱x rü guxü̃ma ga Firitéugüarü ãẽ̱xgacügüca̱x nangema nax namaxã nangutaque̱xegüxü̃ca̱x. Rü nüxna nacagüe rü ñanagürügü: —¿Ta̱xacü tá namaxã ixügüxü̃ i ngẽma baú i ngẽma Iraéanecüã̱xgüarü Tupanaarü mugüchixü̃? —ñanagürügü. Rü yema ãẽ̱xgacügü rü nanangãxü̃ rü ñanagürügü: —¡Ẽcü ĩane ya Gáxwa penangegü! —ñaxü̃maxã nanangãxü̃gü. Rü nüma ga yema Firitéugü rü guma ĩanewa nanangegü.
9 Natürü yexguma marü yéma nangegüãguwena, rü nüma ga Cori ya Tupana rü yema ĩanecüã̱xgüxü̃ nayaxĩ̱xãchiãẽxẽẽgü yerü taixnamaxã nayada̱xaweexẽxẽ ga guxü̃ma ga duü̃xü̃gü ga ibuxü̃ rü iyaxü̃.
10 Rü yexguma ga nüma ga Firitéugü rü ĩane ga Ecróü̃waama nanangegü ga yema baú ga Tupanaarü mugüchixü̃. Natürü yexguma Ecróü̃wa nanguxgu ga yema baú, rü yema duü̃xü̃gü ga Ecróü̃cüã̱xgü rü nixaixcha rü ñanagürügü: —¿Tü̱xcüü̃ nua penange i ngẽma Iraéanecüã̱xgüarü Tupanaarü mugüchixü̃ nax toxü̃ nada̱i̱xü̃ca̱x ya guxãma? —ñanagürügü.
11 Rü guma ĩanewa rü guxü̃ma ga duü̃xü̃gü rü nanaxĩ̱xãchiãẽgü, yerü Tupana rü poraãcü nanapoxcue. Rü yemaca̱x ga yema ĩanecüã̱xgü rü guxü̃ma ga Firitéugüarü ãẽ̱xgacügüca̱x nangema rü ñanagürügü nüxü̃: —¡Nua torü ĩanewa ípenangexechi i ngẽma baú i Iraéanecüã̱xgüarü Tupanaarü mugüchixü̃, rü nachixü̃aneca̱xtama penataeguxẽxẽ nax tama toxü̃ nada̱i̱xü̃ca̱x i guxãma i tomax! —ñanagürügü.
12 Rü guma ĩanecüã̱x rü poraãcü naxauxe ñu̱xmata dauxü̃guxü̃ i naanewa nangu ga norü axu, yerü yema tama yuexü̃ rü guxü̃wama nataixnaxü̃negü.
