1 Samuel 8:1-22
8 Rü yexguma marü naya̱xgu ga Chamué, rü nanegüxü̃ naxuneta nax Iraéanecüã̱xgümaxã inacua̱xgüxü̃ca̱x.
2 Rü guma nüxíraü̃cü ga nane rü Yoégu naxãéga. Rü guma norü taxre ga nane rü Abíagu naxãéga. Rü ĩane ga Bechébawa nixĩ ga ãẽ̱xgacü yixĩgüxü̃.
3 Natürü tama nanatürüxü̃ nixĩgü, yerü norü yemaxü̃güguama narüxĩnüe. Rü yexguma ta̱xacürü guxchaxü̃ namexẽẽgügu rü nanayauxtanügü, rü tama nawüxigu i norü ngü̃xẽxẽ i guxãmaxã.
4 Rü yemaca̱x ga Iraéanecüã̱xgüarü ãẽ̱xgacügü rü nügümaxã nangutaque̱xegü, rü ĩane ga Ramáwa naxĩ nax Chamuéxü̃ íyadaugüxü̃ca̱x.
5 Rü Chamuéxü̃ ñanagürügü: —Cuma rü marü cuya, rü cunegü rü tama curüxü̃ mea tomaxã inacua̱x. Rü ngẽmaca̱x ¡nüxü̃ naxuneta i wüxi i torü ãẽ̱xgacü i réi nax tomaxã inacuáxü̃ca̱x ngẽxgumarüxü̃ i ngẽma togü i nachixü̃anegü i nüxü̃́ nangẽxmaxü̃ i norü ãẽ̱xgacü i réi! —ñanagürügü.
6 Rü yexguma ga nüma ga Chamué rü tama namaxã nataãxẽ yerü yema duü̃xü̃gü rü nanaxwa̱xegü nax nüxü̃́ nangẽxmaxü̃ ya wüxi ya ãẽ̱xgacü ya réi nax namaxã inacuáxü̃ca̱x. Rü yemaca̱x norü yumüxẽwa Cori ya Tupanamaxã nüxü̃ nixu.
7 Natürü nüma ga Cori ya Tupana rü Chamuéxü̃ nangãxü̃ga rü ñanagürü: —¡Ẽcü, naxü i ngẽma cuxna naxca̱x nacagüxü̃! Erü tama cuxü̃ nixĩ i naxõõ̱xgüxü̃, rü choxü̃waxi nixĩ, erü tama nanaxwa̱xegü i norü ãẽ̱xgacü nax chixĩxü̃.
8 Rü yexguma Equítuanewa íchanguxü̃xẽẽ̱xgucürüwa chomaxã naxügüxü̃ rü ngẽmatama nixĩ i ñu̱xma cumaxã naxügüxü̃. Yerü choxna nixĩgachi nax tupananetagüxü̃mare yacua̱xüü̃güxü̃ca̱x
9 ¡Ẽcü naxǘ i ngẽma naxca̱x ínacagüxü̃! ¡Natürü mea namaxã nüxü̃ ixu i ngẽma duü̃xü̃gü i ta̱xacü tá nixĩ i natanüwa naxca̱x ínacaxü̃ i ngẽma ãẽ̱xgacü i réi i namaxã icuáxü̃! —ñanagürü ga Tupana.
10 Rü nüma ga Chamué rü yema duü̃xü̃gü ga norü réica̱x ícagüxü̃maxã nüxü̃ nixu ga yema ore ga Cori ya Tupana nüxü̃ ixuxü̃.
11 Rü ñanagürü nüxü̃: —Ngẽxguma penaxwa̱xegu nax pexü̃́ nangẽxmaxü̃ i perü réi, rü ñaãcü tá nixĩ i pemaxã inacuáxü̃ i ngẽma ãẽ̱xgacü. Rü tümaca̱x tá naca ya penegü nax churaragü tixĩgüxü̃ca̱x, rü toguegü rü churaragü i naweü̃ ya dairuü̃maxã icua̱xgüxü̃ nax tixĩgüxü̃ca̱x, rü toguxegü rü cowarugü i dairuü̃maxã icua̱xgüxü̃ nax tixĩgüxü̃ca̱x, rü toguxegü rü churaragü i noxrütama dauruü̃gü nax tixĩgüxü̃ca̱x.
