1 Samuel 9:1-27
9 Rü Bẽyamíü̃tanüxü̃wa nayexma ga wüxi ga yatü ga Chíxgu ãégacü. Rü nüma rü Abié nane nixĩ rü Cherótaxa nixĩ. Rü guxema toguxe ga norü o̱xi rü Becoráx ga Afía nane tixĩ. Rü nüma ga Chíx rü wüxi ga yatü ga guxãma nüxü̃ ngechaü̃cü nixĩ.
2 Rü nüma rü nüxü̃́ nayexma ga wüxi ga nane ga ngextü̱xücü ga guxü̃wama mexẽchicü ga Chaúgu ãégacü. Rü guxü̃ma ga yatüxü̃ ga Iraéanecüã̱xgüarü yexera namexẽchi, rü norü máchanewa rü taxúema nüxü̃ tangupetü ga naãtüwa.
3 Rü wüxi ga ngunexü̃gu rü Chíxarü búrugü rü inarütauxe. Rü yemaca̱x nane ga Chaúxü̃ ñanagürü: —¡Cugü namexẽxẽ rü naxca̱x yadau i ngẽma búrugü! ¡Rü wüxi i tórü duü̃xü̃maxã íixãmücü! —ñanagürü.
4 Rü nüma ga Chaú rü inaxũãchi. Rü Efraíü̃arü naanearü máxpü̱xanexü̃wa nixüpetü, rü ñu̱xũchi Charicháanewa rü ta naxüpetü, natürü tama nüxü̃ inayangau ga norü búrugü. Rü yexgumarüxü̃ ta Chaaríü̃anewa rü Bẽyamíü̃anewa naxüpetü, natürü yéma rü ta taxuxü̃ma inayangau.
5 Rü yexguma Chúxarü naanewa nanguxgu, rü nüma ga Chaú rü yema norü duü̃xü̃ ga íyaxümücüxü̃xü̃ ñanagürü: —¡Ngĩxã tawoegu! Rü Ñuxcü ya chorü papa rü ngẽma búrugüca̱x nax taxoegaãẽxü̃arü yexera taxca̱x taxoegaãxẽ —ñanagürü.
6 Rü nüma ga yema norü duü̃xü̃ rü nanangãxü̃ rü ñanagürü: —Daa ĩanewa nangẽxma i wüxi i Tupanaarü orearü uruxü̃ i guxãma nüxü̃ ngechaü̃güxü̃, erü guxü̃ma i nüxü̃ yaxuxü̃ rü ngẽmaãcü ningu. ¡Rü ngĩxã naxü̃tawa taxĩ! Rü nüma tá tamaxã nüxü̃ nixu nax ngextá nangẽxmagüxü̃ i ngẽma búrugü —ñanagürü.
7 Natürü nüma ga Chaú rü nanangãxü̃ rü ñanagürü: —¡Ngĩxã! ¿Natürü ta̱xacü tá naxca̱x ngéma tange i ngẽma yatü? Erü tórü onaxchiü̃wa rü nataxuma i paũ íyaxüxü̃. Rü taxuxü̃ma tüxü̃́ nangẽxma nax nüxna naxãxü̃ca̱x ya yimá orearü uruxü̃ —ñanagürü.
8 Natürü ga gumá norü duü̃ rü nanangãxü̃ rü ñanagürü: —Choxü̃́ tangexma ya wüxi ya íxratachinüxe ya diẽru, rü yixema tá nüxna tüxü̃ taxã ya yimá Tupanaarü orearü uruxü̃ nax tamaxã nüxü̃ yaxuxü̃ca̱x i ngẽma nama —ñanagürü.
9 (Nũxcüma yexguma wüxi ga Iraétanüxü̃ Tupanana caxchaü̃gu rü ñanagürü: “¡Ngĩxã nüxna tayaca ya yimá Ẽxü̃guxü̃xü̃ Cuácü!” ñanagürü. Rü nũxcüma rü “Ẽxü̃guxü̃xü̃ Cua̱xcümaxã nanaxugü”, natürü i ñu̱xma rü “Orearü Uruxü̃maxã nanaxugü”.)
