1 Samuel 7:1-17
7 Rü nüma ga Quiriáx-yearíü̃cüã̱xgü rü ĩane ga Bex-cheméwa nayayauxgü ga yema baú ga Cori ya Tupanaarü mugüchixü̃. Rü norü ĩanewa nanangegü rü nayaxǘcuchigü napatagu ga Abinadá ga wüxi ga ma̱xpǘnegu ãchiü̃cü. Rü Tupanana nanaxuaxü̃gü ga Abinadá nane ga Ereachá nax nüxna nadauxü̃ca̱x.
Chamué rü Iraéanecüã̱xgümaxã inacua̱x
2 Rü 20 ga taunecü ningu ga yema Tupanaarü mugüchixü̃ ga ĩane ga Quiriáx-yearíü̃wa nax nayexmaxü̃. Rü guxü̃ma ga Iraéanecüã̱xgü rü poraãcü nangechaü̃gü rü Cori ya Tupanaca̱x nawoegu.
3 Rü yemaca̱x nüma ga Chamué rü guxü̃ma ga yema Iraéanecüã̱xgüxü̃ ñanagürü: —Ngẽxguma pema rü aixcüma Cori ya Tupanaca̱x pewoegu̱xgux, rü name nixĩ i ípenawogü i guxü̃ma i ngẽma togü i nachixü̃anegüarü tupananetagü, rü ngẽma tupananeta i Ataréchicüna̱xãgü. Rü penaxwa̱xegü i Cori ya Tupanaxü̃xicatama picua̱xüü̃gü. Rü ngẽxguma ngẽmaãcü penaxü̱xgux, rü nüma ya Cori ya Tupana rü tá pexü̃ ínanguxü̃xẽxẽ naxme̱xwa i ngẽma Firitéugü —ñanagürü.
4 Rü nüma ga Iraéanecüã̱xgü rü ínanawogü ga naguxü̃raxü̃ãcü üxü̃ ga Baáchicüna̱xãgü rü Ataréchicüna̱xãgü. Rü Cori ya Tupanaxü̃xicatama nicua̱xüü̃gü.
5 Rü yemawena ga Chamué rü Iraéanecüã̱xgüxü̃ ñanagürü: —¡Ĩane ya Mispágu penangutaque̱xexẽxẽ i guxü̃ma i Iraéanecüã̱xgü! Rü ngéma tá nixĩ i peétüwa nüxna chachogüxü̃ ya Cori ya Tupana —ñanagürü.
6 Rü nüma ga Iraéanecüã̱xgü rü Mispágu nangutaque̱xegü. Rü yéma puchuwa dexá ta nayauxü̃gü, rü Cori ya Tupanape̱xegu nanabagü norü ãmareruxü̃. Rü yema ga ngunexü̃gu rü naxauree rü tama nachibüe. Rü guxü̃ma ga duü̃xü̃gü rü nüxü̃ nixugüe nax chixexü̃ naxügüxü̃ ga Tupanape̱xewa. Rü yéma Mispáwa nixĩ ga Chamué ga inaxügüãxü̃ ga Iraéanecüã̱xgümaxã inacuáxü̃.
7 Yexguma yema Firitéugü nüxü̃ cua̱xgügu nax Mispágu nangutaque̱xegüxü̃ ga Iraétanüxü̃, rü nüma ga yema Firitéugüarü ãẽ̱xgacügü rü naxca̱x inaxĩãchi. Rü yemaxü̃ nacua̱xgügu ga Iraétanüxü̃ rü namuü̃e.
8 Rü Chamuéxü̃ ñanagürügü: —¡Taxṹ i nüxü̃ curüchauxü̃ nax tórü Cori ya Tupanamaxã quidexaxü̃ nax naxme̱xwa tüxü̃ ínanguxü̃xẽẽxü̃ca̱x i ngẽma Firitéugü! —ñanagürügü.
9 Rü nüma ga Chamué rü wüxi ga carnéruxacü tüxü̃ nima̱x rü guxema Cori ga Tupanaca̱x tüxü̃ nigu. Rü ñu̱xũchi Cori ya Tupanana naca nax Iraétanüxü̃xü̃ nangü̃xẽẽxü̃ca̱x. Rü nümax ga Cori ya Tupana rü Chamuéxü̃ nangãxü̃.
10 Yexguma Chamué íyaguyane ga yema ãmare rü ningaicagü ga Firitéugü nax Iraétanüxü̃xü̃ yadaixü̃ca̱x. Rü nüma ga Cori ya Tupana rü wüxi ga tacü ga ãẽmacü nayawã̱ĩ̱xẽxẽ. Rü Firitéugüxü̃ namaxã ínabaixgü, rü yemaacü narüporamaegü ga Iraétanüxü̃.
11 Rü yexgumatama ga yema Iraétanüxü̃ rü Mispáwa inaxĩãchi. Rü Firitéugüwe nangegü ñu̱xmata Bex-cáxarü tuãchigu nayadaix.
12 Yemawena ga Chamué rü wüxi ga nuta nayaxu, rü ĩane ga Mispá rü ĩane ga Chéü̃arü ngãxü̃gu nanaxǘ ga gumá nuta. Rü Ebéü̃-échegu nanaxüéga. Rü ñu̱xũchi ñanagürü: —Nüma ya Cori ya Tupana rü ñu̱xmarüta taguma nüxü̃ narüchau nax tüxü̃ nangü̃xẽẽxü̃ —ñanagürü.
13 Rü nüma ga Iraétanüxü̃ rü Firitéugüxü̃ narüporamae, rü taguma wena Iraétanüxü̃arü naanewa ínayaxüãchi. Rü yexguma namaxü̃gu ga Chamué rü Cori ya Tupana rü Firitéugümaxã narüxuanü.
14 Guma ĩanegü ga Firitéugü puxü̃ne nüxna ga Iraétanüxü̃, rü Ecróü̃wa inaxügü ñu̱xmata Gáxwa nangu. Rü gumagü rü wenaxarü Iraétanüxü̃arü nixĩ. Rü yemaacü ga Iraétanüxü̃ rü wenaxarü nanayauxgü ga yema naane ga Firitéugü napugüxü̃. Rü nümagü ga Iraétanüxü̃ rü Amoréutanüxü̃ rü nügümaxã narüngüxmü.
15 Rü yexguma namaxü̃gu ga Chamué rü guxü̃ma ga Iraéanecüã̱xgümaxã inacua̱x.
16 Rü guxcüma ga taunecügu rü ĩanegü ga Betéwa rü Guirigáwa rü Mispáwa naxũũxü̃ nax yema Iraéanecüã̱xgüxü̃ yanangü̃xẽẽxü̃ca̱x nax yamexẽẽãxü̃ca̱x ga norü guxchaxü̃gü.
17 Rü ñu̱xũchi norü ĩane ga Ramáca̱x nataeguü̃xü̃, yerü yexma nixĩ ga naxãchiü̃xü̃. Rü yéma nixĩ ga Iraéanecüã̱xgümaxã inacuáxü̃. Rü yexma nanaxü ga Cori ya Tupanaarü ãmarearü guruxü̃ ga nawa naxü̃nagü ínaguxü̃.