12 Rü ngẽxgumarüxü̃ tá ta tüxü̃ naxuneta ya toguxegü nax 1,000 i churaragüarü ãẽ̱xgacü nax tixĩgüxü̃ca̱x, rü toguxegü nax 50 i churaragüarü ãẽ̱xgacü nax tixĩgüxü̃ca̱x. Rü ñuxre i pemax, rü tá norü naanearü aimüanewa pexü̃ napuracüe, rü toguxe rü tá norü nanetüarü buxgüwa pexü̃ napuracüexẽxẽ, rü toguxe rü tá naxnegüarü üwa pexü̃ napuracüexẽxẽ, rü toguxe rü tá naweü̃ ya dairuü̃arü üwa pexü̃ napuracüexẽxẽ.
13 Rü tá tüxü̃ nade ya pexacügü nax norü pumaraarü üruxü̃ tixĩgüxü̃ca̱x rü norü üwemüruxü̃ tixĩgüxü̃ca̱x, rü norü paũarü üruxü̃ tixĩgüxü̃ca̱x.
14 Rü nügüxü̃́ tá nanayaxu i ngẽma naanegü i rümemaegüxü̃, rü ngẽma rümemaegüxü̃ i perü úbanecügü̃ rü oribunecügü, rü ñu̱xũchi ngẽma norü ngü̃xẽẽruü̃güna tá nanana.
15 Rü ngẽma 10 wetaxü̃ i perü triguwa rü perü úbawa, rü ngẽma ãẽ̱xgacü tá pexna nanayaxu i wüxiwetaxü̃, rü ñu̱xũchi ngẽma norü ngü̃xẽẽruü̃güna tá nanana.
16 Rü ngẽxgumarüxü̃ tá ta pexna nanapuxü̃ i ngẽma duü̃xü̃gü i pexü̃́ puracüexü̃ rü yíxema pexü̃taxü̃gü. Rü ngẽma rümemaexü̃ i perü woca i puracüruü̃gü, rü búrugü, rü tá pexna nanade nax nügüxü̃́ napuracüexẽẽãxü̃ca̱x.
17 Rü ngẽma 10 i perü carnérugüwa rü tá pexna nanayaxu i wüxi nax noxrüxü̃ yixĩxü̃ca̱x. Rü pema tátama nixĩ i ñu̱xũchi nüxü̃́ pepuracüexü̃.
18 Rü ngẽma ngunexü̃gu i namaxã pechixeãẽgügu i ngẽma ãẽ̱xgacü i ñu̱xmax naxca̱x ípeca̱xaxü̃, rü nüma ya Cori ya Tupana rü marü taxũtáma pexü̃ narüngü̃xẽxẽ —ñanagürü ga Chamué.
19 8:19-20 Natürü nüma ga yema duü̃xü̃gü, rü tama inarüxĩnüechaü̃ ga yema Chamué namaxã nüxü̃ ixuxü̃. Rü ñanagürügüama: —Nüetama, rü tanaxwa̱xegü i toxü̃́ nangẽxma i wüxi i ãẽ̱xgacü i réi nax ngẽma togü i nachixü̃anerüxü̃ tixĩgüxü̃ca̱x. Rü nüma tá nixĩ i tórü ãẽ̱xgacü yixĩxü̃, rü tá tomaxã inacuáxü̃ ega ngẽxguma togümaxã togü tadaixgux —ñanagürügüama.
20 Nüü̃ nadau 8:19
21 Rü yexguma yema duü̃xü̃gügaxü̃ naxĩnüguwena ga Chamué, rü Cori ya Tupanamaxã nüxü̃ nixu ga yema duü̃xü̃güga.
22 Rü nüma ga Cori ya Tupana rü Chamuéxü̃ nangaxü̃ rü ñanagürü: —¡Naxü i ngẽma naxca̱x ínacagüxü̃ rü nüxü̃ naxuneta i wüxi i norü ãẽ̱xgacü i réi! —ñanagürü. Rü yexguma nüma ga Chamué rü yema Iraéanecüã̱xgüxü̃ namu nax norü ĩanegüca̱x nawoeguxü̃.