10 Rü nüma ga Chaú rü ñanagürü: —Marü name. ¡Ngĩxã rü ngéma taxĩ! —ñanagürü. Rü yexguma inaxĩãchi rü guma ĩane ga Tupanaarü orearü uruxü̃ nawa yexmanewa naxĩ.
11 Rü yexguma marü yangaicagügu rü yexma namagu ngĩxü̃ nangaugü ga ñuxre ga pacü ga puchuwa dexáwa ĩcü. Rü yexguma ngĩxna nacagü rü ñanagürügü: —¿Nua inangexmaxü̃ ya yimá ẽxü̃guxü̃xü̃ cuácü? —ñanagürügü.
12 Rü yexguma ga ngĩmagü rü inangãxü̃gü rü ngĩgürügügü: —Ngẽmáacüx. ¡Rü pepaxaãẽgü nax ngéma pexĩxü̃! Rü ñomatama i ngunexü̃ daa ĩanewa nangu erü ñu̱xmax rü ngutaque̱xechicawa tá Tupanaca̱x nayagu i ngẽma ãmare.
13 Rü ngẽxguma nawa pengugügu ya yima ĩane ¡rü paxa naxca̱x peda̱u̱x naxü̃pa nax ngutaque̱xechicawa naxũxü̃ naxca̱x i ngẽma õna! Rü ngẽma duü̃xü̃gü rü taxũtáma nachibüe ñu̱xmata nüma ngéma nanguxgu. Erü nüma tá namaxã nayumüxẽ i ngẽma Tupanaarü ãmare i yagugüxü̃. Rü ngẽmawena tá nixĩ i nachibüexü̃ i ngẽma duü̃xü̃gü i nüxna naxuxü̃. ¡Rü ngẽmaca̱x paxãma ngéma pexĩ i ñu̱xmax! Rü tá ngẽxma nüxü̃ ipeyangau —ngĩgürügügü.
14 Rü yexguma ga Chaú rü yema namücümaxã guma ĩaneca̱x nixĩama. Rü yexguma guma ĩanewa nangugügu, rü nüma ga Chamué rü yéma ne naxũ ga ngutaque̱xechicawa nax naxũxü̃ca̱x.
15 9:15-16 Rü ĩneacü, naxü̃pa nax Chaú yéma nguxü̃, rü Chamuémaxã nidexa ga Tupana rü ñanagürü: —Moxü̃ i ñaa tátama i oragu rü cuxca̱x tá nua chanamu i wüxi i yatü i Bẽyamíü̃arü naanewa ne ũxü̃. Rü cuma rü tá chíxü̃maxã cunabaeru i ngẽma yatü nax chorü duü̃xü̃gü i Iraécüã̱xgümaxã inacuáxü̃ca̱x. Rü nüma tá nixĩ i Firitéugüme̱xẽwa ínanguxü̃xẽẽãxü̃. Erü choxü̃́ nangechaü̃tümüxü̃gü i chorü duü̃xü̃gü i ngẽxguma nüxü̃ chaxĩnügu i norü yumüxẽ i auxeãcüma chomaxã nüxü̃ yaxugüxü̃ —ñanagürü ga Tupana.
16 Nüü̃ nadau 9:15
17 Rü yexguma Chaúxü̃ nada̱u̱xgu ga Chamué, rü nüma ga Cori ya Tupana rü ñanagürü nüxü̃: —Ngẽma nixĩ i ngẽma yatü i cumaxã nüxü̃ chixuxü̃, rü nüma tá nixĩ i chorü duü̃xü̃gümaxã inacuáxü̃ —ñanagürü.
18 Rü yexguma guma ĩanearü ücuchicawa nayexmagügu, rü nüma ga Chaú rü Chamuéca̱x nixũ rü ñanagürü: —¡Tomaxã nüxü̃ ixu rü ngextá nixĩ i napexü̃ ya yimá Tupanaarü orearü uruxü̃! —ñanagürü.
19 Rü nüma ga Chamué rü nanangãxü̃ rü ñanagürü: —Choma nixĩ i orearü uruxü̃ chixĩxü̃. ¡Rü ngĩxã chowe rüxũ i ngutaque̱xechicawa, rü chauxü̃tawa yachibü! Rü moxü̃ pa̱xmama tá cumaxã nüxü̃ chixu i guxü̃ma i ngẽma choxna naxca̱x cuca̱a̱xü̃, rü ñu̱xũchi tá cuxü̃ íchimu.
20 ¡Rü taxṹ i naxca̱x cuxoegaãẽxü̃ i ngẽma búrugü i tomaepü̱x i ngunexü̃ marü iyarütauxexü̃, erü marü nüxü̃ inayangaugü! Rü naétü rü guxü̃ma i Iraéanearü mexü̃gü rü cuxme̱xwa rü cutanüxü̃me̱xẽwa tá nangẽxma —ñanagürü.
21 Rü nüma ga Chaú rü nanangãxü̃ rü ñanagürü: —Natürü i choma rü Bẽyamíü̃tanüxü̃ chixĩ, rü ngẽma totücumü rü guxü̃ma i togü i Iraéanecüã̱xgütücumüxü̃ narüxíxramae. Rü ñu̱xũchi ngẽma nügütanüxü̃chigü i Bẽyamíü̃tücumüwa ügüxü̃, rü chautanüxü̃ nixĩ i guxü̃arü yexera rüxíxramaexü̃. Rü ngẽmaca̱x ¿tü̱xcüü̃ chomaxã nüxü̃ quixu nax guxü̃ma i Iraéanearü mexü̃gü rü cho̱xme̱xwa tá nangẽxmaxü̃? —ñanagürü.
22 Rü yemawena ga Chamué rü chibüchicawa nanagagü ga Chaú rü norü duü̃xü̃. Rü yema rümemaexü̃ ga nachicawa nanatogüxẽxẽ natanüwa ga yema 30 ga duü̃xü̃gü ga nüxna naxuxü̃.
23 Rü nüma ga Chamué rü yema üwemüxü̃xü̃ namu nax Chaúna naxããxü̃ca̱x ga yema rümemaexü̃ ga namachi ga woetama naxca̱x ínaxüxüchixü̃.
24 Rü yexgumatama ga yema üwemüruxü̃ rü wüxi ga naperema ga mexü̃ne nayaxu rü Chaúpe̱xegu nayaxǘ. Rü nüma ga Chamué rü Chaúxü̃ ñanagürü: —Ngẽma nixĩ i woetama cuxü̃́ íchaxǘxüchixü̃. ¡Rü nayaxu rü nangõ̱x! Erü woetama cuxü̃́ íchanaxǘxüchi naxü̃pa ga ñaa duü̃xü̃güna nax chaxuxü̃ —ñanagürü. Rü nüma ga Chaú rü Chamuémaxã nachibü ga yema ngunexü̃gu.
25 Rü yexguma marü yema nachicawa yanachoxü̃gu ga ĩanewa nax naxĩxü̃, rü ĩpataarü daxũwa Chaúca̱x nanamexẽẽgü ga wüxi ga pechica.
26 Rü nüma ga Chaú rü yexma nape. Rü moxü̃ãcü nüma ga Chamué rü Chaúxü̃ naca ga ĩpataarü dauxnawa, rü ñanagürü nüxü̃: —¡Írüda rü marü name nax íquixũxü̃! —ñanagürü. Rü nüma ga Chaú rü ínarüda. Rü yemawena rü ínachoxü̃ ga Chaú rü Chamué, rü namawa naxĩ.
27 Rü yexguma marü guma ĩanewa ínachoxü̃gu, rü nüma ga Chamué rü Chaúxü̃ ñanagürü: —¡Ẽcü cugüpe̱xe yamu i ngẽma curü duü̃xü̃, rü cuma rü paxaãchi nuxã rüxã̱ũ̱x! Erü cumaxã nüxü̃ chixuxchaü̃ i ngẽma ore ya Tupana chomaxã nüxü̃ ixuxü̃ —ñanagürü.
